Olketa Willing for Givim Olketa Seleva
“PIPOL bilong iu bae willing for givim olketa seleva.” (Psalm 110:3) Disfala toktok garem spesol mining for 46 student bilong mek-118 class bilong Watchtower Bible Skul Bilong Gilead. Hao nao olketa redim olketa seleva for attendim disfala skul, wea trainim olketa missionary for helpem pipol long nara kantri kasem spiritual need bilong olketa? Mike and Stacie, wea tufala member bilong disfala mek-118 class, sei olsem: “Wei wea mitufala disaed for garem simpol living helpem mifala for markem olketa spiritual samting olsem main important samting. Mifala disaed strong for no letem wei wea mifala win saed long bisnis for mekem mifala no garem taem for aftarem olketa spiritual goal.” Olsem Mike and Stacie, olketa nara student long class willing for givim olketa seleva, and distaem olketa redi for preach abaotem Kingdom long fofala difren continent.
Long Saturday, March 12, 2005, namba bilong olketa wea hipap and barava enjoyim datfala graduation program hem 6,843. Chairman hem Theodore Jaracz, wanfala member bilong Governing Body bilong Olketa Jehovah’s Witness. Bihaen hem givim naesfala welkam long olketa guest wea kam from 28 kantri, hem storyim gudfala samting wea man kasem from Bible education. Hem talem toktok bilong William Lyon Phelps, wea hem wanfala teacher long America, and sei: “Iumi fit for talem hao evriwan wea savve gud long Bible, garem gudfala education.” Nomata education bilong world hem gud, Bible education hem barava moabeta. Diswan helpem pipol for kasem savve abaotem God, wea lead go long laef olowe. (John 17:3) Brata Jaracz praisem wei wea olketa student willing for duim moa samting for share long disfala Bible education program evriwea long world long winim 98,000 kongregeson bilong Olketa Jehovah’s Witness.
Encouragement Long Barava Taem for Olketa wea Graduate
Bihaen long introduction bilong chairman, William Samuelson storyim subject “Hao Nao Iu Savve Olsem Wanfala Olive Tree wea Garem Staka Frut Insaed Haos Bilong God,” wea hem kam from Psalm 52:8. Hem explainim hao Bible iusim olive tree long tokpiksa wei for storyim samting wea garem staka frut, luk naes, and wea fit for kasem honor. (Jeremiah 11:16) Taem hem markem olketa student witim olketa olive tree, datfala speaker hem sei: “Jehovah bae ting long iufala olsem olketa wea luk naes and kasem honor taem iufala gohed faithful long waka bilong iufala for preachim Kingdom long missionary assignment bilong iufala.” Long sem wei wea olive tree needim plande rut for mekem hem gohed laef, olketa student bae need for strongim olketa spiritual rut bilong olketa, mekem olketa no givap taem pipol no interest for lisin, maet againstim olketa, or taem olketa kasem eni nara hard samting long assignment bilong olketa.—Matthew 13:21; Colossians 2:6, 7.
John E. Barr, wea hem witim nara tufala member bilong Governing Body share long program, storyim theme, “Iufala Nao Salt Bilong Earth.” (Matthew 5:13) Hem storyim hao salt hem samting wea stopem kaikai for rotten, and long sem wei, waka wea olketa missionary duim for preachim Kingdom bilong God bae sevem laef bilong olketa wea lisin, and protectim olketa from kaen wei for rotten saed long fasin and long spiritual saed. Then, Brata Barr hem story long kaenfala wei taem hem barava encouragem olketa wea graduate for “keepim peace” witim olketa narawan. (Mark 9:50) Hem encouragem olketa olsem: “Mekem grow olketa frut bilong spirit, and mek sure fasin and toktok bilong iufala hem evritaem respectim and tingim feeling bilong narawan.”
Wallace Liverance, wea hem wanfala long olketa Gilead teacher hem storyim theme “Stap Insaed Ship Taem Iu Go Long Olketa Deep Wata.” Long sem wei wea wanfala ship wea stap long deep wata savve muv ahed stret, man bae fit for muv ahed long spiritual wei sapos hem minim “olketa deep samting bilong God,” wea hem nao olketa tru samting abaotem plan bilong God and wei wea hem bae fulfillim datwan. (1 Corinthians 2:10) Wei for stap long wata wea no deep long wei for satisfae nomoa long “olketa fasfala samting bilong olketa holy toktok bilong God,” bae stopem iumi for muv ahed, and savve lead go long wei for ‘faith bilong iumi hem shiprek.’ (Hebrews 5:12, 13; 1 Timothy 1:19) Brata Liverance finisim tok bilong hem taem hem sei: “Letem ‘riches, wisdom, and savve bilong God wea deep tumas,’ gohed for keepim iufala strong long missionary assignment bilong iufala.”—Romans 11:33.
Mark Noumair, wea hem nara Gilead teacher, storyim subject “Bae Iu Duim Samting wea Fitim Spiritual Present wea Iu kasem?” For winim 60 year, pipol barava respectim and tinghae long disfala Watchtower Bible Skul Bilong Gilead, bikos long ‘bigfala witness’ wea olketa wea graduate from disfala skul givim. (Genesis 31:48) Olketa student bilong mek-118 class bilong Gilead kasem disfala nambawan spiritual present tu. Brata Noumair encouragem olketa student for followim example bilong olketa Tekoite long taem bilong Nehemiah, long wei for hambol and waka gud tugeta witim olketa nara missionary and olketa brata long kongregeson. Hem encouragem olketa for no olsem olketa man wea Nehemiah storyim “wea nambawan” and wea olketa praod tumas, bat olketa mas willing for waka long kwaet wei and no laek for kamap main man.—Nehemiah 3:5.
Olketa Experience and Interview wea Teachim Gud Samting
Title bilong next part bilong program hem “Word Bilong God Gohed for Grow.” (Acts 6:7) Anda long direction bilong nara Gilead teacher, Lawrence Bowen, olketa student actim moa samfala experience wea olketa enjoyim long field ministry taem olketa attendim disfala skul. Olketa experience hia showimaot hao olketa student talemaot Word bilong God witim strong, and hao Jehovah hem barava blessim waka bilong olketa.
Richard Ashe interviewim samfala member bilong Bethel famili wea waka long klos wei witim disfala skul. Samting olketa talem helpem audience for minim go moa sapot wea Bethel famili givim for helpem olketa Gilead student kasem best samting from skul. Then, Geoffrey Jackson story witim samfala wea graduate from Gilead bifor. Olketa mekhae long plande chance wea olketa missionary garem for duim samting wea mekem Jehovah kasem praise and honor. Wanfala hem sei: “Pipol lukluk long evri samting wea olketa missionary duim. Olketa lisin, olketa lukim, and olketa no forget.” So olketa student kasem encouragement for evritaem showimaot gudfala example. For sure, disfala advaes bae helpem olketa long assignment bilong olketa.
Stephen Lett, wanfala member bilong Governing Body, givim last tok wea garem title, “Gohed Olsem Olketa wea Givim ‘Wata wea Laef.’ ” (John 7:38) Hem storyim hao insaed long faevfala month wea go pas, olketa student barava kasem gud samting from wei wea olketa drink gud from Word bilong God wea tru. Bat wanem nao olketa missionary bae duim witim information wea olketa kasem? Brata Lett barava encouragem olketa wea graduate for willing for sharem spiritual wata hia, mekem olketa narawan savve garem tu ‘wanfala spring wata insaed long olketa wea ran kamaot for givim laef olowe.’ (John 4:14) Speaker hem sei tu: “No forget for givim Jehovah, ‘wea hem nao wan wea givim datfala wata,’ honor and glory wea hem fit for kasem. Mas patient taem iu teachim olketa wea kamaot from Bigfala Babylon wea hangre long spiritual wei.” (Jeremiah 2:13) Brata Lett finisim tok bilong hem taem hem encouragem olketa wea graduate for strong for followim datfala spirit and bride, long wei for evritaem sei: “ ‘Kam!’ And letem eniwan wea thirsty kam; letem eniwan wea laekem for tekem wata bilong laef free.”—Revelation 22:17.
For finisim program, Brata Jaracz talemaot olketa greeting from olketa nara kantri. Then wanfala member bilong class readim wanfala leta from class for talemaot thankiu.
Waswe, iu savve serve long ples wea bigfala need hem stap? Sapos olsem, aftarem olketa spiritual goal, olsem olketa student hia duim. Garem datfala hapi and feeling for satisfae wea man kasem taem hem willing for givim hemseleva for servem God—maet olsem wanfala missionary, or olsem wanfala minister wea serve long kantri bilong hem.
[Box long page 13]
INFORMATION ABAOTEM CLASS
Haomas kantri olketa kam from: 8
Haomas kantri olketa bae go long hem: 19
Haomas student: 46
Average age: 33.0
Average year insaed truth: 16.5
Average year insaed full-taem ministry: 12.9
[Piksa long page 15]
Mek-118 Class Bilong Watchtower Bible Skul Bilong Gilead wea Graduate
List long daon start long front and go bihaen, and olketa nem start long left go long raet bilong each laen.
(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B. Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.