Luk Aotem Gudfala Leader
“Iu go nao, mifala les long iu. Long nem bilong God, go!”—Toktok bilong Oliver Cromwell; wea Leopold Amery, wanfala member bilong British Parliament hem talem.
World War II gohed finis for eitfala month and hem barava distroem planti samting. Luk olsem Britain and olketa kantri wea sapotim hem bae lus. From diswan, Leopold Amery and planti narawan long gavman ting olketa need for garem wanfala niu leader. Dastawe long May 7, 1940, Mista Amery talem datfala toktok go long Prime Minister Neville Chamberlain long parliament. Thrifala day bihaen, Mista Chamberlain lusim datfala waka, and Winston Churchill nao kamap Prime Minister.
OLKETA man needim samwan for lead, bat diswan no minim eni leader nomoa fit. Nomata insaed famili, sapos dadi laek mekem waef and pikinini hapi, hem mas fit for leadim olketa. Sapos olsem, wanfala leader bilong kantri mas barava savve hao for lead! So iumi no sapraes hao hem hard tumas for faendem olketa gudfala leader.
Diswan mekem staka change kamap insaed planti thousand year. Olketa niu king kamap, wei for againstim gavman, wei for tekovarem gavman, wei for kasem niu position, olketa election, wei for killim dae man wea rul, and olketa rul wea ova tumas. Olketa king, prime minister, prince, president, secretary-general, and olketa raf ruler kasem and lusim paoa. Nomata olketa ruler wea garem bigfala paoa bifor, olketa savve lusim datwan from seknomoa samfala samting hem change. (Lukim box “Seknomoa No Garem Paoa,” long page 5.) Nomata planti change olsem kamap, hem hard for faendem olketa leader wea fit and bae lead for longfala taem.
“Iumi Mas Acceptim Nomoa”—Or Hao?
So iumi savve minim hao planti pipol no garem hope for kasem eni gud leader. Long samfala kantri, taem election kamap man savve lukim klia hao pipol acceptim eniting nomoa and no garem hope. Geoff Hill, wanfala man for raet long Africa, hem sei: “Taem pipol ting olketa nogud samting insaed laef bilong olketa hem hard for change, disfala feeling for acceptim eniting nomoa or for les for vote hem kamap big tumas. . . . Long Africa, sapos pipol no vote diswan no minim olketa satisfae. Staka taem, diswan showimaot olketa wantem help from olketa feel no eniwan tingim olketa.” Hem tu, samting wea wanfala man wea raet for niuspepa long United States hem talem taem olketa reredi for election: “Mi laekem pipol votem wanfala perfect leader.” Hem sei tu: “No eni man olsem stap distaem. No enitaem kaen man olsem hem stap. Iumi mas acceptim nomoa.”
Waswe hem tru, man “mas acceptim nomoa” wei for garem olketa leader wea no perfect? Waswe, wei wea olketa leader no fit for provaedem samting wea pipol needim hem minim iumi hard for kasem eni gud leader? Nomoa. Wanfala best leader hem stap. Next article bae showimaot hu nao datfala leader and hao nao waka wea hem duim bae helpem iu and planti million pipol from staka difren ples.
[Olketa Piksa long page 3]
Antap left: Neville Chamberlain
Antap right: Leopold Amery
Long daon: Winston Churchill
[Credit Lines]
Chamberlain: Photo by Jimmy Sime/Central Press/Getty Images; Amery: Photo by Kurt Hutton/Picture Post/Getty Images; Churchill: The Trustees of the Imperial War Museum (MH 26392)