Waka Hard for Showimaot Kaenfala Fasin Insaed World wea Raf
“Samting wea luk naes tumas long man bilong earth nao loving-kaeness bilong hem.”—PROVERBS 19:22.
1. Why nao hem savve hard for showimaot kaenfala fasin?
WASWE, iu ting iu wanfala kaen man? Sapos olsem, for stap long disfala world hem no isi. Hem tru, Bible sei kaenfala fasin hem part long “frut bilong spirit,” bat why nao hem hard for showimaot kaenfala fasin nomata long olketa kantri wea sei olketa Christian? (Galatians 5:22) Olsem iumi storyim long first article, iumi savve faendem part long ansa for datfala kwestin long samting wea aposol John raetem—Devil Satan datfala spirit creature wea nating kaen, hem nao kontrolem disfala full world. (1 John 5:19) Jesus Christ kolem Satan “ruler bilong disfala world.” (John 14:30) So disfala world garem sem fasin olsem bighed ruler bilong hem wea raf fogud.—Ephesians 2:2.
2. Wanem nao olketa challenge wea mekem hem hard for iumi showimaot kaenfala fasin?
2 Taem nara pipol no kaen long iumi diswan savve affectim iumi long nogud wei. Maet hem olketa neiba wea againstim iumi, stranger wea no kaen, and samfala taem olketa fren and famili member wea maet duim samting wea spoelem feeling bilong iumi. Hevi wea iumi kasem taem iumi mas deal witim pipol wea no kaen and wea singaot and tok swear long each other savve mekem iumi feel nogud tumas. Wei wea olketa nating kaen savve mekem iumi les long olketa, and iumi maet ting for no showimaot kaenfala fasin long olketa. Kaen feeling olsem savve lead go long olketa spiritual or physical health problem.—Romans 12:17.
3. Wanem nao olketa bigfala problem wea pipol feisim wea testim kaenfala fasin bilong olketa?
3 Olketa nogud samting wea happen long world tu maet mekem hem hard for iumi showimaot kaenfala fasin. Olsem example, pipol kasem hevi from danger bilong terrorism and wei wea samfala kantri maet iusim olketa biological or nuclear weapon. And tu, planti million pipol poor and no garem inaf kaikai, ples for stap, kaleko, and medical treatment. Hem wanfala challenge for iumi go ahed showimaot kaenfala fasin taem hem luk olsem laef bilong iumi hard for kamap moabeta.—Ecclesiastes 7:7.
4. Taem olketa ting for showimaot kaenfala fasin long nara pipol, samfala maet garem wanem rongfala tingting?
4 Hem isi for man tingse kaenfala fasin no important tumas and for tingse datfala fasin hem showimaot man hem wik. Man savve feel olsem pipol mekius long hem nomoa, especially taem nara pipol ting nating long feeling bilong hem. (Psalm 73:2-9) Bat Bible provaedem stretfala direction for iumi taem hem sei: “Kwaet ansa hem stopem kros, bat toktok wea givim pain hem mekem kros kamap.” (Proverbs 15:1) Kwaet fasin and kaenfala fasin hem tufala frut bilong spirit wea join tugeta and wea savve helpem iumi for deal witim olketa challenge wea kamap.
5. Iumi need for showimaot kaenfala fasin long hu?
5 From hem barava important for iumi olketa Christian for showimaot frut bilong holy spirit bilong God, hem gud for iumi ting raonem hao iumi savve showimaot wanfala long olketa fasin hia—kaenfala fasin. Waswe, man savve showimaot kaenfala fasin insaed world wea raf tumas? Sapos olsem, wanem nao samfala wei wea iumi savve showimaot iumi no letem Satan stopem iumi for showimaot disfala fasin, especially taem iumi kasem hevi? Bae iumi lukim hao for showimaot kaenfala fasin long famili, wakples, skul, long olketa neiba bilong iumi, long ministry, and midolwan olketa Christian brata and sista bilong iumi.
Kaenfala Fasin Insaed Famili
6. Why nao kaenfala fasin hem important tumas insaed long famili, and hao nao olketa famili member savve showimaot diswan?
6 For kasem direction from Jehovah and blessing bilong hem, iumi mas garem and mekem grow evribit olketa frut bilong spirit. (Ephesians 4:32) Bae iumi storyim spesol need bilong olketa famili member for kaen long each other. Long samting olketa duim evriday, hasband and waef shud showimaot fasin for kea and mas kaen long each other and long olketa pikinini. (Ephesians 5:28-33; 6:1, 2) Kaenfala fasin olsem mas showaot long wei wea olketa famili member tok long each other, long wei wea olketa pikinini honorim and respectim dadi and mami, and wei wea tufala deal witim olketa pikinini long stretfala wei. Mas kwiktaem for givim praise, slow for tok daonem.
7, 8. (a) For showimaot tru kaenfala fasin insaed long famili, wanem fasin nao iumi mas stap klia long hem? (b) Hao nao wei for story gud tugeta savve mekem famili hem strong? (c) Hao nao iu savve showimaot kaenfala fasin insaed famili bilong iu?
7 Insaed wei for kaen long olketa famili member bilong iumi, hem wei for followim kaonsel bilong aposol Paul: “Barava aotem fasin for kros, nogud fasin, nogud toktok, and dirty toktok from mouth bilong iufala.” Evriday, olketa Christian famili shud story witim each other long wei wea showimaot respect. Why nao olsem? Hem bikos wei for story gud hem main samting wea mekem olketa famili for stap strong and gudfala. Taem wei for no agree hem kamap, trae for stretem datfala problem and for stopem wei for raoa, no trae for win. Olketa famili member wea hapi bae trae hard for tingim feeling and for kaen long each other.—Colossians 3:8, 12-14.
8 Kaenfala fasin hem mekem iumi want for duim gud samting for narawan. So iumi luk aotem eni wei for helpem and tingim feeling bilong olketa nara famili member. For wanfala famili kamap gudfala example saed long kaenfala fasin, evri famili member mas waka hard long diswan wanwan and olsem famili. Sapos olsem, God bae blessim olketa, and tu, long kongregeson and long community olketa bae honorim God bilong kaenfala fasin, Jehovah.—1 Peter 2:12.
Kaenfala Fasin Long Wakples
9, 10. Storyim samfala problem wea savve kamap long wakples, and storyim hao for deal witim long kaenfala wei.
9 For wanfala Christian, samting wea happen long wakples evriday savve mekem hem wanfala challenge for showimaot kaenfala fasin long olketa wakfren. Wei wea samfala wakman trae for winim narawan long wei for laea long boss savve mekem olketa finisim iumi from datfala waka or savve spoelem gud nem wea iumi garem witim boss. (Ecclesiastes 4:4) Hem no isi for showimaot kaenfala fasin long taem olsem. Nomata olsem, wanfala servant bilong Jehovah shud no forget hao evritaem, wei for showimaot kaenfala fasin nao hem best samting for duim, and hem shud trae for stap gud witim pipol wea no isi for fren witim. For showimaot fasin for kea savve helpem iumi for duim diswan. Maet iu savve showimaot interest taem wakfren bilong iu hem sik or samwan long famili bilong hem sik. Wei for ask bihaen hao nao datfala sik man savve affectim datfala man long gudfala wei. Tru nao, olketa Christian mas luk aotem eni wei wea olketa fit for duim for mekem peace kamap. Samfala taem kaenfala toktok wea showimaot iumi interest savve help long diswan.
10 Samfala taem, boss maet forcem tingting bilong hem long olketa wakman and laekem evriwan for join insaed wanfala celebration wea mekhae long nation or wea againstim Bible. Taem conscience bilong wanfala Christian stopem hem for tekpart, diswan savve mekem problem kamap witim boss. Long taem olsem, maet hem no wise for explainim evribit hao hem barava rong for iumi duim samting wea boss askem. Diswan hem bikos long tingting bilong olketa wea no bilivim sem samting olsem iumi, datfala celebration hem stret samting nomoa. (1 Peter 2:21-23) Maet iu savve explainim long kaenfala wei why nao iuseleva bae no join insaed. No changem bak nogud toktok witim nogud toktok. Hem gud for wanfala Christian for followim nambawan advaes long Romans 12:18: “Sapos iufala fit for duim, keepim peace witim evri man.”
Kaenfala Fasin Long Skul
11. Wanem nao olketa challenge wea olketa young wan feisim for showimaot kaenfala fasin long olketa skulfren?
11 Hem bigfala challenge for olketa young wan for showimaot kaenfala fasin long olketa skulfren. Planti taem, young pipol laekem tumas for olketa skulfren acceptim olketa. Samfala boy act raf for mekem olketa nara student tinghae long olketa, and samfala spoelem olketa nara student. (Matthew 20:25) Samfala nara young pipol show-off saed long savve, sports, or long olketa nara wei. Planti taem wea olketa show-off olsem, olketa deal witim olketa skulfren and nara student long wei wea no kaen and olketa mistek for tingse diswan mekem olketa winim narawan. Wanfala young Christian mas keakea nogud hem followim wei bilong olketa hia. (Matthew 20:26, 27) Aposol Paul talem hao “love hem long-safaring and kaen” and love hem “no tok praod, hem no bighed.” Dastawe, wanfala Christian mas no followim badfala example bilong olketa wea no kaen, bat hem mas followim kaonsel bilong Bible taem hem deal witim olketa skulfren bilong hem.—1 Corinthians 13:4.
12. (a) Why nao maet hem wanfala challenge for olketa young wan showimaot kaenfala fasin long olketa teacher? (b) Taem olketa young wan kasem hevi for no kaen, olketa savve luk go long hu for help?
12 Olketa young wan mas showimaot kaenfala fasin long teacher bilong olketa tu. Planti student laekem tumas for mekem teacher bilong olketa feel kros. Olketa tingse olketa nao kleva taem olketa duim samting wea againstim olketa rul bilong skul and wea showimaot olketa no respectim teacher. Thru long wei for mekem olketa fraet, olketa savve forcem samfala nara student for duim sem samting. Taem wanfala young Christian no willing for followim olketa, maet olketa tok spoelem or mekfani long hem. For feisim kaen samting olsem long skul evriday savve testim wei wea wanfala Christian disaed strong for showimaot kaenfala fasin. Bat, no forget hao hem important tumas for loyal long Jehovah. Iu savve feel sure hao thru long spirit bilong hem, hem bae sapotim iu taem olketa hard samting olsem kamap long laef bilong iu.—Psalm 37:28.
Kaenfala Fasin Long Olketa Neiba
13-15. Wanem nao savve stopem iumi for showimaot kaenfala fasin long olketa neiba, and hao nao iumi savve winim olketa challenge olsem?
13 Nomata iu stap long wanfala haos, bigfala building, or eni nara ples, iu savve tingim olketa wei for showimaot kaenfala fasin and interest long olketa neiba. Diswan tu no isi evritaem.
14 Waswe sapos klos neiba bilong iu no laekem iu from kala skin, kantri, or religion bilong iu? Waswe sapos samfala taem olketa no kaen long iu or barava nating interest long iu? From iu wanfala servant bilong Jehovah, for showimaot kaenfala fasin savve help. Bae olketa luksavve iu difren, and diswan bae barava givim praise long Jehovah—nambawan example bilong kaenfala fasin. Kaenfala fasin bilong iu maet changem tingting bilong datfala neiba. Maet hem kamap man wea praisem Jehovah.—1 Peter 2:12.
15 Hao nao iumi savve showimaot kaenfala fasin? Wanfala wei nao hem gudfala fasin bilong evriwan long famili taem olketa showimaot olketa frut bilong spirit. Olketa neiba maet luksavve long diswan. Samfala taem, maet iu fit for duim kaenfala samting for neiba bilong iu. No forget, for garem kaenfala fasin hem minim iumi interest long nara pipol.—1 Peter 3:8-12.
Kaenfala Fasin Long Ministry Bilong Iumi
16, 17. (a) Why nao kaenfala fasin hem important long pablik ministry bilong iumi? (b) Hao nao iumi savve showimaot kaenfala fasin long olketa difren part bilong field ministry wea iumi duim?
16 Iumi mas kaen long Christian ministry bilong iumi taem iumi trae hard for meetim pipol long haos or wakples bilong olketa, and long olketa pablik ples. Iumi mas no forget iumi stand for Jehovah, wea hem evritaem kaen.—Exodus 34:6.
17 Wanem nao iu savve duim for showimaot kaenfala fasin long ministry bilong iu? Olsem example, taem iu duim street witnessing, iu savve showimaot kaenfala fasin long wei wea iu tingim pipol and mek sure story bilong iu no long tumas. No blokem ples wea pipol wakabaot long hem. And tu, taem iu witness long bisnis territory, showimaot kaenfala fasin long wei for mekem story bilong iu short nomoa from iu luksavve olketa stoakeeper mas servem olketa kastoma.
18. Hao nao fasin for luksavve hem join witim wei for showimaot kaenfala fasin long ministry bilong iumi?
18 Iusim fasin for luksavve long haos-tu-haos ministry. No stap longtaem tumas long wanfala haos, especially taem weather hem nogud. Waswe, iu luksavve taem man hem start for no laek lisin or start for kamap kros? Maet long kantri bilong iu, Olketa Jehovah’s Witness visitim sem pipol planti taem. Sapos olsem, iumi mas barava tingim olketa, evritaem kaen and showimaot naesfala fasin. (Proverbs 17:14) Trae for minim reason why haosholder no laek for lisin long datfala day. Remember, wanfala Christian brata or sista bilong iu bae visitim datfala haosholder no longtaem bihaen. Sapos iu meetim samwan wea no tok kaen long iu, barava trae hard for showimaot kaenfala fasin. No tok moa laod or showim feis wea no hapi, bat story long kwaetfala wei. Christian wea kaen hem no laek argue witim haosholder. (Matthew 10:11-14) Wanday, maet datfala man lisin long gud nius.
Kaenfala Fasin Long Olketa Kongregeson Meeting
19, 20. Why nao kongregeson need for garem kaenfala fasin, and hao nao iumi savve showimaot diswan?
19 Hem barava important tu for iumi showimaot kaenfala fasin long olketa Christian brata and sista bilong iumi. (Hebrews 13:1) From iumi part bilong bigfala famili bilong olketa brata evriwea long world, iumi mas deal witim each other long kaenfala wei.
20 Sapos wanfala kongregeson hem sharem Kingdom Hall witim wanfala or maet tu-thri nara kongregeson, hem important for iumi kaen and showimaot respect taem iumi deal witim olketa. For eni kongregeson trae winim narawan hem no mekem olketa waka gud tugeta saed long wei for arrangem taem bilong olketa meeting and olketa nara important samting, olsem klining or waka for fixim Kingdom hall. Iumi mas kaen and tingim narawan nomata iumi maet no agree long evri samting. Long disfala wei, kaenfala fasin bae win, and Jehovah bae barava blessim interest wea iumi showimaot long olketa narawan.
Go Ahed for Showimaot Kaenfala Fasin
21, 22. Olsem Colossians 3:12 storyim, iumi shud disaed strong for duim wanem?
21 Kaenfala fasin hem affectim evri part long laef bilong iumi. So iumi mas mekem diswan important part bilong Christian fasin bilong iumi. For kaen long nara pipol shud kamap wei bilong iumi.
22 Iumi evriwan mas kaen long nara pipol evriday and long wei olsem, iumi wanwan followim toktok bilong aposol Paul: “Olsem olketa wea God chusim, wea holy and wea hem lovem, iufala mas werem olsem kaleko fasin for kea, kaenfala fasin, hambol tingting, kwaet fasin, and long-safaring.”—Colossians 3:12.
Waswe, Iu Remember?
• Wanem nao mekem hem hard for wanfala Christian showimaot kaenfala fasin?
• Why nao hem important for showimaot kaenfala fasin insaed famili?
• Wanem nao samfala challenge wea mekem hem hard for showimaot kaenfala fasin long skul, wakples, and long olketa neiba?
• Explainim hao olketa Christian savve showimaot kaenfala fasin long pablik ministry bilong olketa.
[Piksa long page 18]
Wan mind and wei for waka gud tugeta savve kamap insaed famili wea evriwan showimaot kaenfala fasin
[Piksa long page 19]
Iu savve showimaot kaenfala fasin taem wakfren or samwan long famili bilong hem kasem sik
[Piksa long page 20]
Jehovah sapotim olketa wea loyal for showimaot kaenfala fasin nomata pipol mekfani long olketa
[Piksa long page 21]
For helpem neiba taem need kamap hem wei for showimaot kaenfala fasin