Standap Kwaet and Lukim Salvation Bilong Jehovah!

“Standap redy, standap kwaet and lukim salvation bilong Jehovah for saed bilong iufala.”—2 CHRONICLES 20:17.

1, 2. Why nao attak bilong “Gog bilong land bilong Magog” wea klosap hem moa serious winim danger bilong international terrorism?

SAMFALA sei terrorism hem wanfala attak againstim world community, or wea maet finisim wei wea olketa man laef long earth. Hem tru, olketa man mas barava ting strong long kaen danger olsem. Long narasaed, wanfala attak wea moa serious hem stap, and klosap full world ting nating long hem. Wanem nao diswan?

² Hem nao attak bilong “Gog bilong land bilong Magog,” wea Bible storyim long Ezekiel chapter 38. Waswe, hem ova tumas for sei attak hia hem moa serious winim danger bilong international terrorism? Nomoa nao, bikos attak bilong Gog no just againstim olketa gavman bilong man nomoa. Hem barava attakim gavman bilong God long heven! Bat, no olsem olketa man, wea hard for defendim olketa seleva evribit from eni attak, Creator hem fit evribit for deal witim barava nogud attak bilong Gog.

Attak Againstim Gavman Bilong God

3. Wanem nao olketa world ruler kasem chance for duim start kam long 1914, and wanem nao olketa duim?

³ Raoa midolwan long King bilong God wea rul distaem and wicked system bilong Satan hem go ahed start kam long taem wea Kingdom bilong God hem start for rul long heven long 1914. Long datfala taem, olketa man wea rul kasem warning for stap anda long Ruler wea God chusim. Bat olketa nating willing, olsem Bible profesi talem: “Olketa king bilong earth standap and olketa bigman hipap tugeta olsem wanfala sekson for againstim Jehovah and againstim anointed wan bilong hem, and sei: ‘Iumi brekem olketa rope and torowem olketa string bilong olketa from iumi!’” (Psalm 2:1-3) Wei for againstim rul bilong Kingdom bae kamap big tumas long taem bilong attak bilong Gog bilong Magog.

4, 5. Hao nao olketa man savve faet againstim gavman bilong God long heven wea olketa no savve lukim?

⁴ Maet iumi laek for savve hao nao olketa man savve faet againstim wanfala gavman long heven wea olketa no savve lukim. Bible showimaot hao insaed disfala gavman hem “datfala wan handred and foti-foa thousand, wea hem baem from earth,” and datfala “Lamb,” Christ Jesus. (Revelation 14:1, 3; John 1:29) From datfala niu gavman hem stap long heven, Bible kolem datwan “niu heven,” bat hem kolem olketa wea stap anda long datwan long earth “wanfala niu earth.” (Isaiah 65:17; 2 Peter 3:13) Staka long olketa member bilong datfala 144,000 wea bae rul witim Christ finisim faithful laef bilong olketa long earth. Long wei olsem olketa pruvim olketa fit for olketa niu assignment for serve long heven.

⁵ Bat, smolfala remnant bilong datfala 144,000 stap yet long earth. Insaed datfala 15,000,000 wea attendim celebration bilong Evening Kaikai bilong Lord long 2002, only 8,760 showimaot hope bilong olketa for kasem datfala assignment long heven. Eniwan wea bighed for attakim olketa member bilong datfala Kingdom wea stap yet long earth really attakim Kingdom bilong God.—Revelation 12:17.

Datfala King Winim Faet Bilong Hem Evribit

6. Hao nao feeling bilong Jehovah and Christ abaotem wei for againstim pipol bilong God?

⁶ Bible talem finis wanem Jehovah bae duim taem olketa againstim Kingdom bilong hem: “Datwan wea sidaon long heven bae laf; Jehovah nao bae mekfani long olketa. Long datfala taem hem bae tok kros long olketa and from hem feel nogud hem bae tok strong long olketa, and sei: ‘Mi, yes mi, putim king bilong mi long Zion, holy maunten bilong mi.’” (Psalm 2:4-6) Taem hem kam nao for Christ, anda long direction bilong Jehovah, “for winim faet bilong hem evribit.” (Revelation 6:2) Hao nao Jehovah ting long disfala wei for againstim pipol bilong hem long taem bilong lastfala faet? Jehovah ting long diswan olsem olketa againstim hemseleva and againstim King bilong hem wea rul. Jehovah hem sei, “man wea tasim iufala hem tasim eye bilong mi.” (Zechariah 2:8) And Jesus talem klia hao samting wea pipol duim or no duim long olketa anointed brata bilong hem, hem olsem olketa duim or no duim long hemseleva.—Matthew 25:40, 45.

7. Why nao olketa bilong datfala “big crowd,” wea Revelation 7:9 story abaotem experiencem kros bilong Gog?

⁷ Hem tru, olketa wea saportim anointed remnant bae experiencem kros bilong Gog tu. Olketa hia wea hope for kamap olketa member bilong “niu earth” bilong God, olketa nao “wanfala big crowd” wea “kamaot from evri nation and tribe and pipol and languis.” (Revelation 7:9) Bible sei olketa “standap front long throne and front long Lamb, and olketa werem white kaleko.” Diswan piksarem wei wea God and Christ Jesus appruvim olketa. Olketa holem “olketa branch bilong palm tree,” and praisem Jehovah olsem tru Sovereign long universe, wea rul thru long King bilong hem, Jesus Christ, datfala “Lamb bilong God.”—John 1:29, 36.

8. Attak bilong Gog bae mekem Christ duim wanem samting, and wanem nao bae kamaot from datwan?

⁸ Attak bilong Gog bae mekem King wea God markem for duim samting and faetem datfala war bilong Armageddon. (Revelation 16:14, 16) Olketa wea nating willing for acceptim sovereign rul bilong Jehovah bae finis evribit. Bat, persecution wea olketa kasem wea loyal long Kingdom bilong God bae finis for olowe. Aposol Paul hem raet olsem abaotem diswan: “Diswan nao pruvim raeteous judgment bilong God, wea mekem iufala kamap fit for kingdom bilong God, wea iufala safa for hem. Diswan minim hem stret long saed bilong God for peim bak trabol long olketa wea mekem trabol for iufala, bat, for iufala wea kasem trabol, kasem help olsem mifala long taem wea Lord Jesus hem showaot from heven witim olketa strongfala angel bilong hem insaed wanfala bigfala fire, taem hem pei bak long olketa wea no savve long God and olketa wea no obeyim gud nius abaotem Lord bilong iumi Jesus.”—2 Thessalonians 1:5-8.

9, 10. (a) Hao nao Jehovah mekem Judah winim wanfala barava nogud enemy? (b) Olketa Christian distaem mas go ahed for duim wanem samting?

⁹ Long datfala big trabol wea bae kam, wea end bilong hem nao Armageddon, Christ bae faet againstim evri nogud samting. Bat olketa follower bilong hem bae no need for faet, long sem wei wea datfala tu-tribe kingdom bilong Judah winim 2,900 year bifor no need for faet. Datfala faet hem bilong Jehovah, and hem nao mekem olketa win. Bible record hem sei: “Jehovah putim olketa man for weit haed for attakim olketa son bilong Ammon, Moab and maunten area bilong Seir wea kam long Judah, and olketa killim each other. And olketa son bilong Ammon and Moab go againstim olketa bilong maunten area bilong Seir for finisim and killim olketa dae evribit; and taem olketa killim dae olketa bilong Seir, olketa help for killim dae each other. Bat for saed bilong Judah, olketa kam long taoa for luk go aot long wilderness. Taem olketa tan for luk go long datfala crowd, olketa dead body bilong olketa foldaon finis long graon and no eniwan ranawe.”—2 Chronicles 20:22-24.

¹⁰ Hem barava olsem Jehovah talem finis: “Iufala bae no need for faet.” (2 Chronicles 20:17) Diswan hem example for olketa Christian followim taem Jesus Christ hem kam “for winim faet bilong hem evribit.” Go kasem datfala taem, olketa go ahed for faet againstim olketa nogud samting, no witim physical samting for faet, bat long spiritual wei. Long wei olsem olketa “winim nogud fasin witim gud fasin.”—Romans 6:13; 12:17-21; 13:12; 2 Corinthians 10:3-5.

Hu Nao Bae Leadim Attak Bilong Gog?

11. (a) Hu nao bae Gog iusim for attak bilong hem? (b) Wanem nao hem minim for stap wekap long spiritual wei?

¹¹ Gog bilong Magog hem Devil Satan long lowfala position bilong hem start kam long 1914. From hem wanfala spirit creature, hem no savve attak stret, bat hem bae iusim olketa sekson bilong man for duim olketa nogud samting bilong hem. Hu nao olketa hia? Bible no barava talem iumi, bat hem talem iumi samfala samting wea savve helpem iumi for luksavve long olketa. Taem olketa samting wea happen long world fulfillim olketa Bible profesi, bae iumi luksavve moa klia. Pipol bilong Jehovah no trae for guessim wanem maet happen bat olketa stap wekap long spiritual wei and luksavve long olketa samting wea happen saed long politik and religion wea showimaot dat Bible profesi hem fulfill.

12, 13. Wanem nao profesi bilong Daniel sei abaotem wanfala last attak againstim pipol bilong God?

¹² Profet Daniel givim iumi moa information abaotem lastfala attak againstim pipol bilong God. Hem sei: “Witim bigfala kros hem [datfala king bilong north] bae go for distroem and killim dae planti pipol. And hem bae putim olketa bigfala tent bilong hem midolwan long nambawan sea and holy maunten bilong Decoration.”—Daniel 11:44, 45.

¹³ Long taem bilong Bible, “nambawan sea” hem datfala Great Sea, or Mediterranean, and “holy maunten” hem Zion, wea Jehovah sei olsem abaotem hem: “Mi, yes mi, putim king bilong mi long Zion, holy maunten bilong mi.” (Psalm 2:6; Joshua 1:4) So, long spiritual wei, datfala land “midolwan long nambawan sea and holy maunten” hem piksarem gudfala spiritual living bilong olketa anointed Christian. Olketa finis from wei for olsem part bilong datfala tokpiksa sea bilong olketa man wea stap farawe from God, and olketa luk forward for rul witim Christ Jesus long datfala Kingdom long heven. Hem klia hao, attak bilong king bilong north wea bae fulfillim profesi bilong Daniel, bae targetim olketa anointed servant bilong God, witim datfala big crowd bilong olketa loyal fren bilong olketa.—Isaiah 57:20; Hebrews 12:22; Revelation 14:1.

Wanem Nao Bae Olketa Servant Bilong God Duim?

14. Pipol bilong God bae duim wanem thrifala samting taem olketa kasem attak?

¹⁴ Wanem nao bae olketa servant bilong God duim taem disfala attak hem start? Long datfala taem tu, samting wea nation bilong God long taem bilong Jehoshaphat duim hem olsem example for followim. Pipol bilong datfala nation kasem komand for duim thrifala samting: (1) standap redy, (2) standap kwaet, and (3) lukim salvation bilong Jehovah. Wanem nao pipol bilong God distaem mas duim for followim disfala toktok?—2 Chronicles 20:17.

15. Wanem nao hem minim for pipol bilong Jehovah standap redy?

¹⁵ Standap redy: Pipol bilong God bae no seksek bat go ahed long waka bilong olketa for saportim Kingdom bilong God. Olketa bae keepim Christian wei for no teksaed. Olketa bae “stand strong, no seksek” long loyal service bilong olketa for Jehovah and bae go ahed for praisem Jehovah long pablik for loving-kaeness bilong hem. (1 Corinthians 15:58; Psalm 118:28, 29) No eni hevi wea kam long olketa distaem or long future bae mekem olketa duim samting wea bae spoelem wei wea God appruvim olketa.

16. Long olketa wanem wei nao olketa servant bilong Jehovah bae standap kwaet?

¹⁶ Standap kwaet: Olketa servant bilong Jehovah bae no trae for sevem olketa seleva bat bae trustim Jehovah evribit. Jehovah nomoa fit for sevem olketa servant bilong hem from disfala olabaot world, and hem promis for duim olsem. (Isaiah 43:10, 11; 54:15; Lamentations 3:26) For trustim Jehovah bae minim iumi mas trustim tu organization bilong hem long earth wea hem iusim for winim 100 year finis for duim waka bilong hem. Long datfala taem winim enitaem bifor, olketa tru Christian bae need for trustim olketa brata bilong olketa wea Jehovah and King bilong hem markem for lead. Olketa faithful man hia bae directim pipol bilong God. For no lisin long direction bilong olketa savve lead go long barava nogud samting.—Matthew 24:45-47; Hebrews 13:7, 17.

17. Why nao olketa faithful servant bilong God bae lukim salvation bilong Jehovah?

¹⁷ Lukim salvation bilong Jehovah: Salvation nao reward for evriwan wea keepim Christian faithful fasin and wea trustim Jehovah for sevem olketa. Go kasem lastfala hour—fitim wanem olketa savve duim—olketa bae talemaot hao day bilong Jehovah for judge hem kam nao. Evri creation mas savve hao Jehovah hem tru God and hem garem olketa faithful servant long earth. No enitaem long future bae eni need kamap moa for pruvim right bilong Jehovah for rul olsem sovereign.—Ezekiel 33:33; 36:23.

18, 19. (a) Hao nao datfala song bilong win long Exodus chapter 15 talemaot feeling bilong olketa wea bae winim attak bilong Gog? (b) Hem fitim for pipol bilong God for duim wanem samting distaem?

¹⁸ Witim niufala strong, pipol bilong God bae go insaed datfala niu world, willing for singim wanfala song bilong win, olsem olketa Israelite duim bihaen olketa sev thru long Red Sea. From olketa thankiu for olowe long Jehovah for wei wea hem protectim each wan, and olketa olsem wanfala grup, olketa bae talem disfala toktok from bifor kam: “Mi sing long Jehovah, from hem kamap barava hae. . . . Jehovah hem strongfala man bilong war. Jehovah nao nem bilong hem. . . . Raet hand bilong iu, O Jehovah, savve pisisim wanfala enemy. And from iu barava moa hae winim eniwan, iu savve torowem go daon olketa wea kamap againstim iu; iu sendem go hotfala kros bilong iu, hem finisim olketa olsem drae grass. . . . Long loving-kaeness bilong iu, iu leadim pipol wea iu kasem bak, long strong bilong iu, iu bae barava leadim olketa long holy ples bilong iu. . . . Bae iu tekem olketa kam and plantim olketa long maunten bilong iu, wanfala set ples wea iu redyim finis for iu for stap, O Jehovah, wanfala holy ples, O Jehovah, wea hand bilong iu wakem. Jehovah bae rul olsem king go kasem taem olketa no markem, and for olowe.”—Exodus 15:1-19.

¹⁹ Distaem, from hope bilong laef olowe hem moa klia winim enitaem bifor, hem barava fitim for olketa servant bilong God for showimaot love bilong olketa for Jehovah and for disaed strong moa for servem hem olsem King bilong olketa for olowe!—1 Chronicles 29:11-13.

Waswe, Iu Savve Explainim?

• Why nao bae Gog attakim olketa anointed and nara sheep?

• Hao nao bae pipol bilong God standap redy?

• Wanem nao hem minim for standap kwaet?

• Hao nao bae pipol bilong God lukim salvation bilong Jehovah?

[Piksa long page 18]

Jehovah mekem Jehoshaphat and pipol bilong hem win, and olketa no need for faet

[Piksa long page 20]

Olketa anointed and nara sheep waka tugeta for saportim sovereign rul bilong Jehovah

[Piksa long page 22]

Olsem olketa Israelite bifor, klosap nao pipol bilong God bae singim wanfala song bilong win