Hao Iu Savve Satisfaem Spiritual Need Bilong Iu
“INSAED tenfala year wea go pas, olketa stoa for sellim buk hem fulap witim winim 300 buk—olsem buk Jesus CEO and The Tao of Leadership—wea story abaotem wei wea spiritual samting hem important long wakples,” datfala U.S. News & World Report hem talem. Diswan showimaot hao long planti rich kantri pipol hangre for spiritual help. Datfala bisnis buk Training & Development hem sei abaotem diswan: “Long taem bilong iumi wea technology kontrolem klosap evri part long living, iumi luk aotem mining wea moa deep abaotem laef, for purpose long laef, and wei for kamap moa satisfae.”
Bat, wea nao iumi savve faendem spiritual help wea bae mekem iumi satisfae? Bifor, pipol tan go long religion for helpem olketa faendem “mining” and “purpose” long laef. Distaem, staka tanawe from religion. Wanfala survey wea olketa duim long 900 pipol wea garem hae position long wakples faendaot “pipol ting long religion and spiritual living olsem tufala difren samting,” hem nao samting Training & Development talem. Pipol wea olketa askem ting long religion olsem samting wea “no acceptim difren tingting and divaedem pipol,” bat olketa ting long spiritual living olsem samting “for evriwan and wea acceptim evriwan.”
Staka young pipol from olketa kantri wea staka pipol no tinghevi long religion, olsem Australia, New Zealand, United Kingdom, and Europe, olketa tu lukim wei wea religion and spiritual living tufala difren. Professor Ruth Webber raet olsem insaed magasin Youth Studies Australia: “Big haf long young pipol biliv long God, or narakaen spirit samting, bat olketa no ting long church olsem important or samting wea bae helpem olketa satisfaem spiritual need bilong olketa.”
Tru Religion Sapotim Spiritual Living
Iumi no sapraes hao pipol ting daonem religion. Staka religion barava insaed nogud deal bilong politik and hypocrite fasin and from staka war bilong religion olketa guilty long blood bilong pipol wea no garem blame. Bat, long semtaem olketa rejectim olketa religion wea hypocrite and showimaot giaman fasin, samfala mistek for rejectim Bible from olketa tingse Bible acceptim olketa fasin olsem.
Bat tru samting nao, Bible tok strong againstim hypocrite fasin and fasin for brekem law. Jesus sei olsem long olketa leader bilong religion long taem bilong hem: “Trabol for iufala, olketa scribe and Pharisee, iufala hypocrite! from iufala olsem olketa grev wea olketa paintim white, wea aotsaed hem luk naes tumas bat insaed hem fulap witim bon bilong olketa man wea dae finis and evrikaen samting wea no klin. Long sem wei, iufala tu luk raeteous front long olketa man, bat insaed iufala fulap witim hypocrite fasin and fasin for brekem law.”—Matthew 23:27, 28.
And tu, Bible encouragem olketa Christian for no teksaed long politik. Winim wei for encouragem olketa wea biliv for killim dae each other, Bible talem hao olketa shud willing for dae for each other. (John 15:12, 13; 18:36; 1 John 3:10-12) Winim wei for “no acceptim difren tingting and divaedem pipol,” trufala religion, wea followim Bible, hem “for evriwan.” Aposol Peter hem sei: “God hem no saed witim eniwan, bat long evri nation man wea fraet long hem and duim raeteous fasin nao hem acceptim.”—Acts 10:34, 35.
Bible—Iumi Fit for Trustim for Leadim Iumi Go Long Spiritual Health
Bible talem iumi hao God wakem olketa man long image bilong Hem. (Genesis 1:26, 27) Diswan no minim olketa man semsem witim God long physical wei, bat hem minim olketa man fit for showimaot olketa fasin bilong God, wea insaed diswan hem wei for garem spiritual saed.
From diswan, hem mek sense for biliv God bae provaedem wei for iumi satisfaem spiritual need bilong iumi, and tu stretfala direction wea bae mekem iumi luksavve long wanem hem helpem iumi and wanem bae spoelem iumi long spiritual wei. Olsem nambawan wei wea God creatim immune system bilong body bilong iumi wea faetem sik and helpem iumi stap healthy, hem givim iumi tu wanfala conscience, or voice insaed iumi, wea savve helpem iumi disaed stret and stap klia long samting wea bae spoelem iumi long physical and spiritual wei. (Romans 2:14, 15) Olsem iumi savve, immune system bilong iumi no savve waka gud sapos iumi no kaikai gud. Olsem tu, for conscience bilong iumi waka gud, iumi need for feedim witim gudfala spiritual kaikai.
For showimaot kaen kaikai wea bae keepim iumi healthy long spiritual wei, Jesus sei: “Man mas laef, no long bred nomoa, bat long evri toktok wea kamaot from mouth bilong Jehovah.” (Matthew 4:4) Toktok bilong Jehovah stap insaed Word bilong hem, Bible, and olketa “gud for teach, for givim kaonsel, for stretem evri samting.” (2 Timothy 3:16) So, hem depend long iumi for duim samting for kaikaim datfala spiritual kaikai. Haomas gud samting iumi kasem long spiritual and physical wei hem depend long haomas savve long Bible iumi kasem and hao hard iumi trae for followim olketa principle bilong hem long laef bilong iumi.—Isaiah 48:17, 18.
Hard Waka Nating?
Hem tru, hem tek taem for studyim Bible for kamap moa healthy long spiritual wei; and taem hem samting wea kamap moa hard for faendem. Bat hem no hard waka nating taem iumi tingim olketa reward! Lukim hao samfala wea garem bigfala waka wea busy evritaem olketa explainim why hem important long olketa for iusim taem for kea for spiritual health bilong olketa.
Marina, wanfala medical doctor, hem sei: “Mi no really tingim spiritual living bilong mi go kasem taem mi start for waka long hospital and mi sorre tumas long wei wea nara pipol safa. Long datfala taem nao mi luksavve mi need for luksavve and fulfillim spiritual need bilong mi bifor mi savve feel satisfae and kasem peace, bikos hevi bilong living and wei for kea for wari bilong pipol savve kamap bigfala hevi for pipol wea duim waka olsem mi.
“Distaem mi studyim Bible witim Olketa Jehovah’s Witness. Disfala study helpem mi for lukluk gud long samting mi duim and reason mi duim samting and hem trainim tingting bilong mi for tingim gud saed long olketa samting, mekem laef bilong mi no ova tumas. Waka bilong mi givim mi bigfala wei for satisfae. Bat wei wea mi studyim Bible nao mekem saed long feeling bilong mi kamap moabeta, wea helpem mi for kontrolem nogud tingting, daonem wari, and moa patient and kea long pipol. For followim olketa Bible principle hem helpem tu marit bilong mi. Moa important nao, mi distaem savve long Jehovah and experiencem, long smol wei, hao hem givim spirit bilong hem long bigfala wei, wea givim laef bilong mi moa mining.”
Nicholas, man for designim building, hem sei: “Bifor mi studyim Bible witim Olketa Jehovah’s Witness, mi nating interest long olketa spiritual samting. Only goal bilong mi long laef hem for win long waka wea mi chus for duim. Mi lanem from Bible study bilong mi hao moa samting hem insaed laef and hao wei for duim will bilong Jehovah bae bringim hapi wea real and wea for olowe.
“Waka bilong mi givim mi feeling for satisfae, bat Bible nao teachim mi wei wea hem important for keepim laef simpol thru long wei for mekhae long olketa spiritual samting. Taem mi duim olsem, mitufala waef bilong mi missim staka hevi wea kam from wei for lovem material samting. Mitufala kasem staka trufala fren tu thru long wei for kaban witim olketa wea garem sem spiritual tingting abaotem laef.”
Vincent, wanfala lawyer, hem sei: “For garem gudfala waka for selen hem givim wankaen feeling for satisfae. Bat, mi faendem hao man needim staka samting moa for kasem hapi and feeling for satisfae. Bifor mi savve long olketa teaching bilong Bible abaotem olketa samting hia, mi rememberim hao wantaem bifor mi ting laef hem iusles nomoa—for born kam, growap, marit, waka for provaedem material need for bringimap pikinini, trainim olketa for followim barava sem living olsem iu, and gogo kamap olo and dae.
“Taem mi studyim Bible witim Olketa Jehovah’s Witness nao mi just kasem olketa ansa wea mekem mi satisfae for olketa kwestin bilong mi abaotem purpose bilong laef. Bible study bilong mi mekem mi savve long Jehovah olsem wanfala person and for mekem grow deep love for hem. Diswan hem faondeson bilong mi for keepim healthy spiritual tingting taem mi trae live followim savve bilong mi abaotem purpose bilong hem. Distaem, mitufala waef bilong mi satisfae long wei for savve mitufala iusim laef bilong mitufala long wei wea garem mining.”
Thru long wei for studyim Bible, iu tu savve garem purpose and mining long laef. Olketa Jehovah’s Witness hapi for helpem iu. Olsem Marina, Nicholas, and Vincent, iu savve kasem feeling for satisfae wea kam from wei for lane abaotem Jehovah and olketa purpose bilong hem for evri man and for iuseleva. Bae iu no just kasem hapi from spiritual need bilong iu satisfae bat from iu kasem hope tu for enjoyim laef olowe long perfect physical health—hope for olketa nomoa wea “luksavve long spiritual need bilong olketa.”—Matthew 5:3.
Wanfala wei for mekem grow spiritual living bilong iumi hem thru long prea. Jesus mekem taem for teachim olketa disaepol bilong hem hao for prea, wea staka savve long hem olsem datfala Lord’s Prea. Datfala prea garem wanem mining for iu distaem? Hao nao iu savve kasem gud samting from diswan? Iu bae faendem olketa ansa long next tufala article.
[Piksa long page 6]
Marina
[Piksa long page 7]
Nicholas
[Piksa long page 7]
Vincent