Kingdom Gavman Bilong God​—Really Samting Distaem

“Hao nao staka kantri wea garem olketa difren kastom, samfala rich and olketa narawan poor, savve agree? Olketa sei only wanfala attak from nara planet nomoa savve mekem evri man wan mind.”—The Age, niuspepa bilong Australia.

WANFALA attak from nara planet? Iumi no savve sapos datwan bae mekem evri kantri bilong earth kamap wan mind or nomoa, bat profesi long Bible story abaotem trabol wea klosap for happen wea bae mekem olketa kantri bilong world for kamap wan mind. And olketa samting wea no from earth nao bae mekem disfala trabol kamap.

King David long Israel bifor profesi abaotem diswan. God muvim hem for raet olsem: “Olketa king bilong earth standap and olketa bigman hipap tugeta olsem wanfala sekson for againstim Jehovah and againstim anointed wan bilong hem, and sei: ‘Iumi brekem olketa rope and torowem olketa string bilong olketa from iumi!’ ” (Psalm 2:2, 3; Acts 4:25, 26) Lukim hao olketa ruler bilong world hipap tugeta olsem wanfala sekson for againstim Jehovah, Creator bilong universe, and anointed wan bilong hem, wea hem nao King wea hem appointim, Jesus Christ. Hao nao diswan bae kamap?

Followim olketa date long Bible and olketa profesi wea fulfill, long year 1914, God putim Kingdom bilong hem long heven wea Jesus Christ nao hem King.a Long datfala taem olketa kantri bilong world garem sem tingting. Winim wei for stap anda long sovereign rul bilong Kingdom bilong God wea just start, olketa faet for garem paoa ovarem olketa narawan—datfala Great War, or World War I.

Wanem nao tingting bilong Jehovah abaotem wanem olketa man wea rul duim? “Datwan wea sidaon long heven bae laf; Jehovah nao bae mekfani long olketa. Long datfala taem hem bae tok long olketa from hem kros and from wei wea hem feel nogud tumas bae hem spoelem olketa.” Then, Jehovah bae talem Son bilong hem, datfala anointed King bilong Kingdom: “Askem mi, mekem mi givim olketa nation long iu, and full earth olsem samting bilong iu. Iu bae brekem olketa witim iron stik, olsem clay dish iu bae pisisim olketa.”—Psalm 2:4, 5, 8, 9.

Disfala wei wea Jehovah iusim iron stik for pisisim evribit olketa nation wea againstim hem, bae kamap long Armageddon, or Har–​Magedon. Lastfala buk bilong Bible, Revelation, storyim disfala bigfala trabol olsem “war bilong bigfala day bilong God Olmaeti,” wea “olketa king bilong full earth” hipap tugeta. (Revelation 16:14, 16) From demon nao muvim olketa, olketa kantri bilong earth bae kamap wan mind for duim wanfala samting—faet againstim God Olmaeti.

Datfala taem wea olketa man bae hipap tugeta for faet againstim sovereign rul bilong God hem kakam kwiktaem. Bat wei wea olketa kamap “wan mind” bae no givim eni gud samting long olketa. Bat, wanem olketa duim bae hem startim samting wea bae lead go long peace wea evri man bin weitim for long taem finis. Hao nao olsem? Long datfala last faet, Kingdom bilong God “bae smasem and finisim evri kingdom hia [bilong world], and hemseleva nao bae stap olowe.” (Daniel 2:44) Kingdom bilong God, no eni organization bilong man, hem nao gavman wea bae mekem kamap samting wea olketa man laekem for world peace.

Main Wan for Lead Insaed Kingdom Gavman

Datwan nao Kingdom wea staka honest pipol prea for hem taem olketa sei: “Mekem kingdom bilong iu kam. Mekem will bilong iu kamap long earth, olsem long heven.” (Matthew 6:10) Kingdom bilong God hem no samting wea insaed heart bilong man, bat hem wanfala really gavman wea duim staka gud samting start taem hem kamap long heven long 1914. Iumi bae storyim samfala important samting wea showimaot Kingdom bilong God hem wanfala really samting and hem barava muv ahed distaem.

First samting, disfala gavman garem paoa for duim samting and Jesus Christ nao King bilong hem. Long 33 C.E., Jehovah God mekem Jesus Christ Hed bilong Christian kongregeson. (Ephesians 1:22) Start kam from datfala taem, Jesus duim waka bilong hem olsem hed, wea diswan showimaot savve wea hem garem for rul. Olsem example, taem bigfala hangre kasem Judea long first century, Christian kongregeson duim samting kwiktaem for helpem olketa member bilong hem. Olketa organizem relief waka, and Barnabas and Saul nao lusim Antioch for go long there and givim help.—Acts 11:27-30.

Iumi expectim Jesus Christ for duim sem samting distaem from datfala Kingdom hem rul nao. Taem olketa disaster happen, olsem earthquake, hangre, flood, cyclone, big wind and rain or volcano bosta, Christian kongregeson bilong Olketa Jehovah’s Witness duim samting kwiktaem for provaedem need bilong olketa brata and olketa narawan wea stap long ples wea disaster spoelem. Olsem example, taem earthquake barava spoelem El Salvador long January and February 2001, olketa organizem waka for help long olketa difren ples long datfala kantri, and olketa grup bilong Olketa Jehovah’s Witness from Canada, Guatemala, and United States givim help. Insaed shortfala taem nomoa olketa buildim bak thrifala ples for worship and winim 500 haos.

Pipol wea Stap Anda Kingdom Gavman Bilong God

Start kam long 1914, Kingdom bilong God long heven go ahed for hipimap and organizem pipol wea stap anda long hem evriwea long world. Diswan fulfillim nambawan profesi wea Isaiah raetem: “Hem mas happen long lastfala part bilong olketa day hao maunten bilong haos bilong Jehovah [tru worship bilong hem wea hae] bae standap strong winim top bilong olketa maunten, . . . and evri nation bae go long hem.” Disfala profesi showimaot hao “planti pipol” bae go ap long maunten and followim olketa instruction and law bilong Jehovah.—Isaiah 2:2, 3.

Samting wea kamaot from diswan hem wei wea pipol organize for kasem samfala goal long taem bilong iumi distaem—winim 6,000,000 Christian evriwea long world long winim 230 kantri long earth garem wan mind. Long olketa international convention bilong Olketa Jehovah’s Witness, staka taem pipol sapraes for lukim love, peace, and wei for wan mind midolwan big grup bilong pipol, wea kam from olketa difren kantri, kastom and languis. (Acts 10:34, 35) For sure bae iu agree hao gavman wea fit for hipimap tugeta long peace and wan mind planti handred pipol wea iusim difren languis, hem mas waka gud and stedy—and hem really samting.

Kingdom Bilong God and Education

Evri gavman garem olketa standard wea pipol bilong hem mas followim, and evriwan wea laek stap anda long datfala gavman mas followim olketa standard hia. Olsem tu, Kingdom bilong God garem olketa standard wea evriwan wea kasem mark for stap anda long hem mas followim. Bat, for helpem staka pipol wea garem difren living for acceptim and followim olketa sem standard hem wanfala big challenge. So, nara samting wea pruvim Kingdom bilong God hem really samting, hem disfala program bilong education wea waka gud and wea no changem mind nomoa bat heart tu.

Hao nao Kingdom gavman win for duim disfala waka wea no isi? Long wei for followim example bilong olketa aposol for preach “from haos tu haos” and teachim Word bilong God long man wanwan. (Acts 5:42; 20:20) Waswe, disfala wei for teach hem waka gud? Jacques Johnson, wanfala Catholic priest, raet long wanfala niuspepa bilong Canada wea kamap evri week abaotem wei wea hem trae hard for talem wanfala woman for no study witim Olketa Jehovah’s Witness. Hem sei: “Mi sapraes and konfius, and luksavve hao mi no savve win. Mi start for lukim hao insaed samfala month nomoa olketa JW woman hia kamap gud fren bilong disfala young mami wea no savve gogo aot. Olketa kamap klos long hem thru long wei for helpem hem, fren witim hem, and barava minim hem gud. No longtaem bihaen hem kamap active member long religion bilong olketa and mi no savve duim eniting for stopem datwan for happen.” Fasin and Bible message wea Olketa Jehovah’s Witness teachim muvim heart bilong staka million pipol evriwea long world, olsem wei wea hem muvim heart bilong disfala woman wea hem Catholic bifor.

Faondeson bilong disfala education—education bilong Kingdom—hem Bible, and hem mekhae long olketa standard bilong hem saed long fasin. Bible teachim pipol for lovem and honorim each other nomata wanem kaen living nao olketa garem. (John 13:34, 35) Hem helpem pipol tu for followim disfala kaonsel: “Finis for followim disfala system, bat kamap difren evribit from iufala changem tingting bilong iufala, mekem iufala savve pruvim long iufala seleva, gudfala and stretfala and perfect will bilong God.” (Romans 12:2) Planti million pipol garem peace and hapi distaem and nambawan hope for future from olketa lusim samting olketa duim bifor and hapi for followim olketa law and principle bilong Kingdom gavman.—Colossians 3:9-11.

Wanfala nambawan samting wea help for mekem wan mind kamap evriwea long world hem disfala magasin, Wastaoa. Thru long olketa teknik for transleit wea organize and olketa spesol samting for printim buk long olketa difren languis, olketa printim olketa main article insaed Wastaoa long 135 languis, and winim 95 percent long pipol wea readim evriwea long world savve studyim long languis bilong olketa seleva long semtaem.

Wanfala man for raet bilong Mormon church listim olketa barava gud samting wea olketa missionary bilong olketa nara religion duim wea win. Hem listim Wastaoa and Wekap!, wea Olketa Jehovah’s Witness pablisim, olsem best magasin for preach and sei: “No eniwan savve sei Wastaoa or Wekap! encouragem wei for no ting strong long olketa important samting—nomoa nao, tufala helpem pipol for luksavve long important samting winim staka nara pablikeson bilong olketa nara religion. Wastaoa and Wekap! savve strongim man from samting tufala story abaotem hem tru, olketa bin duim gudfala research, and hem abaotem olketa real samting wea happen long world.”

Staka pruv showim hao Kingdom bilong God hem really samting and hem go ahed waka distaem. Olketa Jehovah’s Witness hapi and strong for sharem “disfala gud nius bilong kingdom” witim olketa neiba, and invaetem olketa for stap anda long datwan. (Matthew 24:14) Waswe, hem samting wea iu interest long hem? Iu savve kasem blessing long wei for kaban witim pipol wea kasem education from disfala Kingdom and duim best for followim olketa standard bilong hem. Bat, samting wea moabeta, iu savve enjoyim wei for stap anda long rul bilong Kingdom insaed long niu world wea God promisim wea “evriwan bae garem raeteous fasin.”—2 Peter 3:13.

[Footnote]

[Piksa long page 4, 5]

Long 1914 olketa kantri faet insaed world war

[Olketa Piksa long page 6]

Volunteer relief waka showimaot wanem Christian love savve duim

[Piksa long page 7]

Olketa Jehovah’s Witness evriwea long world kasem gud samting from sem education program