Judgment Bilong Jehovah Bae Kam Againstim Wicked Pipol
“Reredi for meetim God bilong iu.”—AMOS 4:12.
1, 2. Wanem nao mekem iumi sure God bae finisim wicked fasin?
WASWE, bae enitaem Jehovah finisim wicked fasin and wei for safa long earth? Winim enitaem bifor, datfala kwestin hem important tumas distaem. Evriwea long world, iumi lukim samting wea pruvim hao olketa man spoelem nara man. Iumi evriwan barava laek for stap long world wea no garem raf fasin, terrorism, and raverave fasin!
2 Gud samting nao, iumi savve barava trustim wei wea Jehovah bae finisim wicked fasin. Olketa fasin bilong God mekem iumi sure hao hem bae duim samting againstim wicked pipol. Jehovah hem God wea raeteous and showimaot justice. Long Psalm 33:5, Bible sei: “Hem lovem raeteous fasin and justice.” Narafala psalm sei: “Soul bilong [Jehovah] barava heitim eniwan wea lovem raf fasin.” (Psalm 11:5) Jehovah wea garem bigfala paoa, wea lovem raeteous fasin and justice, bae no letem wanem hem heitim for gohed olowe.
3. Wei for iumi lukluk moa long profesi bilong Amos bae mekhae long wanem samting?
3 Nara reason stap wea mekem iumi barava sure Jehovah bae aotem wicked fasin. Diswan showaot long samting hem duim bifor. Olketa nambawan example long buk bilong Amos showimaot hao Jehovah deal long sem wei evritaem witim wicked pipol. Wei for lukluk moa long profesi bilong Amos bae mekhae long thrifala point abaotem judgment wea kam from God. First wan, judgment bilong God hem evritaem fitim. Mek-tu, no eniwan savve missim. And mek-thri, hem for wicked pipol nomoa, from Jehovah hem finisim wicked pipol bat hem showimaot mercy long olketa wea repent and wea garem gudfala fasin.—Romans 9:17-26.
Judgment Bilong God Hem Evritaem Fitim
4. Jehovah sendem Amos go long wea, and for duim wanem?
4 Long taem bilong Amos, olketa Israelite divaed long tufala kingdom finis. Wanfala hem kingdom bilong Judah long south. Narawan hem kingdom bilong Israel long north. Jehovah markem Amos nao for waka olsem wanfala profet. Hem sendem Amos from homtaon bilong hem Judah for go long Israel. God bae iusim Amos for talemaot judgment bilong hem.
5. Amos hem talem profesi againstim olketa wanem nation firstaem, and wanem nao wanfala reason why olketa fit for kasem strongfala judgment from God?
5 Amos no start long wei for talemaot judgment bilong Jehovah againstim bighed kingdom bilong Israel long north. Bat, hem talemaot strongfala judgment againstim sixfala nation wea stap klosap. Olketa nation hia nao Syria, Philistia, Tyre, Edom, Ammon, and Moab. Bat waswe, olketa nation hia fit for kasem strongfala judgment? Barava nao. Wanfala reason nao hem from olketa hia enemy witim pipol bilong Jehovah.
6. Why nao God bae mekem bigfala trabol kasem Syria, Philistia, and Tyre?
6 Olsem example, Jehovah judgem olketa bilong Syria “from olketa smasem Gilead.” (Amos 1:3) Olketa bilong Syria tekem land from Gilead—wanfala area bilong Israel long east bilong Jordan River—and mekem pipol bilong God safa long barava nogud wei. Waswe long Philistia and Tyre? Olketa bilong Philistia tekem olketa Israelite olsem prisoner and salem olketa go long olketa bilong Edom. And olketa man long Tyre for baem olketa slave tekem samfala Israelite tu. (Amos 1:6, 9) Tingim datwan—olketa salem pipol bilong Jehovah olsem slave! Dastawe Jehovah redi for mekem bigfala trabol kasem Syria, Philistia, and Tyre.
7. Long wanem wei nao Edom, Ammon, and Moab semsem witim Israel, bat hao nao olketa deal witim olketa Israelite?
7 Edom, Ammon, and Moab semsem long wanfala wei. Thrifala nation evriwan olketa relative bilong olketa Israelite. Olketa bilong Edom kam from Abraham thru long Esau, twin brata bilong Jacob. So, long wanfala wei, Edom and Israel tufala brata. Olketa bilong Ammon and Moab kam from laen bilong Lot, son bilong brata bilong Abraham. Bat waswe, Edom, Ammon, and Moab deal witim olketa Israelite relative long loving wei? Nomoa nao! Edom iusim sword againstim “brata bilong hem,” and olketa bilong Ammon deal witim olketa Israelite prisoner long barava raf wei. (Amos 1:11, 13) Nomata Amos no storyim hao olketa bilong Moab deal witim pipol bilong God long nogud wei, for longtaem nao olketa bilong Moab againstim Israel. Panis for thrifala nation hia wea kam from sem laen bae barava strong. Jehovah promis for distroem olketa.
No Eniwan Savve Ranawe From Judgment Bilong God
8. Why nao sixfala nation wea stap klosap long Israel no savve missim judgment bilong God?
8 Hem klia hao sixfala nation wea profesi bilong Amos storyim barava fit for kasem strongfala judgment bilong God. And tu, no eni wei stap for olketa missim diswan. Start long Amos chapter 1, verse 3, go kasem chapter 2, verse 1, Jehovah sei olsem sixfala taem: “Mi bae no changem tingting bilong mi.” Olsem Jehovah talem, hem finisim olketa nation hia. History showimaot hao bihaen, bigfala trabol kasem each nation hia. Gogo, fofala long olketa—Philistia, Moab, Ammon, and Edom—finis evribit!
9. Pipol long Judah fit for kasem wanem, and why nao olsem?
9 Next samting wea profesi bilong Amos storyim hem mek-seven nation wea hem nao hom bilong hem long Judah. Olketa long kingdom bilong Israel wea lisin long Amos maet sapraes for herem hem talemaot judgment againstim kingdom long south. Why nao pipol long Judah fit for kasem strongfala judgment? Amos 2:4 sei olsem: “From olketa rejectim law bilong Jehovah.” Jehovah no ting nating long wei wea olketa min for brekem Law bilong hem. Long Amos 2:5 hem sei: “Mi bae sendem fire long Judah, and hem mas finisim evribit olketa taoa bilong Jerusalem.”
10. Why nao Judah no savve missim trabol?
10 Judah wea no faithful no savve missim trabol wea bae kam. Jehovah sei olsem for mek-seven taem: “Mi bae no changem tingting bilong mi.” (Amos 2:4) Judah hem kasem datfala judgment taem olketa bilong Babylon distroem hem long 607 B.C.E. Long hia iumi lukim moa hao wicked pipol no savve missim judgment bilong God.
11-13. Main part long profesi bilong Amos hem for wanem nation, and wanem kaen barava nogud samting wea spoelem pipol nao stap long there?
11 Datfala profet Amos hem just talem finis judgment bilong Jehovah for sevenfala nation. Bat sapos eniwan tingse Amos finis nao for talemaot profesi, tingting bilong hem rong. Amos hem no finis yet! Main part long assignment bilong hem nao for talemaot strongfala judgment message for kingdom bilong Israel long north. From fasin and religion bilong Israel barava nogud, hem fit for kasem strongfala judgment bilong God.
12 Profesi bilong Amos showimaot klia olketa barava nogud samting wea spoelem pipol long kingdom bilong Israel. Amos 2:6, 7 storyim datwan olsem: “Diswan nao wanem Jehovah talem, ‘From thrifala taem Israel againstim mi, and from fofala taem, mi bae no changem tingting bilong mi, from olketa salem samwan wea raeteous for silver nomoa, and samwan wea poor for kost bilong sandol. Olketa barava laek for lukim dust bilong earth antap hed bilong olketa man nating; and spoelem olketa hambol pipol.’ ”
13 Wei wea olketa salem pipol wea raeteous “for silver nomoa” maet minim olketa judge acceptim silver olsem bribe for panisim pipol wea no duim eni rong samting. Olketa man for givim selen for kaon salem olsem slave olketa wea poor for kost bilong “sandol,” maet for changem smol kaon wea semsem witim kost bilong sandol nomoa. Olketa man hia no garem eni feeling for narawan. Olketa “barava laek” for living bilong “olketa man nating” for kamap barava nogud, mekem poor pipol hia torowem dust long hed bilong olketa seleva for showimaot olketa safa, sorre, or shame. Raverave fasin kamap big tumas gogo “poor pipol” no garem eni chance for kasem help saed long justice.
14. Hu nao pipol spoelem long kingdom bilong Israel?
14 Lukim hu nao pipol hia spoelem. Olketa wea raeteous, hambol, kwaet, and poor. Law covenant bilong Jehovah witim olketa Israelite sei olketa mas showimaot fasin for kea long olketa wea garem need and wea isi for nara pipol spoelem olketa. Nomata olsem, olketa hia wea stap anda long kingdom bilong Israel garem barava nogud living.
“Reredi for Meetim God Bilong Iu”
15, 16. (a) Why nao olketa Israelite kasem disfala warning: “Reredi for meetim God bilong iu”? (b) Hao nao Amos 9:1, 2 showimaot hao wicked pipol no savve ranawe from judgment bilong God? (c) Wanem nao happen long kingdom bilong Israel long 740 B.C.E.?
15 From dirty fasin and wei for duim olketa nara sin kamap big tumas long Israel, profet Amos garem gudfala reason for givim disfala warning long datfala bighed nation: “Reredi for meetim God bilong iu.” (Amos 4:12) Israel wea no faithful kanduit missim wei wea Jehovah redi for judgem olketa bikos hem sei olsem for mek-eit taem: “Mi bae no changem tingting bilong mi.” (Amos 2:6) God sei olsem tu long olketa wicked wan wea trae for haed: “No eniwan wea trae for ranawe bae win for duim datwan. Sapos olketa dig daon go long Sheol, long there hand bilong mi nao bae tekem olketa; and sapos olketa go ap long hae ples, long there mi bae tekem olketa kam daon.”—Amos 9:1, 2.
16 Olketa wicked pipol kanduit ranawe from judgment bilong Jehovah long wei for “dig daon go long Sheol,” wea piksarem wei wea olketa trae for haed long botom bilong olketa deep valley long earth. And tu, olketa no savve ranawe from judgment bilong God nomata sapos olketa go “ap long hae ples,” wea minim olketa trae for faendem ples for haed long olketa hae maunten. Warning bilong Jehovah hem klia: No eni ples for haed stap wea hem no savve kasem. Standard bilong Jehovah saed long justice minim kingdom bilong north mas ansa for olketa nogud samting wea olketa duim. And datwan hem kamap tru. Long 740 B.C.E.—samting olsem 60 year bihaen Amos talem profesi bilong hem—kingdom bilong Israel hem lus long faet witim Assyria.
Judgment Bilong God Hem for Wicked Pipol Nomoa
17, 18. Wanem nao Amos chapter 9 showimaot saed long mercy bilong God?
17 Profesi bilong Amos helpem iumi for lukim hao judgment bilong God hem evritaem fitim and no eniwan savve missim tu. Bat buk bilong Amos showimaot tu hao judgment bilong Jehovah hem for wicked pipol nomoa. God savve faendem wicked pipol and judgem olketa nomata long wanem ples olketa haed. Hem savve faendem tu olketa wea repent and olketa wea honest—wea hem bae showimaot mercy long olketa. Diswan hem showaot klia tumas long lastfala chapter long buk bilong Amos.
18 Long Amos chapter 9, verse 8, Jehovah sei: “Mi bae no finisim evribit haos bilong Jacob.” Long verse 13 go kasem 15, Jehovah promisim hao hem bae “hipimap bak” pipol bilong hem wea “prisoner.” Hem bae showimaot mercy long olketa and bae olketa stap gud moa. Jehovah promis hao “man for hou bae kasem man for harvest.” Tingim datwan—harvest hem big tumas dastawe olketa still gohed for harvest bat taem hem kam nao for hou and plant moa!
19. Wanem nao happen long wanfala smol sekson bilong Israel and Judah?
19 Judgment bilong Jehovah againstim Judah and Israel hem for wicked pipol nomoa bikos hem showimaot mercy long olketa wea repent and garem honest heart. For fulfillim profesi abaotem wei for kamap gud moa wea stap long Amos chapter 9, wanfala smol sekson bilong Israel and Judah wea prisoner long Babylon, go bak long hom long 537 B.C.E. Taem olketa go bak long hom bilong olketa, olketa startim moa klin worship. And tu, no eni samting bae spoelem wei wea olketa buildim bak olketa haos and plantim grape plantation and olketa garden.
Strongfala Judgment Bilong Jehovah Bae Kam!
20. Disfala story abaotem olketa judgment message wea Amos talemaot shud mekem iumi sure long wanem samting?
20 Wei wea iumi storyim olketa judgment message bilong God shud mekem iumi feel sure hao Jehovah bae finisim wicked fasin long taem bilong iumi. Why nao iumi savve bilivim diswan? First samting, wei wea Jehovah deal witim wicked pipol bifor showim klia wanem hem bae duim long taem bilong iumi. Mek-tu samting, wei wea God finisim apostate kingdom bilong Israel mekem iumi sure hem bae distroem Christendom, wea hem main part bilong “Bigfala Babylon,” datfala world rul bilong giaman religion.—Revelation 18:2.
21. Why nao Christendom fit for kasem strongfala judgment bilong God?
21 No eni daot stap hao Christendom fit for kasem judgment bilong God. Olketa nogud samting wea gohed for happen long Christendom mekem iumi barava sure. Judgment bilong Jehovah againstim Christendom—and olketa nara part bilong world bilong Satan—hem fitim. And tu no eniwan savve missim datwan, bikos long taem bilong judgment, disfala toktok bilong Amos chapter 9, verse 1 bae barava fitim: “No eniwan wea trae for ranawe bae haed.” Tru tumas, nomata long wanem ples wicked pipol haed, Jehovah bae faendem olketa.
22. Wanem nao olketa point saed long judgment bilong God wea showaot klia long 2 Thessalonians 1:6-8?
22 Judgment bilong God hem evritaem fitim, no eniwan savve missim, and hem for wicked pipol nomoa. Toktok bilong aposol Paul showimaot diswan klia: “Diswan minim hem stret long saed bilong God for pei bak long olketa wea mek trabol long iufala, bat, for iufala wea kasem trabol, bae iufala kasem help olsem mifala long taem wea Lord Jesus hem showaot from heven witim olketa strongfala angel bilong hem insaed wanfala bigfala fire, taem hem pei bak long olketa wea no savve long God and olketa wea no obeyim gud nius abaotem Lord bilong iumi Jesus.” (2 Thessalonians 1:6-8) “God hem duim raeteous samting” taem hem pei bak long pipol wea fit for kasem strongfala judgment from olketa mek trabol long olketa anointed wan bilong hem. Olketa hia bae no missim datfala judgment, bikos wicked pipol bae dae long ‘taem wea Jesus hem showaot from heven witim olketa strongfala angel bilong hem insaed wanfala bigfala fire.’ Judgment bilong God bae for olketa wea wicked nomoa bikos Jesus bae pei bak long “olketa wea no savve long God and olketa wea no obeyim gud nius.” Judgment bilong God bae comfortim olketa wea obeyim God wea kasem hardfala taem.
Hope for Olketa wea Raeteous
23. Wanem hope and comfort nao iumi savve kasem from buk bilong Amos?
23 Profesi bilong Amos garem wanfala nambawan message bilong hope and comfort for olketa wea garem gudfala heart. Olsem profesi insaed buk bilong Amos showimaot, Jehovah no finisim evribit pipol bilong hem long bifor. Gogo hem hipimap bak olketa bilong Israel and Judah wea prisoner, mekem olketa go bak long hom bilong olketa and hem blessim olketa witim gudfala laef and sef living. Diswan minim wanem for taem bilong iumi? Diswan mekem iumi sure judgment bilong God bae kam, and Jehovah bae faendem wicked pipol nomata wanem ples olketa haed and bae hem faendem tu pipol wea hem ting olketa fit for kasem mercy bilong hem, nomata wea olketa stap long earth.
24. Wanem nao olketa blessing wea olketa servant bilong Jehovah kasem distaem?
24 From iumi olketa faithful servant bilong hem, wanem nao iumi enjoyim taem iumi gohed for weitim judgment bilong Jehovah for wicked pipol? Jehovah blessim iumi witim wei for barava stap gud long spiritual saed! Worship bilong iumi no garem eni laea and rong idea wea kam from olketa giaman teaching bilong Christendom. Jehovah blessim iumi tu witim staka spiritual kaikai. Nomata olsem, iumi mas tingim hao staka blessing olsem wea kam from Jehovah hem minim iumi garem bigfala responsibility tu. God expectim iumi for warnim nara pipol abaotem judgment wea bae kam. Iumi laek for traem best bilong iumi for faendem olketa wea “garem fasin fitim laef olowe.” (Acts 13:48) Iumi laek for helpem staka pipol for kasem gudfala spiritual samting wea iumi kasem distaem. And iumi no laekem olketa for dae long judgment bilong God wea klosap wicked pipol bae kasem. Bat, for kasem olketa blessing hia, iumi mas garem stretfala feeling long heart. Long next article, bae iumi lukim hao profesi bilong Amos mekhae long diswan tu.
Hao Nao Bae Iu Ansa?
• Hao nao profesi bilong Amos showaot wei wea olketa strongfala judgment bilong Jehovah hem evritaem fitim?
• Wanem nao Amos talem for pruvim hao no eniwan savve missim judgment bilong God?
• Hao nao buk bilong Amos showaot hao God hem judgem wicked pipol nomoa?
[Piksa long page 16, 17]
Kingdom bilong Israel no missim judgment bilong God
[Piksa long page 18]
Wanfala smol sekson bilong Israel and Judah wea prisoner long Babylon, go bak long hom long 537 B.C.E.