Ehud Finisim Nogud Rul

DISWAN hem wanfala tru story abaotem man wea no fraet for followim wanfala secret plan. Hem happen samting olsem 3,000 year go finis. Bible startim story hia witim disfala toktok: “Olketa son bilong Israel start moa for duim samting wea nogud long eye bilong Jehovah. From datwan Jehovah letem Eglon, king bilong Moab for kamap strong againstim Israel, bikos olketa duim samting wea nogud long eye bilong Jehovah. And tu, hem hipimap olketa son bilong Ammon and Amalek for againstim olketa. So olketa go and faet againstim Israel and tekovarem taon bilong olketa palm tree. And olketa son bilong Israel go ahed for servem Eglon, king bilong Moab for eitinfala year.”—Judges 3:12-14.

Land bilong olketa Moabite hem stap long east saed bilong Jordan River and datfala Dead Sea. Bat olketa akrosim river and tekova long area raonem Jericho, “taon bilong olketa palm tree,” wea diswan mekem olketa Israelite stap anda long olketa. (Deuteronomy 34:3) Eglon, datfala Moabite king wea hem “barava fat man,” hem forcem olketa long Israel for givim barava bigfala tax for klosap twenti year. (Judges 3:17) Nomata olsem, wei wea hem demandim tax givim chance long olketa for killim dae disfala hardfala ruler.

Story sei: “Olketa son bilong Israel start for askem Jehovah for help. So Jehovah givim wanfala man for sevem olketa, Ehud son bilong Gera, man wea kam from laen bilong Benjamin, wea hem left-hand. Gogo olketa son bilong Israel markem hem for tekem go tax long Eglon king bilong Moab.” (Judges 3:15) Luk olsem Jehovah hem mek sure olketa chusim Ehud for givim datfala tax. Bible no storyim sapos hem duim datfala assignment bifor or nomoa. Bat, wei wea Ehud hem prepare gud for datwan and olketa plan wea hem followim showimaot hem maet savve lelebet long haos bilong Eglon and wanem maet bae kasem hem long there. Wei wea hem left-hand hem wanfala important part long plan hia.

Man wea Cripple or Man for Faet?

Long Hebrew languis, word for “left-hand” hem minim ‘sat, cripple, or taemap raet hand.’ Waswe, datwan minim Ehud hem cripple, maet raet hand bilong hem nogud? Lukim wanem Bible talem abaotem “seven handred man wea olketa chusim” wea olketa left-hand and kam from tribe bilong Benjamin. Judges 20:16 hem sei: “Each wan long olketa savve iusim sling long wei wea barava kasem mark and olketa no savve miss.” Luk olsem olketa chusim sekson hia from olketa garem savve saed long wei for faet. Samfala savveman wea studyim Bible sei “left-hand” hem minim man “wea iusim left hand long sem wei wea hem iusim raet hand.”—Judges 3:15, The Douay Version.

Tru nao, staka savve long tribe bilong Benjamin olsem tribe bilong olketa man wea left hand. First Chronicles 12:1, 2 story abaotem olketa bilong tribe bilong Benjamin olsem “olketa strongfala man, olketa wea help long datfala war wea holem bow, and iusim raet hand and iusim left hand witim olketa ston or witim olketa arrow insaed long bow.” Wanfala buk sei maet olketa savve hao for iusim left hand “taem olketa taemap raet hand bilong olketa pikinini . . . and diswan trainim olketa for iusim gud left hand.” Olketa enemy bilong Israel kasem training for faet witim olketa soldia wea iusim raet hand. Dastawe bigfala training wea wanfala enemy kasem hem iusles taem hem seknomoa meetim wanfala soldia wea left hand.

“Wanfala Secret Toktok” for King

First samting Ehud duim hem for redyim “wanfala sword for hemseleva”—wanfala sword wea sharp tu saed and wea short nomoa mekem hem savve haedem insaed kaleko bilong hem. Hem savve maet olketa chekim hem. Normal samting hem for hangem sword long left saed bilong body, mekem man wea iusim raet hand savve kwiktaem aotem. From Ehud hem left hand, hem haedem sword bilong hem for faet “andanit long kaleko bilong hem antap long raet leg bilong hem,” wea olketa security bilong king maet no ting for chekim. Then, “hem start for givim tax long Eglon datfala king bilong Moab.”—Judges 3:16, 17.

Bible no talem olketa first samting wea happen long ples wea Eglon stap. Bible hem sei nomoa: “Taem [Ehud] finis for givim tax, hem talem olketa wea karem kam datfala tax for go aot.” (Judges 3:18) Ehud givim datfala tax, then hem wakabaot go witim sekson wea karem kam datfala tax farawe lelebet from haos bilong Eglon, and kam bak moa bihaen hem sendem olketa go. Why nao olsem? Maet olketa man hia kam witim hem for protectim hem, or maet hem kastom, or maet for karem kam datfala tax nomoa. And maet hem laekem olketa for go long sef ples bifor hem duim samting wea hem planim kam finis. Nomata wanem nao reason why hem sendem olketa go, Ehud no fraet for go bak seleva.

“[Ehud] tan kam bak from ples for katem ston long Gilgal, and hem go ahed for sei: ‘Mi garem wanfala secret toktok for iu, O king.’ ” Bible no talem wanem nao hem talem for mekem olketa letem hem lukim moa Eglon. Waswe, fitim olketa security for no trustim hem? Waswe, olketa tingse wanfala Israelite seleva no savve mekem lord bilong olketa stap long danger? Waswe, wei wea Ehud kam seleva hem mekem olketa tingse hem saed witim olketa? Nomata wanem reason, Ehud ask for lukim king seleva and king appruvim datwan.—Judges 3:19.

Story go ahed for sei: “Ehud kam long [Eglon] taem hem sidaon seleva long rum bilong hem wea cold naes long ruf. And Ehud hem sei: ‘Mi garem wanfala toktok from God for iu.’ ” Ehud hem no minim wanfala really toktok from God. Ehud minim nao for iusim sword bilong hem. Maet from king hia hem ting bae hem herem toktok from god bilong hem Chemosh, hem “getap from throne bilong hem.” Ehud kwiktaem pullim aot sword bilong hem and busarem bele bilong Eglon. Luk olsem sword hia hem olsem wanfala naef. So, “handol tu hem go insaed witim naef wea mekem gris kavarem naef, . .  and evri siti start for kamaot,” maet from ples wea Ehud busarem or from hem let go nao.—Judges 3:20-23.

Isi for Ranawe

Hem no weit moa for tekem sword bilong hem, “Ehud hem go aot thru long air hol, bat hem satem and lokim door bilong rum long ruf bihaen long hem and go aot. And hemseleva nao go aot. And olketa servant bilong [Eglon] kam and start for lukluk, and olketa lukim olketa door bilong rum long ruf hem lok. So olketa sei: ‘Hem go long toilet insaed rum wea cold naes.’ ”—Judges 3:23, 24.

Wanem nao “air hol” wea Ehud go aot thru long hem? Wanfala buk sei: “Iumi no savve long really mining [bilong datfala Hebrew word],” bat samfala sei maet hem “ ‘ples for air go aot’ or ‘window.’ ” Waswe, Ehud lokim olketa door from insaed and then go aot long difren wei? Or waswe, hem lokim door from aotsaed witim key wea hem tekem from datfala king wea dae finis? Waswe, hem wakabaot isisi go pas long olketa security and act olsem no eniting nomoa happen? Bible no talem. Nomata wanem teknik Ehud duim, olketa servant bilong Eglon no stretawe tingse eni samting happen taem olketa faendem door hem lok. Olketa tingse hem “go long toilet” nomoa.

Taem olketa servant bilong king delay, Ehud hem ranawe. Then hem hipimap olketa nara Israelite and sei: “Kam bihaen long mi, bikos Jehovah hem givim finis enemy bilong iufala, olketa Moabite, long hand bilong iufala.” Taem olketa blokem olketa stream bilong Jordan River, olketa man bilong Ehud stopem wei for olketa Moabite hia wea no garem eni leader for go bak long homland bilong olketa. So, long “datfala taem [olketa Israelite] finisim Moab, samting olsem ten thousand man, evriwan healthy and evriwan strongfala man; and no eniwan hem ranawe. And long datfala taem Moab start for stap anda long hand bilong Israel; and datfala land no garem eni problem for eiti year.”—Judges 3:25-30.

Olketa Leson wea Iumi Savve Lanem

Samting wea happen long taem bilong Ehud teachim iumi hao iumi bae kasem nogud samting sapos iumi duim samting wea nogud long eye bilong Jehovah. Long narasaed, Jehovah helpem olketa wea repent and tan go long hem.

Olketa plan bilong Ehud win no from hem kleva or bikos olketa enemy no garem savve. Wei wea olketa purpose bilong God fulfill hem no depend long olketa man. Main reason why Ehud hem win hem bikos God sapotim hem from hem duim samting followim will bilong Hem for mekem pipol bilong Hem kamap free. God hem sendem Ehud, “and taem Jehovah markem olketa judge for [pipol bilong hem], Jehovah stap witim datfala judge.”—Judges 2:18; 3:15.