“Kam Klosap Long God, and Hem Bae Kam Klosap Long Iufala”
Bifor and Bihaen—Laef Bilong Hem Change Evribit
FOR Matsepang, laef no garem eni mining and hem no enjoyim! Hem wanfala young girl long Lesotho, wanfala kantri midol long South Africa. Matsepang growap wanfala Catholic. Winim wei for helpem hem for kam klosap long God, for planti year olketa nun spoelem hem long wei for givim hem selen for switim hem for duim dirty fasin.
From diswan, Matsepang lusim trust bilong hem long religion and hem faendem hard tumas for biliv long wanfala loving Creator wea barava kea for olketa wea hem creatim. From hem safa long wei wea olketa no kea and spoelem hem, Matsepang garem olketa pain saed long feeling wea deep tumas and hem barava feel iusles. Taem hem big hem barava raf and kwiktaem for kros. Diswan leadim hem for duim criminal fasin.
Gogo, Matsepang joinim gang wea savve steal from pipol insaed long olketa train. Olketa arrestim hem and hem kasem panis for go long prison long South Africa. Bihaen, olketa sendem hem go bak long hom kantri bilong hem, Lesotho, long there hem go ahed long wanfala laef bilong criminal fasin, fasin for drunk, raf fasin and dirty fasin.
Long wanfala taem long laef bilong hem wea hem barava feel sorre tumas, Matsepang prea strong long God for helpem hem. Hem mekem promis olsem, “God, sapos mi stap laef, mi bae duim wanem mi savve duim for servem iu.”
No longtaem bihaen, olketa missionary bilong Jehovah’s Witness kam long hem. Olketa offer for studyim Bible witim hem. From study bilong hem, Matsepang luksavve hao God garem wei for interest and kea. Hem luksavve Satan, “father bilong laea fasin,” iusim kleva and giaman plan for mekem grow long samfala disfala feeling hao olketa iusles and for mekem olketa bilivim hao Jehovah kanduit fit for lovem olketa.—John 8:44; Ephesians 6:11.
Matsepang kasem comfort for lanem hao iumi savve garem gud tingting for respectim iumi seleva sapos iumi repent from olketa sin bilong iumi long bifor, lukaotem forgiveness bilong God, and trae hard for mekem hem hapi! Olketa helpem hem for minim “God hem big winim heart bilong iumi” and lukim iumi long difren wei from hao iumi luk long iumiseleva.—1 John 3:19, 20.
Matsepang barava hapi for readim olketa toktok bilong man wea raetem psalm, David: “Jehovah hem stap klosap long olketa wea heart bilong olketa brek; and hem sevem olketa wea spirit bilong olketa pisis.” (Psalm 34:18) Olsem wanfala long olketa wea “spirit bilong olketa pisis,” hem luksavve Jehovah no savve lusim olketa servant bilong hem, nomata samfala long olketa feel wikdaon or feel olsem olketa no important. Hem mekem heart bilong hem feel hapi for lanem hao God lukaftarem evri sheep bilong hem and strongim olketa long hardfala taem. (Psalm 55:22; 1 Peter 5:6, 7) Olketa toktok hia nao barava muvim heart bilong hem: “Kam klosap long God, and hem bae kam klosap long iufala.”—James 4:8.
No longtaem bihaen, paoa bilong Word bilong God, Bible, showaot klia long laef bilong Matsepang. Hem start for attendim olketa Christian meeting evritaem and hem lusim olketa fasin wea againstim Bible. Wanem nao kamaot from datwan? Hem no feel olsem hem no fit for kasem love and kaenfala fasin bilong God. Start kam from taem hem baptaes olsem wanfala Jehovah’s Witness, hem spendem planti thousand hour long Christian ministry olsem pablisa for talemaot gud nius bilong Kingdom. Nomata hem garem pain saed long feeling from taem bifor, distaem Matsepang garem laef wea hapi and garem mining. Diswan barava showimaot paoa bilong Bible for mekem laef bilong pipol kamap moabeta!—Hebrews 4:12.
[Blurb long page 9]
“God, sapos mi stap laef, mi bae duim wanem mi savve duim for servem iu”
[Box long page 9]
Olketa Bible Principle wea Waka
Long hia nao samfala Bible principle wea comfortim olketa wea safa from pipol spoelem olketa:
“Taem planti tingting for wari kamap insaed long mi, olketa toktok bilong iu [God] for givim comfort nao lukaftarem soul bilong mi.” (Psalm 94:19) Olketa ‘toktok for givim comfort’ bilong Jehovah wea stap insaed Bible savve givim nambawan comfort. Wei for ting raonem olketa scripture and prea savve help for daonem tingting for wari and mekem grow trust long God olsem wanfala Fren wea minim evribit.
“Hem [Jehovah] healim olketa wea heart bilong olketa hem brek, and taemap olketa ples wea pain.” (Psalm 147:3) Sapos iumi tinghae long mercy bilong Jehovah and wei wea hem provaedem ransom sakrifaes bilong Jesus for kavarem sin, iumi savve feel free for kam long God and no feel olsem iumi no fit long heart bilong iumi. Diswan savve givim bigfala comfort and peace long mind.
“No eni man savve kam long mi [Jesus Christ] sapos Father, wea sendem mi, no pullim hem; and mi bae resurrectim hem long last day.” (John 6:44) Thru long holy spirit bilong hem and waka for preachim Kingdom, Jehovah seleva pullim iumi long Son bilong hem and givim iumi hope for laef olowe.