Taed Long Physical Wei Bat No Long Spiritual Wei
“Jehovah, Creator bilong full earth, . . . givim paoa long man wea taed; and man wea no garem bigfala strong, hem mekem full paoa stap long hem.”—ISAIAH 40:28, 29.
1, 2. (a) Wanem naesfala invitation nao evriwan wea laek join insaed klin worship olketa kasem? (b) Wanem nao savve mekem big danger kamap saed long spiritual laef bilong iumi?
FROM iumi olketa disaepol bilong Jesus, iumi savve gud long disfala naesfala invitation: “Kam long mi, iufala evriwan wea stragol and karem bigfala hevi, and mi bae strongim iufala. . . . From yoke bilong mi hem kaenfala and lod bilong mi hem no hevi.” (Matthew 11:28-30) Olketa Christian garem invitation tu for kasem “olketa taem bilong blessing [wea] kam from Jehovah.” (Acts 3:19) For sure iuseleva kasem gudfala samting from iu lanem olketa truth long Bible, iu garem hapi hope for future, and iu followim olketa principle bilong Jehovah long laef bilong iu.
2 Nomata olsem, samfala wea worshipim Jehovah kasem taem wea olketa taed saed long feeling. Samfala taem olketa feeling hia go ahed for lelebet taem nomoa. Long olketa narataem hem maet go ahed for longtaem. From diswan, samfala maet garem feeling hao olketa Christian responsibility bilong olketa hem wanfala hevi and no samting wea strongim man olsem Jesus bin promisim. Kaen nogud feeling olsem maet mekem wei wea wanfala Christian fren witim Jehovah hem stap insaed big danger.
3. Why nao Jesus givim kaonsel long John 14:1?
3 Taem olketa klosap arrestim and killim dae Jesus, hem sei olsem long olketa disaepol bilong hem: “No letem heart bilong iufala wari. Showimaot faith long God, and showimaot faith long mi tu.” (John 14:1) Jesus talem toktok hia bikos barava nogud samting bae klosap kasem olketa aposol. Bihaen datwan bae olketa kasem persecution. Jesus savve olketa aposol bilong hem maet stambol bikos long bigfala feeling for wikdaon. (John 16:1) Sapos olketa no kontrolem datwan, sorre feeling maet spoelem spiritual saed bilong olketa and mekem olketa lusim wei for trustim Jehovah. Datwan savve happen long olketa Christian distaem tu. Feeling for wikdaon wea go ahed for longtaem savve mekem iumi wari, and heart bilong iumi kamap hevi. (Jeremiah 8:18) Feeling bilong iumi savve kamap wik. Taem iumi kasem kaen hevi olsem, maet iumi no savve duim eniting saed long feeling and spiritual saed, and lusim tu feeling for laek worshipim Jehovah.
4. Wanem nao savve helpem iumi for keepim gud tokpiksa heart bilong iumi for no taed?
4 Disfala advaes bilong Bible hem gud tumas: “Winim eni nara samting wea iu mas protectim, protectim gud heart bilong iu, from olketa samting bilong laef kamaot from hem.” (Proverbs 4:23) Bible givim advaes wea savve barava helpem iumi for protectim tokpiksa heart bilong iumi for no feel wikdaon and taed long spiritual wei. Bat, first samting, iumi need for luksavve long samting wea mekem iumi feel taed.
Christian Wei Hem No Hevi
5. Wanem toktok wea luk olsem againstim each other nao stap saed long wei for olsem wanfala Christian disaepol?
5 Hem tru hao wei for olsem wanfala Christian hem minim man mas waka hard. (Luke 13:24) Jesus sei tu: “Eniwan wea no karem torture stake bilong hem and kam bihaen long mi kanduit for disaepol bilong mi.” (Luke 14:27) Hem luk olsem toktok hia againstim nao toktok bilong Jesus abaotem wei wea lod bilong hem no hevi and savve strongim man, bat tru samting nao, toktok hia no againstim.
6, 7. Why nao worship bilong iumi hem no mekem man feel taed?
6 Wei for waka hard, nomata hem mekem body bilong man taed, hem savve mekem man feel satisfae and strong sapos hem duim for gudfala reason. (Ecclesiastes 3:13, 22) And no eni gudfala reason hem winim wei for sharem olketa nambawan truth from Bible witim nara pipol! Nara samting tu, stragol wea iumi garem long laef for followim olketa hae mark bilong God saed long fasin hem samting nating nomoa sapos iumi markem witim olketa gudfala samting wea iumi kasem from iumi duim datwan. (Proverbs 2:10-20) Nomata taem iumi kasem persecution, iumi ting long wei for safa for saed long Kingdom bilong God olsem wanfala privilege.—1 Peter 4:14.
7 Lod bilong Jesus hem barava strongim man, especially taem iumi markem witim pipol wea stap anda long giaman religion and no garem eni spiritual laet. God lovem iumi and hem no askem iumi for duim samting wea hard tumas. ‘Olketa komandment bilong Jehovah no hevi.’ (1 John 5:3) Tru Christian Wei, wea fitim wanem Bible talem, hem no hevi. Tru nao, worship bilong iumi hem no mekem man feel taed or wikdaon.
“Aotem Evri Hevi”
8. Staka taem, wanem nao savve mekem man feel taed long spiritual saed?
8 Eni wei for feel taed long spiritual saed hem staka taem kamap from extra hevi wea iumi kasem from disfala nogud system. From “full world hem stap long paoa bilong wicked wan,” olketa nogud idea and tingting nao stap raonem iumi wea savve mekem Christian wei for balance hem gogo daon. (1 John 5:19) Wei for aftarem olketa samting wea no important savve spoelem and mekem hem moa hard for iumi duim olketa spiritual waka bilong iumi. Olketa extra hevi olsem savve mekem iumi feel nogud. Dastawe Bible kaonselem iumi for “aotem evri hevi.”—Hebrews 12:1-3.
9. Hao nao wei for aftarem olketa material samting savve mekem iumi kasem hevi?
9 Olsem example, wei wea pipol bilong world interest evribit for garem bignem, selen, hapitaem, gogo for holiday evritaem, and aftarem olketa nara material samting savve affectim tingting bilong iumi. (1 John 2:15-17) Samfala Christian long first century wea aftarem riches olketa mekem laef bilong olketa kamap moa hard. Aposol Paul hem explainim diswan olsem: “Olketa wea wantem tumas for kamap rich bae foldaon insaed test and trap and wei for barava wantem olketa samting wea krangge and kosim pain, wea gogo barava spoelem man. From fasin for lovem selen hem start bilong planti nogud samting, and from samfala trae for kasem datfala love olketa lusim faith finis and givim planti pain long olketa seleva.”—1 Timothy 6:9, 10.
10. Wanem nao iumi savve lanem abaotem olketa riches from tokpiksa bilong Jesus abaotem man for plantim seed?
10 Taem iumi feel taed and wikdaon long service bilong iumi for God, waswe, datwan hem from wei for aftarem olketa material samting hem daonem spiritual saed bilong iumi? Diswan hem samting wea maet kamap, olsem tokpiksa bilong Jesus abaotem man for plantim seed hem showimaot datwan. Jesus hem markem “olketa wari bilong disfala system and paoa bilong olketa riches for giamanim man and fasin for wantem evri nara samting” witim nila grass wea “stopem” seed bilong Word bilong God for grow insaed heart bilong iumi. (Mark 4:18, 19) Dastawe Bible givim disfala kaonsel long iumi: “Living bilong iufala mas kamap free from wei for lovem selen, taem iufala satisfae long samting wea stap distaem. From hem talem finis: ‘Mi bae nating lusim iu and bae nating forgetim iu.’ ”—Hebrews 13:5.
11. Hao nao iumi savve aotem olketa samting wea savve mekem iumi kasem hevi?
11 Samfala taem, samting wea mekem laef bilong iumi moa hard hem, no wei for aftarem moa samting, bat wanem iumi duim witim olketa samting wea iumi garem finis. Samfala maet kamap taed saed long feeling bikos long olketa problem saed long health, samfala wea olketa lovem olketa dae, or olketa nara problem. Olketa luksavve olketa need for mekem samfala change long samfala taem. Wanfala hasband and waef disaed for stop evribit for duim samfala samting wea tufala interest for duim and olketa nara samting wea no mas important. Tufala lukluk thru long evriting wea olketa garem and putim difren evriting bilong olketa project hia. Iumi evriwan savve kasem gud samting sapos samfala taem iumi lukluk long olketa samting wea iumi duim and garem, and aotem evri hevi wea no important mekem iumi no kamap taed and givap.
Mas Garem Balance Fasin and Wei for No Ova Tumas
12. Wanem nao iumi shud luksavve long hem saed long olketa mistek bilong iumi?
12 Olketa mistek bilong iumiseleva, nomata long olketa smol samting, savve isisi mekem laef bilong iumi kamap moa hard. Disfala toktok bilong David barava tru: “Olketa mistek bilong mi ovarem hed bilong mi; olsem wanfala hevi lod olketa hevi tumas for mi.” (Psalm 38:4) Staka taem, wei for mekem samfala change bae aotem bigfala hevi wea iumi garem.
13. Hao nao balance fasin savve helpem iumi for garem balance tingting abaotem ministry bilong iumi?
13 Bible encouragem iumi for mekem grow “wisdom wea helpem man and wei for tingting gud.” (Proverbs 3:21, 22) Bible talem tu hao “wisdom from antap hem . . . balance.” (James 3:17) Samfala garem feeling hao olketa mas duim sem samting wea olketa narawan duim insaed long Christian ministry. Bat, Bible givim iumi disfala advaes: “Evri man mas pruvim waka bilong hemseleva, and then hem bae garem reason for hapi long samting wea hemseleva duim, and no long wei for markem hemseleva witim narafala man. Evri man bae karem lod bilong hemseleva.” (Galatians 6:4, 5) Hem tru, gudfala example bilong olketa nara Christian savve encouragem iumi for servem Jehovah witim full heart, bat wisdom wea helpem man and balance fasin bae helpem iumi for markem olketa goal wea fitim living bilong iumiseleva.
14, 15. Hao nao iumi savve showimaot wisdom wea helpem man taem iumi lukaftarem olketa samting iumi needim long body and feeling?
14 Balance fasin bilong iumi long olketa samting wea maet luk olsem no important savve help for stopem wei for feel taed. Olsem example, waswe, iumi garem balance fasin wea helpem iumi for garem gudfala health? Tingim example bilong wanfala hasband and waef wea serve long wanfala branch office bilong Olketa Jehovah’s Witness. Tufala lukim wei wea wisdom wea helpem man hem helpem tufala for no taed. Waef hem sei: “Nomata mifala garem staka waka, mifala trae for sleep long semtaem evri naet. Mifala exercise evritaem tu. Diswan barava helpem mifala. Mifala lanem wanem nao mifala fit and no fit for duim, and then mifala duim samting followim diswan. Mifala trae for no markem mifala seleva witim olketa wea luk olsem olketa garem staka strong.” Waswe, iumi savve kaikaim healthy kaikai and no sleep leit olowe? Wei for balance for lukaftarem health bilong iumi savve daonem wei for taed long feeling and spiritual saed.
15 Samfala long iumi garem olketa spesol need. Olsem example, wanfala Christian sista hem duim full-taem ministry long samfala hard assignment. Hem bin garem olketa serious problem saed long health, wanfala nao cancer. Wanem nao helpem hem for deal witim olketa hard taem hia? Hem sei: “Hem important for mi garem taem wea mi savve stap seleva and no eniwan or eniting disturbim mi. Taem mi kasem big hevi and start for feel taed tumas, mi savve hem moa important for mi garem kwaet taem wea mi savve read and rest.” Wisdom wea helpem man and wei for tingting gud savve helpem iumi for luksavve and duim wanem iumiseleva needim for stopem wei for kamap taed long spiritual wei.
Jehovah God Strongim Iumi
16, 17. (a) Why nao wei for lukaftarem health bilong iumi long spiritual saed hem important tumas? (b) Wanem nao mas kamap part long schedule bilong iumi evriday?
16 Hem tru, wei for lukaftarem health bilong iumi long spiritual saed hem barava important. Taem iumi fren long barava klos wei witim Jehovah God, maet iumi taed long body, bat bae iumi nating kamap taed for worshipim hem. Jehovah nao wan wea “givim paoa long man wea taed; and man wea no garem bigfala strong, hem mekem full paoa stap long hem.” (Isaiah 40:28, 29) Aposol Paul, wea hemseleva feelim wei wea olketa toktok hia tru hem raet olsem: “Iumi no givap, bat nomata man wea hem iumi long aotsaed hem gogo for finis, man wea hem iumi long insaed hem kamap niu moa evriday.”—2 Corinthians 4:16.
17 Lukim datfala toktok “evriday.” Hem minim for tekem samting wea Jehovah provaedem for iumi long evriday. Wanfala missionary wea faithful for serve for 43 year, hem feisim wei for taed long body and feeling for wikdaon. Bat hem no kamap taed long spiritual wei. Hem sei: “Mi mekem olsem kastom bilong mi for wekap early mekem bifor mi startim eni waka, mi savve prea long Jehovah and readim Word bilong hem. Datfala schedule wea mi followim evriday hem barava helpem mi for stand strong kam kasem distaem.” Iumi savve depend long paoa bilong Jehovah for strongim iumi sapos iumi evritaem, yes “evriday” prea long hem and ting raonem olketa nambawan fasin and olketa promis bilong hem.
18. Wanem comfort nao Bible givim for olketa faithful wan wea olo or sik?
18 Diswan hem barava helpem olketa wea feel wikdaon bikos olketa kamap olo and health bilong olketa nogud. Olketa olsem savve feel sorre, no bikos olketa markem olketa seleva witim nara pipol, bat bikos olketa markem olketa witim samting wea olketa seleva savve duim bifor. Iumi kasem comfort taem iumi savve Jehovah hem showim honor long olketa olo! Bible hem sei: “Gray hair hem olsem crown wea luk naes tumas long man wea garem raeteous fasin.” (Proverbs 16:31) Jehovah savve long samting iumi no fit for duim and tinghae tumas long wei wea iumi worshipim hem witim full heart nomata iumi wik. And God nating savve forgetim olketa gudfala waka wea iumi duim finis. Bible promisim iumi olsem: “God hem no wicked mekem hem forgetim waka bilong iufala and love wea iufala showimaot for nem bilong hem, long wei wea iufala servem olketa holy wan and go ahed for serve.” (Hebrews 6:10) Iumi evriwan hapi tumas for stap witim olketa wea loyal long Jehovah for staka year finis!
No Givap
19. Hao nao iumi kasem gud samting taem iumi go ahed busy for duim wanem hem gud?
19 Staka pipol tingse hao wei for exercise olowe savve help for daonem wei for feel taed. Olsem tu, spiritual waka wea iumi duim evritaem savve help for daonem wei for feel taed long feeling or spiritual saed. Bible hem sei: “Iumi no givap for duim wanem hem gud, bikos long barava taem iumi bae harvestim samting sapos iumi no kamap taed. So, from iumi garem taem wea hem fitim, iumi shud duim gud samting long evriwan, bat main wan nao long olketa wea garem sem faith olsem iumi.” (Galatians 6:9, 10) Tingim tufala toktok hia “duim wanem hem gud” and “duim gud samting.” Olketa showimaot wei wea iumi mas duim samting. Wei for duim gud samting for nara pipol savve help for mekem iumi no kamap taed long service bilong iumi for Jehovah.
20. For stap klia long feeling for wikdaon, iumi shud no kaban witim hu?
20 Long narasaed, wei for kaban and duim samting witim pipol wea ting nating long olketa law bilong God savve kamap wanfala hevi wea mekem man taed. Bible givim disfala warning long iumi: “Wanfala ston and wanfala lod sandbis savve hevi tumas—bat trabol wea wanfala krangge man kosim hem hevi winim tufala samting hia.” (Proverbs 27:3) For faet againstim olketa feeling for wikdaon and taed, iumi shud no kaban witim olketa wea tingting evritaem long nogud saed and garem fasin for staka taem luk long rong bilong pipol and tok daonem olketa.
21. Hao nao iumi savve encouragem olketa narawan long olketa Christian meeting?
21 Jehovah provaedem olketa Christian meeting for mekem iumi strong long spiritual saed. Long taem bilong olketa meeting iumi garem nambawan chance for encouragem each other taem iumi kasem instruction and kaban tugeta. (Hebrews 10:25) Iumi evriwan long kongregeson shud waka hard for buildimap narawan taem iumi givim koment long olketa meeting or taem iumi garem part long program. Olketa wea lead olsem teacher barava garem responsibility for encouragem olketa narawan. (Isaiah 32:1, 2) Nomata taem need hem stap for givim kaonsel, wei wea olketa givim datwan mas strongim man. (Galatians 6:1, 2) Love wea iumi garem for narawan bae barava helpem iumi for servem Jehovah and no kamap taed.—Psalm 133:1; John 13:35.
22. Nomata iumi no perfect, why nao iumi savve kamap strong?
22 For worshipim Jehovah long disfala taem bilong end hem minim iumi mas duim samting. And olketa Christian tu savve taed long mind, kasem hevi saed long feeling, and hard samting. Wei wea iumi no perfect hem minim iumi olsem clay wea isi tumas for brek. Nomata olsem, Bible sei: “Iumi garem disfala riches long olketa clay pot, wei wea paoa wea winim wanem iumi garem hem bilong God and no bilong iumiseleva.” (2 Corinthians 4:7) Tru tumas, bae iumi kamap taed long physical wei, bat iumi no want for givap. Winim datwan, iumi want for “kamap strong and sei: ‘Jehovah hem helpem mi.’”—Hebrews 13:6.
Short Review
• Wanem nao samfala hevi wea iumi savve aotem?
• Hao nao iumi savve share for “duim gud samting” long olketa nara Christian?
• Hao nao Jehovah strongim iumi taem iumi feel taed or wikdaon?
[Piksa long page 23]
Jesus savve hao wei for feel wikdaon for longtaem savve affectim olketa aposol
[Piksa long page 24]
Samfala stop evribit for duim samting wea olketa interest for duim
[Piksa long page 26]
Nomata iumi no fit for duim samfala samting, Jehovah tinghae tumas long wei wea iumi worship witim full heart