Givim Gudfala Witness Long Olketa Pablik Ples
1. Hao nao olketa Christian distaem followim example bilong olketa fasfala Christian for givim witness long olketa pablik ples, and wanem nao kamaot from datwan?
1 Olsem olketa fasfala disaepol bilong Jesus, olketa Christian distaem luk aotem pipol long eni ples wea olketa savve faendem for sharem gud nius witim olketa. (Acts 16:13; 17:17; 20:20, 21) From olketa duim best for witness long olketa pablik ples, olketa faendem olketa wea interest, wea maet olketa no meetim taem olketa duim haos-tu-haos ministry.
2. Why nao iumi needim fasin for luksavve taem iumi witness long olketa pablik ples, and wanem nao iumi savve duim mekem iumi waka followim order?
2 Iumi needim fasin for luksavve taem iumi witness long olketa pablik ples. Evritaem, best samting hem for no disturbim eniwan taem iumi duim waka bilong iumi. Olsem example, sapos staka pablisa duim sem area or visitim olketa sem bisnis, samfala pipol maet feel nogud taem olketa lukim iumi staka long ples bilong olketa. Diswan savve spoelem wei wea pipol tinghae long waka bilong iumi and maet no staka laek for story witim iumi. Wanem nao iumi savve duim for stopem kaen samting olsem for happen? Samfala kongregeson wea garem staka pablik area for witness long hem faendem hem gud for markem separate territory map for each area olsem. (1 Cor. 14:40) And tu, evri samting savve followim gudfala order sapos iumi waka nomoa long ples wea olketa markem for kongregeson bilong iumi, bat sapos Kongregeson Service Komiti mekem arrangement for helpem nara kongregeson, then iumi savve go long datfala territory.—Lukim November 1998 Kingdom Ministry Bilong Iumi, p. 6, par. 18-19.
3. Wanem kaen wei for story nao samfala faendem hem gud taem olketa witness long olketa pablik ples?
3 Story Long Pipol: Taem Jesus story witim wanfala woman long wanfala well, hem start witim shortfala toktok nomoa and taem hem lukim hem start for interest, hem gohed for storyim moa samting for fitim interest wea datfala woman showimaot. (John 4:7-26) Distaem, diskaen wei for story hem savve barava waka gud tu samfala taem. Samfala pablisa faendemaot hao for givim gudfala witness long pablik, hem gud for story lelebet long man fastaem and showim really interest long hem, then bihaen, storyim Kingdom message. Pablisa savve story abaotem samting wea pipol interest long hem, wea plande taem savve lead go long wei for story. Taem olketa narawan storyim samting wea olketa warim, olketa lisin gud long olketa, and savve sharem nao comfort from Word bilong God.—Rom. 15:4.
4. Hao nao iumi savve mekem grow interest bilong man wea iumi story witim?
4 Mekem Grow Interest: Each taem iumi story gud witim eniwan, iumi shud trae arrange for mekem interest bilong hem for grow. Hao nao iumi savve duim? Taem iu finisim story, maet iu savve aotem kam note buk bilong iu and sei: “Mi laekem tumas story bilong iumi. Hem olraet for iumi savve story long narataem moa?” Or iu savve sei: “Mi laek tekem kam wanfala article for iu wea mi sure iu bae interest long hem. Waswe, mi savve tekem kam for iu long haos or office bilong iu?” Samfala pablisa sei nomoa: “Wanem nao telephone namba bilong iu?” Iu savve kasem gud samting taem iu duim olsem.