Promis Bilong Hu Nao Iu Savve Trustim?
“OLKETA promis bilong hem strong, olsem hem long datfala taem; bat samting wea hem duim hem no eniting, olsem hem distaem.”—King Henry Mek-Eit, wea William Shakespeare nao raetem.
Olketa strongfala promis wea Shakespeare tok abaotem hem bilong wanfala bigman long church long England, Thomas Wolsey, wea garem bigfala paoa saed long politik long England long mek-16 century. Samfala pipol sei olketa toktok bilong Shakespeare hia hem fitim planti promis wea olketa herem distaem. Staka taem nao pipol promisim planti samting bat olketa no fulfill. Dastawe iumi no sapraes taem pipol no bilivim eni promis.
Sorre Feeling Kamap Big
Olsem example, long taem bilong nogud war wea kamap long Balkan long olketa year bilong 1990, United Nations Security Council talemaot hao taon bilong Srebrenica long Bosnia hem “wanfala sef area.” Datwan luk olsem toktok wea man fit for trustim wea kam from United Nations. Planti thousand Muslim refugee long Srebrenica ting olsem tu. Bat, samting wea happen showimaot datfala promis for mekem disfala area kamap sef hem samting nating. (Psalm 146:3) Long July 1995, olketa nogud army pushim aot army bilong UN and tekovarem disfala taon. Winim 6,000 Muslim lus, and samting olsem 1,200 Muslim pipol dae.
Evri saed long laef hem fulap witim olketa promis wea no kamap tru. Pipol ting long “staka laea and ososo wei for advertise” wea kamap evriwea distaem olsem hem ravem olketa. Olketa lusim wei for trustim “barava staka man bilong politik wea mekem olketa promis long taem bilong election bat nating keepim.” (The New Encyclopædia Britannica, Volume 15, page 37) Olketa bigman bilong religion wea promis for lukaftarem sheep bilong olketa spoelem olketa long barava nogud wei. Nomata long olketa important waka saed long education and medicine—olketa waka wea pipol shud garem fasin for kea for narawan—samfala spoelem trust and mekius long pipol or killim dae olketa wea stap long kea bilong olketa. Dastawe Bible warnim iumi for no putim faith long evri toktok!—Proverbs 14:15.
Olketa Promis wea Fulfill
Hem tru, samfala pipol fulfillim promis bilong olketa, nomata diswan maet minim olketa mas mekem bigfala sakrifaes. (Psalm 15:4) Long olketa, samting olketa talem olketa mas duim, and olketa followim diswan. Olketa narawan laek for keepim promis bilong olketa and traem best. Olketa redy and willing for duim samting wea olketa promisim bat faendem hard for duim olsem. Samting wea kamap long living maet mekem olketa nambawan plan for no happen.—Ecclesiastes 9:11.
Nomata wanem nao reason, tru samting nao planti pipol faendem hard tumas for putim faith long promis bilong eniwan. So kwestin kamap: Waswe, eni promis stap wea iumi fit for trustim? Yes. Iumi savve trustim olketa promis wea stap insaed Word bilong God, Bible. Readim gud nextfala article wea storyim diswan. Maet iu bae garem tingting, olsem planti million duim finis, hao iumi barava fit for trustim olketa promis bilong God.
[Piksa Credit Line long page 3]
AP Photo/Amel Emric