Day for Graduate—Wanfala Naes Day
“IUMI garem naes day. Sun hem shaen. Skae hem blue. Grass hem green. Olketa bird singsing. Evriting showaot hao disfala day bae barava naes, and for sure hem bae olsem. Jehovah hem God wea mekem iumi feel gud. Hem God for givim olketa blessing.”
Brata Samuel Herd, hem wanfala member bilong Governing Body bilong Olketa Jehovah’s Witness. Hem talem toktok hia taem hem startim graduation program bilong mek-117 class bilong Watchtower Bible Skul Bilong Gilead. Diswan kamap long September 11, 2004. Disfala naes program storyim olketa kaonsel from Bible for encouragem man, and tu, samfala experience bilong olketa student taem olketa skul and samfala experience bilong olketa missionary wea duim disfala waka for longfala taem. Tru nao, hem naesfala day for 6,974 wea attend long Watchtower Educational Center long Patterson, New York, and tu, for olketa long Brooklyn and Wallkill, wea herem and lukim diswan long video.
Toktok for Encouragem Olketa Student
John Kikot, wea hem wanfala member bilong United States Branch Komiti, talem toktok for encouragem olketa Gilead student long tok bilong hem wea garem theme, “Gohed Stap Hapi Taem Iu Missionary.” Hem sei olketa Gilead student olketa hapi pipol. Diswan showaot klia long disfala graduation. Olketa samting wea olketa lanem from Bible taem olketa skul hem mekem olketa hapi, and olketa kamap fit for helpem nara pipol for hapi tu. Long wanem wei? Long wei for duim ministry bilong olketa witim full heart. Jesus sei: “Moa hapi kamaot from wei for givim samting winim wei for kasem samting.” (Acts 20:35) Taem olketa niu missionary followim Jehovah God, wea kaen and “hapi,” and wea mekem pipol savve long truth, then olketa seleva savve gohed stap hapi.—1 Timothy 1:11.
David Splane, nara member bilong Governing Body givim tok wea garem theme, “Waswe, Bae Iu Fren Gud Witim Olketa Narawan?” Wei for stap tugeta witim wan mind hem gud tumas, bat maet diswan needim man for “kamap evri samting long evrikaen pipol.” (1 Corinthians 9:22; Psalm 133:1) Brata Splane storyim hao olketa student wea graduate bae deal witim olketa difren kaen pipol taem olketa duim missionary waka. Olketa hia nao pipol long territory, olketa nara missionary, olketa brata and sista long niu kongregeson, and olketa long branch office wea directim waka for preach and teach. Hem talem samfala naes idea long hao for fren gud witim olketa narawan: Savve long languis bilong datfala ples, luksavve and willing for change fitim kastom bilong datfala ples, no poke-nose long laef bilong nara missionary, and obeyim olketa wea lead.—Hebrews 13:17.
Wanfala teacher long Gilead Skul, Lawrence Bowen ask olsem, “Waswe, Iu Garem Tingting Bilong God or Man?” Hem remindim olketa student hao pipol wea ‘judgem man from lukluk bilong hem’ no acceptim hao Jesus hem Messiah. (John 7:24) From iumi olketa man no perfect, evriwan mas waka hard for no ‘garem tingting bilong olketa man’ bat for garem “tingting bilong God.” (Matthew 16:22, 23) Pipol wea tinghae long olketa spiritual samting tu, mas gohed for changem tingting bilong olketa. Olsem wanfala ship long sea, sapos iumi no willing for change, bae iumi shiprek long spiritual wei and no kasem goal bilong iumi. Wei for gohed studyim Bible and ting raonem full story bilong samting iumi readim savve helpem iumi for garem “tingting bilong God.”
Nara teacher long Gilead Skul, Wallace Liverance endim disfala part bilong program. Theme for tok bilong hem, “Wanem Nao Bae Iu Baem” hem kam from Isaiah 55:1. Hem encouragem olketa student for “baem” hapi, and spiritual strong wea kam from profesi message bilong God for distaem. Profesi bilong Isaiah markem toktok bilong God witim wata, wine, and milk. Hao nao man savve baem diswan nomata hem no garem “eni selen” and olketa samting hia no garem “eni price”? Brata Liverance showimaot hao man savve kasem diswan thru long wei for lukluk gud long Bible profesi and changem tingting and wei bilong hem wea no followim Bible for followim tingting and wei bilong God. (Isaiah 55:2, 3, 6, 7) Taem olketa niu missionary duim olsem, olketa bae kasem strong for gohed insaed long assignment bilong olketa. Olketa man wea no perfect planti taem ting wei for hapi depend nomoa long wei for trae hard for kasem material samting. Speaker encouragem olketa for “no bilivim datwan. No followim datkaen tingting. Markem taem for study long wei wea mekem iu minim gud profesi toktok bilong God. Diswan bae mekem iu feel gud, strongim iu, and mekem iu hapi long missionary assignment bilong iu.”
Naesfala Experience and Interview Bilong Olketa Student
Olketa student share evritaem long preaching waka. Brata Mark Noumair, nara Gilead teacher, story witim samfala student long skul wea actim olketa experience wea mekhae long theme, “No Shame Long Gud Nius.” (Romans 1:16) Audience enjoy for lisin long wei wea olketa hia, wea minister for longtaem, witness from haos tu haos, long street, and long ples wea garem staka stoa. Olketa student wea savve long olketa nara languis, arrange for go preach long pipol wea tok long olketa languis hia long territory bilong kongregeson wea olketa attendim. Olketa narawan iusim gud olketa Bible pablikeson bilong Olketa Jehovah’s Witness taem olketa duim return visit and startim olketa Bible study. Olketa “no shame” for preachim gud nius.
Brata William Nonkes, wea waka long Service Department interviewim olketa missionary wea serve for longtaem long Burkina Faso, Latvia, and Russia. Olketa storyim samfala gudfala advaes wea join witim theme, “Long Loving Wei Jehovah Rewardim Olketa wea Faithful.” Wanfala brata wea Brata Nonkes interviewim encouragem olketa student for rememberim 300 soldia long army bilong Gideon. Each soldia duim samting wea help for mekem army bilong Gideon win. (Judges 7:19-21) Long sem wei tu, olketa missionary kasem reward sapos olketa stap long assignment bilong olketa.
Olketa interview wea Samuel Roberson, wanfala teacher long Patterson hem duim, hem garem theme, “Kamap Evriting Long Difren Kaen Pipol.” Hem interviewim fofala Branch Komiti member from Senegal, Guam, Liberia, and Madagascar. Wan handred and seventi missionary nao serve long olketa kantri hia. Olketa student wea graduate herem hao olketa Branch Komiti savve helpem olketa niu missionary change for fitim assignment bilong olketa. Diswan planti taem minim olketa mas lanem olketa kastom wea difren from kastom bilong pipol long Europe or America. Olsem example, long samfala kantri hem olraet nomoa for olketa man, and olketa brata insaed Christian kongregeson tu, for hol hand and wakabaot tugeta. From olketa narawan change for fitim diswan, olketa missionary savve duim olsem tu.
Wanfala member bilong Governing Body, Guy Pierce story raonem disfala subject, “Stap Faithful Long ‘Kingdom Bilong Lord Bilong Iumi.’” Hem remindim audience olsem: “Jehovah garem reason for creatim earth. Hem garem plan. Samting wea Jehovah laek duim for disfala earth hem no change. No eniting savve stopem for fulfill. No eniting savve changem datwan.” (Genesis 1:28) Brata Pierce encouragem evriwan for stap faithful anda long sovereign rul bilong God nomata olketa hard samting kamap bikos long sin bilong firstfala man, Adam. Brata Pierce encouragem olketa olsem: “Iumi stap long taem bilong judgment. Iumi garem lelebet taem nomoa for kasem pipol wea garem honest heart and helpem olketa for savve long truth. Iusim gud disfala taem for story abaotem disfala gud nius bilong Kingdom long pipol.” Olketa wea faithful for sapotim Kingdom bilong God savve barava sure hao hem stap witim olketa.—Psalm 18:25.
Long end bilong program, chairman readim olketa greeting and toktok for encouragem olketa student wea kam from olketa branch evriwea long world. Then hem givim olketa diploma long olketa student wea graduate. Wanfala long olketa student readim leta from class wea talemaot bigfala thankiu from heart bilong olketa for training wea olketa kasem. Diswan endim datfala naesfala program wea evriwan wea attend bae no savve forgetim.
[Box long page 23]
INFORMATION ABAOTEM CLASS
Haomas kantri olketa kam from: 11
Haomas kantri olketa bae go long hem: 22
Haomas student: 48
Average age: 34.8
Average year insaed truth: 18.3
Average year insaed full-taem ministry: 13.4
[Piksa long page 24]
Mek-117 Class Bilong Watchtower Bible Skul Bilong Gilead wea Graduate
List long daon start long front and go bihaen, and olketa nem start long left go long raet bilong each laen.
(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.