Hu Nao Barava Fit for Leader Distaem?
Long 1940, British Parliament feisim problem saed long wei for lead. Wanfala man wea herehere long datfala story insaed parliament hem David Lloyd George, wea seventi-seven year. Hem helpem Britain for win long World War I. Wei wea hem join insaed politik for planti year mekem hem savve tumas long waka bilong olketa wea garem hae position. Taem hem tok long parliament long May 8 hem sei: “Pipol bilong kantri willing for duim eni samting sapos samwan leadim olketa, sapos Gavman showimaot klia wanem nao goal bilong hem and sapos pipol hia trustim wei wea olketa leader duim best bilong olketa.”
TOKTOK wea Lloyd George talem showimaot klia hao pipol expectim leader bilong olketa for fit and barava trae hard for mekem evriting kamap moabeta. Wanfala woman wea duim waka for campaign hem sei: “Taem pipol votem president, olketa showimaot hao olketa trustim hem for lukaftarem olketa, future bilong olketa, and pikinini bilong olketa.” Datwan hem wanfala barava bigfala waka. Why nao olsem?
World bilong iumi fulap witim olketa problem wea luk olsem hard for man stretem. Tingim samfala example hia. Waswe, eni leader hem wise and garem bigfala paoa mekem hem fit for finisim criminal fasin and war? Waswe, eni leader distaem kea and fit for givim evri man inaf kaikai, klin wata, and olketa samting for helpem olketa saed long health? Hu nao garem savve and strong for protectim environment and mekem hem kamap gud moa? Hu nao fit and garem paoa for mekem evri man garem laef wea hapi and stap longtaem?
Olketa Man No Fit for Duim Datfala Waka
Hem tru, samfala leader win for duim samfala samting. Bat, olketa savve duim datfala waka for samfala year nomoa—and then narawan bae changem olketa. Wanfala leader wea fit winim planti narawan hem King Solomon long Israel bifor. Hem ting raonem disfala point and gogo hem sei: “Nomata mi, mi tu heitim evri hard waka wea mi waka hard for duim anda long sun, wea bae mi leavim for man wea bae kamap bihaen long mi. And hu nao savve sapos bae hem wise or krangge? Nomata olsem, hem nao bae tekovarem evri hard waka wea mi waka hard for duim and wea showimaot hao mi wise anda long sun. Diswan tu hem iusles.”—Ecclesiastes 2:18, 19.
Solomon no savve sapos eniwan wea rul bihaen bae gohed duim waka wea hem startim or bae olketa spoelem datwan. Solomon ting wei wea olketa ruler change olowe hem “iusles” samting. Wanfala Bible transleitim disfala toktok “iusles” olsem: “Samting wea krangge.”
Samfala taem, pipol iusim raf fasin for aotem man wea rul. Nomata man hem wanfala gud leader pipol savve killim hem dae. Abraham Lincoln, wanfala president bilong United States wea pipol tinghae long hem, hem sei olsem wantaem: “Pipol chusim mi for duim disfala important waka and iufala savve hao disfala paoa wea iufala givim long mi hem for shortfala taem nomoa.” Tru nao, hem nating president for longtaem. Nomata President Lincoln duim planti samting and garem feeling for duim planti moa samting for helpem pipol, hem leadim kantri for fofala year nomoa. Long mek-tu taem wea hem kamap president, wanfala man wea laek garem niu leader killim hem dae.
Nomata olketa man wea barava savve lead gud, olketa no fit for kontrolem future bilong olketa seleva. So waswe, fitim iu for trustim olketa for mekem iu garem gud future? Bible hem sei: “No putim trust bilong iufala long olketa bigman, or son bilong man long earth, wea no savve givim salvation. Spirit bilong hem go aot, hem go bak long graon; long datfala day tingting bilong hem finis evribit.” Datfala Byington transleison sei olsem long last part bilong verse 4: “Long datfala day wei wea hem kea for man hem finis nao.”—Psalm 146:3, 4.
Maet hem hard for samfala acceptim datfala advaes for no trustim olketa man olsem leader. Bat, Bible no sei olketa man bae hard for kasem eni gud and stedy leader nao. Isaiah 32:1 hem sei: “Wanfala king bae rul for raeteous fasin.” Jehovah God, Creator bilong olketa man, hem redim wanfala “king,” wanfala Leader, wea klosap nao bae rul ovarem disfala earth. Hu nao datwan? Bible profesi hem showimaot.
Datwan wea Fit Evribit for Lead
Tu thousand year go finis, wanfala angel talem wanfala young woman wea Jew wea nem bilong hem Mary: “Iu bae garem pikinini insaed long bele bilong iu and bornem wanfala son, and iu mas kolem nem bilong hem Jesus. And hem bae kamap nambawan and olketa bae kolem hem Son bilong Most Hae; and Jehovah God bae givim hem throne bilong David, dadi bilong hem, and hem bae rul olsem king ovarem haos bilong Jacob for olowe, and kingdom bilong hem bae no savve finis.” (Luke 1:31-33) Tru nao, Jesus wea kam from Nazareth hem nao King wea Bible profesi abaotem.
Olketa lotu piksa planti taem showim Jesus olsem wanfala baby, olsem wanfala man wea body bilong hem wik, or olsem wanfala man wea acceptim nomoa eniting wea kasem hem. Olketa piksa olsem no muvim pipol for trustim hem for rulim olketa. Bat, Bible story abaotem Jesus olsem man wea waka hard and wea garem strong body. And hem garem tu olketa nara fasin wea mekem hem barava fit for lead. (Luke 2:52) Iumi lukluk long samfala nambawan fasin bilong hem.
Jesus faithful evribit. Hem honest and stret evribit, dastawe hem fit for challengem olketa enemy bilong hem for pruvim sapos hem rong. Olketa no fit for duim. (John 8:46) From teaching bilong hem nating hypocrite diswan mekem staka for kamap follower bilong hem.—John 7:46; 8:28-30; 12:19.
Jesus dedicate evribit long God. From hem barava disaed strong for duim evribit waka wea God markem hem for duim, no eniwan, nomata man or demon, fit for stopem hem. Pipol attakim hem long raf wei, bat hem nating fraet. (Luke 4:28-30) Wei for feel taed or hangre hem nating mekem hem wikdaon. (John 4:5-16, 31-34) Nomata olketa fren bilong hem lusim hem, hem nating lusim goal bilong hem.—Matthew 26:55, 56; John 18:3-9.
Jesus barava tingim pipol. Hem provaedem kaikai for olketa wea hangre. (John 6:10, 11) Hem comfortim olketa wea feel sorre. (Luke 7:11-15) Hem healim olketa wea blind, wea earpas, and sik. (Matthew 12:22; Luke 8:43-48; John 9:1-6) Hem encouragem olketa aposol bilong hem wea waka hard. (John, chapter 13-17) Hem nao datfala ‘gud shepherd’ wea lukaftarem sheep bilong hem.—John 10:11-14.
Jesus willing for waka. Hem wasim leg bilong olketa aposol bilong hem for teachim olketa wanfala important leson. (John 13:4-15) Leg bilong hem kamap dirty tu taem hem wakabaot for preachim gud nius long olketa long Israel. (Luke 8:1) Nomata taem hem plan for go rest long “wanfala kwaet ples,” hem helpem pipol taem olketa kam luk aotem hem for hem teachim olketa. (Mark 6:30-34) Hem wanfala nambawan example for evri Christian saed long wei for waka hard.—1 John 2:6.
Jesus lusim disfala earth taem hem finisim waka bilong hem. From faithful fasin bilong hem, Jehovah God mekem hem kamap king long heven and hem kasem laef wea kanduit dae. Bible sei olsem abaotem Jesus: “Christ, from hem laef bak, bae no dae moa and dae no masta ovarem hem.” (Romans 6:9) Iu savve feel sure hao hem nao best Leader for olketa man. Taem Christ Jesus kontrolem evribit disfala earth, bae no need for eniwan moa kamap ruler, and no need for eniwan changem hem for lead. Bae no eniwan aotem hem from datfala waka, and waka bilong hem bae no kamap iusles from narawan tekova and spoelem waka wea hem duim. Bat wanem gud samting nao bae hem duim for olketa man?
Samting wea Datfala Leader Bae Duim
Psalm 72 storyim samfala samting wea disfala perfect King wea no savve dae bae duim. Long verse 7 and 8, hem sei olsem: “Long taem bilong hem olketa raeteous wan bae kamap, and bigfala peace go kasem taem wea moon bae nomoa. And hem bae garem pipol anda long hem from sea go kasem sea, and from datfala River go kasem end bilong earth.” From rul bilong hem barava helpem olketa man, pipol long earth bae stap sef for olowe. Hem bae finisim evri samting for faet wea stap distaem and hem bae aotem feeling for faet from heart bilong evri man. Olketa man wea distaem olsem lion wea laek for killim olketa narawan or olketa wea garem fasin olsem olketa raf bear bae changem fasin bilong olketa evribit. (Isaiah 11:1-9) Peace bae kamap big tumas.
Psalm 72 hem sei moa long verse 12 go kasem 14: “Hem bae sevem poor wan wea singaot for help, and tu, man wea safa and eniwan wea no garem samwan for helpem olketa. Hem bae feel sorre for man nating and poor man, and hem bae sevem soul bilong olketa poor man. From hardfala living and raf fasin hem bae baem bak soul bilong olketa, and blood bilong olketa bae spesol long eye bilong hem.” Olketa man nating, olketa wea poor and olketa wea safa bae stap hapi, and garem wan mind anda long leader bilong olketa King Jesus Christ. Hapi, no pain and sorre nao bae main samting long laef bilong olketa.—Isaiah 35:10.
Verse 16 promis olsem: “Staka kaikai bae stap long earth; antap long olketa maunten hem bae fulap.” Hangre hem samting wea planti million pipol distaem feelim olowe. Politik and greedy fasin savve stopem wei for sharem inaf kaikai, so dastawe staka pipol, especially pikinini, olketa dae from hangre. Bat taem Jesus Christ hem rul, bae disfala problem hem finis. Man bae harvestim planti nambawan kaikai from graon. Evri man bae garem inaf kaikai.
Waswe, iu laek for kasem olketa blessing olsem wea bae kamap from wanfala gud leader? Sapos olsem, mifala encouragem iu for lanem moa samting abaotem datfala Leader wea klosap nao hem bae kontrolem full earth. Olketa Jehovah’s Witness bae hapi for helpem iu saed long diswan. Bae iu barava interest long diswan, from Jehovah God hem sei olsem abaotem Son bilong hem: “Tru nao, mi nao bae putim king bilong mi long Zion, holy maunten bilong mi.”—Psalm 2:6.
[Box long page 5]
SEKNOMOA NO GAREM PAOA
Sapos wanfala ruler mekem pipol wea hem rul ovarem feel sef and garem lelebet peace, bae olketa respectim and sapotim hem. Bat, sapos eni samting mekem pipol for no trustim hem, bae kwiktaem nomoa difren man nao kasem datfala position for rul. Long hia, hem samfala example wea showimaot samfala wea seknomoa lusim position bilong olketa for rul.
From Laef Hem Hard. Winim tu handred year go finis, planti pipol long France barava garem hard laef from olketa mas peim tax wea hae tumas bat olketa no garem inaf kaikai. Diswan lead go long French Revolution, wea gogo olketa killim dae King Louis XVI long 1793.
War. World War I mekem samfala long olketa barava strongfala rul for finis. Olsem example, from pipol long datfala taon long Russia wea olketa kolem St. Petersburg olketa no garem inaf kaikai, olketa startim datfala February Revolution long 1917. Long datfala taem olketa aotem Czar Nicholas II and diswan lead go long rul bilong olketa Communist. Long November 1918, Germany laek for mekem peace, bat olketa kantri wea faet againstim Germany no stop for faet from olketa laekem ruler bilong Germany for change. From diswan, German Emperor Wilhelm II hem mas lusim kantri bilong hem and go stap long Netherlands.
Laekem Niu Wei for Rul. Long 1989 datfala Iron Curtain hem finis. Planti rul wea luk olsem olketa strong olsem ston gogo olketa pisis nomoa from pipol les nao for followim Communism and olketa laek garem olketa democratic rul.
[Olketa Piksa long page 7]
Jesus feedim olketa wea hangre, healim olketa wea sik, and showimaot nambawan example for evri Christian
[Piksa Credit Line long page 4]
Lloyd George: Photo by Kurt Hutton/Picture Post/Getty Images