Followim Example Bilong Profet Amos
1. Hao nao example bilong Amos savve encouragem iumi?
1 Waswe, iu tingse iu no fit for preach from iu man nating nomoa and no garem bigfala savve? Sapos olsem, example bilong Amos bae helpem iu for no garem kaen tingting olsem. Amos hem man for lukaftarem sheepsheep and hem savve waka long planteison samfala taem long year. Nomata olsem, Jehovah strongim hem for talemaot wanfala important message. (Amos 1:1; 7:14, 15) Distaem Jehovah iusim tu olketa man nating and olketa wea no garem bigfala savve. (1 Cor. 1:27-29) Wanem nao samfala nara samting wea iumi savve lanem from example bilong profet Amos wea bae helpem iumi long ministry?
2. Wanem nao savve helpem iumi for gohed strong nomata pipol againstim iumi long ministry?
2 Gohed Strong Nomata Pipol Againstim Iumi: Amaziah hem wanfala priest long ten tribe kingdom bilong Israel wea worshipim pikinini buluka. Hem herem profesi wea Amos talem and hem olsem hem sei long Amos: ‘Go long ples bilong iu! No kam long mifala! Mifala garem religion finis!’ (Amos 7:12, 13) Taem Amaziah go for askem King Jeroboam for stopem Amos for gohed talem profesi, hem twistim toktok bilong profet Amos. (Amos 7:7-11) Bat Amos hem gohed strong and no fraet. Distaem samfala bigman bilong religion askem gavman for sapotim olketa for spoelem pipol bilong Jehovah. Bat Jehovah hem sei olketa samting wea pipol iusim for faetem iumi bae iusles nomoa.—Isa. 54:17.
3. Wanem nao tufala samting wea iumi storyim taem iumi preach?
3 Talemaot Judgment Bilong God and Gud Samting wea Iumi Bae Kasem: Amos talem profesi abaotem wei wea God bae judgem ten tribe kingdom bilong Israel. Bat last samting wea Amos raetem long Bible buk bilong hem, hem promis bilong Jehovah for buildim bak Jerusalem and for blessim olketa. (Amos 9:13-15) Taem iumi preach, iumi tu storyim “taem wea God bae judgem” pipol, bat iumi mas storyim nara samting wea join witim datfala “gud nius abaotem Kingdom.” (2 Pet. 3:7; Matt. 24:14) Disfala earth bae kamap paradaes bihaen Jehovah finisim olketa nogud pipol long Armageddon.—Ps. 37:34.
4. Wanem nao bae helpem iumi for duim wanem Jehovah laekem?
4 Iumi mas strong for duim wanem Jehovah laekem and for duim wanem iumi promisim taem iumi dedicate long hem, bikos hem no isi for gohed preach taem pipol againstim iumi. (John 15:19) Bat iumi barava sure Jehovah bae helpem iumi for duim wanem hem laekem, olsem hem helpem Amos.—2 Cor. 3:5.