STUDY ARTICLE 15
Wat Nao Iumi Savve Lanem From Olketa Mirakol blo Jesus?
“Hem go raon long evri ples for duim gud samting and for healim evriwan.”—ACTS 10:38.
SONG 13 Christ Showim Example for Iumi
ARTICLE BAE STORYIMa
1. Storyim samting wea happen lo taem wea Jesus duim first mirakol blo hem.
TINGIM samting wea happen taem Jesus startim Ministry blo hem lo end blo 29 C.E. Jesus and mami blo hem, Mary, witim samfala disaepol go lo wanfala wedding feast lo Cana wea stap lo north lo Nazareth, wea hem hom taon blo Jesus. Mary savve gud lo datfala famili, and luk olsem hem help for lukaftarem olketa guest wea kam. Bat taem wedding feast gohed, wanfala problem kamap wea bae mek shame lo datfala famili and young couple wea marit. Wine blo olketa hem finis.b Maet staka guest kam winim wat olketa expectim. Mary kwiktaem talem Jesus: “Olketa no garem eni wine nao.” (John 2:1-3) Wat nao Jesus duim? Hem duim wanfala spesol samting, hem changem wata for kamap “gudfala wine.”—John 2:9, 10.
2-3. (a) Olketa wanem mirakol nao Jesus duim? (b) Taem iumi ting raonem olketa mirakol blo Jesus, wanem gud samting nao bae iumi kasem?
2 Jesus duim staka mirakol moa taem hem duim ministry blo hem.c Hem duim olketa mirakol for helpem staka thousand pipol. For example, tingim tufala mirakol hia, wantaem hem feedim 5,000 man and narataem hem feedim 4,000 man. Luk olsem, lo tufala mirakol hia, hem feedim winim 27,000 pipol bikos olketa woman and pikinini tu stap lo datfala taem. (Matt. 14:15-21; 15:32-38) Lo tufala taem hia, Jesus healim tu olketa wea sik. (Matt. 14:14; 15:30, 31) Tingim go, olketa pipol hia mas barava sapraes lo hao Jesus healim and feedim olketa!
3 Iumi savve lanem staka samting from olketa mirakol wea Jesus duim. Lo disfala article, bae iumi storyim samfala mirakol wea teachim iumi olketa samting wea savve strongim faith blo iumi. Then bae iumi storyim hao iumi savve followim example blo Jesus for hambol and tingim narawan taem hem duim olketa mirakol.
WAT IUMI LANEM ABAOTEM JEHOVAH AND JESUS
4. Wat iumi lanem from olketa mirakol blo Jesus savve strongim faith blo iumi lo hu?
4 Wat iumi lanem from olketa mirakol blo Jesus savve strongim faith blo iumi lo hem and Dadi blo hem tu. Diswan bikos Jehovah nao givim paoa lo Jesus for duim mirakol. Acts 10:38 sei: “God hem markem Jesus, . . . for kamap datfala Christ. Hem iusim holy spirit and paoa for duim datwan. Jesus hem go raon long evri ples for duim gud samting and for healim evriwan wea Devil spoelem. Hem savve duim diswan bikos God nao helpem hem.” Olketa mirakol and evri samting wea Jesus talem and duim, hem showimaot tingting and feeling blo Dadi blo hem. (John 14:9) Tingim thrifala samting wea iumi savve lanem from olketa mirakol blo Jesus.
5. Wat nao muvim Jesus for duim olketa mirakol? (Matthew 20:30-34)
5 First samting, Jesus and Dadi blo hem barava lovem iumi. Taem Jesus lo earth hem showimaot hao hem barava lovem pipol taem hem duim mirakol for helpem olketa wea safa. Wantaem tufala blind man singaot go lo Jesus for helpem tufala. (Readim Matthew 20:30-34.) Tingim, hao feeling for “barava sorre” nao muvim Jesus and then hem healim tufala. Lo datfala verse, Greek verb wea olketa transleitim olsem “barava sorre” savve minim strongfala feeling for tingim narawan wea kam from heart. Jesus lovem pipol dastawe hem garem datfala feeling for sorre, and datwan muvim hem for feedim olketa wea hangere and healim man wea garem leprosy. (Matt. 15:32; Mark 1:41) Iumi sure Jehovah, God wea “kaen tumas,” and Son blo hem wea barava lovem iumi, tufala sorre tumas taem tufala lukim iumi safa. (Luke 1:78; 1 Pet. 5:7) Tufala mas barava laek for finisim evri problem wea gohed for affectim iumi!
6. Wanem paoa nao God givim lo Jesus?
6 Second samting, God givim paoa lo Jesus for finisim evri problem wea kasem iumi. Olketa mirakol wea Jesus duim showimaot hem fit finisim olketa problem wea iumiseleva hard for finisim. For example, hem garem paoa for mekem iumi free from sin wea hem nao main samting wea kosim sik and dae. (Matt. 9:1-6; Rome 5:12, 18, 19) Olketa mirakol wea hem duim pruvim hem savve “healim enikaen sik” and resurrectim olketa wea dae tu. (Matt. 4:23; John 11:43, 44) And tu, hem garem paoa for kontrolem big wind and mekem pipol kamap free from olketa wicked spirit. (Mark 4:37-39; Luke 8:2) Hem barava comfortim iumi for savve Jehovah givim bigfala paoa olsem lo Son blo hem!
7-8. (a) Olketa mirakol wea Jesus duim mekem iumi sure lo wanem? (b) Wanem mirakol nao iu barava luk forward for hem lo niu world?
7 Third samting, iumi savve sure olketa promis blo God bae kamap tru anda lo Kingdom. Olketa mirakol wea Jesus duim showimaot wanem hem bae duim lo future evriwea lo earth taem hem King lo Kingdom blo God lo heven. Tingim olketa samting wea iumi klosap for kasem anda lo rul hem. Bae iumi garem perfect health, bikos hem bae finisim evri sik and olketa nogud samting wea spoelem iumi. (Isa. 33:24; 35:5, 6; Rev. 21:3, 4) Bae iumi no hangere or safa from olketa natural disaster. (Isa. 25:6; Mark 4:41) Bae iumi hapi tumas for welkamim bak olketa wea iumi lovem wea insaed lo “grev.” (John 5:28, 29) Wanem mirakol nao iu barava luk forward for hem lo niu world?
8 Taem Jesus duim olketa mirakol, hem hambol and tingim pipol. Iumi tu laek waka hard for garem tufala wei hia. Bae iumi storyim tufala example. Bat firstaem, bae iumi storyim mirakol wea Jesus duim lo wedding feast lo Cana.
LANE FROM WEI BLO JESUS FOR HAMBOL
9. Wat nao Jesus duim lo datfala wedding feast? (John 2:6-10)
9 Readim John 2:6-10. Taem wine hem ran aot lo datfala wedding feast, waswe, eni samting showimaot Jesus mas duim samting? Nomoa. No eni profesi sei Jesus bae duim mirakol for changem wata for kamap wine. Bat tingim, if iu nao datfala young couple, hao nao bae iu feel? Masbi Jesus tingim feeling blo datfala famili, especially tufala hia wea marit, and hem no laekem olketa for shame. So, olsem iumi storyim finis, hem duim wanfala mirakol. Hem changem 390 liter (103 gallon) blo wata for kamap gudfala wine. Maet Jesus provaedem staka wine olsem mekem samfala wea left ova olketa savve iusim bihaen or olketa savve salem tu for helpem datfala young couple. Datfala niu couple mas barava hapi tumas!
Followim example blo Jesus for no tok praod abaotem samting wea iu duim (Lukim paragraf 10-11)e
10. Wat nao samfala interesting samting wea iumi savve lanem from John chapter 2? (Lukim tu piksa.)
10 Tingim samfala interesting samting wea iumi savve lanem from John chapter 2. Tingim, hu nao fulimap wata lo olketa botol hia, waswe, hem Jesus? Nomoa. Hem no laekem pipol for mekhae lo hem, so hem talem olketa servant nao for duim. (Verse 6, 7) And bihaen Jesus changem wata for kamap wine, ino hemseleva nao tekem go wine and givim lo bigman wea lukaftarem datfala feast. Bat hem talem olketa servant for duim datwan. (Verse 8) And Jesus no tekem wanfala kap wine then holem ap front lo evriwan, and sei, ‘Teistim wine hia, mi nao mi mekem!’
11. Wat nao iumi savve lanem from mirakol blo Jesus?
11 Wat nao iumi lanem from mirakol wea Jesus duim for changem wata for kamap wine? Iumi lanem wei for hambol. Jesus no tok praod abaotem datfala mirakol, and no enitaem Jesus tok praod abaotem eni samting hem duim. Bat hem evritaem hambol and mekhae lo Dadi blo hem. (John 5:19, 30; 8:28) If iumi hambol olsem Jesus, bae iumi no tinghae lo iumiseleva and tok praod abaotem eni samting iumi duim. Nomata wat nao iumi duim lo service blo Jehovah, iumi no laek tok praod abaotem iumiseleva, bat evritaem iumi laek mekhae lo nambawan God blo iumi. (Jer. 9:23, 24) Iumi laek for mekhae lo Jehovah bikos hem nao fit for kasem praise. Datwan hem barava tru, bikos if Jehovah no helpem iumi hard for iumi duim eni gud samting!—1 Cor. 1:26-31.
12. Wat nao nara wei wea iumi savve followim wei blo Jesus for hambol? Storyim example.
12 Tingim narafala wei wea iumi savve followim wei blo Jesus for hambol. Tingim disfala example: Wanfala elder spendem taem for helpem wanfala young ministerial servant for preparem first pablik tok blo hem. From elder hia helpem hem, young brata givim naes tok wea kongregeson barava enjoyim. Bihaen meeting, samwan kam lo datfala elder and sei: ‘Datfala brata givim naes tok, iaman?’ Waswe, datfala elder bae sei: ‘Ia, mi nao spendem staka taem for helpem hem’? Or maet hem hambol and sei: ‘Ia hem givim naes tok. Mi hapi tumas lo hem’? Taem iumi hambol bae iumi no mekhae lo gud samting wea iumi duim for olketa narawan. Iumi hapi nomoa bikos Jehovah nao lukim and tinghae lo wat iumi duim. (Comparem Matthew 6:2-4; Heb. 13:16) Tru nao, iumi mekem Jehovah hapi taem iumi followim example blo Jesus for hambol.—1 Pet. 5:6.
LANE FROM WEI BLO JESUS FOR TINGIM NARAWAN
13. Wat nao Jesus lukim taem hem klosap kasem Nain, and wat nao hem duim? (Luke 7:11-15)
13 Readim Luke 7:11-15. Tingim samting wea happen samting olsem wan and haf year bihaen Jesus startim ministry blo hem. Jesus travel go lo Nain, wanfala taon lo Galilee wea klosap lo Shunem, ples wea profet Elisha resurrectim son blo wanfala woman samting olsem 900 year bifor. (2 Ki. 4:32-37) Taem Jesus klosap kasem gate blo datfala taon hem lukim pipol karem kamaot wanfala dead body. Hem only pikinini blo wanfala widow woman. Datwan hem barava sorre samting. Datfala woman no wakabaot seleva, bat staka from datfala taon nao kam witim hem. Jesus stopem olketa and duim samting wea mekem evriwan barava sapraes. Hem resurrectim son blo datfala woman! Diswan hem first resurrection wea Jesus duim wea olketa Gospel storyim.
Followim example blo Jesus for showimaot iu tingim olketa wea sorre from olketa lusim loved wan (Lukim paragraf 14-16)
14. Wat nao samfala interesting samting wea iumi savve lanem from Luke chapter 7? (Lukim tu piksa.)
14 Tingim samfala interesting samting wea iumi savve lanem from Luke chapter 7. Tingim, hao bihaen Jesus “lukim” woman hia nao feeling for “barava sorre” muvim hem for duim samting. (Verse 13) Maet Jesus lukim woman hia krae taem hem wakabaot go first lo datfala dead body, and datwan mekem Jesus sorre tumas lo hem. Jesus no just feel sorre lo hem nomoa, bat hem showimaot hem tingim hem. Taem hem story lo hem, masbi hem story kaen and sei: “Iu no krae.” Then hem duim samting for helpem hem. Hem resurrectim datfala boy and “givim hem long mami bilong hem.”—Verse 14, 15.
15. Wat nao iumi savve lanem from mirakol wea Jesus duim?
15 Wat nao iumi lanem from mirakol wea Jesus duim for resurrectim son blo datfala widow woman? Iumi lanem hao iumi need for showimaot iumi tingim olketa wea sorre. Hem tru, iumi hard for olsem Jesus wea resurrectim samwan. Bat olsem Jesus, if iumi garem wei for luksavve bae iumi savve showimaot iumi tingim olketa wea sorre, taem iumi duim samting for helpem and comfortim olketa.d (Prov. 17:17; 2 Cor. 1:3, 4; 1 Pet. 3:8) Nomata iumi talem tu-thri toktok nomoa and duim smol samting, datwan savve barava comfortim olketa.
16. Olsem iumi lukim lo piksa, wat nao iumi lanem from experience blo mami wea smol gele blo hem dae?
16 Tingim disfala experience. Wantaem lo wanfala kongregeson meeting, wanfala sista lukim wanfala mami wea sidaon lo nara row hem krae taem olketa singsing. Datfala song hem abaotem resurrection hope, and no longtaem go nomoa smol gele blo datfala mami hem dae. From sista hia savve lo datwan, hem go and putim arm blo hem raonem datfala mami, and singsing witim hem. Bihaen, datfala mami sei: “Datwan mekem mi lovem tumas olketa brata and sista.” Hem hapi tumas bikos hem go lo datfala meeting. Hem sei: “Lo Kingdom Hall nao iumi savve kasem help.” Iumi sure Jehovah lukim and tinghae lo olketa smol samting wea iumi duim for showimaot iumi tingim olketa wea sorre tumas.—Ps. 34:18.
STUDY PROJECT WEA SAVVE ENCOURAGEM IU
17. Wat nao iumi lanem lo disfala article?
17 Taem iumi duim study project abaotem olketa mirakol blo Jesus wea olketa Gospel storyim, datwan savve barava encouragem iumi. Olketa mirakol hia teachim iumi hao Jehovah and Jesus barava lovem iumi, Jesus garem paoa for finisim evri problem, and iumi sure klosap nao bae iumi kasem olketa blessing wea God promisim anda lo Kingdom. Taem iumi ting raonem olketa mirakol blo Jesus, bae iumi lanem samfala wei blo Jesus wea iumi savve followim. Hao if iu markem taem for studyim olketa nara mirakol blo Jesus lo study project blo iuseleva or lo Famili Worship? Lukim wat iu savve lanem, then storyim lo narawan. Taem olsem, bae iu garem staka naes story for encouragem narawan!—Rome 1:11, 12.
18. Wat nao bae iumi storyim lo next article?
18 Klosap lo end lo ministry blo Jesus, hem duim mek-thri resurrection blo hem. Bat disfala resurrection hem difren bikos hem resurrectim klos fren blo hem, and situation lo datfala taem hem difren tu. Wat nao iumi savve lanem from datfala story lo Gospel abaotem datfala mirakol? And hao nao iumi savve strongim faith blo iumi lo resurrection hope? Bae iumi kasem ansa for olketa kwestin hia lo next article.
SONG 20 Iu Givim Spesol Son Bilong Iu
a Hem barava interesting for read abaotem olketa mirakol wea Jesus duim! For example, hem mekem big wind for stop, healim sik pipol, and resurrectim olketa wea dae. Olketa story hia stap lo Bible no for iumi enjoyim nomoa, bat for teachim iumi. Iumi bae storyim samfala lo olketa mirakol hia mekem iumi savve lanem olketa samting wea bae strongim faith blo iumi lo Jehovah and Jesus. And tu, bae iumi lanem olketa wei wea iumi shud waka hard for garem.
b Wanfala Bible scholar sei: “Pipol lo datfala taem barava tinghae tumas lo wei for welkamim narawan. So man wea invaetem olketa guest mas provaedem samting winim wat olketa needim. So for showimaot welkam, especially lo wedding feast, man mas provaedem kaikai and drink winim wat olketa needim.”
c Olketa Gospel storyim winim 30 difren mirakol wea Jesus duim. And Jesus duim staka nara mirakol tu wea Bible no storyim separate lo olketa. Example, wantaem ‘evriwan lo wanfala taon’ kam lo hem and “hem healim olketa wea sik.”—Mark 1:32-34.
d For samfala idea lo wanem for talem or duim for comfortim olketa wea sorre, lukim article “Comfort the Bereaved, as Jesus Did” lo The Watchtower blo November 1, 2010.
e PIKSA: Jesus standap lo baekgraon, tufala wea marit and olketa guest blo tufala enjoyim datfala gud wine wea hem provaedem.