Go Ahed for Stand Strong,and Winim Resis for Laef
SAPOS iu mas travel thru long raf sea, wanem kaen ship nao iu bae chus for go insaed? Waswe, bae iu wantem wanfala smol boat or wanfala strong ship, wea olketa wakem gud? For sure, iu bae chusim ship, from hem fit for againstim olketa strong wave.
Taem iumi go thru raf sea bilong disfala system, iumi feisim enikaen nogud challenge. Olsem example, young pipol maet samfala taem feel konfius and no sure long enikaen idea and tingting bilong disfala world. Olketa man wanwan wea just start for followim laef olsem Christian maet still no sure long samfala samting. Nomata samfala wea stand strong and faithful for planti year finis insaed service bilong God maet kasem test bikos samting wea olketa expectim no fulfill evribit.
Kaen feeling olsem hem no niu. Olketa faithful servant bilong Jehovah, olsem Moses, Job, and David, kasem hevi samfala taem. (Numbers 11:14, 15; Job 3:1-4; Psalm 55:4) Nomata olsem, olketa barava stand strong insaed laef bilong olketa for worshipim God. Nambawan example bilong olketa encouragem iumi for stand strong, bat Satan hem want for pullim iumi awe from datfala resis for laef olowe. (Luke 22:31) So hao nao iumi savve go ahed for stand “strong long faith”? (1 Peter 5:9) And hao nao iumi savve strongim olketa brata and sista bilong iumi?
Jehovah Wantem Iumi for Stand Strong
Sapos iumi faithful long Jehovah, hem bae evritaem helpem iumi for go ahed strong. Man wea raetem psalm, David, hem feisim planti hard samting, bat hem hope long God, dastawe hem fit for sing olsem: “[Jehovah] hem go ahed for tekem mi aot from bigfala singaot bilong hol, aot from wata bilong mud. Then hem raisimap leg bilong mi from bigfala ston; hem strongim olketa step bilong mi.”—Psalm 40:2.
Jehovah hem strongim iumi for “faetem nambawan faet bilong faith” mekem iumi fit for ‘hol strong long laef olowe.’ (1 Timothy 6:12) Hem provaedem tu wei for iumi go ahed stap stedy and winim spiritual faet bilong iumi. Aposol Paul encouragem olketa nara Christian for “go ahed for kasem paoa long Lord and long bigfala strong bilong hem,” and for ‘werem full kaleko for faet wea kam from God mekem olketa fit for stand strong againstim evri trik bilong Devil.’ (Ephesians 6:10-17) Bat wanem nao savve mekem iumi kasem hevi? And hao iumi savve protectim iumiseleva againstim olketa trabol olsem?
Luk Aot Long Olketa Samting wea Mekem Iumi Wikdaon
Hem wise for tingim disfala important samting: Olketa disison wea iumi mekem bae affectim wei wea iumi stand strong olsem Christian long gudfala wei or long nogud wei. Young pipol need for disaedem olketa samting olsem waka, moa education, and marit. Olketa wea full-grown maet need for disaed sapos olketa bae muv go long narafala ples or garem narafala waka moa. Iumi mekem disison evriday long wei for iusim taem and staka nara samting moa. Wanem nao savve helpem iumi for mekem wise disison wea bae helpem iumi for stand strong olsem olketa servant bilong God? Wanfala Christian wea stand strong for longfala taem finis sei: “Mi askem Jehovah for help taem mi mekem disison. Mi bilivim hao hem important for acceptim and followim kaonsel wea kam from Bible, long olketa Christian meeting, from olketa elder, and insaed olketa Bible pablikeson.”
Taem iumi mekem disison, hem gud for askem iumiseleva: ‘Waswe, faev or tenfala year bihaen, bae mi hapi witim olketa disison wea mi mekem distaem, or mi bae feel sorre long diswan? Waswe, mi trae hard for mek sure olketa disison bilong mi bae no mekem mi wikdaon long spiritual wei bat bae mekem mi muv ahed long spiritual wei?’—Philippians 3:16.
Wei for foldaon long temptation or for letem olketa seleva for klosap brekem law bilong God mekem samfala wea baptaes finis for no stedy long laef bilong olketa. Samfala wea disfellowship from kongregeson bikos olketa go ahed for aftarem wei bilong sin and no repent barava waka hard for reinstate, bat bihaen olketa disfellowship moa—samfala taem no longtaem bihaen datwan—from olketa duim sem rong. Waswe, diswan maet happen bikos olketa no prea for God helpem olketa for ‘barava heitim nogud samting and hol strong long gud samting’? (Romans 12:9; Psalm 97:10) Evriwan long iumi need for “go ahed for stretem gogo bilong leg bilong [iumi].” (Hebrews 12:13) So letem iumi ting raonem samfala point wea savve helpem iumi for go ahed strong long spiritual wei.
Go Ahed Strong Thru Long Christian Waka
Wanfala wei for go ahed stedy long resis for laef hem for garem planti samting for duim long waka for preachim Kingdom. Tru nao, Christian ministry bilong iumi hem wanfala important help long wei for keepim heart and mind bilong iumi for tingim nomoa wei for duim will bilong God and hol strong long datfala prize bilong laef olowe. Paul encouragem olketa bilong Corinth long diswan: “Olketa brata wea mi lovem, stand strong, no seksek, evritaem garem planti samting for duim insaed long waka bilong Lord, from iufala savve waka bilong iufala hem no hard waka nating long saed long Lord.” (1 Corinthians 15:58) “Stand strong” hem minim for ‘stap strong.’ “No seksek” savve minim wei for ‘hol strong long wanfala anka.’ Dastawe, wei for busy long ministry savve helpem iumi for stand strong long Christian gogo bilong iumi. For helpem nara pipol for savve long Jehovah hem mekem laef bilong iumi garem mining and mekem iumi hapi.—Acts 20:35.
Pauline, wanfala Christian wea spendem winim 30 year olsem wanfala missionary and long nara full-taem preaching waka, sei: “Ministry hem wanfala protection bikos wei for witness long nara pipol mekem mi feel sure hao mi garem truth.” Wei for biliv strong savve kamap tu taem iu evritaem duim olketa nara Christian waka, olsem wei for attendim olketa meeting for worship and waka hard for study seleva long Bible.
Olketa Loving Brata and Sista Strongim Iumi
Wei wea iumi part long organization bilong olketa tru worshiper evriwea long world savve barava muvim iumi for stand strong. Hem barava bigfala blessing for kaban witim olketa brata and sista bilong iumi evriwea long world! (1 Peter 2:17) Iumi savve strongim each other.
Tingim olketa samting wea raeteous man Job duim wea helpem iumi. Nomata datfala giaman man for givim comfort, Eliphaz hem sei: “Eniwan wea stambol, olketa toktok bilong iu bae raisimap; and olketa knee wea seksek iu bae mekem strong.” (Job 4:4) Waswe, iumi duim diswan? Iumi wanwan garem responsibility for helpem olketa spiritual brata and sista bilong iumi for go ahed strong long service bilong God. Taem iumi stap witim olketa, iumi savve duim samting for fitim olketa toktok hia: “Strongim olketa hand wea wik, iufala pipol, and mekem olketa knee wea seksek strong.” (Isaiah 35:3) So markem olsem goal bilong iu for strongim and encouragem wanfala or tufala Christian evritaem iu meet witim olketa. (Hebrews 10:24, 25) Toktok bilong praise and wei for talem hao iu tinghae long wei wea olketa waka hard for mekem Jehovah hapi savve really helpem olketa for stand strong witim goal for winim datfala resis for laef.
Olketa Christian elder savve duim moa samting long wei for encouragem olketa niu wan. Iufala maet duim diswan long wei for givim olketa idea wea savve help and advaes from Bible and taem iufala waka witim olketa long field ministry. Aposol Paul hem evritaem iusim olketa chance for strongim olketa narawan. Hem laekem tumas for lukim olketa Christian long Rome, mekem hem savve help for strongim olketa long spiritual wei. (Romans 1:11) Hem ting long olketa brata and sista long Philippi olsem “hapi and crown” bilong hem and encouragem olketa for “standap strong long disfala wei insaed long Lord.” (Philippians 4:1) Taem hem herem hard taem wea olketa brata bilong hem long Thessalonica kasem, Paul sendem go Timothy for ‘mekem olketa strong and comfortim olketa, mekem no eniwan maet wikdaon long olketa hard taem hia.’—1 Thessalonians 3:1-3.
Aposol Paul and Peter luksavve and tinghae long faithful waka bilong olketa brata and sista hia. (Colossians 2:5; 1 Thessalonians 3:7, 8; 2 Peter 1:12) Long sem wei, letem iumi lukluk, no long wik point bilong olketa brata bilong iumi, bat long gudfala fasin bilong olketa and wei wea olketa win long faet bilong olketa for stand strong and honorim Jehovah.
Sapos iumi judge or tingim nogud saed, iumi bae mekem moa hard for samfala for go ahed stand strong long faith. Hem gud for rememberim hao olketa brata bilong iumi “garekil and stap olabaot” insaed disfala system! (Matthew 9:36) Christian kongregeson nao hem ples wea olketa shud expectim wei for kasem comfort and strong. So letem iumi evriwan duim best bilong iumi for buildimap olketa brata and sista bilong iumi and helpem olketa for go ahed stand strong.
Samfala taem olketa narawan maet treatim iumi long wei wea daonem wei wea iumi stand strong. Waswe, iumi bae letem toktok or akson wea no kaen for daonem service bilong iumi for Jehovah? Iumi mas no letem eniwan for pullim iumi awe from wei wea iumi go ahed strong!—2 Peter 3:17.
Olketa Promis Bilong God—Samting wea Givim Strong
Promis bilong Jehovah for nambawan future anda long Kingdom rul givim iumi hope wea helpem iumi for go ahed stand strong. (Hebrews 6:19) And for biliv strong hao God evritaem fulfillim olketa promis bilong hem muvim iumi for ‘stap wekap and stand strong long faith.’ (1 Corinthians 16:13; Hebrews 3:6) Wei wea luk olsem God hem delay for fulfillim olketa promis bilong hem maet testim faith bilong iumi. Dastawe, hem barava important for gard againstim olketa giaman teaching and for no go difren from hope bilong iumi.—Colossians 1:23; Hebrews 13:9.
Nogud example bilong olketa Israelite wea finis evribit bikos olketa no garem faith long olketa promis bilong Jehovah shud kamap olsem wanfala warning for iumi. (Psalm 78:37) Iumi mas no kamap olsem olketa, bat mas stand strong, servem God witim feeling for hariap insaed olketa last day. Wanfala elder wea garem savve sei: “Evriday mi live olsem bigfala day bilong Jehovah bae kam tumoro.”—Joel 1:15.
Tru nao, bigfala day bilong Jehovah hem klosap for kam. Bat, iumi no need for fraet taem iumi go ahed for stap klosap long God. Sapos iumi hol strong long olketa raeteous mark bilong hem and go ahed for stand strong, iumi savve winim datfala resis for kasem laef olowe!—Proverbs 11:19; 1 Timothy 6:12, 17-19.
[Piksa long page 23]
Waswe, iu duim evri samting wea iu fit for duim for helpem olketa Christian brata and sista for stand strong?
[Piksa Credit Line long page 21]
The Complete Encyclopedia of Illustration/J. G. Heck