Olketa Olo—Important Member Bilong Christian Kongregeson

“Olketa wea grow insaed haos bilong Jehovah . . . bae olketa grow gud tumas. Bae olketa still go ahed for grow taem olketa garem gray hair.”—PSALM 92:13, 14.

1. Hao nao staka pipol ting long olketa olo?

JEHOVAH lovem evri faithful servant bilong hem, olketa olo tu. Bat, wanfala report long United States sei evri year pipol spoelem or no keepim gud klosap faev handred thousand olo. Semkaen report long staka nara kantri showimaot hao wei for spoelem olketa olo hem wanfala problem long full world. Samting wea kosim disfala problem hem wanem wanfala organization kolem “tingting wea staka pipol garem . . . hao olketa olo iusles nao, olketa no savve duim waka and depend tumas long nara pipol for helpem olketa.”

2. (a) Hao nao Jehovah ting long olketa faithful servant bilong hem wea olo? (b) Wanem naesfala promis nao iumi readim long Psalm 92:12-15?

² Jehovah God barava tinghae tumas long olketa servant bilong hem wea olo. Hem lukluk long “man wea hem iumi long insaed”—spiritual living bilong iumi—no long samting wea body bilong iumi no savve duim. (2 Corinthians 4:16) Long Bible, iumi readim disfala promis wea mekem iumi feel hapi: “Raeteous wan seleva bae grow gud tumas olsem wanfala palm tree; olsem wanfala cedar tree long Lebanon, bae hem grow big. Olketa wea grow insaed haos bilong Jehovah, long olketa courtyard bilong God bilong iumi, bae olketa grow gud tumas. Bae olketa still go ahed for grow taem olketa garem gray hair, bae olketa go ahed for fat and fresh, for talem wei wea Jehovah hem garem stretfala fasin.” (Psalm 92:12-15) Wei for lukluk long olketa verse hia bae showimaot olketa gud samting wea iufala olketa olo savve givim long Christian kongregeson.

“Go Ahed for Grow Taem Olketa Garem Gray Hair”

3. (a) Why nao olketa raeteous wan olsem palm tree? (b) Hao nao olketa olo savve ‘grow taem olketa garem gray hair’?

³ Man wea raetem psalm sei olketa raeteous wan olsem olketa palm tree ‘wea grow insaed olketa courtyard bilong God bilong iumi.’ Olketa “go ahed for grow taem olketa garem gray hair.” Narafala Bible transleison sei: “Taem olketa olo, olketa still garem frut.” (Tanakh) Diswan barava encouragem man! Olketa stretfala palm tree wea luk naes tumas olketa samting wea stap long klosap evri courtyard bilong olketa haos long taem bilong Bible. Olketa luk naes and tu pipol tinghae long olketa from olketa garem staka frut. Samfala palm tree go ahed for garem frut for winim wan handred year.a Taem iu stap strong insaed tru worship, iu tu savve “go ahed for garem frut long evri gudfala waka.”—Colossians 1:10.

4, 5. (a) Wanem important frut nao olketa Christian need for mekem grow? (b) Talem olketa Bible example bilong olketa olo wea garem “frut bilong mouth.”

⁴ Jehovah expectim olketa Christian for garem “frut bilong mouth”—hem nao toktok for praisem hem and olketa purpose bilong hem. (Hebrews 13:15) Waswe, diswan fitim iufala olketa olo? Barava nao.

⁵ Bible hem storyim example bilong olketa olo wea no fraet for witness abaotem nem bilong Jehovah and olketa purpose bilong hem. Moses hem winim “seventi year” finis taem Jehovah appointim hem for serve olsem profet and man for stand for hem. (Psalm 90:10; Exodus 4:10-17) Wei wea hem olo no stopem profet Daniel for no fraet for talem witness abaotem sovereign rul bilong Jehovah. Maet Daniel hem winim 90 year finis taem Belshazzar kolem hem kam for talemaot mining bilong secret handraeting long wall. (Daniel, chapter 5) And waswe long olo aposol John? Gogo for end long laef bilong hem, hem stap long prison long island bilong Patmos ‘from hem tok abaotem God and givim witness abaotem Jesus.’ (Revelation 1:9) Maet iu rememberim staka narawan wea stap insaed Bible wea garem “frut bilong mouth” taem olketa olo.—1 Samuel 8:1, 10; 12:2; 1 Kings 14:4, 5; Luke 1:7, 67-79; 2:22-32.

6. Long wanem wei nao Jehovah hem iusim “olketa olo man” for talemaot profesi long olketa last day distaem?

⁶ Taem hem talem toktok bilong Hebrew profet Joel, aposol Peter sei: “ ‘Long olketa lastfala day,’ God hem sei, ‘mi bae pourim aot samfala spirit bilong mi long evri difren kaen flesh [“olketa olo man” tu], . . . and olketa bae talem profesi.’ ” (Acts 2:17, 18; Joel 2:28) Dastawe, long olketa last day distaem, Jehovah iusim olketa olo member bilong anointed sekson and bilong “nara sheep” for talemaot olketa purpose bilong hem. (John 10:16) Samfala long olketa hia faithful for garem Kingdom frut for staka year finis.

7. Talemaot example hao olketa olo savve go ahed for garem frut bilong Kingdom nomata olketa garem sik long body.

⁷ Tingim Sonia, wea start long 1941, hem full taem for preach abaotem Kingdom. Nomata hem stragol longtaem witim bigfala sik, hem evritaem conductim olketa Bible study long haos bilong hem. Sonia hem sei: “Wei for preachim gud nius hem part long laef bilong mi. For tok stret, hem nao laef bilong mi. Mi no want for finis for duim diswan.” No longtaem go nomoa, Sonia and sista bilong hem Olive, storyim message bilong hope long Janet, wanfala barava sik woman wea olketa meetim long hospital. Mami bilong Janet, wea hem strongfala Catholic, hem hapi tumas long loving interest wea tufala hia showimaot long dota bilong hem so hem acceptim wanfala Bible study and distaem hem muv ahed gud. Waswe, iu savve mekius long olketa chance for garem olketa frut bilong Kingdom?

8. Hao nao Caleb wea olo hem showimaot hem trustim Jehovah, and hao nao olketa olo Christian savve followim example bilong hem?

⁸ Taem olketa olo Christian strong for go ahed long waka for preachim Kingdom nomata olketa olo, olketa followim example bilong faithful Israelite Caleb, wea go witim Moses long wilderness for foti year. Caleb hem 79 year taem hem akrosim Jordan River for go insaed long datfala Promis Land. Bihaen hem faet olsem wanfala soldia insaed army bilong Israel for sixfala year, fitim hem for rest nao. Bat hem no duim datwan, hem no fraet for ask for duim hardfala assignment for attakim and winim “olketa strongfala taon” long maunten area bilong Judah, area wea olketa big pipol bilong Anakim stap. From Jehovah helpem hem, Caleb “aotem olketa from datfala ples, olsem Jehovah promisim finis.” (Joshua 14:9-14; 15:13, 14) Iu tu savve sure Jehovah hem stap witim iu, olsem hem stap witim Caleb, taem iu go ahed for garem olketa frut bilong Kingdom taem iu olo. And sapos iu stap faithful, bae hem givim iu wanfala ples insaed niu world wea hem promisim.—Isaiah 40:29-31; 2 Peter 3:13.

“Bae Olketa Go Ahed for Fat and Fresh”

9, 10. Hao nao olketa olo Christian savve stap healthy long faith and stap strong long spiritual wei? (Lukim box long page 13.)

⁹ Man wea raetem psalm point go long wei wea olketa olo servant bilong Jehovah garem frut: “Raeteous wan seleva bae grow gud tumas olsem wanfala palm tree; olsem wanfala cedar tree long Lebanon, bae hem grow big. Bae olketa still go ahed for grow taem olketa garem gray hair, bae olketa go ahed for fat and fresh.”—Psalm 92:12, 14.

¹⁰ Hao nao iu savve keepim spiritual strong bilong iu nomata iu gogo for olo? Secret bilong wei wea palm tree hem stap longtaem hem sapos hem garem fresh wata evritaem. Long sem wei, iu savve kasem strong from wata bilong truth bilong Bible taem iu studyim Word bilong God and hipap witim organization bilong hem. (Psalm 1:1-3; Jeremiah 17:7, 8) Wei wea iu strong long spiritual saed hem mekem iu spesol samting for olketa brata and sista. Example bilong olo Hae Priest Jehoiada pruvim hao diswan hem tru.

11, 12. (a) Wanem important waka nao Jehoiada duim long history bilong kingdom bilong Judah? (b) Hao nao Jehoiada iusim paoa wea hem garem for sapotim tru worship?

¹¹ Luk olsem Jehoiada hem winim wan handred year taem Queen Athaliah wea aftarem hae position hem tek kontrol long Judah taem hem killim dae olketa granpikinini bilong hemseleva. Wanem nao olo man Jehoiada fit for duim? For sixfala year hem and waef bilong hem haedem Jehoash long temple, only pikinini bilong king wea laef. Then, Jehoiada duim wanfala sapraesing samting taem hem talemaot hao Jehoash wea seven year hem nao king and hem killim dae Athaliah.—2 Chronicles 22:10-12; 23:1-3, 15, 21.

¹² From hem nao man for luk aftarem king, Jehoiada iusim paoa wea hem garem for sapotim tru worship. Hem “mekem wanfala covenant midolwan hemseleva and evri pipol and king hao olketa bae go ahed olsem pipol bilong Jehovah.” Jehoiada givim order for pipol hia brekem haos bilong giaman god Baal and aotem olketa altar, image, and priest bilong olketa. Anda long direction bilong Jehoiada, Jehoash mekem kam bak worship insaed temple and duim bigfala waka for fixim temple. “Jehoash go ahed for duim samting wea stret long eye bilong Jehovah long full taem wea Jehoiada datfala priest givim instruction long hem.” (2 Chronicles 23:11, 16-19; 24:11-14; 2 Kings 12:2) Taem Jehoiada dae taem hem 130 year, olketa berem hem long spesol ples witim olketa king bikos “hem duim gudfala samting long Israel and long tru God and haos bilong Hem.”—2 Chronicles 24:15, 16.

13. Hao nao olketa olo Christian savve ‘duim gudfala samting long tru God and haos bilong hem’?

¹³ Maet nogud health or nara samting long living mekem iu no fit for duim staka samting tumas for sapotim tru worship. Nomata olsem, iu still fit for ‘duim gudfala samting long tru God and haos bilong hem.’ Iu savve showimaot strong for spiritual haos bilong Jehovah long wei for attendim and tekpart long olketa meeting bilong kongregeson and for share long field ministry long evri chance wea iu garem. Wei wea iu willing for acceptim kaonsel from Bible and loyal for sapotim “faithful and wise slave” and kongregeson bae strongim olketa Christian brata. (Matthew 24:45-47) Iu savve muvim tu olketa nara brata “for showimaot love and gudfala waka.” (Hebrews 10:24, 25; Philemon 8, 9) And iu bae kamap wanfala blessing long nara pipol sapos iu duim samting wea aposol Paul talem: “Letem olketa olo man no ova tumas long wei bilong olketa, garem fasin for ting hevi, garem stretfala tingting, healthy long faith, long love, and long wei for stand strong. Long sem wei tu, olketa olo woman mas garem fasin wea showimaot honor, no tok spoelem nem bilong pipol, no drinkim tumas wine, and kamap olketa teacher bilong gudfala samting.”—Titus 2:2-4.

14. Wanem nao olketa wea Christian overseer for longtaem savve duim for sapotim tru worship?

¹⁴ Waswe, iu serve olsem wanfala elder insaed kongregeson for staka year? Wanfala wea elder for longtaem insaed kongregeson talem disfala advaes: “No hol bak for iusim wisdom wea iu kasem insaed olketa year wea go pas. Markem olketa narawan for luk aftarem samfala responsibility, sharem savve bilong iu witim olketa narawan wea willing for lane . . . Luksavve wei wea nara pipol garem savve and fit for duim samting. Helpem olketa for mekem grow datfala savve. Mekredy for future.” (Deuteronomy 3:27, 28) Really interest wea iu showimaot long Kingdom waka wea go ahed for grow bae barava helpem olketa narawan insaed Christian kongregeson.

“Talem Wei wea Jehovah Hem Garem Stretfala Fasin”

15. Hao nao olketa olo Christian “talem wei wea Jehovah hem garem stretfala fasin”?

¹⁵ Olketa olo servant bilong God hapi tumas for fulfillim responsibility bilong olketa “for talem wei wea Jehovah hem garem stretfala fasin.” Sapos iu wanfala olo Christian, toktok and samting iu duim savve showimaot long nara pipol hao ‘Jehovah hem Rok bilong iu, wea no eni fasin wea no raeteous hem stap.’ (Psalm 92:15) Olketa palm tree givim kwaet witness abaotem olketa nambawan fasin bilong Creator. Bat Jehovah givim iu privilege for talemaot witness abaotem hem long olketa wea acceptim tru worship distaem. (Deuteronomy 32:7; Psalm 71:17, 18; Joel 1:2, 3) Why nao diswan hem important?

16. Wanem Bible example nao showimaot hem important for “talem wei wea Jehovah hem garem stretfala fasin”?

¹⁶ Taem leader bilong Israel, Joshua hem “olo and gogo for dae,” hem “kolem kam full Israel, olketa olo man and leader and judge and olketa wea garem paoa,” for talem olketa moa, abaotem olketa stretfala samting wea God duim. Hem sei: “No eni toktok long evri gudfala toktok wea God bilong iufala Jehovah talem long iufala hem fail. Evriwan kamap tru for iufala.” (Joshua 23:1, 2, 14) For lelebet taem, toktok hia strongim wei wea pipol hia disaed strong for go ahed faithful. Nomata olsem, bihaen Joshua dae “nara genereson start for kamap . . . wea no savve long Jehovah or olketa samting wea hem duim finis for Israel. And olketa son bilong Israel start for duim samting wea nogud long eye bilong Jehovah and servem olketa Baal.”—Judges 2:8-11.

17. Hao nao Jehovah deal witim pipol bilong hem long distaem?

¹⁷ Faithful fasin bilong Christian kongregeson distaem hem no depend long witness wea olketa olo servant bilong God talem. Nomata olsem, faith bilong iumi long Jehovah and olketa promis bilong hem kamap moa strong taem iumi herem story bilong olketa abaotem “nambawan waka” wea hem duim for pipol bilong hem long olketa last day distaem. (Judges 2:7; 2 Peter 1:16-19) Sapos iu hipap witim organization bilong Jehovah for staka year, maet iu rememberim taem wea tu-thri nomoa talemaot Kingdom long area or kantri bilong iu or taem strongfala wei for againstim preaching waka hem stap. Gogo, iu lukim wei wea Jehovah aotem olketa hardfala samting hia and “speedim” wei wea olketa pablisa grow. (Isaiah 54:17; 60:22) Iu lukim wei wea olketa truth insaed Bible kamap moa klia and hao organization bilong God long earth hem change for kamap moabeta. (Proverbs 4:18; Isaiah 60:17) Waswe, iu luk aotem olketa wei for encouragem nara pipol long wei for talem experience bilong iu saed long olketa stretfala samting wea Jehovah duim? Diswan savve strongim olketa Christian brata!

18. (a) Talem example bilong gudfala samting wea savve kamaot from wei for ‘talem nara pipol abaotem wei wea Jehovah garem stretfala fasin.’ (b) Hao nao iuseleva lukim stretfala fasin bilong Jehovah?

¹⁸ Waswe olketa taem wea iu kasem loving kea and help long laef bilong iuseleva? (Psalm 37:25; Matthew 6:33; 1 Peter 5:7) Wanfala olo sista Martha savve encouragem olketa narawan taem hem sei: “Nomata wanem samting happen, no lusim Jehovah. Hem bae strongim iu.” Disfala advaes hem affectim Tolmina, wanfala Bible student bilong Martha wea baptaes long start bilong olketa year bilong 1960. Tolmina sei: “Taem hasband bilong mi dae, mi barava feel wikdaon, bat toktok hia mekem mi disaed strong for no missim eni meeting. And Jehovah really strongim mi for go ahed.” Tolmina givim sem advaes long staka Bible student bilong hem tu insaed olketa year wea go pas. Tru tumas, taem iu givim encouragement and storyim olketa gudfala samting wea Jehovah duim, iu savve duim bigfala samting for buildimap faith bilong olketa nara brata and sista.

Jehovah Barava Lovem Olketa Faithful Wan wea Olo

19, 20. (a) Hao nao Jehovah ting long waka bilong olketa olo servant bilong hem? (b) Wanem nao iumi bae storyim long next article?

¹⁹ Pipol long world distaem wea nating garem fasin for thankiu barava no tingim olketa olo. (2 Timothy 3:1, 2) Taem pipol tingim olketa, staka taem hem from samting wea olketa duim bifor and no samting olketa duim distaem. Long difren wei, Bible sei: “God hem no wicked mekem hem forgetim waka bilong iufala and love wea iufala showimaot for nem bilong hem, long wei wea iufala servem olketa holy wan and go ahed for serve.” (Hebrews 6:10) Hem tru Jehovah rememberim olketa faithful samting wea iu duim bifor. Bat hem tinghae long iu tu for wanem iu go ahed for duim long service bilong hem. Tru tumas, hem ting long olketa faithful olo olsem olketa Christian wea strong and healthy long spiritual wei—pipol wea laef bilong olketa showimaot paoa bilong hem.—Philippians 4:13.

²⁰ Waswe, iu ting long olketa olo long Christian kongregeson long sem wei wea Jehovah ting long olketa? Sapos olsem, iu bae showimaot love for olketa. (1 John 3:18) Next article bae storyim samfala gudfala wei for showimaot love hia taem iumi provaedem wanem olketa needim.

[Footnote]

Wanem Nao Olketa Ansa Bilong Iu?

• Hao nao olketa olo “garem frut”?

• Why nao spiritual strong bilong olketa olo hem spesol samting?

• Hao nao olketa olo “talem wei wea Jehovah garem stretfala fasin”?

• Why nao Jehovah barava lovem olketa wea servem hem for longfala taem?

[Box long page 13]

Hao Olketa Stap Healthy Long Faith

Wanem nao helpem olketa wea Christian for longtaem for stap healthy long faith and for keepim spiritual strong bilong olketa? Diswan nao samting wea samfala talem:

“Hem barava important for readim olketa scripture wea mekhae long wei wea iumi fren witim Jehovah. Staka naet, mi baeheartim Psalm 23 and 91.”—Olive, baptaes long 1930.

“Mi evritaem mek sure mi stap long evri baptism tok and lisin gud, olsem hem tok for taem mi baptaes. Wei for tingim evritaem dedication bilong mi hem wanfala important samting for go ahed faithful.”—Harry, baptaes long 1946.

“Wei for prea evriday hem important tumas—evritaem askem help, protection, and blessing bilong Jehovah, ‘lisin long hem long evri samting iumi duim.’ ” (Proverbs 3:5, 6)—Antônio, baptaes long 1951.

“Wei for lisin long experience bilong olketa wea faithful for servem Jehovah for staka year hem strongim mi for stap loyal and faithful long hem.”—Joan, baptaes long 1954.

“Hem important for no ting tumas long seleva. Evriting iumi garem hem from kaenfala fasin bilong God wea iumi no fit for kasem. Wei for garem disfala tingting hem leadim iumi go long stretfala ples for kasem spiritual kaikai wea iumi needim for stand strong go kasem end.”—Arlene, baptaes long 1954.

[Piksa long page 11]

Olketa olo garem gudfala Kingdom frut

[Piksa long page 14]

Spiritual strong bilong olketa wea olo hem spesol samting