Hao Nao Iu Savve Disaed Long Wisefala Wei?
KING Solomon bilong Israel bifor sei: “Wanfala wise man bae lisin and kasem moa instruction.” Samfala taem planti long iumi disaedem samting wea no wise, from iumi no followim advaes bilong nara pipol.—Proverbs 1:5.
Solomon raetem toktok hia witim nara “thri thousand wisefala toktok” wea bihaen olketa raetem insaed Bible. (1 Kings 4:32) Waswe, iumi savve kasem gud samting for savve and followim wise toktok bilong hem? Barava nao. Diswan helpem iumi for “savve long wisdom and discipline, for luksavve long olketa toktok for minim samting, for kasem discipline wea givim savve, raeteous fasin and judgment and stretfala fasin.” (Proverbs 1:2, 3) Iumi bae storyim faevfala point from Bible for helpem iumi disaedem samting long wisefala wei.
Tingim Samting wea Bae Affectim Iu for Olowe
Samfala disison bae barava affectim iu. Dastawe, hem gud for faendaot firstaem samting wea bae kamaot from datfala disison. No letem olketa gud samting iu bae kasem insaed shortfala taem nomoa mekem iu no luksavve long samting wea maet nogud wea bae affectim iu for olowe. Proverbs 22:3 givim disfala warning: “Man wea wise hem lukim trabol and protectim hemseleva, bat man wea no garem savve hem go nomoa and mas kasem problem long diswan.”
Hem maet help for iu raetem long pepa olketa samting wea bae kamaot from datfala disison insaed shortfala taem and for olowe. For chusim waka wea iu enjoy for duim and kasem bigfala pei hem maet samting wea iu savve kasem insaed shortfala taem nomoa. Bat waswe, disfala waka bae givim iu eni gud future? Waswe, maet gogo hem mekem iu stap farawe from olketa fren or famili? Waswe, maet hem spoelem health bilong iu or hem no interesting and mekem iu no hapi? Ting raonem long careful wei olketa gud and nogud saed, then disaedem samting wea moa important.
Givim Moa Taem
Hem no wise for kwiktaem disaedem samting. Proverbs 21:5 givim warning: “Olketa plan bilong man wea careful bae kasem reward, bat evriwan wea kwiktaem tumas bae garem need.” Olsem example, olketa teenager wea feeling nao muvim olketa shud givim moa taem for tingting gud firstaem and no kwiktaem for marit. Sapos nomoa, olketa bae kasem wanem William Congreve, man from England for raet long start bilong mek-18 century, talem wea tru evribit: “Pipol wea kwiktaem for marit bae garem moa taem for feel sorre abaotem datwan.”
Bat, for givim moa taem, hem no minim for delay for duim samting. Samfala disison hem important tumas dastawe hem wise for disaed kwiktaem. For delayim savve kosim problem long iumi or nara pipol. For delayim wanfala disison hem nao wanfala disison—maet hem no wise wan.
Acceptim Help
No eni tufala problem hem semsem, so tufala man bae no evritaem disaedem samting long sem wei taem tufala feisim problem wea klosap semsem. Nomata olsem, hem bae help for savve long hao nara pipol disaedem samting wea semsem witim iumi. Askem olketa hao olketa ting long datfala disison distaem. Olsem example, bifor iu chusim wanfala waka, askem pipol wea waka long datfala waka for explainim gud and nogud saed bilong hem. Wanem nao olketa gud samting wea kamaot from waka wea olketa chusim, and wanem nao olketa nogud saed or danger bilong datwan?
Iumi kasem disfala warning: “Olketa plan savve kamap nogud taem pipol no story secret tugeta, bat taem planti story tugeta, bae olketa kasem gudfala samting.” (Proverbs 15:22) Bat, nomata iumi luk aotem help and lane from experience bilong nara pipol, iumiseleva nao bae disaedem samting and karem datfala responsibility.—Galatians 6:4, 5.
Followim Conscience wea Kasem Gudfala Training
Conscience savve helpem iumi for disaedem samting followim olketa main principle wea iumi chus for live followim. For wanfala Christian, diswan minim for trainim conscience for showimaot tingting bilong God. (Romans 2:14, 15) Word bilong God hem sei: “Long evri samting iu duim, lisin long hem, and hemseleva nao bae stretem gogo bilong iu.” (Proverbs 3:6) Bat, long samfala samting, tufala man—each wan witim conscience wea kasem gudfala training—maet disaedem samting long difren wei.
Bat, man wea conscience bilong hem kasem gudfala training bae no iusim datfala freedom for mekem disison wea againstim Word bilong God. Olsem example, man wea conscience bilong hem no kasem training from olketa Bible principle maet tingse hem olraet nomoa for wanfala man and woman stap tugeta for traem firstaem sapos tufala fitim each other bifor tufala marit. Olketa maet ting hem wanfala wisefala disison, and sei hem stopem olketa for no kwiktaem go insaed wanfala marit wea no wise. Conscience bilong olketa maet sei hem no rong. Bat, man wea garem tingting bilong God abaotem sex and marit bae no acceptim datkaen arrangement wea no stret.—1 Corinthians 6:18; 7:1, 2; Hebrews 13:4.
Hao Disison Bilong Iu Affectim Nara Pipol
Planti taem, disison bilong iu maet affectim nara pipol. So no min for mekem disison wea no wise—maet stupid—wea bae spoelem spesol wei for fren witim olketa fren and relative, or Datwan wea winim evriwan, God. Proverbs 10:1 sei: “Wanfala wise son hem mekem dadi bilong hem hapi, and wanfala stupid son hem mekem mami bilong hem sorre fogud.”
Long narasaed, iu mas luksavve hao samfala taem hem important for chusim olketa fren. Olsem example, iu maet disaed for rejectim olketa biliv bilong religion iu garem firstaem wea no followim Bible. Or iu maet disaed for mekem bigfala change long fasin bilong iu from iu laek for live followim olketa principle bilong God. Disfala disison bilong iu maet mekem samfala fren or relative no hapi, bat eni disison wea mekem God hapi hem wanfala wise disison.
Wise for Mekem Barava Nambawan Disison
Distaem, nomata planti pipol no savve, evriwan mas disaed for stap laef or for dae. Olketa Israelite bifor tu mas disaed taem olketa camp long border bilong Promis Land long 1473 B.C.E. Moses wea tok for God sei: “Mi putim laef and dae front long iufala, blessing and curse; and iufala mas chusim laef mekem iufala go ahed for laef, iufala and olketa pikinini bilong iufala, long wei for lovem Jehovah, God bilong iufala, and for lisin long voice bilong hem and for stap klosap long hem; from hem nao laef bilong iufala and long bilong olketa day bilong iufala, mekem iufala savve stap long graon wea Jehovah promisim long olketa laen dadi bilong iufala, Abraham, Isaac and Jacob for givim long olketa.”—Deuteronomy 30:19, 20.
Bible profesi and olketa date insaed Bible showimaot hao iumi stap insaed olketa “nogud taem wea hard for deal witim” and “wei bilong disfala world hem go ahed for change.” (2 Timothy 3:1; 1 Corinthians 7:31) Disfala change bae lead go long wei for finisim evribit nogud system bilong man, wea niu world bilong raeteous fasin bilong God bae changem.
Iumi klosap nao for go insaed datfala niu world. Waswe, iu bae go insaed for enjoyim laef olowe long earth anda long Kingdom bilong God? Or waswe, Jehovah bae aotem iu from earth taem system bilong Satan hem finis evribit? (Psalm 37:9-11; Proverbs 2:21, 22) Hem disison bilong iuseleva for chusim wanem for duim, and hem wanfala disison wea minim laef or dae for iu. Waswe, iu bae acceptim help for disaedem samting wea stret and wise?
For disaed for kasem laef hem minim for firstaem lane abaotem olketa mark bilong God. Olketa church fail for talemaot stret olketa mark hia. Planti taem olketa leader bilong church giamanim pipol for bilivim olketa laea samting and duim samting wea mekem God no hapi. Olketa nating explainim need for man seleva disaed for worshipim God “witim spirit and truth.” (John 4:24) Dastawe planti pipol no worshipim God witim spirit and truth. Bat lukim wanem Jesus sei: “Man wea no saed witim mi hem againstim mi, and man wea no helpem mi for hipimap pipol hem raosem olketa.”—Matthew 12:30.
Olketa Jehovah’s Witness hapi for helpem pipol kasem moa savve from Word bilong God. Olketa evritaem storyim Bible witim man wanwan or wanfala grup long taem and ples wea fitim olketa hia. Pipol wea laek for duim olsem savve lukim Olketa Jehovah’s Witness long ples olketa stap or raet long olketa wea pablisim Wastaoa.
Bat, samfala maet lelebet savve finis abaotem olketa mark bilong God. Olketa maet barava sure hao Bible tru evribit and fit for trustim. Nomata olsem, samfala delay for disaed for dedicatem olketa seleva long God. Why nao olsem? Maet samfala reason stap for diswan.
Waswe, maet olketa no savve hao hem barava important for dedicatem olketa seleva long God? Jesus talem klia: “No evriwan wea kolem mi, ‘Lord, Lord,’ bae go insaed long kingdom bilong heven, bat man wea duim will bilong Father bilong mi long heven bae go insaed.” (Matthew 7:21) Man need for duim samting, from hem no inaf for kasem nomoa savve bilong Bible. Christian kongregeson bilong firstaem showim example for iumi. Iumi read abaotem samfala long first century: “Taem olketa bilivim Philip, wea talemaot gud nius bilong kingdom bilong God and bilong nem bilong Jesus Christ, olketa man and woman baptaes.” (Acts 2:41; 8:12) Dastawe, sapos man acceptim Word bilong God witim full heart bilong hem, bilivim, and changem laef followim olketa principle bilong God, wanem nao stopem hem for baptaes for showimaot dedication bilong hem? (Acts 8:34-38) Hem tru, for God acceptim diswan, hem mas duim from hem willing and witim heart wea hapi.—2 Corinthians 9:7.
Samfala maet ting olketa no garem inaf savve for dedicatem laef bilong olketa long God. Bat evriwan wea start for followim wanfala niu wei bilong laef garem nomoa lelebet savve abaotem datwan. Wanfala wakman kasem bigfala savve abaotem waka bilong hem no long start, bat bihaen planti year. Man need for savve nomoa long olketa main Bible teaching and principle for disaed for servem God, and witim wei for laekem tumas for live followim olketa samting hia.
Waswe, samfala delay for disaed from olketa ting bae olketa no savve followim evribit? Long planti samting wea man duim, hem mas wari lelebet nogud hem fail long datwan. Man wea disaed for marit and garem famili maet ting hem no fit, bat from hem disaed finis, diswan bae muvim hem for duim best bilong hem. Hem olsem tu witim wanfala young wan wea garem licence for draev. Maet hem fraet lelebet nogud hem accident—especially sapos hem savve hao planti young wan wea draev kasem accident winim full-grown pipol. Bat for savve long diswan hem gud bikos hem bae moa careful taem hem draev. For hol bak and no garem licence hem no ansa for diswan!
Disaed for Laef!
Bible showimaot hao klosap nao disfala system bilong politik, selen, religion and pipol wea saportim bae finis evribit from disfala earth. Bat, only pipol wea disaed long wisefala wei and duim stret samting bae stap laef. Olsem pipol bilong niu world, olketa bae share for mekem earth kamap paradaes, wea hem nao purpose bilong God long firstaem. Waswe, iu bae stap anda long direction bilong God and hapi for join insaed disfala hapi waka?
Sapos olsem, disaed for studyim Word bilong God. Disaed for lanem olketa mark bilong God for mekem hem hapi. Disaed for followim evribit olketa mark hia. Winim evri samting, disaed for followim disison bilong iu go kasem end. Diswan minim iu disaed for laef!
[Olketa Piksa long page 4]
Givim moa taem for disaedem olketa important samting
[Piksa long page 5]
Acceptim help for chusim wanfala waka
[Olketa Piksa long page 7]
Pipol wea disaed for servem God distaem bae share for mekem earth kamap paradaes