Wisefala Direction for Olketa wea Marit
“Olketa waef mas stap anda long hasband, for saed bilong Lord. Olketa hasband, gohed for lovem waef bilong iufala.”—Ephesians 5:22, 25.
1. Wanem nao stretfala wei for ting long marit?
JESUS sei marit hem joinim tugeta man and woman for kamap “wan body.” (Matthew 19:5, 6) Marit hem minim tufala wea garem difren tingting and fasin mas lane for mekem grow samting wea tufala evriwan interest long hem, and waka tugeta for kasem olketa sem goal. Marit hem wanfala arrangement wea tufala promis for stap tugeta for full laef, no for lelebet taem nomoa. Long staka kantri, hem no hard saed long law for divorce, bat wanfala Christian shud ting long marit olsem holy samting. Bigfala rong nomoa savve finisim marit.—Matthew 19:9.
2. (a) Wanem help nao olketa hasband and waef savve kasem? (b) Why nao hem important for waka hard for mekem marit hem win?
2 Wanfala woman for givim advaes saed long marit sei olsem: “Marit wea win hem marit wea tufala change for fitim olketa problem and niu samting wea savve kamap, and mekius long help wea stap for deal witim evri samting long laef.” Help wea olketa Christian hasband or waef savve mekius long hem nao wisefala kaonsel from Bible, sapot bilong olketa nara Christian, and wei for fren klos witim Jehovah thru long prea. Marit wea win hem gohed strong nomata hard taem kamap, and gogo, diswan hem givim hapi and wei for satisfae long hasband and waef. Bat samting wea moa important, hem mekem Jehovah God, Man wea startim marit, for kasem honor.—Genesis 2:18, 21-24; 1 Corinthians 10:31; Ephesians 3:15; 1 Thessalonians 5:17.
Followim Example Bilong Jesus and Kongregeson
3. (a) Wanem nao main point bilong kaonsel wea Paul givim long olketa wea marit? (b) Wanem nambawan example nao Jesus showimaot?
3 Tu thousand year go finis, aposol Paul talem wisefala kaonsel long olketa Christian hasband and waef taem hem raet olsem: “Olsem kongregeson hem stap anda long Christ, olketa waef tu mas stap anda long hasband long evri samting. Olketa hasband, gohed for lovem waef bilong iufala, olsem Christ tu hem lovem kongregeson and givim laef bilong hem for datwan.” (Ephesians 5:24, 25) Taem olketa Christian waef stap anda long hasband bilong olketa, olketa followim example bilong kongregeson saed long wei for luksavve and followim principle bilong hedship. Olketa Christian hasband wea gohed for lovem waef bilong olketa, long gud taem and nogud taem, showimaot olketa barava followim example bilong Christ wea lovem and lukaftarem kongregeson.
4. Hao nao olketa hasband savve followim example bilong Jesus?
4 Olketa Christian hasband nao hed long famili bilong olketa, bat olketa tu garem wanfala hed, hem nao Jesus. (1 Corinthians 11:3) Dastawe, long sem wei wea Jesus lukaftarem kongregeson, olketa hasband lukaftarem famili long spiritual and physical saed long loving wei, nomata hemseleva mas sakrifaesim samfala samting for duim datwan. Olketa no tingim samting wea olketa seleva laekem, bat olketa tingim gud samting for famili fastaem. Jesus sei: “Evri samting wea iufala wantem olketa man for duim long iufala, iufala tu mas duim olsem long olketa.” (Matthew 7:12) Datfala principle hem barava fitim marit. Paul showimaot diswan taem hem sei: “Olketa hasband mas lovem waef bilong olketa olsem olketa seleva. . . . No eni man heitim body bilong hemseleva; bat hem feedim and lukaftarem.” (Ephesians 5:28, 29) Hasband shud feedim and lukaftarem waef bilong hem long sem wei wea hem feedim and lukaftarem hemseleva.
5. Hao nao olketa waef savve followim example bilong Christian kongregeson?
5 Christian kongregeson hem olsem wanfala example for olketa waef wea worshipim God. Taem Jesus stap long earth, olketa follower bilong hem hapi for lusim samting wea olketa duim and followim hem. Bihaen hem dae, olketa gohed for stap anda long hem, and insaed long klosap 2,000 year wea go pas, trufala Christian kongregeson stap anda long Jesus and followim evribit wei wea hem lead long evri samting. Olketa Christian waef tu no lukdaonem hasband and no ting smol long hedship arrangement wea Bible story abaotem saed long marit. Bat, olketa sapotim and stap anda long hasband bilong olketa, waka tugeta witim olketa, and from datwan encouragem olketa tu. Taem hasband and waef followim loving wei olsem, marit bilong olketa bae win and tufala evriwan bae kasem hapi from marit bilong tufala.
Gohed for Stap Witim Olketa
6. Wanem kaonsel nao Peter talem long olketa hasband, and why nao diswan hem important?
6 Aposol Peter tu garem kaonsel for olketa hasband and waef, and hem tok stret long olketa hasband. Hem sei: “Iufala hasband, gohed for stap long sem wei witim [waef bilong iufala] fitim savve. Givim honor long olketa from olketa no strong olsem man, from olketa tu bae kasem laef wea man no fit for kasem olsem iufala, mekem diswan no stopem prea bilong iufala.” (1 Peter 3:7) Wei wea kaonsel bilong Peter hem important tumas hem showaot long last toktok bilong datfala verse. Sapos hasband hem fail for givim honor long waef bilong hem, diswan bae affectim wei wea hem fren witim Jehovah. Diswan savve stopem olketa prea bilong hem.
7. Long wanem wei nao hasband shud honorim waef bilong hem?
7 So, hao nao olketa hasband savve honorim waef bilong olketa? For honorim waef hem minim for lovem and respectim waef. Long taem bilong Peter, hem no normal samting for man deal witim waef long kaenfala wei. Wanfala Greek savveman sei: “Anda long Law bilong Rome, woman hem no garem eni right. Law markem hem olsem pikinini nomoa. . . . Hasband bilong hem nao bossim and kontrolem hem evribit.” Datwan hem difren tumas from olketa teaching bilong Christ! Christian hasband hem honorim waef bilong hem. Wei wea hem deal witim waef hem followim olketa Christian principle, no followim tingting bilong hemseleva nomoa. And tu, hem deal witim waef “fitim savve,” wea minim hem luksavve waef no strong olsem man.
“No Strong Olsem Man” Long Wanem Wei?
8, 9. Long olketa wanem wei nao olketa woman semsem olsem olketa man?
8 Taem Peter sei woman “no strong olsem man,” datwan no minim man hem strong winim woman saed long savve or spiritual saed. Hem tru, staka Christian man garem spesol waka wea woman no garem insaed long kongregeson, and insaed famili olketa woman mas stap anda long hasband bilong olketa. (1 Corinthians 14:35; 1 Timothy 2:12) Nomata olsem, olketa man and woman mas garem sem faith, wei for stand strong, and hae standard saed long fasin. And olsem Peter hem talem, tufala evriwan “bae kasem laef wea man no fit for kasem.” Front long Jehovah God, tufala semsem saed long salvation. (Galatians 3:28) Long datfala taem Peter hem raet for olketa anointed Christian. Dastawe toktok bilong hem mekem olketa Christian hasband tingim hao olketa and waef bilong olketa tu garem “right wea semsem witim Christ,” olketa evriwan garem sem hope for go long heven. (Romans 8:17) Tufala evriwan bae waka olsem priest and king insaed Kingdom bilong God long heven!—Revelation 5:10.
9 Olketa anointed Christian hasband no winim anointed Christian waef bilong olketa. Datwan hem semsem tu for olketa wea garem hope for stap long earth. Olketa man and woman tu, insaed datfala “big crowd” wea wasim kaleko bilong olketa and mekem kamap white long blood bilong Lamb. Olketa man and woman tu, tekpart insaed waka wea kamap evriwea long world for givim praise long Jehovah “day and naet.” (Revelation 7:9, 10, 14, 15) And olketa man and woman tu, luk forward for kasem “nambawan freedom olsem olketa pikinini bilong God,” taem olketa hapi long “datfala really laef.” (Romans 8:21; 1 Timothy 6:19) Nomata wanfala Christian hem anointed or bilong nara sheep, evriwan servem Jehovah tugeta olsem “wan sekson bilong sheep” anda long “wanfala shepherd nomoa.” (John 10:16) Datwan hem strongfala reason for wanfala Christian hasband and waef for showimaot honor long each other!
10. Long wanem wei nao woman “hem no strong olsem man”?
10 So, long wanem wei nao olketa woman “no strong olsem man”? Maet Peter hem story abaotem wei wea plande taem man nao big and moa strong winim woman long physical wei. And tu, from body no perfect, wei wea woman savve bornem pikinini savve affectim health bilong hem. Sik bilong woman tu savve barava affectim olketa. Tru nao, olketa barava needim hasband for showimaot kaenfala fasin long olketa, taem olketa kasem sik bilong woman, or taem olketa babule and bornem pikinini, wea hem samting wea savve mekem olketa barava taed. Hasband wea showimaot honor long waef bilong hem, wea luksavve long sapot wea hem needim saed long feeling, bae help long bigfala wei for mekem marit win.
Famili wea Divaed Saed Long Religion
11. Long wanem wei nao marit savve win nomata sapos hasband or waef garem difren religion?
11 Bat, waswe sapos marit partner hem garem difren religion from wanfala acceptim truth bilong Bible bihaen tufala marit, bat narawan nomoa? Waswe, marit olsem savve win? Staka olsem garem marit wea win. Iumi fit for sei marit bilong hasband and waef wea garem difren religion hem win from tufala stap tugeta longtaem and tufala hapi. And tu, long eye bilong Jehovah marit bilong tufala hem stret; tufala “wan body” front long hem. Dastawe, olketa Christian wea marit kasem kaonsel for stap witim partner bilong olketa wea garem difren religion sapos hem agree for tufala stap tugeta. Sapos tufala garem olketa pikinini, olketa hia kasem gud samting from faithful fasin bilong datwan wea Christian.—1 Corinthians 7:12-14.
12, 13. Sapos olketa Christian waef followim kaonsel bilong Peter, hao nao olketa savve helpem hasband bilong olketa wea garem difren religion?
12 Peter talem kaenfala kaonsel long olketa Christian woman wea insaed famili wea divaed saed long religion. Toktok bilong hem fitim tu olketa Christian hasband wea garem waef wea garem difren religion. Peter raet olsem: “Iufala waef, stap anda long hasband bilong iufala, mekem sapos eniwan no obeyim word, iufala maet savve pullim kam olketa, no long toktok, bat thru long fasin bilong iufala, from olketa lukim klinfala fasin bilong iufala witim wei for showimaot bigfala respect.”—1 Peter 3:1, 2.
13 Sapos waef savve explainim biliv bilong hem long hasband long gudfala wei, datwan hem gud. Bat, waswe sapos hem no laek for lisin? Datwan hem saed bilong hem. Nomata olsem, hope hem stap, bikos Christian fasin savve givim strongfala witness tu. Staka hasband wea no interest or maet againstim biliv bilong waef bilong olketa fastaem, gogo “garem fasin fitim laef olowe,” bihaen olketa lukim gudfala fasin wea waef bilong olketa showimaot. (Acts 13:48) Nomata sapos hasband no acceptim truth bilong Bible, maet hem hapi long fasin bilong waef wea bae strongim marit bilong tufala. Wanfala hasband wea waef bilong hem wanfala Jehovah’s Witness talem stret hao hem bae hard tumas for kasem olketa hae standard bilong Olketa Jehovah’s Witness. Nomata olsem, hem sei hem hapi tumas for garem naesfala waef and hem praisem waef and olketa nara Witness insaed wanfala leta wea hem sendem go long niuspepa.
14. Hao nao olketa hasband savve helpem waef wea garem difren religion?
14 Samfala Christian hasband tu mekem waef interest from fasin bilong olketa followim olketa principle bilong samting wea Peter talem. Olketa waef wea garem difren religion lukim hasband start for tingim famili bilong hem, no westem selen for peim smoke, drink, and plei kura, and tu hem no garem raf fasin. Samfala long olketa meetim tu olketa nara member bilong Christian kongregeson. Olketa tinghae tumas long wei wea evri Christian brata showimaot love, and samting wea olketa lukim midolwan olketa brata mekem olketa laek savve moa abaotem Jehovah.—John 13:34, 35.
“Really Fasin Insaed Heart”
15, 16. Wanem fasin wea Christian waef garem nao maet pullim kam hasband wea garem difren religion?
15 Wanem kaen fasin nao savve pullim kam hasband? Hem fasin wea evri Christian woman mekem grow. Peter hem sei: “No letem wei wea iufala luk naes kamaot from wei for staelem hair and for werem olketa gold samting or wei for werem stael kaleko, bat wei wea iufala luk naes mas showaot long really fasin insaed heart, datfala kaleko wea no savve rotten bilong kwaet and hambol fasin, wea God hem barava tinghae long hem. Bikos long sem wei tu, olketa holy woman bifor wea hope long God, mekem olketa seleva luk naes olsem, and stap anda long hasband bilong olketa, olsem wei wea Sarah savve obeyim Abraham, and kolem hem ‘lord.’ And iufala kamap olketa pikinini bilong hem sapos iufala gohed for duim gudfala samting and no fraet long eni samting.”—1 Peter 3:3-6.
16 Peter givim advaes long woman for no tingim tumas lukluk bilong hem. Winim datwan, hem shud showim long hasband bilong hem hao olketa teaching insaed Bible changem fasin bilong hem, and hao distaem hem garem disfala niu fasin. Maet hasband markem datwan witim fasin wea waef bilong hem garem bifor. (Ephesians 4:22-24) “Kwaet and hambol fasin” wea waef showimaot bae strongim and luk naes tumas long hasband bilong hem. Fasin olsem mekem hasband hapi, and tu, ‘God hem barava tinghae long datwan.’—Colossians 3:12.
17. Long wanem wei nao Sarah hem nambawan example for olketa Christian waef?
17 Bible showimaot wei wea Sarah hem gudfala example for olketa Christian waef nomata hasband bilong olketa garem difren religion or nomoa. Sarah barava ting long Abraham olsem hed bilong hem. Nomata insaed heart bilong hem, hem kolem Abraham “lord” bilong hem. (Genesis 18:12) Bat, wei wea Sarah ting olsem no daonem hem. Tru nao, Sarah hem strong long spiritual wei, bikos hem garem strongfala faith long Jehovah. Tru tumas, hem insaed long “bigfala sekson bilong olketa witness” wea example bilong olketa saed long faith shud muvim iumi for “gohed strong long datfala resis wea stap front long iumi.” (Hebrews 11:11; 12:1) Wei for wanfala Christian waef kamap olsem Sarah hem no samting wea daonem hem.
18. Wanem nao olketa principle wea famili wea divaed saed long religion mas tingim?
18 Insaed famili wea divaed saed long religion, hasband hem still hed bilong famili. Sapos hasband nao biliv, hem bae tingim olketa biliv bilong waef bilong hem, bat long semtaem, no brekem faith bilong hemseleva. Sapos waef nao biliv, hem tu bae no brekem faith bilong hem. (Acts 5:29) Nomata olsem, bae hem no go againstim hedship bilong hasband bilong hem. Hem bae showimaot respect for position bilong hasband and stap anda long “law bilong hasband bilong hem.”—Romans 7:2.
Wise Kaonsel Bilong Bible
19. Wanem nao samfala hevi wea mekem problem kamap insaed marit, bat hao nao iumi savve againstim olketa hevi olsem?
19 Distaem, staka samting savve mekem hevi kamap insaed marit. Samfala man no laek for fulfillim olketa responsibility bilong olketa olsem hasband and dadi. Samfala woman no laek for stap anda long hedship bilong hasband bilong olketa. Insaed samfala marit, wanfala partner hem spoelem narawan saed long toktok or hem killim hem. For olketa Christian, hevi saed long selen, wei wea man no perfect, tingting bilong world wea followim dirty fasin and olketa standard bilong hem wea olobaot savve testim loyal fasin bilong olketa. Bat gud samting nao, nomata wanem kaen living olketa garem, olketa Christian man and woman wea followim olketa Bible principle kasem blessing bilong Jehovah. Nomata sapos wanfala partner nomoa followim olketa Bible principle, datwan hem moabeta winim wei for no eniwan long tufala followim Bible principle. Nara samting moa, Jehovah lovem and sapotim olketa servant bilong hem wea keepim marit promis bilong olketa nomata hard samting kamap. Hem no forgetim loyal fasin bilong olketa.—Psalm 18:25; Hebrews 6:10; 1 Peter 3:12.
20. Wanem kaonsel nao Paul givim for evri Christian?
20 Bihaen hem givim kaonsel long olketa marit man and woman, aposol Paul talem toktok for encouragem olketa. Hem sei: “Lastfala samting, iufala evriwan mas garem wankaen tingting, showim feeling long narawan, lovem each other olsem brata, garem fasin for kea, hambol long mind, no peim bak nogud samting for nogud samting or nogud toktok for nogud toktok, bat, givim blessing, from God kolem iufala for disfala samting, mekem iufala maet kasem wanfala blessing.” (1 Peter 3:8, 9) Datwan barava wise kaonsel for evriwan, especially olketa wea marit!
Waswe, Iu Remember?
• Hao nao olketa Christian hasband followim example bilong Jesus?
• Hao nao olketa Christian waef followim example bilong kongregeson?
• Long wanem wei nao olketa hasband savve showimaot honor long waef bilong olketa?
• Wanem nao best samting wea Christian waef wea hasband garem difren religion savve duim?
[Piksa long page 16]
Christian hasband hem lovem and lukaftarem waef bilong hem
Christian waef hem showimaot honor and respect long hasband bilong hem
[Piksa long page 17]
Teaching bilong Christ sei hasband mas showimaot honor long waef, wea difren tumas from law bilong Rome
[Piksa long page 18]
Olketa man and woman tu bilong “big crowd” luk forward for laef olowe long Paradaes
[Piksa long page 20]
Sarah ting long Abraham olsem lord bilong hem