Waswe, Iu Savve Kontrolem Future Bilong Iu?
WASWE, eniwan or eni samting markem finis future bilong iumi? Waswe, olketa samting wea iumi disaedem savve affectim future bilong iumi?
Tingim sapos man savve kontrolem future bilong hem. Sapos olsem waswe, eniwan savve markem firstaem eni man for duim wanfala waka or for garem eni responsibility? And hao nao God bae savve fulfillim will bilong hem for earth sapos olketa man fit for kontrolem future bilong olketa seleva? Olketa nambawan ansa for olketa kwestin hia stap insaed Bible.
Tufala Difren Idea Savve Agree?
Tingim wei wea Jehovah God wakem iumi. Bible sei: “Long image bilong God nao hem creatim [man]; hem creatim tufala olsem man and woman.” (Genesis 1:27) From God wakem iumi long image bilong hem, iumi fit for showimaot olketa fasin bilong hem olsem love, justice, wisdom, and paoa. God givim iumi wei wea iumi free for chus tu. Diswan mekem iumi difren from olketa nara creation bilong hem long earth. Iumi savve chusim sapos iumi bae followim God saed long fasin or nomoa. Dastawe profet Moses hem sei: “Mi putim heven and earth olsem witness againstim iufala tuday, hao mi putim laef and dae front long iufala, blessing and curse; and iufala mas chusim laef mekem iufala gohed for laef, iufala and olketa pikinini bilong iufala, long wei for lovem God bilong iufala Jehovah, and for lisin long voice bilong hem and for stap klosap long hem.”—Deuteronomy 30:19, 20.
Bat, wei for free for chus hem no minim iumi barava free. Hem no minim iumi free from olketa law bilong nature and olketa law saed long fasin wea God putim mekem evri samting long universe stap gud. God putim olketa law hia for helpem iumi, and sapos iumi againstim, diswan savve mekem iumi kasem nogud samting. Tingim wanem nao bae happen sapos iu no laek followim law bilong gravity and iu jamp go daon from wanfala tol kokonat tree!—Galatians 6:7.
Wei wea iumi free for chus mekem iumi garem samfala responsibility wea difren from olketa animal wea no free for chus. Wanfala man for raet, Corliss Lamont hem ask olsem: “Waswe, iumi savve panisim olketa man sapos iumi sei . . . wanfala paoa nao disaedem samting wea olketa chus for duim?” Barava nomoa nao. Olketa animal wea followim nomoa wei bilong olketa no kasem blame for samting wea olketa duim, and diswan semsem tu olsem olketa computer wea man wakem for duim samting. So, wei for iumi free for chus seleva givim iumi bigfala responsibility and mekem iumi mas givim ansa for wanem iumi duim.
Sapos Jehovah God markem firstaem evri samting iumi bae duim long laef bilong iumi bifor iumi born and then hem askem iumi for ansa for wanem iumi duim, diswan bae showimaot hao hem no garem love and justice fasin! Hem no duim olsem bikos “God hem love,” and “evri wei bilong hem followim justice.” (1 John 4:8; Deuteronomy 32:4) From God letem iumi free for chus, hem nating ‘disaedem finis hu nao bae hem sevem and hu nao bae dae,’ wea hem nao wanem samfala bilivim. So wei for sei samting nao disaedem finis future bilong iumi, hem no stret.
Bible talem klia hao olketa samting wea iumi chus for duim bae affectim future bilong iumi. Olsem example, God barava askem olketa wea duim nogud samting: “Tan bak, plis, each wan from nogud wei bilong hem and from nogud samting wea iufala duim . . . mekem iufala no kasem bigfala trabol from mi.” (Jeremiah 25:5, 6) Disfala toktok bae no minim eni samting sapos God markem firstaem future bilong olketa man wanwan. And tu, Bible sei: “Repent, and tan raon mekem iufala kasem forgiveness for olketa sin bilong iufala, mekem Jehovah savve strongim iu bak.” (Acts 3:19) Why nao Jehovah askem pipol for repent and tan raon sapos hem savve firstaem hao olketa bae hard for duim eniting wea bae changem future bilong olketa?
Bible storyim samfala wea God invaetem for rul olsem king long heven witim Jesus Christ. (Matthew 22:14; Luke 12:32) Bat Bible sei hao sapos olketa no stand strong kasem end bae olketa lusim disfala privilege. (Revelation 2:10) Why nao God invaetem olketa sapos hem disaedem finis bae hem no chusim olketa? Tingim tu toktok bilong aposol Paul for olketa brata bilong hem. Hem raet: “Sapos iumi min for gohed for sin nomata iumi kasem stretfala savve bilong truth, no eni sakrifaes for sin hem stap moa.” (Hebrews 10:26) Diskaen warning bae hem iusles nomoa sapos God markem firstaem future bilong olketa. Bat samfala sei Bible talem hao God markem firstaem samfala wea bae rul witim Jesus Christ.
Markem Firstaem—Man Wanwan or Wanfala Sekson?
Aposol Paul raet olsem: “[God] hem blessim iumi witim evri spiritual blessing long olketa ples long heven witim Christ, olsem wei wea hem chusim iumi wea garem wan mind witim hem bifor world hem start . . . From hem markem firstaem for adoptim iumi thru long Jesus Christ olsem olketa son bilong hemseleva.” (Ephesians 1:3-5) Wanem nao God markem firstaem, and wei wea hem chusim samfala “bifor world hem start” hem minim wanem?
Disfala scripture talem hao God chusim samfala long laen bilong first man, Adam, for rul witim Christ long heven. (Romans 8:14-17, 28-30; Revelation 5:9, 10) Bat, wei for sei Jehovah God markem firstaem samfala man and woman for kasem disfala privilege planti thousand year bifor olketa born, hem no agree witim disfala tingting wea olketa man free for chus. Samting wea God markem firstaem hem wanfala grup, or sekson bilong pipol, no olketa man wanwan.
For minim: Tingim sapos wanfala gavman garem idea for startim wanfala office. Gavman markem firstaem waka bilong disfala office, wanem hem fit for duim, and haomas pipol bae waka insaed. Then lelebet taem bihaen, pipol long disfala office startim waka bilong olketa. Olketa wea waka insaed disfala office talem disfala toktok: “Planti year bifor gavman disaedem firstaem wanem waka nao mifala bae duim. Distaem mifala startim waka wea olketa markem for mifala.” Waswe, bae iu tingse gavman hem markem firstaem long samfala year bifor hu nao bae waka insaed disfala office? Barava nomoa. Long sem wei, Jehovah markem firstaem hao bae hem garem wanfala spesol gavman wea bae stretem olketa samting wea kamaot from sin bilong Adam. Hem markem firstaem wanem kaen pipol nao bae waka insaed datfala gavman, no olketa man wanwan. Bae hem chusim olketa bihaen, and samting wea pipol hia disaed for duim long laef bilong olketa bae affectim sapos God bae chusim olketa or nomoa.
Wanem kaen world nao aposol Paul minim taem hem sei: “[God] chusim iumi wea garem wan mind witim hem bifor world hem start”? World wea Paul minim long hia hem no disfala world wea God startim taem hem creatim Adam and Eve. Datfala world hem “gud tumas,” barava free from sin. (Genesis 1:31) Hem no need for “kamap free” from sin.—Ephesians 1:7.
World wea Paul storyim hem nao world wea kamap bihaen Adam and Eve kamap bighed long Eden. Datfala world hem barava difren from world wea stap long first plan bilong God. Hem nao world wea start taem Adam and Eve garem olketa pikinini. Insaed long datfala world hem olketa pipol wea stap farawe from God and garem sin. Hem world bilong pipol wea savve kasem forgiveness, no olsem Adam and Eve wea min for duim sin.—Romans 5:12; 8:18-21.
Jehovah God fit for stretawe stretem problem wea kamap from wei for bighed long Eden. Taem need kamap, hem markem firstaem wanfala spesol gavman, wea hem nao Kingdom Bilong Messiah wea Jesus Christ King bilong hem. God bae iusim disfala gavman for mekem olketa man kamap free from sin bilong Adam. (Matthew 6:10) God duim diswan ‘bifor hem startim world’ bilong pipol wea savve kamap free from sin. Datwan minim bifor Adam and Eve garem pikinini.
Planti taem olketa man needim plan mekem olketa savve win long wanem olketa laek for duim. Disfala idea for sei God markem evri samting firstaem, hem join witim idea for sei God garem plan for universe wea hem disaedem finis evri samting wea bae happen. Roy Weatherford hem raet olsem: “Long tingting bilong planti savveman, for sei God no markem samting wea bae happen, hem olsem wei for sei God no garem bigfala paoa.” Waswe, need stap for God mas talem firstaem evri samting wea bae happen?
From Jehovah garem paoa and wisdom wea winim iumi evriwan, hem savve deal witim eni problem wea maet kamap from wei wea olketa man free for chus. (Isaiah 40:25, 26; Romans 11:33) Hem savve duim diswan stretawe and no need for ting raonem firstaem. Olmaeti God hem no olsem olketa man wea no perfect. Hem no needim plan wea no savve change wea markem firstaem future bilong evri man wanwan long earth. (Proverbs 19:21) Long samfala Bible, Ephesians 3:11 talem hao God garem wanfala “plan for olowe” and no wanfala plan wea no savve change.
Wanem Iu Savve Duim Mekem Future Bilong Iu Hem Gud
God garem plan for disfala earth, and datfala plan hem markem firstaem. Revelation 21:3, 4 sei: “Lukim! Tent bilong God hem stap witim olketa man, and hem bae stap witim olketa, and olketa bae kamap pipol bilong hem. And God bae stap witim olketa. And hem bae aotem krae from eye bilong olketa, and dae bae nomoa, sorre and singaot and pain bae nomoa tu. Evri samting bifor hem finis nao.” Olsem first plan bilong Jehovah disfala earth bae kamap paradaes. (Genesis 1:27, 28) Bat kwestin nao, Bae iu stap long there? Datwan depend long wanem iu chus for duim distaem. Jehovah no markem firstaem future bilong iu.
Dae bilong Jesus Christ, Son bilong God, hem openem wei for eniwan wea showimaot faith long hem bae kasem laef olowe. (John 3:16, 17; Acts 10:34, 35) Bible sei: “Man wea showimaot faith long Son bae laef olowe. Man wea no obeyim Son bae no laef.” (John 3:36) Iu savve chus for laef taem iu lane abaotem God, Son bilong hem and will bilong Hem from Bible and taem iu followim datwan. Man wea followim trufala wisdom wea stap insaed Bible kasem promis hao “hem bae stap sef and no fraetem bigfala trabol.”—Proverbs 1:20, 33.
[Olketa Piksa long page 5]
Olketa man no olsem olketa animal, olketa mas ansa for wanem olketa duim
[Credit Line]
Eagle: Foto: Cortesía de GREFA