Hao for Prea—Hao, Lord’s Prea Nao Best Wei for Prea?
Ansa from Bible
Lord’s Prea helpem iumi savve hao iumi shud prea and wat iumi shud prea abaotem. Jesus talem disfala Lord’s Prea taem olketa disaepol blo hem askem hem: “Lord, teachim mifala for prea.” (Luke 11:1) Bat, ino disfala Lord’s Prea, or Our Father prea nomoa only prea God acceptim.a Jesus talem diswan hem example prea lo olketa samting wea God hapi for herem.
Lo disfala article
Wat nao Lord’s Prea story abaotem?
Lord’s Prea wea stap lo Matthew 6:9-13, olketa transleitim difren lo olketa nara Bible transleison. Diswan hem tufala example.
Niu World Transleison: “Dadi blo mifala lo heven, mifala laekem nem blo iu for holy. Mifala laekem Kingdom blo iu for kam. Duim will blo iu lo earth, olsem iu duim lo heven. Givim mifala kaikai for tuday, and forgivim olketa sin blo mifala, olsem mifala tu forgivim olketa wea sin againstim mifala. And no letem mifala foldaon lo temptation, bat sevem mifala from datfala wicked wan.”
King James Version: “Our Father which art in heaven, hallowed be thy name. Thy kingdom come. Thy will be done in earth, as it is in heaven. Give us this day our daily bread. And forgive us our debts, as we forgive our debtors. And lead us not into temptation, but deliver us from evil.”b
Wat nao mining blo Lord’s Prea?
Olketa teaching blo Jesus hem agree witim olketa nara Scripture, so iumi savve sure olketa nara part lo Bible savve helpem iumi for savve lo mining blo Lord’s Prea.
“Dadi blo mifala lo heven”
Hem fitim for addressim God “Dadi blo mifala” bikos hem nao creatim iumi and givim laef lo iumi.—Isaiah 64:8.
“Mifala laekem nem blo iu for holy”
Pipol shud honorim nem blo God, Jehovah, and ting dat nem hia hem holy. Olketa man shud share for mekhae lo nem blo God taem olketa story abaotem olketa quality blo hem and talem purpose blo hem lo olketa nara pipol.—Psalm 83:18; Isaiah 6:3.
“Mifala laekem Kingdom blo iu for kam”
Kingdom blo God hem wanfala gavman lo heven wea Jesus nao King blo hem. Jesus teachim iumi for prea for disfala gavman for hem rul ovarem disfala full earth.—Daniel 2:44; Revelation 11:15.
“Duim will blo iu lo earth, olsem iu duim lo heven”
Will blo God for disfala earth hem for olketa man enjoyim peace and security for olowe, olsem tu lo heven wea no eni rabis samting stap and no eniwan dae.—Psalm 37:11, 29.
“Givim mifala kaikai for tuday”
Lo taem blo Jesus, bred hem main kaikai blo pipol. Iumi shud no forget dat iumi depend lo Creator blo iumi for provaedem olketa tings iumi needim for stap laef.—Acts 17:24, 25.
“Forgivim olketa sin blo mifala, olsem mifala tu forgivim olketa wea sin againstim mifala”
Lo disfala context, word “kaon” hem nara word for sin. (Luke 11:4) Evri human sin and needim forgiveness. Bat if iumi laek for God forgivim iumi, iumi tu mas willing for forgivim olketa narawan wea sin againstim iumi.—Matthew 6:14, 15.
“No letem mifala foldaon lo temptation, bat sevem mifala from datfala wicked wan”
Jehovah God no enitaem temptim iumi for duim rong samting. (James 1:13) Bat datfala “wicked wan,” Satan datfala Devil nao savve temptim olketa man. (1 John 5:19; Matthew 4:1-4) Iumi askem Jehovah for helpem iumi for no foldaon lo eni temptation taem iumi kasem test for disobeyim hem.
Hao, for repeatim Lord’s Prea hem nomoa only wei for prea?
Jesus talem datfala Lord’s Prea olsem hem wanfala example prea. Hem no minim for iumi repeatim olketa sem toktok. Just bifor Jesus talem Lord’s Prea, hem givim disfala warning: “Taem iufala prea, no talem sem toktok evritaem.” (Matthew 6:7) Lo narataem wea hem talem nara model prea, hem iusim nao olketa difren toktok.—Luke 11:2-4.
Best wei for prea hem for talemaot lo God olketa samting wea stap lo heart blo iumi.—Psalm 62:8.
Hao nao iumi shud prea?
Lord’s Prea hem gud example blo prea wea God savve herem. Lukim hao hem agree tu witim olketa nara verse lo Bible wea story abaotem prea.
Prea lo God nomoa
Scripture: “Lo evriting wea iufala needim, barava askem God for datwan, and barava prea strong witim wei for talem thankiu.”—Philippians 4:6.
Mining: Iumi shud prea lo God nomoa, no lo Jesus, Mary, or olketa saint. Taem Jesus talem lo datfala Lord’s Prea, “Dadi blo mifala,” hem teachim iumi for prea lo Jehovah God nomoa.
Prea for olketa tings wea followim will blo God
Scripture: “Eni samting wea iumi askem wea followim tingting blo God, hem herem iumi.”—1 John 5:14.
Mining: Iumi savve prea abaotem eniting wea followim will blo God. Taem Jesus talem lo datfala Lord’s Prea “duim will blo iu lo earth,” hem teachim iumi dat will blo God hem important tumas. Iumi savve lane abaotem will blo God for disfala earth and for olketa man taem iumi studyim Bible.
Prea abaotem personal concern blo iu
Scripture: “Torowem go hevi blo iu lo Jehovah, and hem bae kea for iu.”—Psalm 55:22.
Mining: God savve lo wat iumi wari abaotem. Lo Lord’s Prea Jesus includim samfala samting wea pipol needim lo laef. Iumi savve prea tu for olketa daily need blo iumi, askem God for gaedem iumi mekem olketa important disison, for sapotim iumi lo taem blo trabol, and forgiveness for olketa sin blo iumi.c
a For example, Jesus and olketa disaepol blo hem talem olketa nara prea tu wea hem no semsem olsem disfala model prea.—Luke 23:34; Philippians 1:9.
b King James Version talem olketa last toktok hia lo Lord’s Prea: “For thine is the kingdom, and the power, and the glory, for ever. Amen.” Olketa toktok hia for praisem God, wea olketa kolem lo doxology, hem stap tu lo olketa nara Bible. Bat, The Jerome Biblical Commentary sei olsem: “Doxology . . . hem no stap lo olketa most reliable [manuscript].”
c Olketa wea feel dat olketa needim God for forgivim olketa maet feel guilty for prea. Bat Jehovah appeal olsem lo olketa wea feel guilty. Hem sei: “Iumi stretem olketa samting between iumi.” (Isaiah 1:18) God bae no rejectim eniwan wea barava laek for kasem forgiveness blo hem.