Kwestin From Reader
From Jehovah no givim land long olketa Levite long Israel, hao nao Hanamel wea hem wanfala Levite sellim wanfala field long Levite kasin bilong hem Jeremiah, olsem Jeremiah 32:7 showimaot?
Jehovah tok olsem abaotem olketa Levite long Aaron: “Mi bae no givim iu eni land . . . and midolwan long olketa [Israel] iu bae no garem share.” (Numbers 18:20) Nomata olsem, olketa Levite kasem 48-fala taon and land for olketa animal, evriwea long Promis Land. Anathoth hem homtaon bilong Jeremiah, hem wanfala long olketa taon wea olketa markem for “olketa son bilong Aaron, olketa priest.”—Joshua 21:13-19; Numbers 35:1-8; 1 Chronicles 6:54, 60.
Long Leviticus 25:32-34, iumi lukim hao Jehovah givim kliafala instruction saed long “right for baem bak” land wea olketa Levite ownim. Luk olsem olketa Levite famili wanwan garem right saed long wei for ownim, iusim, and sellim samfala pis land. Insaed diswan hem for sellim and baem bak land tu.a Long planti wei, olketa Levite ownim and iusim land long sem wei olsem olketa nara tribe bilong Israel.
For olketa Levite, maet wei for ownim pis land olsem hem samting olketa pasim thru long famili laen. Bat saed long “right for baem bak,” olketa savve duim midolwan olketa Levite seleva nomoa. And tu, hem luk olsem wei for sellim and baem bak land hem for olketa pis land insaed olketa taon nomoa, bikos “field bilong olketa animal long olketa taon bilong olketa” hem “samting wea olketa ownim for olowe” and mas no sellim.—Leviticus 25:32, 34.
So luk olsem field wea Jeremiah baem bak from Hanamel hem kaen land wea olketa savve sellim and baem bak. Hem maet stap insaed spialaen bilong taon. Jehovah seleva showimaot “datfala field” wea olketa storyim, wea hem bilong Hanamel and Jeremiah garem “right for baem bak.” (Jeremiah 32:6, 7) Jehovah iusim disfala wei for baem bak long tokpiksa wei for strongim promis bilong hem hao olketa Israelite bae tekem bak land bilong olketa bihaen olketa stap olsem prisoner long Babylon.—Jeremiah 32:13-15.
No eni samting showimaot hao Hanamel kasem datfala land long Anathoth long wei wea no stret. No eniting showimaot hem brekem law bilong God taem hem invaetem Jeremiah for baem datfala field long Anathoth or hem no stret for Jeremiah baem bak datfala field.—Jeremiah 32:8-15.
[Footnote]
a Long first century C.E., Barnabas, wanfala Levite, sellim land wea hem ownim and givim datfala selen for olketa follower bilong Christ long Jerusalem wea garem need. Datfala land maet hem long Palestine or long Cyprus. Or hem maet wanfala pis land for berem olketa man dae wea Barnabas tekem long area bilong Jerusalem.—Acts 4:34-37.