“Go Ahed for Garem Planti Frut”
“Go ahed for garem planti frut and pruvim iufala olketa disaepol bilong mi.”—JOHN 15:8.
1. (a) Wanem mark bilong wei for disaepol nao Jesus talem long olketa aposol bilong hem? (b) Wanem kwestin nao iumi shud askem iumiseleva?
HEM evening bifor hem dae. Jesus iusim planti taem for encouragem olketa aposol bilong hem taem hem story witim olketa. Maet hem midol naet finis, bat Jesus go ahed for story bikos long love wea hem garem for olketa klos fren bilong hem. Then, midol long story bilong hem, hem talem wanfala mark wea olketa needim for go ahed olsem olketa disaepol bilong hem. Hem sei: “Father bilong mi hem kasem glory from diswan, hem nao wei wea iufala go ahed for garem planti frut and pruvim iufala olketa disaepol bilong mi.” (John 15:8) Waswe, iumi distaem kasem disfala mark for olsem disaepol? Wanem nao hem minim for “garem planti frut”? For faendaot, iumi go bak long story bilong datfala evening.
2. Wanem tokpiksa abaotem frut nao Jesus storyim long evening bifor dae bilong hem?
2 Datfala advaes for garem frut hem part long tokpiksa wea Jesus talem long olketa aposol bilong hem. Hem sei: “Mi nao trufala grape tree, and Father bilong mi nao man wea mekem grow. Evri branch bilong mi wea no garem frut hem bae katem aot, and evriwan wea garem frut hem bae klinim, mekem hem garem moa frut. Iufala klin finis bikos long toktok wea mi talem long iufala. Garem wan mind witim mi, and mi wan mind witim iufala. Olsem branch hem no savve garem frut seleva sapos hem no stap long grape tree, long sem wei iufala tu olsem, sapos iufala no garem wan mind witim mi. Mi nao grape tree, iufala nao olketa branch. . . . Father bilong mi hem kasem glory from diswan, hem nao wei wea iufala go ahed for garem planti frut and pruvim iufala olketa disaepol bilong mi. Olsem Father hem lovem mi and mi lovem iufala, go ahed for stap insaed long love bilong mi. Sapos iufala obeyim olketa komandment bilong mi, iufala bae stap insaed long love bilong mi.”—John 15:1-10.
3. Wanem nao olketa follower bilong Jesus mas duim for garem frut?
3 Long disfala tokpiksa, Jehovah nao Man wea Mekem Grow, Jesus nao grape tree, and olketa aposol wea Jesus story witim nao olketa branch. Sapos olketa aposol traem best for “wan mind” witim Jesus, olketa bae garem frut. Then Jesus explainim hao olketa aposol savve win for keepim disfala important wei for wan mind: “Sapos iufala obeyim olketa komandment bilong mi, iufala bae stap insaed long love bilong mi.” Bihaen, aposol John raetem semkaen toktok for olketa Christian: “Man wea obeyim olketa komandment bilong [Christ] stap witim hem.”a (1 John 2:24; 3:24) So, long wei for keepim olketa komandment bilong Christ, olketa follower bilong hem garem wan mind witim hem, and datfala wan mind mekem olketa fit for garem frut. Wanem kaen frut nao iumi need for garem?
Chance for Grow
4. Wanem nao iumi savve lanem from wei wea Jehovah “katem aot” evri branch wea no garem frut?
4 Long tokpiksa abaotem datfala grape tree, Jehovah “katem aot” wanfala branch taem hem no garem frut. Wanem nao diswan minim? Hem minim hao evri disaepol mas garem frut and olketa fit for garem frut, nomata wanem kaen living olketa garem. Tru nao, hem bae no fitim olketa loving wei bilong Jehovah for “katem aot,” or aotem, wanfala disaepol bilong Christ sapos hem fail for duim samting wea hem kanduit duim.—Psalm 103:14; Colossians 3:23; 1 John 5:3.
5. (a) Hao nao tokpiksa bilong Jesus showaot iumi savve muv ahed long wei for garem frut? (b) Wanem nao tufala frut wea iumi bae story raonem?
5 Tokpiksa bilong Jesus abaotem grape tree showimaot tu hao, followim living bilong iumi, iumi mas luk aotem olketa chance for grow long waka bilong iumi olsem wanfala disaepol. Lukim hao Jesus storyim diswan: “Evri branch bilong mi wea no garem frut hem bae katem aot, and evriwan wea garem frut hem bae klinim, mekem hem garem moa frut.” (John 15:2) Long end bilong tokpiksa bilong hem, Jesus encouragem olketa follower bilong hem for garem “planti frut.” (Verse 8) Wanem nao diswan minim? From iumi olketa disaepol, iumi shud no isisi. (Revelation 3:14, 15, 19) Bat, iumi shud luk aotem olketa wei for muv ahed for garem moa frut. Wanem kaen frut nao iumi shud trae hard for garem planti moa long hem? Tufala kaen frut hia nao (1) “frut bilong spirit” and (2) Kingdom frut.—Galatians 5:22, 23; Matthew 24:14.
Frut Bilong Olketa Christian Fasin
6. Hao nao Jesus Christ mekhae long gudfala samting bilong firstfala frut bilong spirit?
6 First “frut bilong spirit” hem love. Holy spirit bilong God nao mekem grow love insaed long olketa Christian, from olketa obeyim komand wea Jesus givim bifor hem storyim tokpiksa bilong grape tree wea garem frut. Hem talem olketa aposol bilong hem: “Mi givim iufala wanfala niu komandment, for iufala mas lovem each other.” (John 13:34) Tru nao, long full story bilong hem long datfala last naet long laef bilong hem long earth, Jesus planti taem remindim olketa aposol abaotem datfala need for showimaot love.—John 14:15, 21, 23, 24; 15:12, 13, 17.
7. Hao nao aposol Peter showimaot hao wei for garem frut hem join witim wei for showimaot olketa fasin olsem Christ?
7 Peter, wea stap there long datfala naet luksavve love wea Christ garem and olketa fasin wea join witim datwan mas showaot klia midolwan olketa tru disaepol bilong Christ. Planti year bihaen, Peter encouragem olketa Christian for mekem grow olketa fasin olsem fasin for kontrolem seleva, love for olketa brata, and love. Hem sei wei for duim olsem stopem iumi “from wei for no duim waka or no garem frut.” (2 Peter 1:5-8) Nomata wanem living iumi garem, iumi fit for showimaot olketa frut bilong spirit. So, iumi mas traem best for showimaot love, kaenfala fasin, kwaet fasin, and olketa nara fasin olsem Christ long wei wea moa big, bikos “no eni law stap wea againstim evri samting hia.” (Galatians 5:23) Tru nao, iumi mas garem “moa frut.”
Garem Kingdom Frut
8. (a) Hao nao frut bilong spirit hem join witim Kingdom frut? (b) Wanem kwestin nao fitim for iumi ting raonem?
8 Olketa frut wea garem naes kala and teist gud mekem plant luk naes tumas. Bat, gud samting bilong olketa frut olsem hem winim wei for luk naes nomoa. Olketa frut important tu for mekem datfala plant kamap staka thru long olketa seed. Long sem wei, frut bilong spirit hem duim moa samting winim wei for mekem Christian fasin bilong iumi luk naes. Olketa fasin olsem love and faith muvim iumi tu for talemaot Kingdom message insaed Word bilong God wea olsem seed. Lukim hao aposol Paul strongim disfala important wei wea tufala samting hia join tugeta. Hem sei: “Iumi tu showimaot faith [wanfala frut bilong spirit] and dastawe iumi toktok.” (2 Corinthians 4:13) Paul explainim diswan moa taem hem sei iumi “givim wanfala sakrifaes bilong praise long God, hem nao, frut bilong mouth”—mek-tu frut wea iumi need for showimaot. (Hebrews 13:15) Waswe, iumi savve mekem chance kamap long living bilong iumi for garem “planti frut” olsem olketa wea talemaot Kingdom bilong God?
9. Waswe, wei for garem frut hem minim for mek disaepol? Explainim diswan.
9 For ansarem long stret wei, iumi mas firstaem savve wanem nao Kingdom frut. Waswe, hem stret for sei wei for garem frut hem minim for mek disaepol? (Matthew 28:19) Waswe, datfala frut wea iumi garem hem minim olketa man wea iumi helpem for kamap olketa worshiper bilong Jehovah wea baptaes nomoa? Nomoa. Sapos olsem, diswan bae barava mekem evri Witness wea faithful for talemaot Kingdom message for planti year insaed olketa hardfala territory wea pipol no willing for lisin for feel wikdaon. Tru tumas, sapos Kingdom frut wea iumi garem hem minim olketa niu disaepol nomoa, olketa Witness hia wea waka hard bae olsem olketa branch insaed tokpiksa bilong Jesus wea no garem frut. Bat, iumi savve datwan hem no tru. Sapos olsem, wanem nao main Kingdom frut long ministry bilong iumi?
Garem Frut Long Wei for Plantim Kingdom Seed
10. Hao nao tokpiksa bilong Jesus abaotem man wea plantim seed and olketa difren kaen graon showim wanem nao Kingdom frut and wanem nao no Kingdom frut?
10 Tokpiksa bilong Jesus abaotem man wea plant and olketa difren kaen graon givim ansa—wanfala ansa wea encouragem olketa wea witness long olketa hardfala territory. Jesus sei datfala seed nao hem Kingdom message wea stap insaed long Word bilong God, and datfala graon hem piksarem tokpiksa heart bilong man. Samfala seed “foldaon long gudfala graon, and, bihaen hem start for grow, hem garem frut.” (Luke 8:8) Wanem frut? Taem wanfala wheat hem grow and kamap mature, hem garem frut wea no olketa smol wheat, bat olketa niu seed. Long sem wei tu, wei wea wanfala Christian garem frut, no minim olketa niu disaepol nomoa, bat olketa niu Kingdom seed.
11. Wanem nao Kingdom frut?
11 So, long hia datfala frut hem no olketa niu disaepol or olketa gudfala Christian fasin. From seed wea man plantim hem teaching abaotem Kingdom, frut hem minim planti moa seed olsem. Wei for garem frut long diswan hem minim wei for talem toktok abaotem datfala Kingdom. (Matthew 24:14) Waswe, wei for garem Kingdom frut olsem—for talemaot gud nius bilong Kingdom—hem samting wea iumi fit for duim nomata wanem living iumi garem? Yes! Jesus explainim diswan long datfala sem tokpiksa.
Givim Best Bilong Iumi for Mekem God Kasem Glory
12. Waswe, evri Christian fit for garem Kingdom frut? Explainim diswan.
12 Jesus sei: “Datwan wea olketa plantim long gudfala graon, . . . mekem grow, diswan handred, datwan sixti, and narawan thirti.” (Matthew 13:23) Seed wea man plantim long field maet garem frut followim each wan. Olsem tu, samting wea iumi duim for talemaot gud nius maet followim living bilong iumi, and Jesus showimaot hao hem luksavve long diswan. Samfala maet garem moa chance; olketa narawan maet garem health wea moabeta and moa strong. So, samting wea iumi savve duim maet hem big or maet hem smol winim wanem olketa narawan duim, bat sapos datwan hem best bilong iumi, Jehovah hapi long hem. (Galatians 6:4) Nomata sapos wei for olo or sik hem katem daon share bilong iumi insaed preaching waka, Jehovah, Father bilong iumi wea kea hem ting long iumi olsem olketa wea “go ahed for garem planti frut.” Why nao olsem? Bikos iumi givim hem ‘evri samting wea iumi garem’—wei for servem hem witim full-soul.b—Mark 12:43, 44; Luke 10:27.
13. (a) Wanem nao main reason for iumi “go ahed” for garem Kingdom frut? (b) Wanem nao bae helpem iumi for go ahed garem frut long olketa territory wea pipol no interest?— (Lukim box long page 21.)
13 Nomata haomas Kingdom frut iumi savve garem, wei for tingim reason why iumi duim bae muvim iumi for “go ahed for garem frut.” (John 15:16) Jesus talem main reason: “Father bilong mi hem kasem glory from diswan, hem nao wei wea iufala go ahed for garem planti frut.” (John 15:8) Tru nao, preaching waka bilong iumi mekem nem bilong Jehovah holy front long evri man. (Psalm 109:30) Honor, wanfala faithful Witness wea age bilong hem samting olsem 75 year sei olsem: “Nomata long olketa territory wea pipol no interest, hem wanfala privilege for stand for Most Hae.” Taem olketa askem Claudio, wea hem wanfala strong Witness start long 1974, why nao hem go ahed for preach nomata tu-thri long territory bilong hem nomoa lisin, hem talem toktok long John 4:34 wea Jesus sei: “Kaikai bilong mi hem for duim will bilong datwan wea sendem mi kam, and for finisim waka bilong hem.” Claudio sei moa: “Olsem Jesus, mi laek for no startim nomoa bat finisim waka bilong mi olsem man for talemaot Kingdom.” (John 17:4) Olketa Witness bilong Jehovah evriwea long world garem sem tingting tu.—Lukim box “Hao for ‘Garem Frut Witim Fasin for Go Ahed Strong,’ ” long page 21.
For Preach and for Teach
14. (a) Waka bilong John Baptaesa and Jesus garem wanem purpose wea garem tufala part? (b) Waka bilong olketa Christian distaem hem wanem kaen waka?
14 First man for talemaot Kingdom wea olketa Gospel storyim hem John Baptaesa. (Matthew 3:1, 2; Luke 3:18) Main purpose bilong hem hem for “givim witness,” and hem duim olsem witim bigfala faith and witim hope hao “evri difren kaen pipol savve biliv.” (John 1:6, 7) Tru nao, samfala wea John preach long olketa kamap disaepol bilong Christ. (John 1:35-37) So, John hem man for preach and man for mek disaepol tu. Jesus tu hem man for preach and teach. (Matthew 4:23; 11:1) Dastawe iumi no sapraes long wei wea Jesus givim komand long olketa follower bilong hem for no preachim Kingdom message nomoa bat tu for helpem pipol wea acceptim for kamap olketa disaepol bilong hem. (Matthew 28:19, 20) So waka bilong iumi distaem hem for preach and teach.
15. Hao nao wei wea pipol ting long preaching waka distaem hem semsem witim wei wea pipol ting long preaching waka long first century C.E.?
15 Taem olketa long first century C.E. herem Paul preach and teach, “samfala start for bilivim samting wea hem talem; olketa narawan no biliv.” (Acts 28:24) Distaem, hem semsem tu. Sorre tumas, planti Kingdom seed foldaon long graon wea nogud. Nomata olsem, samfala seed foldaon long gudfala graon, olketa grow, and garem frut, olsem Jesus profesi abaotem. Tru nao, evriwea long world, winim 5,000 pipol kamap olketa tru disaepol bilong Christ evri week bilong each year! Olketa niu disaepol hia ‘bilivim samting wea olketa herem,’ nomata planti narawan no biliv. Wanem nao help for mekem heart bilong olketa willing for lisin long message bilong Kingdom? Planti taem, samting wea barava helpem pipol hem wei wea olketa Witness showim interest long pipol wanwan long wei wea olketa watarem olketa niu seed hia long tokpiksa wei. (1 Corinthians 3:6) Tingim tufala example hia.
Interest Long Man Wanwan Hem Barava Help
16, 17. Why nao hem important for showimaot interest long man wanwan wea iumi meetim long ministry?
16 Karolien, wanfala young Witness long Belgium, go long haos bilong wanfala olo woman wea nating interest long message bilong Kingdom. From woman hia bandagem hand bilong hem, Karolien and partner bilong hem ask for helpem hem, bat datfala woman no acceptim. Tufala day bihaen, tufala sem Witness hia go bak long haos bilong datfala woman and ask hao nao hem feel. Karolien sei: “Datwan nao barava help. Hem sapraes tumas for lukim hao mifala really interest long hem. Hem invaetem mifala insaed haos bilong hem, and mifala startim wanfala Bible study witim hem.”
17 Sandi, wanfala Witness long United States, showimaot interest tu long each wan wea hem preach long hem. Hem lukluk long niuspepa bilong datfala area for lukim hu nao just bornem pikinini and then hem bae tekem go Bible Story Buk Bilong Mic long datfala dadi and mami. Bikos planti taem mami hem stap long haos and hem hapi tumas for showim baby bilong hem long olketa wea visit kam, hem no hard for startim story. Sandi sei: “Mi story witim dadi and mami abaotem wei wea hem important tumas for klos long niu baby hia thru long wei for read. Bihaen, mi story abaotem olketa challenge for garem pikinini long distaem.” No longtaem go nomoa, wanfala mami and sixfala pikinini start for servem Jehovah, from kaen wei for visit olsem. Wei for showimaot interest long man wanwan savve lead go long hapi samting insaed ministry bilong iumi tu.
18. (a) Why nao iumi evriwan fit for “garem planti frut” wea hem nao wanfala mark for iumi? (b) Wanem thrifala mark bilong wei for disaepol wea Gospel bilong John storyim nao iu disaed strong for kasem?
18 Iumi kasem bigfala encouragement taem iumi savve iumi fit for “go ahed garem planti frut” wea hem nao wanfala mark for iumi! Nomata iumi young or olo, garem gudfala or nogud health, nomata iumi preach long olketa territory wea pipol willing for lisin or nomoa, iumi evriwan savve garem planti frut. Long wanem wei? Taem iumi showimaot olketa frut bilong spirit long wei wea moa big and talemaot message bilong Kingdom long best wei wea iumi savve duim. Long semtaem, iumi trae hard for ‘keepim teaching bilong Jesus’ and for ‘garem love midolwan long iumiseleva.’ Tru nao, taem iumi kasem thrifala important mark hia bilong wei for disaepol wea stap insaed Gospel bilong John, iumi pruvim iumi “trufala disaepol bilong [Christ].”—John 8:31; 13:35.
[Olketa Footnote]
a Nomata olketa branch bilong datfala grape tree long disfala tokpiksa hem minim olketa aposol bilong Jesus and olketa nara Christian wea garem hope for stap insaed Kingdom bilong God long heven, datfala tokpiksa garem olketa truth wea savve helpem evri follower bilong Christ distaem.—John 3:16; 10:16.
b Olketa wea no savve lusim haos bikos olketa olo or sik maet fit for witness thru long leta, or sapos fitim, long telephone, or maet sharem gud nius witim pipol wea visitim olketa.
c Olketa Jehovah’s Witness nao pablisim.
Review Kwestin
• Wanem nao olketa frut wea iumi need for garem long wei wea moa big?
• Why nao iumi fit for kasem goal for “garem planti frut”?
• Wanem thrifala mark bilong wei for disaepol wea Gospel bilong John storyim nao iumi story abaotem?
[Box/Piksa long page 21]
HAO FOR “GAREM FRUT WITIM FASIN FOR GO AHED STRONG”
WANEM nao helpem iu for go ahed faithful for preachim message bilong Kingdom long territory wea pipol no willing for lisin? Long hia nao ansa bilong samfala long disfala kwestin.
“Wei for savve iumi garem full saport bilong Jesus hem muvim mi for ting long gud saed and go ahed strong, nomata wanem kaen pipol nao mi meetim long territory.”—Harry, 72 year; baptaes 1946.
“Scripture long 2 Corinthians 2:17 evritaem encouragem mi. Hem sei iumi share insaed long ministry ‘front long eye bilong God, tugeta witim Christ.’ Taem mi long ministry, mi hapi for kaban witim olketa best fren bilong mi.”—Claudio, 43 year; baptaes 1974.
“For tok stret, mi savve barava stragol long preaching waka. Nomata olsem, mi experiencem wei wea Psalm 18:29 hem barava tru: ‘Bikos long God bilong mi, mi savve klaemap wanfala wall.’”—Gerard, 79 year; baptaes 1955.
“Sapos mi savve readim nomata wanfala scripture nomoa long ministry, datwan mekem mi satisfae bikos Bible hem lukluk insaed long heart bilong samwan.”—Eleanor, 26 year; baptaes 1989.
“Mi traem olketa difren wei for startim story. Planti introduction tumas stap and hem bae hard for mi iusim evriwan long full laef bilong mi.”—Paul, 79 year; baptaes 1940.
“Mi no feel kros taem samwan tok nogud long mi. Mi trae for fren gud witim pipol, story witim olketa and lisin long tingting bilong olketa.”—Daniel, 75 year; baptaes 1946.
“Mi meetim olketa niu wan wea just baptaes wea talem mi hao preaching waka bilong mi hem helpem olketa for kamap Witness. Mi no savve bat narawan studyim Bible witim olketa and helpem olketa for muv ahed. Mi hapi for tingim hao ministry hem waka bilong wanfala team.”—Joan, 66 year; baptaes 1954.
Wanem nao helpem iu for “garem frut witim fasin for go ahed strong”?—Luke 8:15.
[Olketa Piksa long page 20]
Taem iumi showimaot frut bilong spirit and talemaot message bilong Kingdom, iumi garem planti frut
[Piksa long page 23]
Wanem nao Jesus minim taem hem sei long olketa aposol bilong hem: “Go ahed for garem planti frut”?