Kwestin From Reader

Why nao Hebrews 2:14 kolem Satan “datwan wea garem wei for kosim dae”?

For tok stret, Paul minim dat Satan, hemseleva or thru olketa wakman bilong hem, savve kosim dae bilong pipol. Dastawe, Jesus kolem Satan “man for killim dae man.”—John 8:44.

Pipol maet minim rong Hebrews 2:14 bikos samfala transleison sei Satan hem garem “paoa for killim dae pipol” or “paoa ovarem dae.” (King James Version; Revised Standard; New International Version; Jerusalem Bible) Toktok olsem mekem hem luk olsem Satan garem paoa evribit for killim dae eniwan wea hem laekem. Bat, hem no olsem. Sapos hem garem paoa olsem, maet hem killim dae olketa worshiper bilong Jehovah from disfala earth long taem finis .—Genesis 3:15.

Disfala Greek toktok “paoa ovarem dae” insaed samfala transleison and “garem wei for kosim dae” long New World Translation hem “kraʹtos tou tha·naʹtou.” Tou tha·naʹtou hem wan kaen toktok wea minim “dae.” Kraʹtos hem minim “force, strong.” Olsem Theological Dictionary of the New Testament talem, diswan minim “wei for garem force or strong bat hem no wei for iusim.” So, long Hebrews 2:14, Paul no minim dat Satan hem garem paoa ovarem dae evribit. Nomoa, bat hem showimaot wei wea Satan savve or fit for kosim dae.

Hao nao Satan mekius long wei wea hem “garem wei for kosim dae”? Long buk bilong Job, iumi read abaotem wanfala samting wea no happen evritaem. Datfala story sei Satan hem iusim wanfala strong wind wea ‘kosim dae’ bilong olketa pikinini bilong Job. Bat lukim hao Satan duim diswan only bikos God nao letem, from olketa mas disaedem wanfala important kwestin. (Job 1:12, 18, 19) Bat Satan hem no fit for killim dae Job. God no letem hem for duim datwan. (Job 2:6) Diswan showimaot hao nomata long samfala taem Satan hem kosim dae bilong samfala faithful man, iumi no need for fraet hao hem bae killim iumi dae long enitaem hem laek duim.

Satan savve iusim tu olketa man for killim dae pipol. Dastawe, planti Christian dae finis from faith bilong olketa, samfala dae from sekson wea kros tumas killim dae olketa or olketa dae from olketa bigman long gavman or nogud judge givim order for killim dae olketa.—Revelation 2:13.

Nara samting tu, samfala taem Satan kosim dae bilong pipol long wei hem mekius long olketa wik point bilong olketa. Long taem bilong olketa Israelite bifor, profet Balaam advaesem olketa bilong Moab for switim olketa Israelite “for duim nogud samting long eye bilong Jehovah.” (Numbers 31:16) Winim 23,000 Israelite nao dae from diswan. (Numbers 25:9; 1 Corinthians 10:8) Long sem wei, samfala distaem foldaon long “evri trik” bilong Satan and wei wea dirty fasin or olketa nara fasin wea no followim God switim olketa. (Ephesians 6:11) Tru, pipol olsem no evritaem dae stretawe. Bat chance bilong olketa for kasem laef olowe stap long danger, and long datfala wei Satan kosim dae bilong olketa.

Nomata iumi luksavve long olketa samting wea Satan savve iusim for spoelem man, iumi no need for fraet nating. Taem Paul sei hao Satan hem garem wei for kosim dae, hem talem tu hao Christ hem dae mekem hem “savve finisim [Satan] . . . and mekem free evriwan wea from olketa fraet long dae olketa slave bilong sin for full laef bilong olketa.” (Hebrews 2:14, 15) Tru nao, Jesus hem peim ransom and mekem free olketa man wea biliv from wei for slave long sin and dae.—2 Timothy 1:10.

Tru, iumi ting serious long wei wea Satan garem wei for kosim dae, bat iumi trustim wei wea Jehovah savve stretem eni samting wea Satan and olketa wakman bilong hem spoelem. Jehovah promisim iumi hao Jesus wea resurrect bae “brekem olketa waka bilong Devil.” (1 John 3:8) Thru long paoa bilong Jehovah, Jesus bae resurrectim olketa wea dae finis and long datfala wei hem finisim dae evribit. (John 5:28, 29) Then, Jesus bae showimaot wei wea Satan no garem paoa evribit taem hem lokim hem long hol wea deep tumas. Bihaen, Satan bae finis evribit.—Revelation 20:1-10.