Report Bilong Olketa wea Talemaot Kingdom

Luk Aotem Pipol Long Wakples Bilong Olketa

WANEM nao semsem long aposol Matthew, Peter, Andrew, James, and John? Jesus kolem evriwan taem olketa stap long wakples bilong olketa. Peter, Andrew, James, and John barava busy long fishing bisnis bilong olketa taem Jesus invaetem olketa olsem: “Kam followim mi.” Jesus invaetem Matthew for kamap disaepol bilong hem taem hem stap long tax office.​—⁠Matthew 4:​18-​21; 9:⁠9.

For witness long pipol long wakples bilong olketa, savve bringim gudfala samting. From olketa luksavve long diswan, no longtaem go nomoa Olketa Jehovah’s Witness long Japan arrange for duim witim best bilong olketa disfala part bilong ministry. Wanem nao kamaot from datwan? Insaed tu-thri month nomoa, olketa duim staka thousand return visit, and startim samting olsem 250 Bible study. Tingim olketa experience hia.

Long Tokyo wanfala full-taem minister meetim boss bilong wanfala ples for kaikai wea bin meetim wanfala Witness samting olsem 30 year bifor taem hem skulboy yet. Nomata datfala boss no minim evri samting wea hem herem long datfala taem, hem barava interest long Bible. From hem interest moa, hem kwiktaem acceptim Bible study wea olketa iusim buk Savvy wea Lead Go Long Laef Olowe.a Witim diswan, hem startim program bilong hemseleva for readim Bible evri evening bifor hem sleep.

Wanfala spesol pioneer minister visitim wanfala office. Nomata boss no stap, wanfala young woman wea ansarem telephone bilong boss askem hem, “Waswe, iu laek story witim mi?” Bihaen tufala story for lelebet taem long telephone, datfala young woman kamaot from office and sei hem interest for readim Bible. Datfala spesol pioneer arrange for tekem kam bak wanfala Bible and startim Bible study witim woman hia long wanfala park wea no farawe tumas, long early morning bifor hem waka.

Long nara office, wanfala man lukim nara wakman acceptim olketa Wastaoa and Wekap! magasin bat then hem torowem bihaen datfala Witness hem go. Taem man hia kasem haos, hem storyim long waef bilong hem wea hem wanfala Witness samting wea happen and sei sapos hem nao datfala man bae hem lisin. Dota bilong hem herem wanem hem talem, and go talem long wanfala Witness wea duim datfala bisnis territory. Datfala Witness kwiktaem visitim datfala hasband and startim Bible study witim hem. Datfala man start for go long evri meeting long Sunday.

For witness long pipol long wakples hem bringim olketa nara gudfala samting. Planti pablisa long Japan garem savve long hao for duim olketa return visit long olketa stoa, olketa factory, and olketa office. And tu, thru long diskaen wei for witness, olketa pablisa go story moa and startim study witim planti wea kamap inactive. Samting wea kamaot from datwan hem barava gud tumas. Wanfala Kongregeson long Central Tokyo reportim 108 hom Bible study no longtaem go nomoa, wea hem tufala taem moa big winim namba wea olketa reportim long year bifor.

[Footnote]