‘No Fraet and Kamap Strong!’
“No fraet! Mi winim world finis.”—JOHN 16:33.
1. From samting wea olketa Israelite bae feisim long Canaan, wanem encouragement nao olketa kasem?
TAEM olketa Israelite redy for katkros long Jordan River for go insaed Promis Land, Moses sei olsem long olketa: “No fraet and kamap strong. No fraet or seksek front long olketa, bikos God bilong iu Jehovah hem march witim iu.” Then Moses kolem Joshua, wea bae leadim olketa Israelite go insaed long Canaan, and talem moa long hem datfala kaonsel for no fraet. (Deuteronomy 31:6, 7) Bihaen, Jehovah seleva encouragem Joshua olsem: “No fraet, and kamap strong . . . Iu mas no fraet and barava strong.” (Joshua 1:6, 7, 9) Olketa toktok hia barava fitim. Olketa Israelite bae needim fasin for no fraet for feisim olketa strong enemy wea stap long narasaed bilong Jordan.
2. Wanem samting nao iumi insaed long hem distaem, and wanem nao iumi needim?
2 Distaem, olketa tru Christian redy for go insaed long promis niu world and, olsem Joshua, olketa mas no fraet. (2 Peter 3:13; Revelation 7:14) Nomata olsem, samting wea iumi insaed hem difren from Joshua. Joshua faet witim olketa sword and spia. Iumi faet insaed wanfala spiritual war and no savve iusim really samting for faet long war. (Isaiah 2:2-4; Ephesians 6:11-17) And tu, Joshua mas faet insaed planti raf war nomata bihaen hem go insaed datfala Promis Land. Bat iumi insaed planti faet distaem—bifor iumi go insaed datfala niu world. Bae iumi lukluk long samfala samting wea mekem iumi needim fasin for no fraet.
Why Nao Iumi Mas Stragol?
3. Wanem nao Bible talem abaotem main wan wea againstim iumi?
3 Aposol John raet olsem: “Iumi savve iumi kam from God, bat full world hem stap long paoa bilong wicked wan.” (1 John 5:19) Toktok hia showim wanfala main reason why olketa Christian mas stragol for keepim faith bilong olketa. Taem wanfala Christian go ahed faithful, long samfala wei hem winim Devil Satan. Dastawe, Satan hem gogo raon “olsem wanfala lion wea singaot strong” and trae for mekem olketa faithful Christian fraet and spoelem olketa. (1 Peter 5:8) Tru nao, hem faet againstim olketa anointed Christian and olketa fren bilong olketa. (Revelation 12:17) Insaed disfala faet, hem iusim olketa man for duim wanem hem laekem nomata sapos olketa savve or no savve long datwan. Man needim fasin for no fraet for stand strong againstim Satan and evri sekson bilong hem.
4. Wanem warning nao Jesus givim, bat wanem fasin nao olketa tru Christian showimaot?
4 From Jesus savve Satan and sekson bilong hem bae strong for againstim gud nius, hem givim disfala warning long olketa follower bilong hem: “Pipol bae persecutim and bae killim iufala dae, and evri nation bae heitim iufala from nem bilong mi.” (Matthew 24:9) Olketa toktok hia kamap tru long first century, and olketa kamap tru long distaem tu. Tru nao, persecution wea samfala Witness bilong Jehovah feisim distaem hem barava hard olsem eni nara hard persecution long history. Nomata olsem, olketa tru Christian no fraet for deal witim kaen hevi olsem. Olketa savve hao “wei for fraet long man hem wanfala trap,” and olketa no want for foldaon long datfala trap.—Proverbs 29:25.
5, 6. (a) Wanem samting nao savve kamap wea mekem iumi needim fasin for no fraet? (b) Wanem nao olketa faithful Christian duim taem fasin bilong olketa for no fraet kasem test?
5 Witim persecution, olketa narafala challenge tu iumi mas no fraet for feisim. For samfala, wei for story long olketa stranger abaotem gud nius hem wanfala challenge. Samfala skul pikinini kasem test long wei for no fraet taem pipol forcem olketa for salutim flag or singim national anthem bilong kantri. From wei for duim diswan hem olsem wanfala toktok bilong religion, olketa Christian pikinini disaed strong for duim samting wea mekem God hapi, and iumi hapi tumas long gudfala samting wea olketa duim.
6 Iumi needim fasin for no fraet tu taem olketa wea againstim iumi iusim olketa niusman for talemaot nogud report abaotem olketa servant bilong God or taem olketa trae for stopem tru worship long wei for “iusim law for mek trabol.” (Psalm 94:20) Olsem example, wanem nao shud tingting bilong iumi taem niuspepa, radio, or television no talem stret samting or talem barava laea story abaotem Olketa Jehovah’s Witness? Waswe, iumi shud seke? Nomoa. Iumi expectim kaen samting olsem. (Psalm 109:2) And iumi no sapraes taem samfala bilivim olketa laea story hia bikos “eniwan wea no garem savve hem bilivim evri toktok.” (Proverbs 14:15) Nomata olsem, olketa loyal Christian no bilivim evri toktok wea pipol talem abaotem olketa brata bilong olketa, and olketa nating letem nogud report for mekem olketa missim olketa Christian meeting, for katdaon long field ministry, or for wikdaon long faith. Bat, olketa “showimaot [olketa] minister bilong God . . . thru long glory and shame, thru long nogud report and gud report; olsem pipol for giaman [long eye bilong sekson wea againstim olketa] bat [really, olketa] tok tru.”—2 Corinthians 6:4, 8.
7. Olketa wanem important kwestin nao iumi savve askem iumiseleva?
7 Taem Paul, hem raet long Timothy, hem sei: “God no givim iumi spirit bilong fraet, bat bilong paoa . . . Dastawe, iu no shame for witness abaotem Lord bilong iumi.” (2 Timothy 1:7, 8; Mark 8:38) Taem iumi readim olketa toktok hia, iumi savve askem iumiseleva: ‘Waswe, mi feel shame long faith bilong mi, or mi no fraet? Long ples wea mi waka (or skul), waswe, mi talem olketa hao mi wanfala Witness bilong Jehovah, or mi trae for haedem datwan? Waswe, mi feel shame for difren from nara pipol, or mi feel praod for difren bikos mi fren witim Jehovah? Sapos eniwan hem fraet for preachim gud nius or for bilivim samting wea planti pipol no bilivim, hem mas rememberim kaonsel bilong Jehovah for Joshua: “No fraet and kamap strong.” No forget, important samting nao tingting bilong Jehovah and Jesus Christ, no tingting bilong olketa wakfren or skulfren.—Galatians 1:10.
Hao for Mekem Grow Fasin for No Fraet
8, 9. (a) Wantaem, hao nao olketa firstfala Christian kasem test saed long fasin for no fraet? (b) Wanem nao Peter and John duim bihaen tufala kasem warning, and wanem nao olketa witim olketa nara brata kasem?
8 Hao nao iumi savve mekem grow fasin for no fraet wea bae helpem iumi for go ahed faithful long olketa hard taem distaem? Well, hao nao olketa firstfala Christian mekem grow fasin for no fraet? Tingim samting wea happen taem olketa chief priest and older man long Jerusalem talem Peter and John for stop for preach long nem bilong Jesus. Olketa disaepol no want for duim datwan and sekson hia givim warning long olketa and then letem olketa go free. Bihaen datwan olketa go bak long olketa brata, and evriwan prea tugeta olsem: “Jehovah, herem strongfala toktok bilong olketa, and letem olketa slave bilong iu go ahed for talem word bilong iu and no fraet.” (Acts 4:13-29) Jehovah ansarem olketa taem hem strongim olketa witim holy spirit, and olsem olketa Jew leader talem bihaen, olketa “fulimap Jerusalem” witim teaching bilong olketa.—Acts 5:28.
9 Iumi bae lukluk long samting wea happen long datfala taem. Taem olketa Jew leader warnim olketa disaepol, olketa disaepol nating stop for preach. Bat, olketa disaepol prea for fasin for no fraet mekem olketa go ahed for preach. Then olketa duim samting followim prea bilong olketa, and Jehovah strongim olketa witim spirit bilong hem. Experience bilong olketa showim hao samting wea Paul raetem tu-thri year bihaen hem for olketa Christian taem olketa kasem persecution. Paul sei: “Long evri samting mi kasem strong from datwan wea givim paoa long mi.”—Philippians 4:13.
10. Hao nao samting wea kasem Jeremiah helpem olketa wea garem fasin for feel shame?
10 Bat, tingim sapos samwan hem garem fasin for feel shame olowe. Waswe, hem savve stand strong for servem Jehovah nomata pipol againstim hem? Barava nao! Tingim samting wea Jeremiah talem taem Jehovah appointim hem olsem wanfala profet. Young man hia hem sei: “Mi wanfala boy nomoa.” Tru tumas, hem feel olsem hem no fit. Nomata olsem, Jehovah encouragem hem witim toktok hia: “Iu no sei, ‘Mi wanfala boy nomoa.’ Bat long evriwan wea mi bae sendem iu go, iu mas go; and evri samting wea mi bae komandim long iu, iu mas talem. Iu no fraet long feis bilong olketa, from ‘Mi stap witim iu for sevem iu.’ ” (Jeremiah 1:6-10) Jeremiah trustim Jehovah, and from diswan, long strong bilong Jehovah hem winim wei wea hem hol bak for preach and kamap wanfala witness long Israel wea barava nating fraet.
11. Wanem nao helpem olketa Christian distaem for kamap olsem Jeremiah?
11 Olketa anointed Christian distaem garem wanfala assignment wea klosap semsem witim Jeremiah, and wea garem saport bilong datfala “big crowd” bilong “nara sheep,” olketa go ahed for talemaot olketa purpose bilong Jehovah, nomata pipol no interest, mek fani, and persecutim olketa. (Revelation 7:9; John 10:16) Olketa kasem encouragement from toktok bilong Jehovah for Jeremiah: “Iu no fraet.” Olketa nating forgetim hao datfala assignment hem kam from God and olketa preachim message bilong hem.—2 Corinthians 2:17.
Olketa Example wea Fitim Iumi for Followim
12. Wanem nambawan example nao Jesus givim, and hao nao hem encouragem olketa follower bilong hem?
12 Iumi savve kasem help for mekem grow fasin for no fraet sapos iumi ting raonem example bilong olketa narawan wea no fraet olsem Jeremiah. (Psalm 77:12) Olsem example, taem iumi study abaotem ministry bilong Jesus, iumi tinghae tumas long wei wea hem strong taem Satan testim hem and taem hem feisim olketa Jew leader wea againstim hem. (Luke 4:1-13; 20:19-47) From Jesus kasem strong from Jehovah hem nating seksek, and no longtaem bifor hem dae, hem sei olsem long olketa disaepol bilong hem: “Long world iufala kasem trabol, bat no fraet! Mi winim world finis.” (John 16:33; 17:16) Sapos olketa disaepol bilong Jesus followim example bilong hem, olketa tu bae win. (1 John 2:6; Revelation 2:7, 11, 17, 26) Bat olketa bae need for “no fraet.”
13. Wanem nao Paul talem for encouragem olketa long Philippi?
13 Samfala year bihaen Jesus dae, pipol putim Paul and Silas insaed prison long Philippi. Bihaen, Paul encouragem kongregeson long Philippi for go ahed for “stand strong witim wan spirit, witim wanfala soul waka hard tugeta for faith bilong gud nius, and no fraet long olketa wea againstim [olketa].” For strongim olketa long diswan, Paul hem sei: “Disfala samting [wei wea olketa Christian hia kasem persecution] nao pruvim [sekson wea persecutim olketa] bae finis evribit, bat iufala bae kasem salvation; and diswan hem kam from God, bikos iufala nao kasem disfala privilege for saed bilong Christ, no for putim faith long hem nomoa, bat for safa tu for saed bilong hem.”—Philippians 1:27-29.
14. From Paul hem no fraet, wanem nao happen long Rome?
14 Taem Paul raet for kongregeson long Philippi, hem stap moa long prison, long Rome. Nomata olsem, hem go ahed for preach long nara pipol witim fasin for no fraet. Wanem nao kamaot from diswan? Hem raet olsem: “Nius abaotem wei wea mi stap long prison for saed bilong Christ hem kasem evriwan bilong Praetorian Guard and olketa nara man; and klosap evri brata insaed long Lord, from olketa kasem strong from wei wea mi stap long prison, olketa showimaot bigfala fasin for strong for talemaot word bilong God and no fraet.”—Philippians 1:13, 14.
15. Wea nao iumi savve faendem olketa gudfala example bilong faith wea bae strongim wei wea iumi disaed strong for no fraet?
15 Example bilong Paul encouragem iumi. And tu olketa gudfala example bilong olketa Christian distaem wea stand strong long persecution long olketa kantri wea garem raf ruler or wea olketa bigman bilong church nao rul. Story bilong planti long olketa hia stap insaed olketa Wastaoa and Wekap! magasin and insaed olketa Yearbook of Jehovah’s Witnesses tu. Taem iu readim olketa story hia, remember hao olketa wea talem olketa story hia olketa pipol olsem iumi; bat taem olketa kasem barava hardfala samting, Jehovah givim olketa paoa wea winim paoa bilong man and olketa stand strong. Iumi savve sure hem bae duim sem samting for iumi sapos hard samting kasem iumi.
Wei wea Iumi No Fraet Mekem Jehovah Hapi and Givim Hem Honor
16, 17. Hao nao iumi distaem savve mekem grow tingting for no fraet?
16 Sapos wanfala Christian stand strong for saed bilong truth and raeteous fasin, hem garem fasin for no fraet. Sapos hem duim datwan nomata hem feel fraet, datwan hem bigfala wei for no fraet. Tru nao, no eni Christian savve fraet sapos hem really want for duim will bilong Jehovah, sapos hem disaed strong for stap faithful, sapos hem evritaem depend long God and sapos hem evritaem remember hao Jehovah givim strong long planti wea olsem hem long taem bifor. And tu, taem iumi luksavve wei wea iumi no fraet hem mekem Jehovah hapi and givim hem honor, iumi barava disaed strong for no wikdaon. Iumi willing for feisim wei wea pipol mekfani long iumi or duim eni samting wea moa worse long iumi.—1 John 2:5; 4:18.
17 Iumi mas nating forget hao taem iumi safa for faith bilong iumi, datwan no minim iumi duim rong samting. (1 Peter 3:17) Iumi safa bikos iumi saportim sovereign rul bilong Jehovah, bikos iumi duim gud samting, and bikos iumi no part bilong world. Aposol Peter sei olsem abaotem diswan: “Sapos iufala stand strong nomata iufala safa from iufala duim gudfala samting, God hem hapi long diswan.” Peter sei tu: “Letem olketa wea safa for saed bilong will bilong God go ahed for givim soul bilong olketa long wanfala faithful Creator taem olketa duim gud samting.” (1 Peter 2:20; 4:19) Tru nao, faith bilong iumi mekem Jehovah, loving God bilong iumi hapi, and diswan mekem hem kasem honor. Datwan givim iumi strongfala reason for no fraet!
Taem Iumi Tok Witim Olketa wea Garem Paoa
18, 19. Taem iumi no fraet front long wanfala judge, hem olsem iumi talemaot wanem message?
18 Taem Jesus talem olketa follower bilong hem hao olketa bae kasem persecution, hem sei tu: “[Olketa man] bae tekem iufala go long kot, and olketa bae whipim iufala insaed long olketa synagogue. Tru nao, olketa bae tekem iufala front long olketa governor and king for saed bilong mi, for wanfala witness long olketa and long olketa nation.” (Matthew 10:17, 18) Iumi needim fasin for no fraet sapos iumi mas stand ap front long wanfala judge or ruler bikos pipol talem laea story abaotem iumi. Nomata olsem, taem iumi iusim olketa chance olsem for givim witness long pipol hia, iumi changem hard samting for kamap wanfala chance for duim important samting. Iumi talem long pipol wea judgem iumi disfala toktok bilong Jehovah, wea stap long mek-tu Psalm: “And so, olketa king, showimaot fasin for luksavve; letem Jehovah stretem iufala, olketa judge bilong earth. Servem Jehovah witim fraet.” (Psalm 2:10, 11) Planti taem, taem pipol accusim long giaman wei Olketa Jehovah’s Witness long kot, olketa judge saportim freedom for worship, and iumi tinghae long datwan. Nomata olsem, samfala judge letem pipol wea againstim iumi for switim olketa. Bible sei olsem long olketa hia: “Letem Jehovah stretem iufala.”
19 Olketa judge shud savve hao law bilong Jehovah God hem barava hae. Olketa shud remember hao evri man, insaed diswan olketa judge tu, mas givim ansa long Jehovah God and Jesus Christ. (Romans 14:10) For saed bilong iumi, nomata wanfala judge hem showimaot justice long iumi or nomoa, iumi garem planti reason for no fraet bikos Jehovah saportim iumi. Bible hem sei: “Hapi nao olketa wea mekem hem ples for stap sef.”—Psalm 2:12.
20. Why nao iumi savve hapi sapos iumi mas stand strong long persecution and laea toktok againstim iumi?
20 Long Sermon long Maunten, Jesus hem sei: “Hapi nao iufala taem pipol tok spoelem iufala and persecutim iufala and laea for talem evri barava nogud samting againstim iufala for saed bilong mi. Hapi and jamp ap from iufala hapi, from reward bilong iufala hem big long heven; bikos long sem wei tu olketa persecutim olketa profet bifor iufala.” (Matthew 5:11, 12) Tru, persecution hem no gudfala samting, bat wei wea iumi stand strong taem iumi kasem persecution, wea insaed diswan hem laea story long nius, hem samting wea mekem iumi hapi. Diswan minim iumi mekem Jehovah hapi and bae iumi kasem reward. Wei wea iumi no fraet showimaot iumi garem trufala faith and hem mekem iumi sure God appruvim iumi. Tru nao, hem showimaot iumi trustim Jehovah evribit. Kaen trust olsem hem important tumas for wanfala Christian, olsem iumi bae lukim long next article.
Wanem Nao Iu Lanem?
• Wanem samting wea happen distaem mekem man need for garem fasin for no fraet?
• Hao nao iumi savve mekem grow fasin for no fraet?
• Hu nao samfala wea showimaot gudfala example bilong wei for no fraet?
• Why nao iumi want for duim samting witim fasin for no fraet?
[Olketa Piksa long page 9]
Simone Arnold (distaem Liebster) long Germany, Widdas Madona long Malawi, and Lydia and Oleksii Kurdas long Ukraine showimaot wei for no fraet and againstim wicked wan
[Olketa Piksa long page 10]
Iumi no shame long gud nius
[Piksa long page 11]
Wei wea Paul no fraet long prison mekem gud samting kamap for gud nius
[Piksa long page 12]
Sapos iumi no fraet for explainim biliv bilong iumi long Bible long wanfala judge, iumi talem important message