Why Nao Iumi Shud Go Long Olketa Meeting?

BIHAEN 20 year wea Christine and hasband bilong hem marit, seknomoa hasband bilong hem lusim hem. Christine seleva nao mas lukaftarem sevenfala son and wanfala dota bilong tufala, wea age bilong olketa start from 7 year go kasem 18 year. Hem sei olsem: “Start long datfala taem, miseleva nao mas disaedem olketa important samting. Mi barava feel wikdaon and mi laekem tumas samwan for sapotim and leadim mi.” Wea nao hem kasem help wea hem needim?

Christine sei: “Olketa Christian meeting nao mekem disfala problem for no barava spoelem mi and famili bilong mi. Long olketa meeting mifala kasem sapot from olketa fren and instruction from Word bilong God. Wei for attendim olketa meeting evritaem hem helpem mifala long olketa difren samting long famili laef bilong mifala.”

Long olketa “nogud taem wea hard for deal witim” distaem, iumi evriwan kasem olketa difren kaen test. (2 Timothy 3:1) Olsem Christine, maet iu ting long olketa meeting bilong Olketa Jehovah’s Witness olsem samting wea barava important long faith bilong iu, wanfala barava important part long worship bilong iu for Jehovah. For sure, faevfala meeting wea kamap evri week hem strongim love wea iu garem for God, hope bilong iu for future, and tu, hem givim iu instruction wea kam from Bible saed long hao for deal witim olketa test.

Nomata olsem, samfala faendem hem hard tumas for attendim olketa meeting evritaem. Long evening, olketa barava feel taed, and maet hem bigfala samting for redi and go long meeting. Samfala mas waka long taem bilong olketa meeting. Sapos olketa go long evri meeting, olketa mas willing for kasem smol pei or maet boss sakem olketa tu. Maet samfala missim olketa meeting bikos olketa tingse wei for duim hapitaem bae strongim olketa winim wei for hipap witim olketa narawan insaed long kongregeson.

So, wanem nao olketa important reason for attendim olketa Christian meeting? Wanem nao iu savve duim for mekem olketa meeting strongim iu? For ansarem olketa kwestin hia, iumi lukluk gud long invitation bilong Jesus wea stap long Matthew 11:28-​30. Hem sei olsem: “Kam long mi, iufala evriwan wea stragol and karem bigfala hevi, and mi bae strongim iufala. Karem yoke bilong mi and lane from mi, from mi garem kwaet fasin and heart wea hambol, and iufala bae faendem samting for strongim soul bilong iufala. From yoke bilong mi hem kaenfala and lod bilong mi hem no hevi.”

“Kam Long Mi”

Jesus sei: “Kam long mi.” Wanfala wei for acceptim datfala invitation hem for attendim olketa meeting evritaem. Olketa gudfala reason stap for go long olketa meeting bikos Jesus hem sei: “Taem tu or thrifala hipap tugeta long nem bilong mi, mi stap witim olketa.”—Matthew 18:20.

Long first century, Jesus nao hem invaetem samfala for followim hem. So hem givim chance long olketa for fren gud and kaban witim hem. Stretawe nomoa samfala acceptim datfala invitation. (Matthew 4:​18-​22) Wei for interest long olketa material samting nao hem stopem olketa narawan for acceptim datfala invitation. (Mark 10:21, 22; Luke 9:​57-​62) Jesus hem talem disfala toktok for encouragem olketa wea chus for followim hem: “Iufala no chusim mi, bat mi nao chusim iufala.”​—John 15:16.

Bihaen hem dae and resurrect, Christ no stap nao witim olketa disaepol bilong hem. Bat, hem olsem hem stap witim olketa from hem leadim waka bilong olketa and hem lukim wei wea olketa followim kaonsel bilong hem or nomoa. Olsem example, samting olsem 70 year bihaen hem resurrect, Jesus kaonselem and encouragem sevenfala kongregeson long Asia Minor. Kaonsel wea hem givim showimaot hem savve gud long olketa gudfala fasin and olketa wik point bilong evriwan insaed long olketa kongregeson hia.​—Revelation 2:1–​3:​22.

Kam kasem distaem, Jesus interest tumas long each wan long olketa disaepol bilong hem. Hem promisim olketa: “Mi stap witim iufala evriday go kasem end bilong disfala world.” (Matthew 28:20) Iumi stap long taem bilong end, dastawe iumi mas showimaot iumi acceptim invitation bilong Jesus for followim hem. Wanfala wei for duim diswan hem for iumi go long olketa meeting evritaem. Jesus laekem iumi for lisin long hem and for “hem teachim” iumi thru long olketa tok and wei for studyim Bible wea kamap evritaem long olketa meeting. (Ephesians 4:​20, 21) Waswe, iu acceptim disfala invitation bilong Jesus: “Kam long mi”?

“Iufala . . . wea Stragol and Karem Bigfala Hevi”

Wanfala barava important reason for attendim olketa Christian meeting hem for kasem encouragement. (Hebrews 10:24, 25) Plande long iumi “stragol and karem bigfala hevi” from olketa difren samting. Maet iu karem bigfala hevi from health bilong iu no mas gud. Long olketa Christian meeting, iu savve encouragem olketa brata and sista and olketa savve encouragem iu. (Romans 1:​11, 12) Olsem example, iu bae herem olketa ansa wea buildimap faith bilong iu, mekem iu tingim moa hope bilong iu wea kam from Bible, and lukim faith bilong olketa narawan wea gohed for stand strong long olketa hardfala taem. Evri samting hia savve helpem iu for gohed and no givap and for garem stretfala tingting abaotem olketa problem bilong iu.

Tingim toktok bilong wanfala Christian woman wea garem sik wea gohed for longtaem. Hem sei: “Mi mas stap long hospital plande taem. Bihaen mi kamaot from hospital, hem lelebet hard for go long olketa meeting bat mi savve hem best samting wea mi savve duim. Naesfala feeling and love wea olketa brata and sista showimaot hem mekem hapi bilong mi kamap moa big, and teaching and information wea kam from Jehovah and Jesus hem mekem laef bilong mi garem mining.”

“Yoke Bilong Mi Hem Kaenfala and Lod Bilong Mi Hem No Hevi”

Long datfala scripture wea iumi storyim, Jesus hem sei: “Lane from mi.” Taem iumi lane from Jesus, iumi kamap olketa disaepol bilong hem, and iumi karem yoke bilong hem taem iumi dedicate long God and baptaes. (Matthew 28:19, 20) Sapos iumi laek for gohed olsem disaepol bilong Jesus, hem barava important for iumi tekpart long olketa meeting. Why nao olsem? Bikos long olketa Christian meeting nao iumi lane abaotem Jesus, olketa teaching bilong hem, and wei wea hem teach.

Wanem nao lod wea Christ laekem iumi for karem? Hem sem lod wea hemseleva karem, wea hem nao privilege for duim will bilong God. (John 4:​34; 15:8) For obeyim olketa komandment bilong God, iumi mas waka hard, bat disfala lod hem no hevi. Maet hem luk olsem hem hevi sapos iumi trae for karem datwan seleva. Bat sapos iumi prea for spirit bilong God and iumi kaikaim spiritual kaikai wea kamap long olketa meeting, iumi bae kasem “paoa wea winim wanem iumi garem” wea God hem givim. (2 Corinthians 4:7) Wei for prepare for olketa meeting and tekpart long olketa bae mekem love bilong iumi for Jehovah hem kamap moa strong. And sapos love nao hem muvim iumi for duim samting, olketa komandment bilong God “no wanfala hevi.”​—1 John 5:3.

Staka pipol distaem mas deal witim olketa hard samting olsem for waka for selen, problem saed long health, and narakaen problem bilong olketa seleva. Bat for deal witim olketa, iumi mas no depend long savve bilong olketa man nomoa. Olketa meeting bilong kongregeson helpem iumi for “no gohed for wari,” bikos Jehovah givim wanem iumi needim and hem helpem iumi for deal witim olketa problem. (Matthew 6:​25-​33) Tru nao, olketa Christian meeting olketa wanfala wei wea God hem showimaot love for iumi.

“Mi Garem Kwaet Fasin and Heart wea Hambol”

Jesus hem evritaem go long synagogue wea olketa story abaotem Word bilong God. Long wanfala taem wea Jesus go, hem tekem scroll bilong Isaiah and hem readim part wea sei: “Spirit bilong Jehovah hem stap long mi, from hem anointim mi for talemaot gud nius long poor pipol, hem sendem mi go for preach long olketa prisoner abaotem wei for kamap free and for mekem olketa wea blind strong moa for lukluk, for mekem olketa wea karem bigfala hevi kamap free, for preach abaotem taem wea Jehovah acceptim pipol.” (Luke 4:16, 18, 19) Sapos iumi stap long datfala taem, bae iumi hapi tumas taem iumi herem Jesus talemaot mining bilong toktok hia, taem hem sei: “Tuday disfala scripture wea iufala just herem hem fulfill”!​—Luke 4:​21.

Distaem, Jesus “datfala chief shepherd” hem gohed for lukaftarem olketa follower bilong hem long spiritual saed. (1 Peter 5:​1-4) Hem leadim “datfala faithful and wise slave” for appointim olketa man for kamap olsem shepherd insaed long olketa kongregeson bilong Olketa Jehovah’s Witness evriwea long world. (Matthew 24:45-​47; Titus 1:​5-9) Olketa man hia showimaot kwaet fasin taem olketa “shepherdim kongregeson bilong God” and showimaot gudfala example long wei for attendim olketa meeting evritaem. Iu savve showimaot iu tinghae long ‘olketa man hia wea olsem present’ and encouragem olketa narawan long wei for go long olketa meeting and tekpart.​—Acts 15:30-​33; 20:28; Ephesians 4:​8, 11, 12.

“Iufala Bae Faendem Samting for Strongim Soul Bilong Iufala”

Taem iu attendim olketa Christian meeting, wanem nao iu savve duim for kasem strong from olketa meeting hia? Wanfala wei hem for followim disfala kaonsel bilong Jesus: “Tingting gud abaotem hao iufala lisin.” (Luke 8:​18) Pipol wea laek tumas for lanem samting olketa barava lisin gud long Jesus. Olketa askem hem for explainim olketa tokpiksa bilong hem and samting wea kamaot from diswan nao, olketa kasem moa savve.​—Matthew 13:10-​16.

Iu savve followim example bilong olketa olsem wea hangre for spiritual samting long wei for lisin gud long olketa tok wea kamap long olketa meeting bilong iumi. (Matthew 5:​3, 6) For mekem mind bilong iu no wakabaot, trae for minim wei wea olketa point wea speaker story abaotem hem join tugeta. Askem iuseleva olketa kwestin olsem: ‘Hao nao mi savve followim disfala information long laef bilong mi? Hao nao mi savve iusim diswan for helpem nara pipol? Hao nao mi savve explainim disfala point?’ Nara samting tu, faendem olketa scripture wea speaker talem wea sapotim olketa main point bilong tok. Taem iu lukluk gud long wei wea iu lisin, olketa meeting bae barava strongim iu.

Bihaen long meeting, storyim wanem iu herem witim olketa narawan. Storyim datfala information and hao for followim datwan. Olketa story olsem wea buildimap man savve mekem olketa meeting strongim man.

Tru nao, iumi garem olketa barava gudfala reason for hipap tugeta. Bihaen iu reviewim olketa gudfala samting wea iumi just story abaotem, hem gud for askem iumiseleva disfala kwestin, ‘Wanem nao mi duim wea showimaot mi acceptim invitation bilong Jesus wea sei: “Kam long mi”?’

[Piksa long page 3]

Waswe, olketa nara samting stopem iu for go long olketa meeting?