Olketa Servem Christian Brata Long Olketa Difren Kantri

WASWE, iu enitaem herem toktok “international servant” and “international volunteer”? Olketa Witness bilong Jehovah wea insaed tufala sekson hia volunteer for givim taem and savve bilong olketa for help buildim olketa building for printim and givimaot Kingdom message bilong Bible. Olketa volunteer olsem help tu for buildim olketa Assembly Hall and Kingdom Hall, wea olketa nao main ples bilong Bible instruction. Distaem, olketa volunteer hia help long olketa difren building project insaed 34 kantri wea planti long olketa kantri hia no garem inaf selen. Wanem spesol challenge and hapi nao olketa minister hia kasem taem olketa servem olketa Christian brata long difren kantri? Hao nao olketa feel abaotem “holy service” wea olketa duim? (Revelation 7:9, 15) For faendaot, iumi bae meetim samfala volunteer wea serve long Mexico.

Olketa volunteer from difren kantri firstaem arrive long Mexico long May 1992. No longtaem bihaen, olketa leadim waka for mekem moa big datfala branch, wea lukaftarem waka bilong Olketa Jehovah’s Witness long Mexico. Part long disfala project hem 14-fala niu building, wea insaed diswan hem olketa rum for olketa volunteer long branch office stap long hem, ples for duim printing, and wanfala office building.

For help long disfala building project, winim 730 volunteer from Canada, Great Britain, United States, and olketa nara kantri waka tugeta long wan mind witim staka handred volunteer from full Mexico. Join witim diswan, winim 28,000 Witness wea kam from samting olsem 1,600 kongregeson wea stap raonem area bilong branch office kam for help long olketa weekend. Evriwan waka witim willing spirit and iusim savve bilong olketa for duim datfala waka and no tek pei. Olketa ting long disfala wei for serve olsem hem wanfala privilege. Long full building project hia, olketa no forgetim toktok wea kam from God long Psalm 127:1: “Sapos Jehovah no buildim haos, then hem iusles nomoa for olketa man waka hard for buildim.”

Olketa Challenge wea Olketa Feisim

Wanem challenge nao olketa international volunteer feisim taem olketa serve long nara kantri? Bae iumi storyim experience bilong samfala. Curtis and Sally, wanfala hasband and waef from United States, bin help long olketa building project long Germany, India, Mexico, Paraguay, Romania, Russia, Senegal, and Zambia. Curtis hem sei: “Firstfala challenge hem for lusim dota bilong mitufala bihaen, wea hem pioneer [full-taem minister], and kongregeson bilong mifala long Minnesota. Mi and waef bilong mi bin insaed datfala kongregeson for 24 year, and mitufala getius long there nao.”

Sally hem sei: “For stap long ples iu no getius long hem hem wanfala challenge, maet hem moa isi for wanfala man winim wanfala woman, bat mi lanem hao mi fit for change. Mi lanem tu for getius long olketa insect, staka long olketa!” Hem sei moa: “Long wanfala kantri, tenfala long mifala volunteer sharem wanfala apartment wea no garem kitchen and wea garem tufala toilet and bathrum nomoa. Long there mi lane for moa patient.”

For lanem niu languis hem nara challenge wea needim hard waka and hambol fasin. Sharon, wea serve witim hasband bilong hem long olketa construction project long olketa difren kantri, hem sei: “Wei for no savve long languis bilong kantri wea iu serve long hem hem wanfala challenge. Long start, wei wea iu no savve storyim feeling bilong iu long olketa brata and sista mekem hem hard for iu klos long olketa. Hem barava nogud feeling. Bat olketa brata wea mifala meetim long olketa difren kantri olketa patient and barava kea for mifala. Hem no tek longtaem bifor mifala start for isisi iusim languis.”

For Share Long Ministry Hem Needim Fasin for No Fraet

Nomata olketa volunteer wea sakrifaesim seleva hia duim bigfala waka saed long building, olketa luksavve hao first important waka bilong olketa nao hem for preachim gud nius bilong Kingdom bilong God. Dastawe, olketa saportim evribit preaching waka bilong kongregeson wea olketa insaed. Åke and Ing-Mari, wanfala hasband and waef wea help long building project long Guadeloupe, Malawi, Mexico, and Nigeria, sei wei for iusim difren languis taem iu duim field ministry long difren kantri hem hard.

Ing-Mari storyim: “Firstaem, mitufala kanduit preach gud, from mifala evritaem joinim olketa lokol Witness and, from mifala shame, mifala planti taem letem olketa for story. Bat, wan morning, nomata mitufala fraet, mitufala disaed for go aot seleva long field service. Mitufala meetim wanfala woman wea lisin long story wea mi redyim firstaem. Mi readim wanfala scripture and hem tekem samfala literature. Then woman hia sei: ‘Wanfala relative bilong mi studyim Bible witim Olketa Jehovah’s Witness. Plis talem mi, hao nao mi savve kasem study?’ Mi barava sapraes and no savve wanem for talem. Bihaen mi gud bak moa, mi offerim hem wanfala Bible study.”

Ing-Mari sei moa: “Tingim bigfala hapi and thankiu bilong mi long Jehovah from hem blessim wei wea mitufala trae hard and barava want for sharem truth.” Disfala woman muv ahed gud and kamap baptaes Witness long wanfala distrik convention long Mexico City. Åke and Ing-Mari storyim ministry bilong tufala olsem: “Mitufala tinghae tumas long olketa difren assignment bilong mitufala long olketa difren kaen construction project, bat no eniting hem winim hapi and feeling for satisfae wea kamaot from wei for helpem pipol acceptim truth.”

Spirit for Sakrifaesim Seleva

Hem tru, olketa volunteer wea lusim famili and olketa fren mekem planti sakrifaes for servem olketa brata bilong olketa long difren kantri, bat olketa kasem bigfala hapi tu. Olketa wanem hapi?

Howard, wea bin serve witim waef bilong hem Pamela long Angola, Colombia, Ecuador, El Salvador, Guyana, Mexico, and Puerto Rico explainim: “Hem wanfala privilege for meetim olketa brata and sista long olketa difren kantri and for feelim love wea stap midolwan olketa brata bilong iumi evriwea long world. Iumi staka taem read abaotem, bat taem iu stap and serve witim olketa brata wea garem difren kastom and living, iu tinghae moa long wei wea iumi olketa brata.”

Gary, wea help long building waka long Colombia, Costa Rica, Ecuador, Mexico, and Zambia, tu feel hao disfala program hem barava helpem hem. Hem sei: “Training wea mi kasem insaed olketa year wea go pas from wei for kaban witim olketa mature brata long olketa difren branch mi bin waka long hem, hem redyim mi for deal witim olketa challenge long olketa assignment bilong mi. Hem strongim faith bilong mi bikos hem givim mi chance for barava feelim wan mind wea hem mark bilong organization bilong Jehovah evriwea long world—⁠wan mind wea languis, kantri, or kastom no affectim.”

Building waka long Mexico hem finis and olketa dedicatem olketa branch building dis year. From olketa lovem God, olketa international servant and international volunteer duim bigfala waka for mekem big moa worship long Mexico and olketa nara kantri. Evri Jehovah’s Witness raonem world barava thankiu for willing spirit and fasin for sakrifaesim seleva bilong olketa volunteer hia wea servem olketa Christian brata bilong olketa long difren kantri.

[Piksa long page 25]

Ecuador

[Piksa long page 25]

Colombia

[Piksa long page 25]

Angola

[Piksa long page 26]

Waka hem start long Mexico branch

[Piksa long page 26]

Garden long branch

[Piksa long page 26]

Long daon: Samfala bilong Construction Department front long haf sekson bilong niu building

[Piksa long page 27]

Olketa Construction volunteer hapi for saportim preaching waka witim lokol kongregeson