“No Fraet Or Barava Seksek”
“No fraet or barava seksek . . . Jehovah bae stap witim iufala.”—2 CHRONICLES 20:17.
1. Hao nao terrorism affectim pipol, and why nao iumi savve minim feeling bilong olketa for fraet tumas?
TERRORISM! Just for herem datfala word savve mekem pipol fraet and mekem olketa no feel sef and no garem eni hope. Hem mekem pipol garem olketa difren kaen feeling olsem fraet, sorre, and kros. And hem wanfala word wea story abaotem samting wea planti pipol wari bae stap witim olketa man for planti year yet. Wanfala reason for tingse datwan maet tru hem bikos samfala kantri faet againstim evri difren kaen terrorism for staka year finis and no winim.
2. Wanem nao tingting bilong Olketa Jehovah’s Witness saed long problem bilong terrorism, and diswan mekem olketa wanem kwestin kamap?
2 Nomata olsem, tru reason for hope hem stap. Olketa Jehovah’s Witness, wea busy for preach long 234 kantri long earth, barava feel sure long diswan. Winim wei for wari and tingse terrorism bae go ahed for olowe, olketa feel sure klosap nao hem bae finis. Waswe, hem fitim for garem sem tingting olsem olketa? Hu nao fit for finisim terrorism evriwea long world, and hao nao datwan savve happen? From enikaen raf fasin maet affectim iumi evriwan, hem fitim for iumi lukluk gud long olketa reason for tingse diswan bae finis.
3. Olketa wanem samting nao mekem pipol fraet, and wanem nao Bible talem finis abaotem taem bilong iumi?
3 Distaem, planti difren samting mekem pipol fraet and barava seksek. Tingim staka pipol wea olo distaem and no fit for luk aftarem olketa seleva, olketa narawan wea wiki tumas from olketa sik wea no garem cure, and olketa famili wea stragol for garem inaf selen for provaedem need bilong olketa. Tingim tu hao eni samting savve happen long laef! Iumi savve seknomoa dae long wanfala accident or disaster and lusim evri samting. Wei for fraet and wari olsem, and tu, planti problem and samting wea mekem iumi feel wiki, mekem taem bilong iumi hem barava olsem wanem aposol Paul storyim: “Iu mas savve, insaed long olketa last day nogud taem wea hard for deal witim bae stap. From man bae lovem seleva, . . . no garem love, no savve agree, tok laea againstim narawan, no savve kontrolem seleva, raf tumas, no lovem gudfala fasin.”—2 Timothy 3:1-3.
4. Wanem nao gud saed bilong barava nogud samting wea 2 Timothy 3:1-3 storyim?
4 Nomata disfala scripture storyim samting wea barava nogud, hem showimaot hope tu. Lukim hao olketa nogud taem bae kamap long “long olketa last day” bilong disfala wicked system bilong Satan. Diswan minim help hem klosap, and klosap nao rul bilong datfala perfect Kingdom bilong God, wea Jesus teachim olketa follower bilong hem for prea for hem, bae changem disfala wicked world. (Matthew 6:9, 10) Datfala Kingdom hem gavman bilong God long heven, “wea bae nating savve finis,” profet Daniel hem sei, bat “hem bae smasem and finisim evri kingdom [bilong man], and hemseleva nao bae stap olowe.”—Daniel 2:44.
Christian Wei for No Teksaed Hem Barava Difren From Terrorism
5. No longtaem go nomoa, wanem nao olketa nation duim for againstim danger bilong terrorism?
5 For planti year nao, terrorism killim dae planti thousand pipol. Pipol evriwea raonem world barava luksavve long danger bilong terrorism bihaen olketa attak long New York City and Washington, D.C., long September 11, 2001. From terrorism hem big tumas and affectim full world, olketa nation evriwea long earth kwiktaem join tugeta for duim samting for againstim datwan. Olsem example, long December 4, 2001, samfala nius report sei, “olketa gavman minister from 55 kantri long Europe, North America and Central Asia agree for acceptim wanfala plan” for helpem olketa for waka tugeta. Wanfala bigman long U.S. gavman praisem diswan and sei hem givim “paoa wea strong winim bifor” long disfala waka for againstim terrorism. Kwiktaem nomoa, planti handred million pipol join insaed samting wea The New York Times Magazine kolem “start bilong wanfala maeti faet.” Iumi bae lukim sapos olketa bae win long diswan or nomoa. Bat, samting wea kamaot from disfala faet againstim terrorism mekem planti pipol fraet and wari, bat no olketa wea trust long Jehovah.
6. (a) Why nao hem hard samfala taem for pipol acceptim wei wea Olketa Jehovah’s Witness no teksaed? (b) Wanem nao example wea Jesus showimaot for olketa follower bilong hem saed long politik?
6 Planti pipol savve hao Olketa Jehovah’s Witness no teksaed long politik. Nomata planti pipol willing for acceptim diswan long taem bilong peace, olketa no willing tumas taem samting wea no eniwan expectim kamap. Planti taem wei wea war mekem pipol fraet and no sure long future savve mekem olketa garem strongfala feeling for mekhae long kantri bilong olketa. Diswan savve mekem hem hard for samfala for minim why nao eniwan bae no laek for saportim olketa difren sekson wea saportim nation. Nomata olsem, olketa tru Christian savve olketa mas obeyim komand bilong Jesus for “no part bilong world.” (John 15:19; 17:14-16; 18:36; James 4:4) Diswan minim olketa mas no teksaed long politik or olketa problem long community. Jesus seleva showimaot stretfala example. From hem garem perfect wisdom and savve tumas for duim staka samting, hem fit for mekem living bilong pipol long taem bilong hem barava kamap moabeta. Bat, hem barava no willing for join insaed long politik. Taem hem startim ministry bilong hem and Satan offerim hem olketa kingdom bilong disfala world, hem rejectim evribit. Bihaen, taem hem savve olketa laekem hem for kamap bigman bilong politik hem stap klia from olketa.—Matthew 4:8-10; John 6:14, 15.
7, 8. (a) Wei wea Olketa Jehovah’s Witness no tekpart long politik hem no minim wanem, and why nao olsem? (b) Hao nao Romans 13:1, 2 showimaot hem no fitim for duim eni raf samting againstim olketa gavman?
7 Wei wea Olketa Jehovah’s Witness no teksaed, no minim olketa saportim or ting nating long raf fasin. Sapos olketa duim olsem, datwan bae minim olketa no really olketa servant bilong “God bilong love and peace” olsem olketa talem. (2 Corinthians 13:11) Olketa lanem finis tingting bilong Jehovah abaotem raf fasin. Man wea raetem psalm hem sei: “Jehovah seleva hem lukluk gud long raeteous man and wicked man tu, and soul bilong Hem barava heitim eniwan wea lovem raf fasin.” (Psalm 11:5) Olketa savve tu long wanem Jesus talem long aposol Peter: “Putim bak sword bilong iu long ples bilong hem, from olketa wea iusim sword bae dae from sword.”—Matthew 26:52.
8 Nomata history showimaot klia hao olketa false Christian planti taem iusim “sword,” Olketa Jehovah’s Witness nating duim olsem. Olketa stap klia from enikaen samting olsem. Olketa Witness faithful for obeyim datfala komand long Romans 13:1, 2: “Evri soul shud stap anda long olketa hae paoa [olketa ruler long gavman], from no eni paoa bae stap sapos God hem no letem; olketa paoa bilong distaem stap long position wea God letem olketa for stap. So man wea againstim disfala paoa hem againstim datfala arrangement bilong God; olketa wea againstim diswan bae kasem judgment.”
9. Wanem nao tufala wei wea Olketa Jehovah’s Witness againstim terrorism?
9 From terrorism hem barava nogud samting, waswe, Olketa Jehovah’s Witness shud duim samting for help stopem diswan? Yes, and olketa go ahed for duim datwan. First samting, olketa seleva no join insaed enikaen raf fasin. Mek-tu samting, olketa teachim olketa Christian principle long nara pipol, wea, taem olketa live followim, olketa tu no join insaed enikaen raf fasin.a Last year, olketa Witness spendem 1,202,381,302 hour for helpem pipol for lanem disfala Christian wei bilong living. Olketa no westem taem bikos, from disfala waka, 265,469 pipol baptaes olsem olketa Witness bilong Jehovah, and long wei olsem showimaot long pablik hao olketa rejectim raf fasin evribit.
10. Waswe, eni hope stap for finisim raf fasin long world distaem?
10 And tu, Olketa Jehovah’s Witness luksavve hao olketa seleva no savve finisim olketa nogud samting long disfala world. Dastawe, olketa trustim evribit datwan wea savve duim diswan—Jehovah God. (Psalm 83:18) Nomata olketa trae hard, olketa man no savve finisim raf fasin. Wanfala man wea raetem Bible hem givim iumi warning abaotem taem bilong iumi, hem nao “olketa last day,” taem hem sei: “Olketa wicked man and man for laea bae go ahed for moa worse, laea long pipol and olketa seleva tu.” (2 Timothy 3:1, 13) Taem iumi tingim datfala toktok, hem luk olsem no eni chance for olketa man win againstim badfala fasin. Long narasaed, iumi savve depend long Jehovah for finisim raf fasin evribit and for olowe.—Psalm 37:1, 2, 9-11; Proverbs 24:19, 20; Isaiah 60:18.
No Fraet Nomata Attak Hem Klosap
11. Wanem nao Jehovah duim finis for finisim raf fasin?
11 From God bilong peace heitim raf fasin, iumi savve minim why hem duim samting finis for finisim man wea kosim datwan, Devil Satan. Samting wea hem duim finis, hem mekem Satan lusim faet againstim datfala archangel Michael—King wea God appointim, Christ Jesus. Bible storyim diswan olsem: “War hem start long heven: Michael and olketa angel bilong hem faet againstim dragon, and dragon and olketa angel bilong hem faet bat olketa no win, and nomoa eni ples stap for olketa long heven. So, olketa torowem go daon datfala bigfala dragon, datfala firstfala snek, datwan wea olketa kolem Devil and Satan, wea hem giamanim olketa man long earth; olketa torowem hem kam daon long earth, and olketa torowem olketa angel bilong hem go daon witim hem.”—Revelation 12:7-9.
12, 13. (a) Why nao datfala year 1914 hem important tumas? (b) Wanem nao profesi bilong Ezekiel sei bae kasem olketa wea saportim Kingdom bilong God?
12 Olketa date long Bible and samting wea happen long world point go long datfala year 1914 olsem taem wea datfala war hem kamap long heven. Start kam long datfala taem, olketa samting long world hem gogo for worse. Revelation 12:12 explainim reason for diswan, hem sei: “Dastawe iufala hapi, iufala heven and iufala wea stap long there! Trabol for earth and for sea, bikos Devil hem kam daon finis long iufala, and hem kros tumas, from hem savve hem garem shortfala taem nomoa.”
13 Iumi no sapraes hao Devil hem barava kros long olketa anointed worshiper bilong God and olketa “nara sheep” wea fren bilong olketa. (John 10:16; Revelation 12:17) Klosap nao disfala kros bae barava kamap big tumas taem Devil hem barava attakim evriwan wea saportim and putim trust bilong olketa long datfala Kingdom bilong God wea rul finis. Ezekiel chapter 38 storyim disfala bigfala attak olsem attak bilong “Gog bilong land bilong Magog.”
14. Hu nao protectim Olketa Jehovah’s Witness bifor, and waswe, bae olketa duim diswan for olowe?
14 Start kam long taem wea olketa aotem Satan from heven, samfala taem samfala sekson bilong politik protectim pipol bilong God from olketa attak bilong Satan, olsem Revelation 12:15, 16 storyim long tokpiksa wei. Bat, Bible showimaot hao long lastfala attak bilong Satan, no eni sekson long earth bae protectim olketa wea trust long Jehovah. Waswe, diswan shud mekem olketa Christian fraet or barava seksek? Barava nomoa nao!
15, 16. (a) Hao nao promis bilong Jehovah for pipol bilong hem long taem bilong Jehoshaphat mekem olketa Christian distaem no fraet? (b) Wanem example nao Jehoshaphat and olketa pipol showimaot for olketa servant bilong God distaem?
15 God bae saportim pipol bilong hem long sem wei wea hem saportim nation bilong hem long taem bilong King Jehoshaphat. Bible hem sei: “Lisin gud, evriwan long Judah and iufala pipol bilong Jerusalem and King Jehoshaphat! Diswan nao samting wea Jehovah hem talem long iufala, ‘Iufala mas no fraet or barava seksek from disfala bigfala sekson; bikos disfala faet hem no bilong iufala, bat bilong God. . . . Iufala bae no need for faet. Standap redy, standap kwaet and lukim salvation bilong Jehovah for saed bilong iufala. O Judah and Jerusalem, no fraet or barava seksek. Tumoro go againstim olketa, and Jehovah bae stap witim iufala.’ ”—2 Chronicles 20:15-17.
16 Jehovah promisim pipol bilong Judah hao olketa bae no need for faet. Long sem wei, taem Gog bilong Magog hem attakim pipol bilong God, olketa bae no holem eni samting for faet for defendim olketa seleva. Bat, olketa bae “standap kwaet and lukim salvation bilong Jehovah” for saed bilong olketa. Hem tru, for standap kwaet no minim for no duim eni samting, olsem wei wea pipol bilong God long taem bilong Jehoshaphat duim samfala samting. Bible hem sei: “Stretawe Jehoshaphat baodaon low witim feis bilong hem long graon, and full Judah and evriwan wea stap long Jerusalem foldaon front long Jehovah for showimaot respect long Jehovah. . . . And tu, [Jehoshaphat] story witim olketa pipol and putim olketa man for singsing for Jehovah and olketa wea offerim praise wea werem holy kaleko taem olketa go front long olketa man wea holem samting for faet, and olketa sei: ‘Givim praise long Jehovah, from loving-kaeness bilong hem go kasem taem olowe.’” (2 Chronicles 20:18-21) Tru nao, nomata taem olketa enemy attakim olketa, olketa go ahed for praisem Jehovah. Diswan hem kamap example for Olketa Jehovah’s Witness for followim taem Gog start for attakim olketa.
17, 18. (a) Wanem nao gudfala tingting wea Olketa Jehovah’s Witness garem distaem abaotem attak bilong Gog? (b) Wanem nao reminder wea olketa young Christian kasem no longtaem go nomoa?
17 Go kasem datfala taem—and bihaen attak bilong Gog hem start finis—Olketa Jehovah’s Witness bae go ahed for saportim Kingdom bilong God. Olketa bae go ahed for kasem strong and protection insaed 94,600 kongregeson raonem world. (Isaiah 26:20) Distaem hem barava gudfala taem for praisem Jehovah and no fraet! Nomata olketa luksavve attak bilong Gog hem klosap, diswan no mekem olketa for fraet and muv bak. Bat, diswan muvim olketa for duim moa samting wea olketa savve duim for givim sakrifaes bilong praise long Jehovah.—Psalm 146:2.
18 Wei wea planti thousand young wan raonem full world wea join insaed long full-taem ministry showimaot olketa garem disfala gudfala tingting. For mekhae hao diswan nao hem best wei bilong laef, olketa releasem datfala tract Youths—What Will You Do With Your Life? long olketa distrik convention long 2002. Olketa young and olo Christian hapi for kasem olketa reminder olsem.—Psalm 119:14, 24, 99, 119, 129, 146.
19, 20. (a) Why nao olketa Christian no need for fraet or barava seksek? (b) Nextfala study bae duim wanem?
19 Nomata wanem samting go ahed long world, olketa Christian no need for fraet or barava seksek. Olketa savve hao klosap nao Kingdom bilong Jehovah bae finisim evri kaen raf fasin for olowe. Olketa kasem comfort tu for savve hao resurrection bae givim laef bak long planti wea dae long raf fasin. Nomata samfala bae garem first chance for lane abaotem Jehovah taem olketa resurrect, for samfala narawan wea savve finis, resurrection minim olketa savve go ahed witim faithful service long Jehovah.—Acts 24:15.
20 Iumi olketa tru Christian minim hao iumi mas keepim Christian wei for no teksaed and iumi disaed strong for duim olsem. Iumi laek for hol strong long datfala nambawan hope for “standap kwaet and lukim salvation bilong Jehovah.” Nextfala article bae strongim faith bilong iumi taem hem mekem iumi luksavve hao samting wea happen distaem helpem iumi for minim go moa hao Bible profesi hem go ahed for fulfill.
[Footnote]
a For lukim olketa example bilong pipol wea finis for duim raf fasin for mekem olketa fit for kamap olketa Witness, lukim Awake! magasin bilong March 22, 1990, page 21; August 8, 1991, page 18; and olketa Wastaoa magasin bilong January 1, 1996, page 3-4; August 1, 1998, page 5.
Waswe, Iu Savve Explainim?
• Why nao planti pipol distaem no garem eni hope?
• Why nao Olketa Jehovah’s Witness feel sure future bae gud tumas?
• Wanem nao Jehovah duim finis abaotem samting wea kosim evri kaen raf fasin?
• Why nao no eni reason stap for iumi fraetem attak bilong Gog?
[Piksa long page 13]
Jesus showimaot stretfala example bilong Christian wei for no teksaed
[Olketa Piksa long page 16]
Planti thousand young Witness hapi for join insaed full-taem ministry
[Piksa Credit Line long page 12]
UN PHOTO 186226/M. Grafman