Gilead Skul—Trainim Olketa Missionary for 60 Year
“FROM mifala duim deep study long Bible, mifala kam moa klos long Jehovah and lanem moa samting abaotem organization bilong hem. Diswan redyim mifala for wanfala assignment long nara kantri.” Hem nao wei wea wanfala graduate bilong first class story abaotem course wea hem duim long Watchtower Bible Skul Bilong Gilead. From taem hem start 60 year bifor, Gilead Skul sendem aot olketa missionary. Long March 8, 2003, graduation bilong mek-114 class hem kamap long Watchtower Educational Center long Patterson, New York. Datfala 6,404 pipol wea hipap lisin gud long program wea garem olketa tok, interview and wanfala grup wea story tugeta.
Chairman hem Theodore Jaracz, wanfala member bilong Governing Body. Firstfala toktok bilong hem mekhae hao datfala audience kam from staka difren ples, olsem Asia, Caribbean, Central and South America, and Europe. Brata Jaracz story raonem 2 Timothy 4:5 for strongim hao main waka bilong missionary wea kasem training long Gilead hem for “duim waka for talemaot gud nius.” Olketa missionary witness abaotem truth long wei for teachim Bible long pipol.
Olketa Student Kasem Lastfala Instruction
John Larson, wanfala member bilong United States Branch Komiti hem givim first wan long samfala shortfala tok. Subject bilong hem wea strongim faith hem: “Sapos God Stap Witim Iumi, Hu Nao Bae Againstim Iumi?” (Romans 8:31) Brata Larson explainim reason from Bible why olketa student savve trustim evribit paoa bilong Jehovah for helpem olketa winim eni problem wea olketa maet feisim long assignment bilong olketa. Brata Larson storyim Romans 8:38, 39 and encouragem olketa student: “Stop and ting raonem paoa wea God iusim for helpem iu, and no forget hao no eni samting savve stopem wei wea Jehovah barava interest long iu.”
Next speaker hem Guy Pierce, wanfala member bilong Governing Body. Hem chusim theme “Keepim Eye Bilong Iu Hapi!” (Luke 10:23) Hem explainim hao for garem trufala hapi man mas savve long Jehovah and minim purpose bilong hem and tu for lukim wei wea olketa Bible profesi fulfill. Nomata wanem ples olketa go long hem, olketa student savve keepim trufala hapi taem olketa keepim eye bilong olketa hapi. Brata Pierce encouragem olketa graduate for barava ting raonem gudfala fasin bilong Jehovah and for keepim wei for duim will bilong Hem evritaem long heart and mind bilong olketa. (Psalm 77:12) Olketa savve winim eni problem wea olketa maet kasem long wei tingim gud saed bilong olketa samting hia.
Then datfala class kasem samfala lastfala encouragement from tufala instructor wea teachim olketa evriday long datfala course. Title bilong tok bilong Lawrence Bowen hem wanfala kwestin olsem: “Waswe, Iu Luk Aotem Glory?” Planti pipol tingim glory olsem wei for kasem praise, honor, and bignem for olketa seleva. Bat, man for raetem psalm Asaph, hem savve long mining bilong trufala glory—wei for fren witim Jehovah wea hem wanfala spesol treasure. (Psalm 73:24, 25) Speaker encouragem olketa student hia wea graduate for keepim klos wei for fren witim Jehovah thru long wei for go ahed duim deep study long Bible. Olketa angel “laek for lukluk gud” long evri information saed long wei wea purpose bilong Jehovah hem fulfill thru long Christ. (1 Peter 1:12) Olketa interest for lanem evri samting abaotem Father bilong olketa mekem olketa savve showimaot glory bilong God. Then datfala speaker encouragem olketa student for givim glory long Jehovah long missionary assignment bilong olketa long wei for helpem nara pipol faendem datfala spesol treasure.
Registrar bilong datfala skul, Wallace Liverance, endim first part bilong program witim tok wea garem theme: “Tok Abaotem Wisdom Bilong God Long Wanfala Holy Secret.” (1 Corinthians 2:7) Wanem nao disfala wisdom bilong God wea Paul story abaotem long missionary service bilong hem? Hem datfala wei wea Jehovah, witim wisdom and paoa, bae mekem peace and wan mind kamap evriwea long universe. Disfala wisdom hem join witim Jesus. Winim wei for preach abaotem hao for iusim olketa Bible principle for stretem olketa problem bilong world, Paul helpem pipol for minim hao God nao bae stretem bak evri nogud samting wea kamaot from sin bilong Adam. (Ephesians 3:8, 9) Brata Liverance encouragem olketa graduate: “Iusim spesol privilege bilong service bilong iu olsem hao Paul iusim, wea ting long missionary assignment bilong hem olsem chance for helpem pipol for minim hao Jehovah bae fulfillim purpose bilong hem.”
Bihaen disfala tok, Mark Noumair, narafala Gilead instructor, hem leadim wanfala story witim samfala student bilong datfala class. Datfala theme “Wei for Studyim Word Bilong God Mekem Olketa Strongfala Minister” hem mekhae long toktok bilong Paul long Romans 10:10. Datfala class talemaot olketa difren experience wea olketa kasem long field service wea olketa duim taem olketa attendim datfala skul. Olketa experience hia showimaot hao taem iumi study and ting raonem Word bilong God, evri gud samting abaotem Jehovah God and Kingdom bilong hem bae fulap insaed heart bilong iumi and bae iumi storyim long nara pipol. Insaed faevfala month wea olketa stap long datfala Watchtower Educational Center, olketa student hia startim winim 30 hom Bible study witim pipol wea interest long territory bilong olketa kongregeson wea klosap, nomata olketa kongregeson duim datfala territory planti taem.
Olketa Mature Wan Givim Gudfala Advaes
Taem olketa skul, olketa student kasem gud samting from wei for kaban witim olketa Bethel famili member long United States. Tufala member bilong datfala U.S. Branch, Robert Ciranko and Robert P. Johnson conductim olketa interview witim samfala wea faithful for servem Jehovah for longtaem finis, and tu samfala traveling overseer wea kasem spesol training long datfala Watchtower Educational Center. Evriwan wea olketa interviewim hem olketa Gilead graduate wea serve olsem olketa missionary bifor. Olketa student and famili and fren bilong olketa kasem encouragement taem olketa herem wisefala toktok bilong olketa spiritual man hia wea garem savve.
Samfala advaes bilong olketa hem olsem: “Go ahed busy evritaem long ministry and long kongregeson.” “No tinghae tumas long iuseleva. Tingting evritaem long purpose bilong iu olsem wanfala missionary, and ting long datfala assignment olsem hom bilong iu.” Samfala nara gudfala advaes showimaot hao Gilead training redyim wanfala minister for duim gudfala waka, long eni assignment wea hem kasem. Long hia nao samfala: “Mifala lane for waka gud tugeta.” “Datfala skul helpem mifala for acceptim olketa niu kastom.” “Mifala kasem moa savve long wei for iusim Bible.”
John E. Barr, wea member bilong Governing Body for longtaem finis, givim main tok long datfala program. Theme bilong hem wea kam from Bible hem “Long Full Earth Saond Bilong Olketa Hem Go Aot.” (Romans 10:18) Hem askem disfala kwestin: Waswe, pipol bilong God fulfillim datfala challenge distaem? Barava nao! Long 1881, kwestin insaed Wastaoa magasin askem olketa wea readim: “Waswe, iu duim preaching waka?” Then datfala speaker remindim evriwan long audience abaotem datfala spesol invitation wea go aot long datfala convention long Cedar Point, Ohio, U.S.A. long 1922: “Talemaot King and Kingdom bilong hem!” Gogo, strong bilong olketa faithful servant bilong God muvim olketa for talemaot olketa nambawan Kingdom truth long evri nation. Thru long olketa pablikeson and mouth bilong olketa wea talemaot gud nius, datwan kasem evri farawe ples wea pipol stap long earth—wea givim praise and honor long Jehovah. Long naesfala conclusion bilong hem for muvim olketa graduate, Brata Barr encouragem olketa for tingim evri blessing wea olketa kasem, taem hem sei: “Evriday, taem iu prea long Jehovah long assignment bilong iu, talem bigfala thankiu long hem for part wea iu duim for fulfillim datfala toktok, ‘Long full earth saond bilong olketa hem go aot.’”
Bihaen disfala tok, olketa readim kam olketa greeting and then chairman givim wanfala diploma long each graduate. Then, witim feeling bilong hapi and sorre for lusim datfala skul wea olketa lovem tumas, wanfala student readim resolution long Governing Body and Bethel famili wea talemaot feeling from heart hao olketa disaed strong for praisem Jehovah “start long disfala taem go kasem taem olowe.”—Psalm 115:18.
Prea bilong mifala hem for olketa graduate hia getius long niufala hom bilong olketa and for helpem disfala preachim waka wea go ahed evriwea long world, olsem olketa wea graduate insaed 60 year wea go pas finis duim.
[Box long page 23]
INFORMATION ABAOTEM CLASS
Haomas kantri olketa kam from: 12
Haomas kantri olketa bae go long hem: 16
Haomas student: 48
Average age: 34.4
Average year insaed truth: 17.6
Average year insaed full-taem ministry: 13.5
[Piksa long page 24]
Mek-114 Class Bilong Watchtower Bible Skul Bilong Gilead wea Graduate
List long daon start long front and go bihaen, and olketa nem start long left go long raet bilong each laen.
(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martinez, L.; Millar, D.; Festré, Y.; Nutter, S. (3) Martinez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.