Iumi Bae Wakabaot Long Nem Bilong Jehovah for Olowe!
“Iumi . . . bae wakabaot long nem bilong Jehovah, God bilong iumi for longfala taem, yes for olowe.”—MICAH 4:5.
1. Wanem nao olketa message long Micah chapter 3 go kasem 5?
JEHOVAH garem samting for talem pipol bilong hem, and hem iusim Micah olsem profet bilong hem. God bae duim samting againstim olketa wea duim rong. Hem bae panisim Israel for apostate fasin bilong olketa. Bat, gud samting nao, Jehovah bae blessim olketa wea wakabaot long nem bilong hem. Chapter 3 go kasem 5 long profesi bilong Micah talemaot klia olketa message hia.
2, 3. (a) Olketa leader bilong Israel shud garem wanem fasin, bat wanem nao olketa duim? (b) Hao nao bae iu explainim olketa tokpiksa long Micah 3:2, 3?
2 Profet bilong God hem sei: “Herem, plis, iufala chief bilong Jacob and iufala komanda bilong haos bilong Israel. Waswe, hem no waka bilong iufala for savve long justice?” Tru nao, hem nao samting olketa shud duim. Bat wanem nao olketa really duim? Micah hem sei: “Iufala wea heitim gud samting and lovem nogud samting, wea aotem skin from pipol and olketa part bilong body aot from olketa bon bilong olketa; iufala wea kaikaim tu body bilong pipol bilong mi, and wea aotem skin bilong olketa and smasem bon bilong olketa, and pisisim olketa olsem samting wea insaed long wanfala bigfala pot and meat insaed long wanfala pot for kuki.”—Micah 3:1-3.
3 Olketa leader hia putim hevi long poor pipol wea no garem eni protection! Hem isi for olketa wea herem Micah for minim olketa tokpiksa hia. Bifor olketa boelem wanfala sheep wea olketa busarem finis, olketa aotem skin and katem. Samfala taem olketa brekem olketa bon for aotem samting insaed. Olketa boelem olketa meat and bon insaed wanfala bigfala pot, olsem wan wea Micah storyim. (Ezekiel 24:3-5, 10) Disfala tokpiksa barava fitim nogud wei wea olketa wicked leader deal witim pipol wea stap anda long olketa long taem bilong Micah!
Jehovah Expectim Iumi for Showimaot Justice
4. Hao nao Jehovah and olketa leader bilong Israel difren evribit?
4 Datfala loving Shepherd, Jehovah, hem difren evribit from olketa leader bilong Israel. From olketa no showimaot justice, olketa fail for fulfillim assignment bilong olketa for protectim olketa sheep. Olketa selfish for mekius long olketa tokpiksa sheep and stopem olketa for kasem justice and spoelem olketa thru long “wei for spillim blood” bilong olketa, olsem Micah 3:10 storyim. Wanem nao iumi savve lanem from diswan?
5. Jehovah expectim olketa wea lead midolwan long pipol bilong hem for hao?
5 God expectim olketa wea lead midolwan long pipol bilong hem for showimaot justice. Iumi lukim hao diswan hem tru midolwan olketa servant bilong Jehovah distaem. And tu, diswan fitim Isaiah 32:1, wea sei: “Lukim! Wanfala king bae rul for raeteous fasin; and long saed bilong olketa prince, olketa bae rul olsem olketa prince for justice.” Bat waswe long taem bilong Micah? ‘Olketa wea heitim gud samting and lovem nogud samting’ go ahed for barava spoelem justice.
Prea Bilong Hu Nao Kasem Ansa?
6, 7. Micah 3:4 hem mekhae long wanem important point?
6 Waswe, wicked pipol wea stap long taem bilong Micah fit for expectim Jehovah for hapi long olketa? Barava nomoa nao! Micah 3:4 hem sei: “Olketa bae singaot long Jehovah for help, bat bae hem no ansarem olketa. And long datfala taem bae hem haedem feis bilong hem from olketa, from olketa duim enikaen nogud samting.” Diswan mekhae long wanfala barava important point.
7 Jehovah bae no herem prea bilong iumi sapos iumi go ahed for duim sin and no repent. Diswan barava tru sapos iumi garem dabol laef, haedem olketa rong wea iumi duim bat act olsem iumi servem God long faithful wei. Long Psalm 26:4, David hem sing: “Mi no sidaon witim olketa man wea no talem trufala samting; and mi no stap witim olketa wea haedem really fasin bilong olketa.” Jehovah bae nating ansarem prea bilong olketa wea barava min for go againstim Word bilong hem!
Kasem Paoa From Spirit Bilong God
8. Olketa giaman profet long taem bilong Micah kasem warning abaotem wanem samting?
8 Barava nogud fasin kamap evritaem midolwan olketa leader bilong Israel! Olketa giaman profet mekem pipol bilong God go rong long spiritual wei. Olketa greedy leader singaot “Peace!” bat agree for faet againstim eniwan wea no putim kaikai insaed mouth bilong olketa. Jehovah hem sei: “Dastawe, naet bae kam long iufala, mekem iufala no lukim eni vision; and bae iu stap long darkness, mekem iufala no duim divination. And sun bae go daon ovarem olketa profet, and day mas kamap dark long olketa. And olketa man for lukim olketa vision mas kasem shame, and olketa wea duim divination mas lus hope. And evriwan long olketa mas kavarem mustache bilong olketa.”—Micah 3:5-7a.
9, 10. Wanem nao hem minim for “kavarem mustache,” and why nao Micah no garem eni reason for duim datwan?
9 Why nao olketa “kavarem mustache”? Diswan hem samting wea olketa wicked man long taem bilong Micah duim from olketa shame. And hem fitim for olketa wicked man hia for shame. Olketa ‘bae no kasem ansa from God.’ (Micah 3:7b) Jehovah nating interest for herem prea bilong eniwan wea praod and wicked.
10 No eni reason for Micah “kavarem mustache.” Hem no feel shame. Jehovah ansarem olketa prea bilong hem. Tingim Micah 3:8, wea datfala faithful profet hem sei: “Long narasaed, mi fulap witim paoa, from spirit bilong Jehovah, and witim justice and strong.” Micah hem barava hapi hao insaed longfala and faithful ministry bilong hem, hem evritaem “fulap witim paoa, from spirit bilong Jehovah”! Diswan strongim hem for “talem Jacob hao hem againstim God and talem long Israel sin bilong hemseleva.”
11. Hao nao man kasem paoa for talemaot olketa message bilong God?
11 Micah needim moa strong winim wanem eni man garem for talemaot judgment message bilong God. Hem barava needim spirit bilong Jehovah. Waswe iumi? Iumi savve fulfillim assignment bilong iumi for preach only sapos Jehovah strongim iumi witim holy spirit bilong hem. Nomata iumi trae hard for preach, sapos iumi go ahed for duim sin, ministry bilong iumi bae fail evribit. God bae no ansarem iumi taem iumi prea for hem strongim iumi for disfala waka. Iumi kanduit talemaot olketa judgment message bilong Father bilong iumi long heven sapos “spirit bilong Jehovah” no stap long iumi. Thru long olketa prea wea God herem and help bilong holy spirit, iumi fit for talemaot toktok bilong God and no fraet, olsem Micah.
12. Why nao olketa disaepol bilong Jesus long first century fit for ‘go ahed for talemaot word bilong God and no fraet’?
12 Maet iu savve long story wea stap long Acts 4:23-31. Tingim sapos iu wanfala disaepol bilong Jesus long first century. Raf pipol wea persecutim olketa wea followim Christ luk aotem eni wei for mekem olketa stap kwaet. Bat olketa loyal wan hia prea long Sovereign Lord bilong olketa, and ask: “Jehovah, herem strongfala toktok bilong olketa, and letem olketa slave bilong iu go ahed for talem word bilong iu and no fraet.” Wanem nao happen? Taem olketa ask olsem, ples wea olketa hipap long hem seksek nao; and evriwan fulap witim holy spirit and talemaot word bilong God witim fasin for no fraet. So iumi tu mas prea long Jehovah and depend long help bilong hem thru long holy spirit taem iumi fulfillim ministry bilong iumi.
13. Wanem nao bae kasem Jerusalem and Samaria, and why nao olsem?
13 Tingim taem bilong Micah moa. Olsem Micah 3:9-12 talem, olketa ruler wea guilty long blood judge sapos olketa kasem bribe, olketa priest putim kost for teaching bilong olketa, and olketa giaman profet duim divination for selen. Dastawe God sei kapitol bilong Judah, Jerusalem, “bae kamap olketa hip nomoa bilong olketa samting wea distroe”! From giaman worship and rabis fasin kamap evriwea insaed Israel, Micah givim warning hao God bae mekem Samaria “wanfala hip bilong olketa samting wea distroe.” (Micah 1:6) Micah hem laef yet long 740 B.C.E. taem olketa army bilong Assyria finisim Samaria olsem profesi talem. (2 Kings 17:5, 6; 25:1-21) Tru nao, thru long strong bilong Jehovah nomoa, Micah fit for talemaot olketa strongfala message hia againstim Jerusalem and Samaria.
14. Hao nao profesi long Micah 3:12 hem fulfill, and hao nao datwan shud affectim iumi?
14 Judah kanduit missim judgment bilong Jehovah. For fulfillim profesi wea stap long Micah 3:12, olketa bae “digim Zion olsem wanfala pis land nating.” Iumi savve finis hao olketa samting hia happen taem olketa bilong Babylon finisim Judah and Jerusalem evribit long 607 B.C.E. Diswan hem happen winim wan handred year bihaen Micah talem profesi bilong hem, bat hem sure datwan bae kamap. Long sem wei, iumi shud barava feel sure disfala wicked system bae finis long “day bilong Jehovah” wea profesi talem finis.—2 Peter 3:11, 12.
Jehovah Stretem Samting
15. Long toktok bilong iuseleva, hao nao bae iu storyim datfala profesi long Micah 4:1-4?
15 Taem iumi luk go bak, next samting iumi lukim hem hao Micah talemaot wanfala barava spesol message bilong hope. Iumi lukim toktok wea barava encouragem man long Micah 4:1-4! Micah hem sei: “Hem mas happen long lastfala part bilong olketa day hao maunten bilong haos bilong Jehovah bae kamap strong winim top bilong olketa maunten, and diswan bae kamap hae winim olketa hill; and planti pipol mas go long diswan. . . . Hem bae judgem planti pipol, and stretem samting long olketa strongfala nation wea stap farawe. And olketa mas hammerim sword bilong olketa for kamap hou, and spia bilong olketa for kamap naef for katem tree. Olketa bae no iusim sword, nation againstim nation, and bae olketa no lanem war moa. And olketa bae sidaon, each wan anda long vine and anda long fig tree bilong hemseleva, and no eniwan bae mekem olketa seksek; from barava mouth bilong Jehovah bilong olketa army hem talem finis.”
16, 17. Hao nao Micah 4:1-4 hem go ahed for fulfill distaem?
16 Hu nao “planti pipol” and “olketa strongfala nation” hia? Hem no olketa nation and gavman bilong disfala world. Bat, hem minim olketa man wanwan from evri nation wea wan mind long holy service bilong Jehovah long maunten bilong tru worship bilong hem.
17 For fitim profesi bilong Micah, klosap nao klinfala worship bilong Jehovah bae kamap evriwea long earth. Distaem, pipol wea “garem fasin wea fitim laef olowe” lanem olketa wei bilong Jehovah. (Acts 13:48) Jehovah judgem and stretem samting long spiritual wei for olketa wea saed witim Kingdom. Olketa bae stap laef bihaen long “datfala big trabol” olsem part bilong datfala “big crowd.” (Revelation 7:9, 14) From olketa hammerim finis sword bilong olketa for kamap hou, nomata distaem, olketa stap long peace witim olketa nara Witness bilong Jehovah and nara pipol. Iumi hapi tumas for stap midolwan long olketa!
Disaed Strong for Wakabaot Long Nem Bilong Jehovah
18. Wanem nao wei wea ‘each wan sidaon anda long vine and fig tree bilong hemseleva’ hem piksarem?
18 Long disfala taem wea pipol evriwea long world barava fraet, iumi hapi tumas for lukim planti wea go ahed lanem olketa wei bilong Jehovah. Iumi luk forward long datfala taem wea klosap tumas wea olketa wea lovem God bae no lanem war and bae sidaon anda long vine and fig tree bilong olketa seleva. Planti taem pipol plantim olketa fig tree insaed grape plantation. (Luke 13:6) For sidaon anda long vine and fig tree hem piksarem gudfala living wea sef and garem peace. Nomata distaem, wei wea iumi fren witim Jehovah givim iumi peace long mind and mekem iumi stap sef long spiritual wei. Taem living olsem hem kamap anda long rul bilong Kingdom, bae iumi feel sef evribit and nating fraet.
19. Wanem nao hem minim for wakabaot long nem bilong Jehovah?
19 For mekem Jehovah appruvim iumi, iumi mas wakabaot long nem bilong hem. Micah 4:5 strongim disfala point taem datfala profet hem sei: “Evri pipol, for saed bilong olketa, bae wakabaot long nem bilong god bilong olketa; bat iumi, for saed bilong iumi, bae wakabaot long nem bilong Jehovah, God bilong iumi for longfala taem, yes for olowe.” For wakabaot long nem bilong Jehovah no minim iumi just sei hem God bilong iumi. Hem minim moa samting winim wei for tekpart long olketa Christian meeting and waka for preachim Kingdom, nomata olketa samting hia barava important tu. Sapos iumi wakabaot long nem bilong Jehovah, iumi dedicate finis long hem and trae hard for servem hem long faithful wei witim love wea iumi showimaot witim full soul bilong iumi. (Matthew 22:37) And olsem olketa trufala worshiper, iumi disaed strong for wakabaot long nem bilong God bilong iumi, Jehovah, for olowe.
20. Wanem nao Micah 4:6-13 profesi abaotem?
20 Distaem, lukluk long profesi toktok long Micah 4:6-13. “Dota bilong Zion” mas stap olsem prisoner “kam kasem Babylon.” Hem nao samting wea barava happen long olketa wea stap long Jerusalem long 607 B.C.E. Nomata olsem, profesi bilong Micah showimaot hao wanfala smol sekson bae go bak long Judah, and taem Zion hem kamap gud moa Jehovah bae mek sure olketa enemy pisis evribit.
21, 22. Hao nao Micah 5:2 hem fulfill?
21 Micah Chapter 5 storyim olketa nara big samting wea bae happen. Olsem example, lukim samting wea Micah 5:2-4 hem sei. Micah talem profesi hao wanfala Ruler wea God appointim—“wea hem start from taem bifor kam”—bae kamaot from Bethlehem. Hem bae rul olsem shepherd “long strong bilong Jehovah.” And tu, disfala Ruler bae nambawan, no long Israel nomoa, bat “go kasem evri ples long earth.” Maet pipol long world konfius abaotem hu nao disfala ruler, bat hem no secret samting long iumi.
22 Hu nao man wea moa important winim eni narawan wea born long Bethlehem? And hu nao bae “nambawan go kasem evri ples long earth”? Datfala Messiah, Jesus Christ! Taem Herod the Great askem olketa chief priest and scribe wea nao Messiah bae born, olketa ansarem hem: “Long Bethlehem bilong Judea.” Olketa talem tu toktok from Micah 5:2. (Matthew 2:3-6) Samfala man nating tu savve long diswan, bikos John 7:42 talem toktok bilong olketa wea sei: “Waswe, Scripture no sei Christ bae kam from laen bilong David, and from Bethlehem, datfala vilij wea David stap long hem bifor?”
Trufala Strong for Pipol
23. Wanem nao samting wea go ahed distaem wea fulfillim Micah 5:7?
23 Micah 5:5-15 storyim taem wea wanfala army bilong Assyria bae kam bat wea bae win for lelebet taem nomoa. Hem talem tu hao God bae finisim olketa nation wea no obey. Micah 5:7 promisim hao smol sekson bilong olketa Jew bae go bak long homland bilong olketa, bat disfala toktok hem fitim taem bilong iumi tu. Micah hem sei: “Olketa bilong Jacob wea stap yet mas kamap olsem dew from Jehovah midolwan long planti pipol, olsem bigfala rain long olketa plant.” Micah iusim disfala naesfala tokpiksa for profesi hao smol sekson, or remnant, bilong spiritual Jacob, wea hem nao Israel, bae kamap wanfala blessing from God for olketa pipol. Olketa “nara sheep” bilong Jesus wea garem hope for stap long earth hapi tumas for waka tugeta witim remnant bilong “Israel bilong God” distaem, for helpem pipol long spiritual wei. (John 10:16; Galatians 6:16; Zephaniah 3:9) Saed long diswan, wanfala important point stap for iumi ting raonem. Olsem olketa wea talemaot Kingdom, iumi evriwan shud tinghae long privilege bilong iumi for givimaot trufala strong long olketa narawan.
24. Olketa wanem point from Micah chapter 3 go kasem 5 nao muvim tingting bilong iu?
24 Wanem nao iu lanem from chapter 3 go kasem 5 bilong profesi bilong Micah? Maet samfala point olsem olketa hia: (1) God expectim olketa wea garem paoa midolwan long pipol bilong hem for showimaot justice. (2) Jehovah bae no ansarem olketa prea bilong iumi sapos iumi go ahed for duim sin and no repent. (3) Iumi savve fulfillim preaching assignment bilong iumi only sapos God strongim iumi thru long holy spirit bilong hem. (4) Iumi mas wakabaot long nem bilong Jehovah for hem appruvim iumi. (5) Olsem pipol wea talemaot Kingdom, iumi shud tinghae long privilege bilong iumi for givim spiritual blessing long pipol. Maet samfala nara point muvim tingting bilong iu. Wanem moa iumi savve lanem from disfala Bible buk bilong profesi? Nextfala article bae helpem iumi lanem samfala gudfala leson from last tufala chapter bilong profesi bilong Micah wea savve strongim faith bilong iumi.
Hao Nao Bae Iu Ansa?
• Wanem nao God expectim from olketa wea lead midolwan long pipol bilong hem?
• Why nao prea and holy spirit hem important long service bilong iumi for Jehovah?
• Hao nao pipol ‘wakabaot long nem bilong Jehovah’?
[Piksa long page 15]
Waswe, iu savve explainim tokpiksa bilong Micah abaotem wanfala pot for kuki?
[Olketa Piksa long page 16]
Olsem Micah, iumi duim ministry bilong iumi witim fasin for no fraet