‘Iu Mas Prea Olsem’

Waswe, iu savve long olketa toktok bilong Lord’s Prea? Diswan nao example prea wea Jesus Christ teachim. Long Sermon Long Maunten, Jesus sei: “So, iufala mas prea olsem.” (Matthew 6:9) From Jesus nao talem datfala prea, staka pipol kolem diswan Lord’s Prea, and tu samfala kolem Our Father prea.—Latin, Paternoster.

Planti pipol long world baeheartim disfala Lord’s Prea and talem olowe, maet evriday. Insaed olketa year wea go pas, planti talem olowe disfala prea long skul and taem community hipap. Why nao pipol barava tinghae long Lord’s Prea?

Wanfala savveman bilong religion long mek-thri century, Cyprian, raet olsem: “From Christ nao givim iumi disfala prea, no eni prea savve moa spiritual winim datwan . . .  No eni prea wea man savve talem long Dadi savve moa tru winim disfala prea wea datfala Son wea hem nao Truth hem talem.”—John 14:6.

Roman Catholic Church teachim hao Lord’s Prea hem “barava main prea bilong olketa Christian.” The World Book Encyclopedia luksavve hao disfala prea hem barava important long evri religion bilong Christendom, dastawe hem sei disfala prea hem wanfala long olketa “main teaching bilong olketa Christian.”

Bat for tok stret, planti wea baeheartim Lord’s Prea no barava minim. Wanfala niuspepa long Canada, Ottawa Citizen, sei: “Sapos iu savve lelebet long teaching bilong olketa Christian maet bae iu savve talem kwiktaem disfala Lord’s Prea. Bat, sapos iu tok slow and trae for minim maet diswan bae no isi.”

Waswe, hem important for minim wanem iumi talem taem iumi prea long God? Why nao Jesus givim iumi disfala Lord’s Prea? Wanem nao hem minim long iu? Bae iumi lukluk long olketa kwestin hia.