Olketa Mirakol​—Tru Wan or Laea Wan?

WANFALA man lukim raeting wea olketa putim bihaen wanfala trak, wea sei, “Olketa Mirakol Savve Happen—Askem Olketa Angel.” Nomata hem man for lotu, hem no really sure wanem nao diswan minim. Waswe, datfala raeting minim man wea ownim trak hem biliv long olketa mirakol? Or waswe, hem mekfani long wei for biliv olketa mirakol really happen and olketa angel really stap?

Maet iu interest long samting wea man for raet from Germany, Manfred Barthel hem talem: “Taem olketa man herem datfala word mirakol, olketa garem wanfala long tufala tingting—samfala barava bilivim and samfala nomoa nao.” Pipol wea biliv long mirakol barava sure olketa mirakol really happen and olketa happen staka taem.a Olsem example, no longtaem go nomoa pipol long Greece sei olketa mirakol happen wantaem evri month. Diswan mekem wanfala bishop bilong Greek Orthodox Church for givim disfala warning: “Man wea biliv long olketa mirakol tingse God, Mary, and olketa saint no spirit bat man. Pipol olsem shud no ova tumas.”

Long samfala nara kantri, no staka pipol bilivim olketa mirakol really happen. Wanfala research long Germany long 2002 hem showimaot hao 71 percent long pipol long there ting long mirakol olsem laea samting, no tru wan. Nomata olsem, thrifala woman long smol sekson wea biliv sei olketa kasem wanfala message from Virgin Mary. Tu-thri month bihaen thrifala hia sei Mary kam long olketa—witim olketa angel and wanfala kurukuru—Westfalenpost niuspepa long Germany sei olsem: “Kam kasem distaem, samting olsem 50,000 pipol wea laek kasem healing, and tu, pipol wea interest nomoa, olketa laek tumas for savve abaotem olketa vision wea olketa woman hia lukim.” Olketa sei maet narafala 10,000 pipol go long datfala vilij for lukim sapos Mary bae showaot moa. Pipol sei Virgin Mary showaot tu long Lourdes, France, long 1858 and long Fátima, Portugal, long 1917.

Waswe Long Olketa Religion wea No Christian?

Klosap evri religion biliv long olketa mirakol. The Encyclopedia of Religion sei olketa man wea startim Buddhist, Christian, and Muslim religion garem didifren idea abaotem olketa mirakol, bat then hem sei: “History bilong olketa religion hia showimaot klia hao olketa mirakol barava important part long religion bilong olketa man.” Datfala buk sei moa hao “samfala taem Buddha tu duim olketa mirakol.” Bihaen, taem “Buddhist religion hem kasem China, olketa missionary duim mirakol planti taem.”

Bihaen hem story abaotem kaen mirakol olsem, datfala encyclopedia sei: “Maet man no acceptim evri story hia abaotem mirakol wea olketa man wea strong for lotu olketa raetem, bat goal bilong olketa hem for mekhae long Buddha, wea savve givim paoa for duim mirakol long olketa follower bilong hem.” Datfala sem buk sei olsem abaotem Muslim religion: “Staka pipol bilong Muslim religion gohed for expectim olketa mirakol. Olketa teaching (hadīths) bilong olketa sei planti taem Muhammad hem duim mirakol wea pipol lukim. . . . Nomata bihaen olketa saint dae, pipol biliv hao olketa duim mirakol for olketa and olketa prea for help bilong olketa.”

Waswe Long Olketa Mirakol Bilong Olketa Christian Religion?

Staka wea insaed olketa Christian religion garem difren tingting abaotem diswan. Samfala biliv long olketa story insaed Bible abaotem olketa mirakol wea Jesus Christ duim, and wea olketa servant bilong God wea stap bifor taem bilong Christ olketa duim. Nomata olsem, staka pipol agree witim tingting bilong Martin Luther, man wea startim Protestant Reformation. The Encyclopedia of Religion sei olsem abaotem hem: “Luther and Calvin sei taem bilong olketa mirakol hem finis nao and pipol shud no expectim olketa mirakol for happen.” Sem buk talem wei wea Catholic Church gohed for biliv long olketa mirakol and “no laek for explainim hao nao olketa mirakol hia happen.” Bat, “olketa Protestant bilivim hao wei for olsem wanfala Christian hem saed long fasin nomoa, and God and olketa spirit no story witim olketa man, or duim eniting or affectim olketa long bigfala wei.”

Olketa narawan wea sei olketa Christian, and tu, samfala bigman bilong religion, garem daot abaotem wei wea olketa mirakol wea Bible storyim olketa tru. Wan example nao story insaed Bible abaotem smol tree wea bone long Exodus 3:1-5. Wanfala buk, What the Bible Really Says hem sei samfala man long Germany wea skulim Bible no ting long diswan olsem wanfala mirakol wea really happen. Bat, olketa sei mining bilong hem piksarem “wei wea Moses stragol witim conscience bilong hem.” Datfala buk sei moa: “Fire hia maet piksarem olketa flaoa wea open taem God story kam long hem.”

Maet iu no satisfae long diskaen wei for explainim datwan. Sapos olsem, wanem nomoa bae iu bilivim? Waswe, fitim for man bilivim hao olketa mirakol really happen? And waswe long olketa mirakol distaem? From hem hard for iumi askem olketa angel, hu nao iumi savve askem?

Tingting Bilong Bible

Evriwan savve hao Bible story abaotem hao bifor kam God duim samting for olketa man wea hard tumas for olketa seleva savve duim. Bible sei olsem abaotem hem: “Iu tekem pipol bilong Israel go aot from land bilong Egypt, long wei for iusim olketa saen and mirakol and strongfala hand and hand wea open and long bigfala wei for mekem man fraet.” (Jeremiah 32:21) Tingim datwan, barava strongfala nation wea stap long taem bilong Moses hem kasem shame taem God sendem tenfala trabol, wanfala nao evri fasbon long datfala nation olketa dae. Olketa trabol hia nao barava mirakol!—Exodus, chapter 7 go kasem 14.

Winim 1,500 year bihaen datwan, fofala man wea raetem Gospel story abaotem samting olsem 35 mirakol wea Jesus duim. Tru nao, olketa sei hem duim moa mirakol winim wanem olketa raetem. Waswe, olketa story hia tru or laea?b—Matthew 9:35; Luke 9:11.

Sapos hem tru hao Bible nao Word bilong God, then iu garem strongfala faondeson for biliv long olketa mirakol wea stap insaed Bible. Bible talem klia hao olketa mirakol really happen—olsem healing, man wea dae laef bak moa and olketa nara samting—long sem wei tu hem talem klia tumas hao olketa mirakol olsem no happen moa distaem. (Lukim box “Why Olketa Mirakol No Happen Distaem,” long page 4.) So waswe, diswan minim olketa wea acceptim Bible no biliv long olketa mirakol wea happen distaem? Next article nao bae ansarem datwan.

[Footnote]

[Box long page 4]

WHY OLKETA MIRAKOL NO HAPPEN DISTAEM

Bible hem story abaotem olketa didifren mirakol. (Exodus 7:19-21; 1 Kings 17:1-7; 18:22-38; 2 Kings 5:1-14; Matthew 8:24-27; Luke 17:11-19; John 2:1-11; 9:1-7) Planti long olketa mirakol hia showimaot klia hao Jesus nao Messiah, and pruvim tu hao God nao sapotim hem. Olketa follower bilong Jesus bifor duim olketa mirakol, olsem for tok long difren languis and explainim mining bilong olketa toktok wea kam from God. (Acts 2:5-12; 1 Corinthians 12:28-31) Olketa mirakol olsem barava helpem Christian kongregeson wea just start. Why nao olsem?

Wanfala reason nao hem bikos no staka copy bilong Bible stap long datfala taem. Staka taem, rich pipol nomoa garem olketa scroll or buk. Long olketa kantri wea no followim Christian religion, no eniwan savve long Bible or Man wea givim kam, Jehovah. Olketa mas talemaot olketa Christian teaching thru long wei for story nomoa. Olketa mirakol showimaot wei wea God iusim Christian kongregeson.

Bat Paul hem sei olketa mirakol hia bae finis. “Nomata olketa present bilong wei for talem profesi stap, bae olketa no stap moa; nomata wei for toktok long difren languis stap, bae diswan finis; nomata savve stap, bae hem no stap moa. Diswan hem bikos iumi garem lelebet savve and iumi talem profesi lelebet; bat taem datwan wea evribit hem kam, datwan wea lelebet bae no stap moa.”—1 Corinthians 13:8-10.

Distaem, pipol garem Bible and tu, olketa concordance and encyclopedia. Winim six million Christian wea kasem training gohed helpem nara pipol for kasem savve abaotem God from Bible. So, no eni need stap for olketa mirakol pruvim wei wea Jesus Christ nao Man wea sevem man or wei wea Jehovah sapotim olketa servant bilong hem.