‘Datfala Faithful Slave’ Win Long Test!

“Hem appointed taem for judgment for start witim haos bilong God.”—1 PETER 4:17.

1. Wanem nao Jesus faendem taem hem lukluk gud long datfala “slave”?

LONG Pentecost 33 C.E., Jesus appointim wanfala “slave” for provaedem kaikai long barava taem for “olketa wakman” bilong hem. Long 1914, Jesus kamap King, and hem kasem taem for hem lukluk gud long datfala “slave.” Hem faendem hao, long bigfala wei, datfala “slave” givim pruv bilong wei wea hem “faithful and wise.” So, hem markem hem for “ovarem evri samting bilong hem.” (Matthew 24:45-47) Bat, wanfala wicked slave stap, wea hem no faithful and no wise.

“Datfala Wicked Slave”

2, 3. Wea nao “datfala wicked slave” kam from, and hao nao hem kamap?

² Jesus story abaotem datfala wicked slave stretawe bihaen hem storyim datfala “faithful and wise slave.” Hem sei: “Sapos enitaem datfala wicked slave hem sei long heart bilong hem, ‘Masta bilong mi hem delay,’ and hem start for hitim olketa nara slave and hem kaikai and drink witim olketa man for drunk, masta bilong datfala slave bae kam long day wea hem no tingim and long hour wea hem no savve, and bae barava panisim hem and bae hem kasem sem panis olsem olketa hypocrite. Long there nao hem bae krae and kros fogud.” (Matthew 24:48-51) Disfala toktok “datfala wicked slave” mekem iumi tingim toktok bilong Jesus bifor datwan abaotem datfala faithful and wise slave. Tru nao, datfala “wicked slave” hem bin member bilong datfala faithful slave bifor.a Hao nao olsem?

³ Bifor 1914, staka member bilong datfala faithful slave barava luk forward for meetim Datwan wea Olketa Bae Maritim long heven long datfala year, bat wanem olketa hope for hem no happen. From diswan and from olketa nara samting, staka lusim hapi and kamap kros. Samfala long olketa hia “hitim” olketa brata bilong olketa bifor thru long wei for tok spoelem olketa and wei for kaban witim “olketa man for drunk,” wea hem olketa religion bilong Christendom.—Isaiah 28:1-3; 32:6.

4. Hao nao Jesus deal witim datfala “wicked slave” and evriwan wea showimaot sem wicked wei bilong hem?

⁴ Olketa hia wea lusim Christian Wei gogo kamap datfala “wicked slave,” and Jesus “barava panisim” olketa. Long wanem wei? Hem rejectim olketa, and olketa lusim datfala chance for go long heven. Hem no distroem olketa stretawe. Firstaem olketa mas feisim wanfala taem bilong krae and kros fogud long “darkness aotsaed” long Christian kongregeson. (Matthew 8:12) Start kam from datfala taem, tu-thri nara anointed wan showimaot wicked wei olsem, wea showimaot olketa part bilong datfala “wicked slave.” Samfala long olketa “nara sheep” followim semkaen fasin for no faithful. (John 10:16) Evrikaen enemy olsem bilong Christ end ap long sem spiritual “darkness aotsaed.”

5. Wanem nao datfala faithful and wise slave duim wea difren tumas from datfala “wicked slave”?

⁵ Nomata olsem, datfala faithful and wise slave kasem olketa sem test olsem “datfala wicked slave.” Bat winim wei for kros, olketa changem tingting. (2 Corinthians 13:11) Love bilong olketa for Jehovah and for olketa brata bilong olketa hem kamap moa strong. From diswan, olketa kamap “wanfala post and sapot bilong truth” long “olketa last day” hia wea nogud tumas.—1 Timothy 3:15; 2 Timothy 3:1.

Olketa Wise and Krangge Young Girl

6. (a) Hao nao Jesus showimaot fasin for wise bilong faithful slave bilong hem? (b) Bifor 1914, wanem message nao olketa anointed Christian talemaot?

⁶ Bihaen hem storyim “datfala wicked slave,” Jesus storyim tufala tokpiksa for showimaot why nao samfala anointed Christian olketa faithful and wise and why nao samfala nomoa.b For minim go fasin for wise, hem sei: “Kingdom bilong heven bae olsem tenfala young girl wea tekem lamp bilong olketa and go for meetim man wea bae marit. Faevfala long olketa krangge, and faevfala wise. Olketa wea krangge tekem lamp bilong olketa bat no tekem eni oil witim olketa, bat olketa wea wise tekem oil insaed long botol witim lamp bilong olketa.” (Matthew 25:1-4) Olketa tenfala young girl mekem iumi tingim olketa anointed Christian bifor 1914. Olketa savve hao man wea bae marit, Jesus Christ, hem klosap nao for arrive. So, olketa “go aot” for meetim hem and no fraet for preachim hao “appointed taem bilong olketa nation” bae end long 1914.—Luke 21:24.

7. Wanem taem and why nao olketa anointed Christian “sleep” long tokpiksa wei?

⁷ Olketa stret. Appointed taem bilong olketa nation hem end long 1914, and Kingdom bilong God anda long Christ Jesus hem start. Bat datwan hem happen long heven. Long earth, olketa man start for kasem “trabol” wea Jesus bin profesi abaotem. (Revelation 12:10, 12) Wanfala taem bilong test kamap. From olketa no minim gud samfala samting, olketa anointed Christian tingse “datfala man wea bae marit hem delay.” From olketa konfius and kasem hard taem from world, olketa slow daon and klosap stop for organizem datfala preaching waka. Olsem olketa young girl long tokpiksa, long spiritual wei “eye bilong evriwan feel hevi and olketa sleep,” olsem olketa wea, bihaen olketa aposol bilong Jesus dae, olketa sei olketa Christian bat olketa nating faithful.—Matthew 25:5; Revelation 11:7, 8; 12:17.

8. Wanem nao lead go long singaot: “Man wea bae marit hem kam nao!” and wanem nao hem taem for olketa anointed Christian duim?

⁸ Then long 1919 samting wea olketa no expectim hem happen. Iumi read: “Barava long midolnaet, olketa herem wanfala singaot, ‘Man wea bae marit hem kam nao! Iufala go for meetim hem.’ Then evri young girl hia getap and redyim lamp bilong olketa.” (Matthew 25:6, 7) Long taem wea luk olsem no eni hope stap nao, wanfala singaot kamap for olketa mas duim samting! Long 1918, Jesus, “datfala man for talemaot message,” hem kam long spiritual temple bilong Jehovah for lukluk gud and klinim kongregeson bilong God. (Malachi 3:1) So, olketa anointed Christian need for go aot and meetim hem long olketa courtyard bilong temple long earth. Hem taem nao for olketa “sendem go laet.”—Isaiah 60:1; Philippians 2:14, 15.

9, 10. Long 1919, why nao samfala Christian “wise” and samfala “krangge”?

⁹ Bat weit! Long datfala tokpiksa, samfala long olketa young woman garem wanfala problem. Jesus go ahed for sei: “Olketa wea krangge sei long olketa wea wise, ‘Givim mifala samfala oil bilong iufala, bikos lamp bilong mifala klosap for dae nao.’ ” (Matthew 25:8) Sapos no eni oil, olketa lamp bae no laet. Oil bilong lamp mekem iumi tingim Word bilong truth bilong God and holy spirit bilong hem, wea strongim olketa tru worshiper for kamap pipol wea givimaot laet. (Psalm 119:130; Daniel 5:14) Bifor 1919, olketa wisefala anointed Christian duim best bilong olketa for luksavve long will bilong God for olketa, nomata olketa wikdaon for lelebet taem. So, taem datfala singaot kamap for laet sut aot, olketa redy.—2 Timothy 4:2; Hebrews 10:24, 25.

¹⁰ Bat, samfala anointed wan no redy for sakrifaesim seleva or for duim moa waka—nomata olketa barava laek for stap witim Man wea Bae Marit. So long taem olketa shud busy for preachim gud nius, olketa no redy. (Matthew 24:14) Olketa trae tu for slowim daon olketa fren bilong olketa wea waka strong, diswan olsem wei for ask for samfala oil bilong olketa. Long tokpiksa bilong Jesus, hao nao olketa wisefala young girl hia ansa? Olketa sei: “Maet hem no inaf for mifala and iufala tu. So iufala go long olketa wea sellim and baem samfala for iufala seleva.” (Matthew 25:9) Olsem tu, olketa loyal anointed Christian long 1919 les for duim eniting wea bae daonem wei wea olketa showimaot laet. From diswan, olketa win long datfala test.

11. Wanem nao happen long olketa krangge young girl?

¹¹ Jesus sei: “Taem olketa go for baem oil, man wea bae marit hem arrive, and olketa young girl wea redy go witim hem long marit feast; and door hem sat. Bihaen, olketa nara young girl kam and sei, ‘Masta, masta, openem door for mifala!’ Hem sei olsem, ‘Tru nao mi talem iufala, mi nating savve long iufala.’ ” (Matthew 25:10-12) Tru nao, samfala nating redy taem Man wea Bae Marit hem arrive. So, olketa fail long datfala test and olketa missim chance for attendim marit feast long heven. Sorre tumas!

Tokpiksa Abaotem Olketa Talent

12. (a) Wanem nao Jesus iusim for minim faithful fasin? (b) Hu nao datfala man wea “go long farawe ples”?

¹² Bihaen hem explainim fasin for wise, Jesus go ahed for explainim faithful fasin. Hem sei: “Hem olsem taem wanfala man, wea redy for go long farawe ples, hem kolem kam olketa slave bilong hem and givim olketa samting bilong hem long olketa. And long wanfala hem givim faevfala talent, long narawan tufala, long narawan moa wanfala, long each wan fitim savve bilong hemseleva, and then hem go long farawe ples.” (Matthew 25:14, 15) Man long tokpiksa hem Jesus, wea “go long farawe ples” taem hem go long heven long year 33 C.E. Bat bifor hem go, Jesus givim olketa “samting bilong hem” long olketa faithful disaepol bilong hem. Long wanem wei?

13. Long wanem wei nao Jesus redyim wanfala bigfala preaching waka and givim paoa long “olketa slave” bilong hem for duim bisnis?

¹³ Long taem hem duim ministry long earth, Jesus start for redyim bigfala waka for preachim gud nius bilong Kingdom evriwea long land bilong Israel. (Matthew 9:35-38) Bifor hem “go long farawe ples,” hem assignim datfala waka long olketa faithful disaepol bilong hem taem hem sei: “Go and mek disaepol long pipol bilong evri nation, baptaesim olketa long nem bilong Father and bilong Son and bilong holy spirit, teachim olketa for duim evri samting wea mi komandim long iufala.” (Matthew 28:18-20) Long toktok hia, Jesus givim “olketa slave” bilong hem paoa for duim bisnis go kasem taem hem kam bak, “each wan fitim savve bilong hemseleva.”

14. Why nao no evriwan fit for duim sem waka?

¹⁴ Datfala toktok showimaot hao no evri first-century Christian garem sem living or garem sem chance. Samfala, olsem Paul and Timothy, free for share evribit long preaching and teaching waka. Olketa narawan maet garem living wea mekem hard for olketa duim planti samting. Olsem example, samfala Christian olketa slave, and samfala moa olketa sik, olo, or garem olketa famili responsibility. Samfala privilege long kongregeson hem no for evri disaepol. Olketa anointed woman and samfala anointed man no teach long kongregeson. (1 Corinthians 14:34; 1 Timothy 3:1; James 3:1) Bat, evri anointed disaepol bilong Christ—nomata man or woman—kasem assignment for share for duim bisnis, for iusim gud chance wea olketa garem long Christian ministry. Olketa anointed disaepol bilong Christ distaem duim sem samting.

Taem Bilong Test Hem Start!

15, 16. (a) Wanem taem nao hem taem for stretem olketa kaon? (b) Olketa faithful wan kasem olketa wanem niu chance for ‘duim bisnis?

¹⁵ Datfala tokpiksa go ahed olsem: “Bihaen longfala taem masta bilong olketa slave hia kam bak and stretem kaon witim olketa.” (Matthew 25:19) Long 1914—longfala taem bihaen 33 C.E.—Christ Jesus start for rul olsem King. Thri and haf year bihaen, long 1918, hem kam long spiritual temple bilong God and fulfillim toktok bilong Peter: “Hem appointed taem for judgment for start witim haos bilong God.” (1 Peter 4:17; Malachi 3:1) Hem taem nao for stretem olketa kaon.

¹⁶ Wanem nao olketa slave, olketa anointed brata bilong Jesus, duim witim “olketa talent” bilong King? Start kam from 33 C.E. wea insaed diswan hem olketa year bifor 1914, staka waka hard long “bisnis” bilong Jesus. (Matthew 25:16) Nomata taem first world war go ahed, olketa showimaot olketa barava want for servem Masta. Hem taem nao for givim olketa faithful wan olketa niu chance for ‘duim bisnis.’ End bilong disfala system hem kam nao. Olketa mas preachim datfala gud nius evriwea long world. Waka for hipimap “harvest bilong earth” start nao. (Revelation 14:6, 7, 14-16) Olketa mas faendem olketa member bilong wheat class wea stap yet and hipimap “wanfala big crowd” bilong nara sheep.—Revelation 7:9; Matthew 13:24-30.

17. Hao nao olketa faithful anointed Christian ‘kasem hapi bilong masta bilong olketa’?

¹⁷ Taem bilong harvest hem wanfala taem bilong hapi. (Psalm 126:6) So, long 1919, taem Jesus givim olketa faithful anointed brata bilong hem moa responsibility, toktok bilong hem barava fitim taem hem sei: “Iu faithful long tu-thri samting. Mi bae appointim iu ovarem planti samting. Kasem hapi bilong masta bilong iu.” (Matthew 25:21, 23) Hapi bilong Masta wea kamap niufala King bilong Kingdom bilong God hem winim eni hapi iumi savve tingim. (Psalm 45:1, 2, 6, 7) Datfala faithful slave class kasem sem hapi taem olketa stand for King and mekem kamap big olketa samting bilong hem long earth. (2 Corinthians 5:20) Hapi bilong olketa hem showaot long profesi toktok bilong Isaiah 61:10: “Mi bae no fail for praisem Jehovah. Soul bilong mi bae hapi long God bilong mi. From hem mekem mi werem kaleko bilong salvation.”

18. Why nao samfala no winim test, and wanem samting nao kamaot from diswan?

¹⁸ Sorre tumas samfala no winim test. Bible sei: “Datwan wea kasem wanfala talent hem kam and sei, ‘Masta, mi savve iu wanfala hard man, wea harvest long ples wea iu no plantim samting and hipimap grain wea nara man nao aotem rabis bilong hem. So mi fraet and mi go and haedem talent bilong iu insaed long graon. Tekem disfala samting bilong iu.’ ” (Matthew 25:24, 25) Olsem tu, samfala anointed Christian no duim eni “bisnis.” Bifor 1914, olketa no strong for storyim hope bilong olketa witim pipol, and olketa les for start for duim datwan long 1919. Wanem nao Jesus duim taem hem lukim bighed wei bilong olketa? Hem aotem evri privilege from olketa. And ‘torowem olketa go long darkness long aotsaed, wea olketa krae and kros fogud.’—Matthew 25:28, 30.

Wei for Lukluk Gud Go Ahed

19. Long wanem wei nao Jesus go ahed for lukluk gud long olketa, and wanem nao evri anointed Christian disaed strong for duim?

¹⁹ Hem tru, staka wea bae kamap anointed slave bilong Christ long taem bilong end no servem Jehovah long taem wea Jesus start for lukluk gud long olketa long 1918. Waswe, bae olketa missim disfala wei for Jesus lukluk gud long olketa? Nomoa. Datwan hem start nomoa long 1918 and 1919, taem faithful and wise slave, olsem wanfala sekson, pasim datfala test. Jesus go ahed for lukluk gud long olketa anointed Christian wanwan go kasem taem wea olketa kasem datfala mark wea bae stap for olowe. (Revelation 7:1-3) From olketa luksavve long diswan, olketa anointed brata bilong Christ disaed strong for go ahed faithful for ‘duim bisnis.’ Olketa disaed strong for garem wise fasin, for mek sure olketa evritaem garem staka oil for mekem laet shaen braet. Olketa savve hao Jesus bae acceptim each wan wea faithful go kasem dae for go stap long heven.—Matthew 24:13; John 14:2-4; 1 Corinthians 15:50, 51.

20. (a) Wanem nao datfala nara sheep disaed strong for duim distaem? (b) Olketa anointed Christian evritaem rememberim wanem samting?

²⁰ Datfala big crowd bilong nara sheep followim example bilong olketa anointed brata bilong olketa. Olketa luksavve hao wei wea olketa garem savve abaotem olketa purpose bilong God hem mekem olketa garem bigfala responsibility. (Ezekiel 3:17-21) Dastawe, witim help bilong Word bilong Jehovah and holy spirit, olketa tu mek sure olketa garem staka oil thru long wei for study and olketa Christian meeting. And olketa mekem laet shaen long wei for share for preach and teach, and taem olketa duim olsem, olketa followim olketa anointed brata bilong olketa for ‘duim bisnis.’ Bat, olketa anointed Christian evritaem remember hao olketa nao kasem olketa talent. Olketa nao mas givim ansa for wanem olketa duim witim evriting bilong Lord long earth. Nomata olketa anointed Christian no staka, olketa kanduit pasim go responsibility bilong olketa long datfala big crowd. From olketa tingim diswan, datfala faithful and wise slave go ahed for leadim waka for lukaftarem bisnis bilong King and olketa thankiu for sapot bilong olketa faithful member bilong big crowd. Disfala big crowd luksavve long responsibility bilong olketa anointed brata and tingim wei for waka anda long olketa olsem wanfala privilege.

21. Wanem kaonsel nao fitim evri Christian long olketa year raonem 1919 kam kasem taem bilong iumi?

²¹ So, nomata tufala tokpiksa hia givim iumi savve abaotem olketa samting wea happen long olketa year raonem 1919, principle bilong tufala fitim tu evri tru Christian wea stap insaed olketa last day. So, nomata kaonsel wea Jesus talem bihaen hem storyim tokpiksa abaotem tenfala young girl hem for olketa anointed Christian bifor 1919, principle bilong hem fitim evri Christian distaem. So letem iumi evriwan followim toktok bilong Jesus: “Go ahed for luk aot gud, from iufala no savve long datfala day or hour.”—Matthew 25:13.

[Olketa Footnote]

Waswe, Iu Savve Explainim?

• Wanem taem nao Jesus chekim olketa follower bilong hem, and wanem nao hem faendem?

• Why nao samfala anointed Christian showimaot wicked wei bilong “datfala wicked slave”?

• Hao nao iumi savve showimaot iumi wise long spiritual wei?

• Long wei wea followim example bilong olketa faithful anointed brata bilong Jesus, hao nao iumi savve go ahed for ‘duim bisnis’?

[Box long page 16]

WANEM TAEM NAO JESUS HEM KAM?

Long Matthew chapter 24 and 25, Jesus hem “kam” long olketa difren wei. For “kam” hem no minim hem mas muv from wan ples go long nara ples. Bat, hem “kam” long wei wea hem tanem kam tingting bilong hem long olketa man or olketa follower bilong hem, planti taem hem for givim judgment. So, long 1914, hem “kam” for startim rul bilong hem olsem niufala King. (Matthew 16:28; 17:1; Acts 1:11) Long 1918 hem “kam” olsem man for talemaot message bilong covenant and start for judgem pipol wea sei olketa servem Jehovah. (Malachi 3:1-3; 1 Peter 4:17) Long Armageddon, hem bae “kam” for distroem olketa enemy bilong Jehovah.—Revelation 19:11-16.

Datfala kakam (or, wei for arrive) wea Matthew 24:29-44 and 25:31-46 story abaotem, hem bae happen long taem bilong “datfala big trabol.” (Revelation 7:14) Bat, datfala kakam wea Matthew 24:45 go kasem 25:30 story abaotem hem join witim wei wea hem bae judgem olketa wea sei olketa disaepol bilong hem start kam from 1918. Olsem example, hem no stret for sei long taem wea Jesus “kam” long datfala big trabol nao bae datfala faithful slave kasem reward and olketa krangge young girl and lesy slave wea haedem talent bilong Masta bae kasem panis. Sapos olsem, diswan bae minim long datfala taem, staka long olketa anointed wan bae no faithful and samfala mas changem olketa. Bat, Revelation 7:3 showimaot hao Christ hem “markem finis” evri anointed slave bilong hem bifor datfala big trabol.

[Piksa long page 14]

Datfala “wicked slave” no kasem eni blessing long 1919

[Piksa long page 15]

Olketa wisefala young girl redy taem man wea bae marit arrive

[Piksa long page 17]

Datfala faithful slave duim “bisnis”

Datfala lesy slave no duim

[Olketa Piksa long page 18]

Olketa anointed and datfala “big crowd” go ahed for letem laet bilong olketa shaen