Enjoyim Gud Samting wea Kamaot From Hard Waka Bilong Iu
1. Wanem nao savve mekem iumi wikdaon long ministry?
1 God wakem olketa man for ‘enjoyim gud samting wea kamaot from hard waka bilong olketa.’ (Eccl. 2:24) Bat taem no eni gud samting kamaot from ministry bilong iumi, datwan savve mekem iumi no enjoyim ministry and wikdaon. Wanem nao bae helpem iumi for gohed garem gudfala tingting?
2. Why nao iumi shud garem stretfala tingting nomata staka pipol no acceptim message abaotem Kingdom?
2 Garem Stretfala Tingting: Jesus duim gud ministry bilong hem, nomata staka pipol no acceptim teaching bilong hem. (John 17:4) Long tokpiksa abaotem man for plantim seed, Jesus sei message abaotem Kingdom wea olsem seed bae no kasem heart bilong staka pipol. (Matt. 13:3-8, 18-22) Nomata olsem, taem iumi waka hard long ministry, gud samting savve kamaot from datwan.
3. Wanem nao iumi savve duim mekem iumi savve “garem frut” nomata staka pipol no interest?
3 Iumi Savve Garem Frut: Long datfala tokpiksa bilong Jesus hem sei olketa wea acceptim message and ‘barava duim samting followim datwan, hem olsem wei for olketa garem frut.’ (Matt. 13:23) Taem wanfala wheat hem grow and kamap big, hem no garem olketa smol wheat plant olsem frut bilong hem, bat hem garem olketa niu seed. For iumi garem frut hem no minim evritaem pipol bae kamap disaepol. Iumi savve garem frut long wei wea iumi storyim message abaotem Kingdom, wea hem olsem iumi plantim seed long staka ples. Iumi kasem “gud” samting from iumi savve satisfae long waka wea iumi duim, nomata pipol acceptim datfala message or nomoa. Iumi help for mekem nem bilong Jehovah for holy. (Isa. 43:10-12; Matt. 6:9) Iumi garem privilege for waka tugeta witim God. (1 Cor. 3:9) And tu, taem iumi “iusim mouth bilong iumi” for talemaot message abaotem Kingdom, datwan mekem Jehovah hapi.—Heb. 13:15, 16.
4. Wanem gud samting nao savve kamaot from ministry wea maet iumi no savve?
4 Olketa gud samting maet kamaot from ministry bilong iumi tu bat iumi no lukim. Maet samfala wea herem message bilong Jesus kamap disaepol bihaen Jesus go bak long heven. Long sem wei tu, seed wea iumi plantim maet grow long heart bilong man bihaen iumi meetim hem and iumi no savve hem kam long truth. Staka gud samting hem kamaot from ministry bilong iumi. So iumi laek for “gohed garem staka frut” long ministry and showimaot iumi disaepol bilong Jesus.—John 15:8.