“Jehovah Nao Man wea Helpem Mi”
Taem Wei for Olo Hem Kamap Olsem “Crown wea Luk Naes Tumas”
MURIEL wea hem 101 year hem sei: “Diswan hem best wei for iusim laef.” Theodoros wea hem 70 year hem ting olsem: “Diswan hem wanfala barava spesol samting for man duim!” Maria wea hem 73 year hem sei: “Sapos mi iusim laef bilong mi long difren wei hem hard for hem gud olsem.” Thrifala hia iusim full laef bilong olketa for servem Jehovah God evribit.
Planti olo olsem gohed strong for worshipim Jehovah evriwea long world. Nomata body bilong olketa start for gogo daon, garem problem saed long health, and enikaen nara problem, olketa gohed servem God witim full soul bilong olketa. Olketa insaed Christian kongregeson barava respectim olketa faithful olo hia wea olsem example saed long wei for worshipim God. Nomata hem hard for olketa duim planti samting, Jehovah barava tinghae long waka wea olketa duim.a—2 Corinthians 8:12.
Buk bilong Psalms talem barava tru samting abaotem laef bilong olketa faithful olo. Olketa savve kamap olsem strongfala tree wea nomata hem stap for longtaem finis, hem gohed for garem frut. Wanfala man wea raetem psalm hem sing olsem abaotem olketa faithful olo: “Bae olketa gohed for strong nomata olketa garem gray hair, bae olketa gohed for fat and fresh.”—Psalm 92:14.
Samfala feel fraet from olketa tingse bae pipol les and no interest long olketa from olketa olo and body kamap wik. David prea strong olsem long God: “No raosem mi taem mi kamap olo; taem paoa bilong mi hem wikdaon, no lusim mi.” (Psalm 71:9) Wanem nao savve mekem olo for gohed strong? Raeteous fasin wea God teachim iumi for garem nao mekem iumi gohed strong and no wikdaon. Man wea raetem psalm hem sing olsem: “Raeteous wan seleva bae grow gud tumas olsem wanfala palm tree.”—Psalm 92:12.
Klosap evritaem, olketa wea iusim full laef for duim faithful service long God savve gohed for garem frut nomata olketa kamap olo. Planti gud samting kamap from evri samting olketa duim long laef bilong olketa for helpem olketa seleva and olketa narawan. Diswan hem olsem olketa seed wea grow and gogo garem staka frut. (Galatians 6:7-10; Colossians 1:10) Tru nao, pipol wea westem laef bilong olketa for aftarem olketa samting for olketa seleva and no followim God, nating garem planti gud samting taem olketa kamap olo.
Buk bilong Proverbs tu strongim hao raeteous fasin hem samting wea mekem olketa olo luk naes. Hem sei: “Gray hair hem olsem crown wea luk naes tumas long man wea garem raeteous fasin.” (Proverbs 16:31) Tru nao, raeteous fasin hem samting wea showimaot man hem luk naes. Taem man gohed garem raeteous fasin for full laef bilong hem pipol bae respectim hem. (Leviticus 19:32) Taem olketa olo garem wise and gudfala fasin, bae olketa kasem honor.—Job 12:12.
Long tingting bilong Jehovah, olketa wea followim stretfala fasin and iusim full laef for servem hem, olketa barava luk naes long hem. Bible sei: “Nomata man kamap olo Mi [Jehovah] no change; and mi bae sapotim man wea garem gray hair. Miseleva bae duim samting, mekem miseleva savve karem and sapotim and mekem iufala kamap free.” (Isaiah 46:4) Iumi kasem comfort from iumi savve hao Dadi bilong iumi long heven hem promis for strongim and sapotim olketa wea loyal long hem nomata olketa olo!—Psalm 48:14.
Long tingting bilong Jehovah olketa wea iusim full laef bilong olketa for servem hem, olketa luk naes. Waswe, diswan no showimaot hao olketa narawan mas respectim olketa olo hia tu? Iumi garem sem tingting olsem God, from iumi tinghae long olketa olo brata and sista. (1 Timothy 5:1, 2) Iumi savve showimaot Christian love long wei for duim samfala samting for helpem olketa.
Nomata Olketa Olo Finis Olketa Followim Road Bilong Raeteous Fasin
Solomon hem sei: “Long road bilong raeteous fasin laef stap.” (Proverbs 12:28) Wei for olo no stopem man for start wakabaot followim disfala road. Long Moldova wanfala man wea 99 year hem sapotim tingting bilong olketa Communist taem hem young. Hem tinghae tumas long wei wea hem story witim olketa bigman bilong Communist bifor, olsem V. I. Lenin. Bat taem rul bilong Communism hem finis, disfala olo hem feel laef bilong hem iusles and hem no savve nao wanem for duim. Taem Olketa Jehovah’s Witness showim hem hao Kingdom bilong God nomoa garem olketa ansa for olketa problem wea man feisim, hem acceptim truth from Bible and strong for studyim Bible. Bat sorre nao, hem dae bifor hem baptaes for servem Jehovah.
Long Hungary, wanfala woman wea 81 year hem lane abaotem olketa standard bilong God saed long fasin. Olo woman hia luksavve hem need for maritim man wea hem stap witim for planti year finis. Woman hia strongim hemseleva for no fraet, then hem go talem disfala man abaotem samting wea hem lanem from Bible. Hem barava hapi and sapraes taem disfala man agree for maritim hem. Bihaen tufala registerim marit bilong tufala, woman hia barava muv ahed long spiritual wei. Bihaen eitfala month from taem wea hem start for studyim Bible, hem kamap wanfala anbaptaes pablisa, and no long taem bihaen datwan hem baptaes. Hem barava tru hao raeteous fasin hem olsem wanfala crown wea mekem olketa olo luk naes!
Olketa olo Christian wea gohed for faithful fit for feel sure hao God hem barava tingim olketa. Jehovah bae no lusim olketa wea gohed for loyal long hem. Hem promis for leadim, sapotim, and strongim olketa nomata olketa kamap olo. And olketa hia pruvim toktok bilong man wea raetem psalm: “Jehovah nao man wea helpem mi.”—Psalm 121:2.
[Footnote]
a Lukim 2005 Calendar of Jehovah’s Witnesses, January/February.
[Blurb long page 9]
“Gray hair hem olsem crown wea luk naes tumas long man wea garem raeteous fasin.”—PROVERBS 16:31
[Box long page 8]
JEHOVAH HEM TINGIM OLKETA SERVANT BILONG HEM WEA OLO
“Front long gray hair iu mas standap, and iu mas showimaot iu tingim olo man.”—Leviticus 19:32.
“Nomata man kamap olo mi no change; and mi bae sapotim man wea garem gray hair.”—Isaiah 46:4.