Waswe, Iu Markem Taem for Studyim Bible?
LAST year Governing Body talem samfala kongregeson meeting bae change mekem famili garem samfala taem moa for studyim Bible and storyim datwan tugeta. Olketa hasband, trae hard for duim famili study evritaem witim waef and olketa pikinini bilong iu and studyim samting wea fitim famili. Olketa wea marit wea no garem pikinini savve iusim datfala taem for studyim Bible tugeta. Olketa wea no marit and wea no garem staka waka long famili savve iusim taem hia tu for study seleva.
Staka talem thankiu for disfala arrangement for markem wanfala evening for duim Famili Worship. Kevin, wanfala elder, hem sei: “Mifala long kongregeson barava thankiu for disfala arrangement. Mifala elder storyim hao mifala iusim datfala evening for duim wanem Governing Body askem iumi for duim, hem nao for study witim famili bilong mifala.”
Jodi, wea hasband bilong hem elder, hem sei: “Mifala garem thrifala dota. Wanfala hem 15 year, narawan hem 11 year, and lastborn hem 2 year. No longtaem go nomoa, mifala muv long saen-languis kongregeson. Mifala mas iusim staka taem for prepare gud for olketa meeting. Taem disfala change kamap, mifala garem nara evening nao for mifala duim Famili Worship nomoa!”
John and JoAnn, wanfala hasband and waef wea regular pioneer, sei: “Samfala taem mifala no duim famili study bikos mifala busy tumas for duim olketa nara samting long kongregeson. Disfala niu arrangement hem olsem wanfala present from Jehovah. Hem bae barava strongim mifala sapos mifala iusim datfala taem for duim wanem Governing Body laekem iumi for duim.”
Tony, wanfala brata wea no marit wea samting olsem 25 year, hem markem Tuesday evening nao for hem study seleva. Hem markem olketa nara taem long week for prepare for olketa kongregeson meeting. Bat Tony hem sei: “Mi barava luk forward long olketa Tuesday evening.” Why nao olsem? “Hem nao spesol evening for mi and Jehovah.” Tony hem sei: “Mi study seleva for samting olsem tufala hour. Mi study abaotem olketa samting wea helpem mi for fren gud go moa witim Jehovah. From mi garem samfala taem moa for duim study seleva, mi savve ting raonem olketa scripture wea mi readim.” Wanem gud samting nao hem kasem? “Olketa toktok bilong Jehovah barava kasem heart bilong mi winim enitaem bifor.” Wanem nao wanfala samting wea hem duim? Hem sei: “Long Insight buk, mi read abaotem wei wea David and Jonathan fren gud tugeta. Mi lanem staka samting abaotem wei wea Jonathan no tingim hemseleva nomoa. Wei bilong hem helpem mi for luksavve wanem nao mi mas duim for kamap trufala fren. Mi barava laek for lanem olketa kaen samting olsem long olketa Tuesday evening!”
Iumi savve evriwan wea worshipim Jehovah bae kasem staka gud samting taem olketa iusim datfala evening wea iumi garem buk study bifor for studyim Bible and duim Famili Worship.