Sheipim Heart Bilong Pikinini Bilong Iu!

MAN for wakem clay pot savve mekem clay nating for kamap naesfala pot. Tu-thri savveman nomoa savve wakem olketa naesfala samting from olketa samting wea no important. For planti thousand year, pipol depend long olketa man olsem for wakem olketa kap, pleit, pot, botol, and olketa samting for putim flaoa insaed.

Parents tu savve duim barava important samting for helpem community long wei for sheipim fasin and wei bilong pikinini bilong olketa. Bible markem each wan long iumi olsem clay, and God hem givim parents disfala important waka for sheipim datfala “clay,” or pikinini bilong olketa. (Job 33:6; Genesis 18:19) Olsem wei for wakem wanfala naes samting witim clay, for mekem pikinini kamap full-grown man wea mature and balance hem no isi waka. Change olsem no just happen nomoa.

Planti samting savve affectim heart bilong olketa pikinini bilong iumi. Sorre tumas, samfala long olketa samting hia savve spoelem man evribit. Winim wei for letem heart bilong pikinini leadim hem olabaot, wanfala wise dadi or mami bae trainim pikinini “fitim wei for hem followim,” from hem trustim hao “taem hem kamap olo, hem bae no lusim datwan.”—Proverbs 22:6.

Insaed disfala longfala, important taem for bringimap wanfala pikinini, wise Christian parents mas spendem taem for protectim pikinini bilong olketa from nogud samting wea savve affectim heart bilong hem. Love bilong olketa bae kasem test taem olketa patient for givim pikinini “instruction, and wei for stretem hem, wea hem nao Christian wei for bringimap wanfala pikinini.” (Ephesians 6:4, The New English Bible) Bat, waka bilong parents bae moa isi sapos olketa start early.

Start Early

Olketa man for wakem clay pot laek for iusim clay wea isi for sheipim bat wea no isi for bend bihaen olketa sheipim finis. Bihaen olketa klinim clay hia, olketa laek for iusim insaed six month. Olsem tu, best taem for parents for start sheipim heart bilong pikinini hem taem wea hem moa willing and isi for sheipim.

Olketa savveman sei taem pikinini kasem eit month, hem lane finis for here savve long saond bilong languis bilong hem, startim finis klos wei for fren witim parents bilong hem, mekem grow wei for minim samting, and start for luk long olketa samting wea stap raonem hem. Best taem for start sheipim pikinini hem taem hem baby yet. Pikinini bilong iu bae kasem gud samting sapos olsem Timothy, hem ‘savve long olketa holy raeting from taem hem baby’!—2 Timothy 3:15.a

Wei for followim parents hem samting wea olketa baby born kam witim. Winim wei for copyim nomoa olketa saond, toktok, and akson, olketa lanem love, kaenfala fasin, and fasin for kea taem olketa lukim parents bilong olketa showimaot olketa fasin hia. Sapos iumi want for trainim pikinini bilong iumi followim olketa law bilong Jehovah, olketa komandment bilong God mas stap insaed heart bilong iumi firstaem. Wei for tinghae olsem bae muvim parents for evritaem story long pikinini bilong olketa abaotem Jehovah and abaotem Word bilong hem. Bible encouragem iumi: “Story abaotem taem iu sidaon long haos bilong iu and taem iu wakabaot long road and taem iu leidaon and taem iu getap.” (Deuteronomy 6:6, 7) Francisco and Rosa explainim hao olketa duim diswan witim tufala smol pikinini bilong tufala.b

“Witim wei for story evriday, mifala trae for story witim each pikinini bilong mifala for samting olsem 15 minute evri day. Taem mifala lukim wanfala problem, mifala spendem moa taem and deal witim diswan. Olsem example, no longtaem go nomoa son bilong mifala wea hem faev year kam hom from skul and talem mifala hao hem no biliv long Jehovah. Luk olsem wanfala skul fren bilong hem mekfani long hem and talem hem hao God no stap.”

Parents hia luksavve hao pikinini need for mekem grow faith long Creator. Iumi savve buildimap faith olsem from interest wea olketa garem long creation bilong God wea olketa born kam witim. Olketa pikinini laekem tumas for tasim animal, pikim olketa flaoa, or plei long sandbis! Parents savve helpem olketa for luksavve hao creation showimaot wanfala Creator hem stap. (Psalm 100:3; 104:24, 25) Wei for tinghae and bigfala respect wea olketa garem for creation bilong Jehovah savve stap witim olketa for full laef. (Psalm 111:2, 10) Taem pikinini minim gud diswan, hem bae mekem grow feeling for laek mekem God hapi and fraet for mekem God no hapi. Diswan bae muvim hem for ‘tanawe from nogud samting.’—Proverbs 16:6.

Nomata planti smol pikinini savve interest tumas and kwiktaem for lanem samting, for obey hem no isi. (Psalm 51:5) Samfala taem olketa laek for independent or laek for kasem evri samting wea olketa seleva wantem. Parents need for strong, patient, and givim discipline for stopem olketa fasin hia for kamap big. (Ephesians 6:4) Hem nao samting wea happen long Phyllis and Paul, wea kasem gud samting for bringimap faevfala pikinini.

Phyllis hem sei: “Nomata fasin bilong each pikinini no semsem, evriwan want for followim wei bilong hemseleva. Hem hard samting, bat gogo olketa lanem mining bilong disfala toktok ‘no.’ ” Paul, hasband bilong hem, sei: “Planti taem, mifala givim reason for disison bilong mifala sapos olketa kasem age wea olketa savve minim diswan. Nomata evritaem mifala trae for kaen, mifala teachim olketa for respectim paoa wea God givim mifala.”

Nomata pikinini maet garem olketa problem taem hem smol yet, planti parents faendem hao barava bigfala challenge kam taem hem teenager, taem heart wea no mature yet kasem planti niufala test.

Kasem Heart Bilong Wanfala Teenager

Man for wakem clay pot mas duim waka bilong hem bifor datfala clay hem drae. For givim hem extra taem, hem maet addim go wata for mekem datfala clay soft and no drae. Olsem tu, parents mas waka hard for stopem heart bilong teenager bilong olketa for kamap strong. Main tul bilong olketa nao Bible, wea olketa savve iusim for ‘givim kaonsel, stretem samting, and redyim pikinini bilong olketa for duim evri gudfala waka.’—2 Timothy 3:15-17.

Bat, wanfala teenager maet no kwiktaem acceptim advaes wea mami or dadi givim olsem hem duim taem hem moa young. Olketa teenager maet start for lisin long fren bilong olketa, so wei for story witim parents bilong olketa maet gogo daon. Hem taem for garem moa patient fasin and savve, from wei wea parents and pikinini deal witim each other hem change. Teenager need for deal witim olketa change wea kamap long physical saed and feeling. Hem mas start for mekem olketa disison and putim olketa goal wea bae affectim hem long full laef. (2 Timothy 2:22) Insaed hardfala taem hia, hem mas deal witim wanfala paoa wea savve spoelem heart bilong hem—hevi from olketa wea sem age.

Hevi olsem no evritaem kam thru long wei wea man isi for luksavve. Nomoa, bat planti taem hem kam thru long samfala toktok or maet samting wea happen wea isisi mekem man wikdaon. Diswan savve attakim wik point bilong planti young wan—wei for fraet nogud olketa nara young wan rejectim olketa. From hem stragol witim shame and wantem pipol acceptim hem, wanfala young wan maet start for showimaot hem saportim “olketa samting insaed long world” wea olketa nara young wan mekhae long hem.—1 John 2:15-17; Romans 12:2.

For mekem diswan moa worse, samting wea heart wea no perfect wantem savve mekem toktok bilong olketa fren hia garem paoa. Kaen toktok olsem “Garem hapitaem” and “Duim wanem iu want for duim” maet here gud tumas. María talem experience bilong hem: “Mi lisin long olketa nara teenager wea bilivim hao olketa young wan garem right for enjoyim olketa seleva evribit, nomata wanem nao kamaot from diswan. From mi want for duim samting wea olketa skul fren bilong mi duim, mi klosap kasem bigfala trabol.” Olsem wanfala dadi or mami, iu want for helpem teenager bilong iu for winim hevi olsem, bat hao nao iu savve duim?

Thru long toktok and akson bilong iu, showimaot long hem hao iu kea. Trae hard for faendem aot tingting bilong hem long olketa samting, and trae for minim olketa problem bilong hem, wea maet moa hard winim olketa problem wea iuseleva feisim bifor long skul. Long taem olsem, pikinini bilong iu need for ting long iu olsem samwan wea hem savve trustim. (Proverbs 20:5) Thru long akson or feeling bilong hem abaotem samting, iu maet luksavve long wei wea hem wari and konfius. Givim olketa need bilong hem wea iu lukim, and ‘comfortim heart bilong hem.’—Colossians 2:2.

Bat hem important for strong for stretfala samting. Planti parents faendem hao samfala taem wei for no agree kamap midolwan olketa and pikinini, bat olketa mas no givap sapos disison bilong olketa garem gudfala faondeson. Long narasaed, mek sure iu minim gud wanfala problem bifor iu disaed sapos iu bae givim loving discipline and hao for duim diswan sapos need kamap.—Proverbs 18:13.

Test Insaed Kongregeson

Wanfala dish wea olketa wakem from clay maet luk olsem olketa wakem finis nao, bat sapos olketa no bonem yet long fire, maet wata wea datfala dish shud holem savve spoelem dish hia. Bible hem markem olketa test and hardfala samting olsem wei for bonem samting long fire, from olketa showimaot iumi really wanem kaen man. Tru nao, Bible barava story abaotem olketa test bilong faith bilong iumi, bat disfala point hem fitim olketa nara test tu. (James 1:2-4) Iumi sapraes hao samfala hardfala test wea olketa young wan feisim maet kam from olketa wea insaed kongregeson.

Nomata young wan bilong iu luk olsem hem garem gudfala spiritual health, hem maet stragol witim heart wea divaed. (1 Kings 18:21) Olsem example, Megan feisim olketa tingting bilong world wea olketa narafala young wan wea kam long Kingdom Hall talem:

“Mi kasem test from wanfala grup bilong olketa young wan wea ting long Christian Wei olsem boring and stopem man for garem hapitaem. Olketa talem samting olsem: ‘Taem mi kasem 18 year, mi bae lusim truth,’ or ‘Mi barava laek for lusim truth nao.’ Olketa no laekem olketa young wan wea talem eni samting wea no followim tingting bilong olketa, olketa mekfani long olketa and kolem olketa holy wan.”

Wan or tufala young wan wea garem nogud fasin nomoa savve mekem olketa narawan for garem diskaen tingting. Planti taem young wan savve followim samting wea staka duim. Krangge fasin and wei for act olsem man wea no fraet savve mekem man for ting daonem wisdom and stretfala fasin. Long planti kantri, olketa young Christian kasem trabol from olketa followim sekson olsem.

Hem tru, olketa young wan needim samfala wei for kaban. Hao nao dadi or mami savve provaedem diswan? Mas ting raonem gud hapitaem bilong olketa, and planim samfala interesting samting for duim witim famili or witim olketa nara young wan and olketa full-grown man tu. Savve gud long olketa fren bilong pikinini bilong iu. Invaetem olketa for kaikai, or spendem wanfala evening witim olketa. (Romans 12:13) Encouragem pikinini bilong iu for aftarem gudfala samting, olsem wei for lane for pleim wanfala music instrument or for savve gud long narafala languis or wanfala waka. Hem maet duim diswan long haos nomoa.

Skul Savve Protectim Man

Wei for skul tu savve helpem hem long wei for keepim hapitaem long proper ples bilong hem. Loli, wanfala woman wea lukaftarem wanfala bigfala skul for 20 year, hem sei: “Mi lukim planti young Witness go thru skul. Planti fit for kasem praise long fasin bilong olketa, bat samfala luk semsem nomoa witim olketa nara student. Olketa wea showimaot gud example hem olketa wea interest long skul waka bilong olketa. Mi laek for givim advaes long parents for showimaot bigfala interest long education bilong pikinini, for savve gud long teacher bilong olketa, and for strongim long olketa pikinini hao wei for kasem gudfala mark long skul hem important. Samfala bae win, bat evriwan savve kasem gudfala mark and kasem respect bilong olketa teacher bilong olketa.”

Wei for skul savve helpem olketa young wan for muv ahed long spiritual wei. Olketa savve lanem gudfala wei for duim study, disciplinem mind, and feeling for garem responsibility. Savve bilong olketa for read gud and for minim samting bae encouragem olketa for kamap olketa gudfala student and teacher bilong Word bilong God. (Nehemiah 8:8) Skul waka and spiritual study wea olketa mas duim savve help for putim hapitaem long proper ples.

Samting wea Givim Honor Long Parents and Jehovah

Long Greece bifor planti dish garem nem bilong man wea wakem and man wea decoratem. Olsem tu, insaed famili evritaem tufala nao share for stretem pikinini. Dadi and mami nao share for sheipim heart bilong pikinini, and long tokpiksa wei “nem” bilong tufala stap long pikinini. Olsem wanfala man for wakem or decoratem clay pot, iu savve feel praod long waka bilong iu for sheipim wanfala young wan for kamap fit and naes.—Proverbs 23:24, 25.

Wei for win long disfala nambawan samting hem depend long wei wea iu waka hard for sheipim heart bilong pikinini bilong iu. Iumi hope iu bae fit for sei: “Law bilong God hem stap long heart bilong hem; wakabaot bilong hem bae no olabaot.” (Psalm 37:31) Samting wea stap insaed heart bilong pikinini hem important tumas so iu mas sheipim heart bilong hem.

[Olketa Footnote]