Wanfala Samting for Rememberim

‘Wanfala man for sevem iufala hem born tuday, and hem nao Christ datfala Lord.’—Luke 2:11, “King James Version.”

SAMTING olsem tu thousand year bifor, wanfala woman long Bethlehem bornem wanfala pikinini boy. Klosap evriwan wea stap long datfala ples nating savve hao datfala samting wea happen hem barava important. Bat samfala shepherd wea stap aotsaed long naet witim sheep bilong olketa, lukim staka-maka-staka angel and olketa herem olketa singsing olsem: “Givim glory long God wea stap antap, and long earth peace stap midolwan long olketa man wea God hapi long olketa.”—Luke 2:8-14.

Bihaen datwan, olketa shepherd hia go long ples wea olketa angel talem, and olketa lukim Mary and hasband bilong hem Joseph insaed wanfala haos for keepim olketa animal. Mary kolem nem bilong datfala pikinini Jesus, and hem leim Jesus insaed ples for feedim animal. (Luke 1:31; 2:12) Distaem hem tu thousand year bihaen and staka pipol evriwea long earth sei olketa followim Jesus Christ. Luk olsem story abaotem olketa samting wea happen taem Jesus born, hem story wea pipol savve long hem winim eni narawan.

Spain hem kantri wea strong for followim kastom bilong Catholic Church. Pipol long there savve tumas for mekem olketa celebration, and olketa garem staka wei for celebratem datfala spesol naet long Bethlehem.

Hao Olketa Long Spain Celebratem Christmas

Samting olsem 700 year bifor, olketa long Spain start for mekem samting wea olketa kolem Nativity taem olketa celebratem Christmas. Planti famili savve mekem smol samting wea piksarem ples wea Jesus leidaon insaed. Olketa iusim clay for wakem olketa smolfala dole wea luk olsem olketa shepherd, datfala Magi (wea minim “thrifala king”), and tu, Joseph, Mary, and Jesus. Long Christmas, klosap long main hall bilong olketa taon, olketa savve putim wanfala big Nativity wea garem olketa dole wea klosap big olsem man. Luk olsem Francis of Assisi laek for mekem pipol tingim story long Gospel abaotem taem Jesus born dastawe hem startim disfala kastom long Italy. Bihaen, olketa Franciscan monk mekem disfala kastom kamap big long Spain and planti nara kantri.

Datfala Magi hem wanfala main samting insaed long wei for celebratem Christmas long Spain, olsem Father Christmas long olketa nara kantri. Olketa sei Magi nao savve givim present long olketa pikinini long Spain long January 6, wea olketa kolem Día de Reyes (Day bilong thrifala King). Olketa sei diswan hem olsem wei wea Magi tekem kam olketa present for Jesus taem hem born. Nomata olsem, planti pipol no savve hao story bilong Gospel nating talem haomas Magi nao visitim Jesus. And tu, olketa hia no king, bat olketa man for lukluk long star for talemaot future.a Nara samting tu, bihaen Magi hia visitim Jesus, Herod killim dae evri pikinini boy long Bethlehem “wea tu year and go daon” from hem laek killim dae Jesus. Datwan showimaot hao luk olsem olketa visitim Jesus longfala taem bihaen hem born.—Matthew 2:11, 16.

Samting olsem 900 year bifor taem bilong iumi, samfala taon long Spain savve actim olketa story abaotem taem wea Jesus born and wei wea olketa shepherd go long Bethlehem, and bihaen, olketa start for actim tu hao datfala Magi visitim Jesus. Distaem, klosap evri taon long Spain savve garem wanfala cabalgata, wea minim wanfala parade, long January 5. Long datfala parade “thrifala king” hia go long olketa trak wea olketa decoratem and olketa go followim main road bilong taon and olketa givimaot lole long pipol wea lukluk kam. Olketa savve mekem tu olketa Christmas decoration and singim villancicos (olketa carol) taem olketa duim datfala celebration.

Klosap evri famili long Spain savve garem spesol kaikai long Christmas Eve (December 24). Olketa savve kaikaim olketa hom kaikai olsem turrón (lole wea olketa wakem from almond nat and honey), marzipan, frut wea olketa draem, sheep, and olketa didifren kaen kaikai from sea. Evriwan long famili, nomata olketa wea stap farawe, savve trae hard for hipap tugeta long datfala taem. Narataem wea olketa mekem hom kaikai hem long January 6, taem famili savve kaikaim roscón de reyes, wea hem wanfala raon cake bilong “thrifala King” and datfala cake hem garem wanfala sorpresa (smol dole) wea olketa haedem insaed. Long taem bilong Rome bifor, olketa tu garem kaen kastom olsem. Sapos haf cake wea wanfala slave hem kasem hem garem datfala smol dole insaed olketa bae mekem hem kamap olsem king for wanfala day.

“Barava Hapi and Busy Taem Insaed Year”

Nomata olketa difren kantri garem staka difren kaen kastom saed long Christmas, Christmas kamap main celebration long world. The World Book Encyclopedia hem sei evriwea long world Christmas hem “barava hapi and busy taem insaed year for planti million Christian and samfala wea no Christian tu.” Waswe, datwan hem gud?

Hem tru, wei wea Christ hem born hem big samting wea happen bifor. Samting wea showimaot diswan, hem wei wea olketa angel sei diswan bae mekem “peace stap midolwan long olketa man wea God hapi long olketa.”

Nomata olsem, Juan Arias, man for raet long Spain hem sei: “Long firstaem, olketa Christian no celebratem datfala Nativity.” Sapos olsem, wei for celebratem Christmas hem start kam from wea? Wanem nao best samting man savve duim for rememberim Jesus? Insaed next article, iu bae kasem olketa ansa for olketa kwestin hia.

[Footnote]