Pipol Bilong God Mas Lovem Kaenfala Fasin
“Only samting wea Jehovah askem bak from iu hem for showimaot justice and for lovem kaenfala fasin and for no ova tumas taem iu wakabaot witim God bilong iu.”—MICAH 6:8.
1, 2. (a) Why nao iumi shud no sapraes hao Jehovah expectim pipol bilong hem for showimaot kaenfala fasin? (b) Hem gud for iumi ting raonem olketa wanem kwestin abaotem kaenfala fasin?
JEHOVAH hem God wea showimaot kaenfala fasin. (Romans 2:4; 11:22) Firstfala man and woman, Adam and Eve, masbi hapi tumas long datwan! Long garden bilong Eden, tufala savve enjoyim olketa creation wea stap raonem olketa wea pruvim God hem kaen tumas long olketa man. And kam kasem distaem God kaen yet long evriwan, nomata pipol wea no showimaot thankiu and olketa wea wicked.
2 From God wakem olketa man long image bilong hem, olketa fit for showimaot olketa fasin bilong hem. (Genesis 1:26) Iumi no sapraes hao Jehovah expectim iumi for showimaot kaenfala fasin. Olsem Micah 6:8 hem talem, pipol bilong God mas “lovem kaenfala fasin.” Bat wanem nao kaenfala fasin? Hao nao hem join witim olketa nara fasin bilong God? From olketa man savve showimaot kaenfala fasin, why nao disfala world hem wanfala raf ples wea no kaen? Why nao iumi olketa Christian shud trae for showimaot kaenfala fasin long nara pipol?
Wanem Nao Kaenfala Fasin?
3. Wanem nao kaenfala fasin?
3 Iumi savve showimaot kaenfala fasin taem iumi interest long nara pipol. Diswan showaot thru long kaenfala toktok and wei for helpem narawan. Man wea kaen hem duim gud samting and no samting wea savve spoelem narawan. Hem fren gud and garem feeling for narawan. Hem willing for give and hem tingim nara pipol. Aposol Paul sei long olketa Christian: “Werem olsem kaleko fasin for kea, kaenfala fasin, hambol tingting, kwaet fasin, and long-safaring.” (Colossians 3:12) So, kaenfala fasin hem part long tokpiksa kaleko bilong evri tru Christian.
4. Hao nao Jehovah hem lead for showimaot kaenfala fasin long olketa man?
4 Jehovah God nao first wan for showimaot kaenfala fasin. Paul talem hao “taem Savior bilong iumi, God, showimaot kaenfala fasin and love for olketa man,” hem “sevem iumi thru long datfala wei for wasim iumi wea mekem iumi laef bak, and from holy spirit hem mekem iumi niu.” (Titus 3:4, 5) God ‘wasim,’ or klinim olketa anointed Christian long blood bilong Jesus, wea minim hem iusim ransom sakrifaes bilong Christ for olketa. Olketa kamap niu tu thru long holy spirit, and kamap “wanfala niufala creation” olsem olketa Son bilong God wea born long spirit. (2 Corinthians 5:17) God hem showimaot love and kaenfala fasin for datfala “big crowd” tu, wea “wasim finis kaleko bilong olketa and mekem kamap white long blood bilong Lamb.”—Revelation 7:9, 14; 1 John 2:1, 2.
5. Why nao olketa wea spirit bilong God leadim shud showimaot kaenfala fasin?
5 Kaenfala fasin hem wanfala part tu long frut bilong holy spirit or active force bilong God. Paul hem sei: “Frut bilong spirit hem love, hapi, peace, long-safaring, kaenfala fasin, gudfala fasin, faith, kwaet fasin, fasin for kontrolem seleva. No eni law stap wea againstim evri samting hia.” (Galatians 5:22, 23) So, hem barava fitim for olketa wea spirit bilong God leadim for showimaot kaenfala fasin long nara pipol.
Tru Kaenfala Fasin No Minim Man hem Wik
6. Hao nao kaenfala fasin savve kamap wanfala wik point and why nao olsem?
6 Samfala pipol tingse man wea showimaot kaenfala fasin hem wik. Olketa tingse man mas strict and maet raf tu, mekem nara pipol lukim strong bilong hem. Bat really samting, man wea strong nao savve showimaot tru kaenfala fasin and hem savve stap klia long wei for showimaot kaenfala fasin wea no fitim. From tru kaenfala fasin hem part long frut bilong spirit bilong God, hem no wanfala fasin wea wik and mekem man ting nating long rong fasin. Long narasaed, kaenfala fasin wea no fitim, hem nao wanfala wik point wea savve mekem man ting nating long rong fasin.
7. (a) Long wanem wei nao Eli hem fail? (b) Why nao olketa elder mas stap klia long wei for showimaot kaenfala fasin wea no fitim?
7 Olsem example, tingim Eli, hae priest bilong Israel. Hem nating disciplinem tufala son bilong hem, Hophni and Phinehas, wea waka olsem olketa priest long tabernacle. From tufala no satisfae witim share bilong sakrifaes wea Law bilong God sei olketa shud kasem, olketa talem wanfala attendant for demandim from man wea offerim animal, meat wea no tan and wea gris bilong datwan no mekem smoke long altar yet. Olketa son bilong Eli duim dirty fasin tu witim olketa woman wea serve long door bilong tabernacle. Bat Eli no aotem Hophni and Phinehas from waka bilong tufala, and hem nating tok strong long olketa. (1 Samuel 2:12-29) Iumi no sapraes for savve hao “pipol no evritaem herem toktok bilong Jehovah long datfala taem”! (1 Samuel 3:1) Olketa Christian elder mas keakea nogud olketa showimaot kaenfala fasin wea no fitim long olketa wea duim rong and diswan savve spoelem spiritual fasin bilong kongregeson. Tru kaenfala fasin hem no ting nating long wicked toktok and fasin wea againstim olketa standard bilong God.
8. Hao nao Jesus showimaot tru kaenfala fasin?
8 No enitaem man wea showimaot Nambawan Example for iumi, Jesus Christ, hem guilty for showimaot kaenfala fasin wea no fitim. Hem nao nambawan example bilong tru kaenfala fasin. Olsem example, ‘hem garem loving feeling for pipol from olketa garekil and stap olobaot olsem olketa sheep wea no garem eni shepherd.’ Pipol wea garem honest heart no fraet for kam long Jesus, and tekem kam olketa smol pikinini long hem tu. Tingim kaenfala fasin and fasin for kea wea hem showimaot taem “hem holem olketa pikinini hia insaed arm bilong hem and start for blessim olketa.” (Matthew 9:36; Mark 10:13-16) Nomata Jesus hem kaen, hem strong for duim samting wea stret long eye bilong Dadi bilong hem long heven. Jesus no acceptim eni wicked samting; hem kasem strong from God for accusim olketa bigman bilong religion wea hypocrite. Olsem Matthew 23:13-26 showimaot, planti taem hem talem datfala toktok: “Trabol for iufala, olketa scribe and Pharisee, iufala hypocrite!”
Kaenfala Fasin and Olketa Nara Fasin Bilong God
9. Hao nao kaenfala fasin hem join witim long-safaring and gudfala fasin?
9 Kaenfala fasin hem join witim olketa nara fasin wea kam from spirit bilong God. Long Galatians 5:22, hem stap midolwan long “long-safaring” and “gudfala fasin.” Tru nao, man wea mekem grow kaenfala fasin hem showimaot datwan long wei wea hem long-safaring. Hem patient witim pipol, nomata long olketa wea no kaen tu. Kaenfala fasin hem join witim gudfala fasin from iumi showimaot diswan taem iumi duim samting for helpem narawan. Samfala taem, olketa savve transleitim Greek word wea Bible iusim for “kaenfala fasin” olsem “gudfala fasin.” Olketa heathen sapraes tumas long wei wea olketa first Christian showimaot disfala fasin, dastawe, olsem Tertullian talem, olketa kolem olketa follower bilong Jesus ‘pipol wea main fasin bilong olketa hem kaenfala fasin.’
10. Hao nao kaenfala fasin and love join tugeta?
10 Kaenfala fasin and love tufala join tugeta. Jesus sei olsem abaotem olketa follower bilong hem: “From diswan evriwan bae savve iufala nao olketa disaepol bilong mi, sapos iufala garem love midolwan long iufala seleva.” (John 13:35) And Paul sei olsem abaotem disfala love: “Love hem long-safaring and kaen.” (1 Corinthians 13:4) Kaenfala fasin hem join witim love tu long datfala word “loving-kaeness,” wea Bible iusim planti taem. Diswan nao kaenfala fasin wea kam from loyal love. Datfala Hebrew noun wea olketa transleitim “loving-kaeness” hem minim moa samting winim loving feeling. Hem kaenfala fasin wea showaot long samting long loving wei, go kasem taem hem fulfillim purpose bilong hem for datfala samting. Jehovah showimaot loving-kaeness, or loyal love bilong hem long samfala difren wei. Olsem example, diswan showaot taem hem duim samting for sevem and protectim pipol.—Psalm 6:4; 40:11; 143:12.
11. Loving-kaeness bilong God hem mekem iumi feel sure long wanem?
11 Loving-kaeness bilong Jehovah pullim pipol kam long hem. (Jeremiah 31:3) Taem olketa faithful servant bilong God needim hem for sevem or helpem olketa, olketa savve hao loving-kaeness bilong hem nao loyal love. Olketa savve depend long disfala loyal love. Dastawe olketa savve prea and feel sure, olsem man wea raetem psalm wea sei: “For saed bilong mi, mi trustim loving-kaeness bilong iu; heart bilong mi bae hapi from iu sevem mi.” (Psalm 13:5) From love bilong God hem loyal, olketa servant bilong hem savve trustim hem evribit. Olketa kasem disfala promis: “Jehovah bae no lusim pipol bilong hem, and hem bae no lusim olketa wea bilong hem.”—Psalm 94:14.
Why Nao World Hem Barava Raf?
12. Long wanem taem and hao nao nogud rul hem start?
12 Ansa for disfala kwestin hem join witim samting wea happen long garden bilong Eden. No longtaem bihaen God creatim firstfala man, wanfala spirit creature wea kamap selfish and bighed hem startim plan bilong hem for rulim world. Followim datfala plan, hem kamap “ruler bilong disfala world,” wanfala barava nogud ruler. (John 12:31) Hem kamap Devil Satan, main enemy bilong God and olketa man. (John 8:44; Revelation 12:9) Selfish plan bilong hem for startim rul wea againstim kaenfala rul bilong Jehovah hem showaot no longtaem bihaen Jehovah creatim Eve. So, nogud rul hem start taem Adam chus for independent from rul bilong God, wea minim hem rejectim evribit kaenfala fasin bilong Hem. (Genesis 3:1-6) Winim wei for rulim olketa seleva, Adam and Eve really stap anda long selfish and bighed rul bilong Devil.
13-15. (a) Wanem nao samfala samting wea kamaot from wei for rejectim raeteous rul bilong Jehovah? (b) Why nao disfala world hem no kaen?
13 Lukluk long samfala samting wea kamaot from diswan. Jehovah aotem Adam and Eve from datfala part long earth wea hem paradaes. Olketa lusim naesfala hom wea olketa frut and vegetable grow gud and stap aotsaed long garden bilong Eden wea living hem hard. God sei long Adam: “From iu lisin long toktok bilong waef bilong iu and kaikai from tree wea mi givim iu disfala komand, ‘Iu mas no kaikai from hem,’ graon hem kasem curse from wanem iu duim. Bae iu waka hard for kasem kaikai from hem long evriday long laef bilong iu. And olketa rabis grass and nila grass bae grow for iu.” From graon hem kasem curse, diswan minim bae hem hard nao for mekem eniting grow. Olketa laen pikinini bilong Adam barava experiencem nogud samting from datfala graon wea kasem curse and wea fulap witim rabis grass and nila grass. Dastawe, dadi bilong Noah, Lamech, storyim ‘pain bilong hand bilong olketa wea kam from graon wea Jehovah cursim.’—Genesis 3:17-19; 5:29.
14 And tu, Adam and Eve lusim peace and kasem trabol. God sei long Eve: “Mi bae mekem pain bilong iu kamap moa big taem iu babule; bae iu bornem pikinini witim pain, and bae iu wantem tumas hasband bilong iu, and bae hem bossim iu.” Bihaen, Cain, firstborn bilong Adam and Eve, duim barava raf samting taem hem killim dae brata bilong hem Abel.—Genesis 3:16; 4:8.
15 Aposol John sei “full world hem stap long paoa bilong wicked wan.” (1 John 5:19) Olsem ruler bilong hem, world distaem fulap witim wicked, selfish, and bighed fasin. Dastawe iumi no sapraes hao world hem fulap witim raf fasin and hem no kaen! Bat bae hem no go ahed olsem for olowe. Jehovah bae mek sure kaenfala fasin and fasin for kea long pipol bae go ahed anda long Kingdom bilong hem, and no fasin for raf and no kaen.
Anda Long Kingdom Bilong God Evriwan Bae Showimaot Kaenfala Fasin
16. Why nao kaenfala fasin hem barava important samting long rul bilong God thru long Christ Jesus, and diswan minim iumi mas hao?
16 Pipol wea stap anda long Jehovah and King bilong Kingdom bilong Hem, Christ Jesus, mas showimaot kaenfala fasin. (Micah 6:8) Jesus Christ showim iumi hao kaenfala fasin nao wanfala mark bilong datfala rul wea Dadi bilong hem markem hem for lukaftarem. (Hebrews 1:3) Iumi lukim diswan long toktok bilong Jesus wea showimaot klia hao olketa bigman bilong giaman religion putim hevi long pipol. Hem sei: “Kam long mi, iufala evriwan wea stragol and karem bigfala hevi, and mi bae strongim iufala. Karem yoke bilong mi and lanem samting from mi, from mi garem kwaet fasin and mi hambol long heart, and iufala bae faendem samting for strongim soul bilong iufala. From yoke bilong mi hem kaenfala and lod bilong mi hem no hevi.” (Matthew 11:28-30) Staka bigman bilong religion and olketa nara ruler mekem pipol feel wikdaon from staka rul and hard waka nating wea olsem bigfala hevi for olketa. Bat, samting wea Jesus laekem olketa follower bilong hem for duim hem satisfaem need bilong olketa and hem samting wea olketa fit for duim. Yoke bilong Jesus savve strongim man and hem barava kaenfala! Diswan muvim iumi for olsem hem long wei for showimaot kaenfala fasin long nara pipol.—John 13:15.
17, 18. Why nao iumi savve trustim hao olketa wea rul witim Christ long heven and olketa wea stand for hem long earth bae showimaot kaenfala fasin?
17 Toktok bilong Jesus long olketa aposol bilong hem showimaot klia hao rul bilong Kingdom bilong God hem difren evribit from rul bilong olketa man. Bible sei: “Wanfala bigfala raoa kamap midolwan long olketa [disaepol] abaotem hu nao nambawan. Bat hem sei long olketa: ‘Olketa king bilong olketa nation bossim olketa, and olketa wea garem paoa ovarem olketa kasem datfala nem Bigman for Givim Help. Bat iufala mas no olsem. Bat man wea nambawan midolwan long iufala mas kamap olsem smol wan, and man wea chief olsem man wea servem narawan. From hu nao hem nambawan, man wea sidaon long tebol or man wea serve? Hem man wea sidaon long tebol, iaman? Bat mi stap midolwan long iufala olsem man wea serve.’ ”—Luke 22:24-27.
18 Olketa man wea rul ‘bossim’ pipol for trae kamap nambawan and olketa luk aotem bignem from olketa tingse bignem nao mekem olketa moa important winim pipol wea stap anda long olketa. Bat Jesus talem hao samting wea really mekem man nambawan hem wei for trae hard for evritaem servem nara pipol. Evriwan wea bae rul witim Christ long heven or serve olsem olketa wea stand for hem long earth mas trae hard for followim example bilong hambol and kaenfala fasin bilong hem.
19, 20. (a) Hao nao Jesus showimaot dat kaenfala fasin bilong Jehovah hem big tumas? (b) Hao nao iumi savve followim wei wea Jehovah showimaot kaenfala fasin?
19 Iumi lukluk long samfala nara loving kaonsel wea Jesus givim. For showim hao kaenfala fasin bilong Jehovah hem big tumas, Jesus hem sei: “Sapos iufala lovem pipol wea lovem iufala, wanem gudfala samting nao iufala duim? From olketa sinner tu lovem pipol wea lovem olketa. And sapos iufala duim gudfala samting long olketa wea duim gudfala samting long iufala, wanem gudfala samting nao iufala duim? Olketa sinner tu duim sem samting. And tu, sapos iufala givim selen and no askem interest long olketa wea iufala hope bae givim bak samting, wanem gudfala samting nao iufala duim? Olketa sinner tu givim selen and no askem interest long olketa sinner wea olketa bae kasem bak sem samting from olketa. Bat long wei wea difren, go ahed for lovem olketa enemy bilong iufala and for duim gudfala samting and for give and no askem interest, no hope for kasem bak eni samting; and reward bilong iufala bae big tumas, and iufala bae kamap olketa son bilong Most Hae, from hem kaen long olketa wea no showimaot thankiu and wea wicked. Go ahed for showimaot mercy, olsem Dadi bilong iufala hem showimaot mercy.”—Luke 6:32-36.
20 Kaenfala fasin olsem hem no selfish. Hem no ask for eniting and no expectim eniting. From kaenfala fasin bilong hem, Jehovah “mekem sun bilong hem shaen long wicked pipol and long gudfala pipol, and hem mekem rain foldaon long pipol wea raeteous and wea no raeteous.” (Matthew 5:43-45; Acts 14:16, 17) For followim Dadi bilong iumi long heven, iumi no just stap klia long wei for spoelem pipol wea no showimaot thankiu bat iumi duim gud samting long olketa, nomata olketa wea enemy bilong iumi. Taem iumi showimaot kaenfala fasin, iumi showim Jehovah and Jesus hao iumi want for stap anda long datfala Kingdom bilong God, taem evri man bae showimaot kaenfala fasin and olketa nara fasin wea kam from God.
Why Iumi Shud Showimaot Kaenfala Fasin?
21, 22. Why nao iumi shud showimaot kaenfala fasin?
21 Hem barava important for olketa tru Christian for showimaot kaenfala fasin. Hem pruvim spirit bilong God stap long iumi. And tu, taem iumi showimaot tru kaenfala fasin, iumi followim Jehovah God and Christ Jesus. Hem wanfala fasin wea olketa wea bae stap anda long Kingdom bilong God mas showimaot. So, iumi mas lovem kaenfala fasin and lane for showimaot diswan.
22 Wanem nao samfala wei wea iumi savve showimaot kaenfala fasin long evriday living bilong iumi? Nextfala article bae storyim datfala subject.
Wanem Nao Ansa Bilong Iu?
• Wanem nao kaenfala fasin?
• Why nao world hem raf and no kaen?
• Hao nao iumi savve evriwan bae showimaot kaenfala fasin anda long rul bilong God?
• Why nao hem important tumas for olketa wea want for stap anda long Kingdom bilong God for showimaot kaenfala fasin?
[Piksa long page 13]
Olketa Christian elder trae hard for deal witim flock long kaenfala wei
[Piksa long page 15]
Olketa servant bilong Jehovah savve depend long loving-kaeness bilong hem long olketa hard taem
[Olketa Piksa long page 16]
Jehovah kaen tumas for letem sun hem shaen and rain hem foldaon long evri man