Olketa Waef—Garem Bigfala Respect for Olketa Hasband
‘Iufala waef mas stap anda long olketa hasband bilong iufala.’—EPHESIANS 5:22.
1. Why nao plande taem hem no isi for waef respectim hasband?
LONG plande kantri, taem man and woman marit, woman talem promis for garem bigfala respect for hasband. Bat wei wea plande hasband deal witim olketa waef savve mekem hem hard or isi for olketa waef fulfillim datfala promis. Nomata olsem, long firstaem God startim marit long gudfala wei. Hem tekem wanfala bon from Adam, datfala first man, and iusim datwan for wakem wanfala woman. Adam hem sei: “Diswan hem bon from olketa bon bilong mi and body from body bilong mi.”—Genesis 2:19-23.
2. Hao nao waka bilong olketa woman insaed marit and tingting bilong olketa abaotem marit hem change long olketa year wea go pas?
2 Nomata God startim marit long gudfala wei, long United States, start long olketa firstfala year bilong 1960, olketa woman laek kamap free from wei wea olketa hasband kontrolem olketa. Long datfala taem tu-thri waef nomoa lusim famili for maritim nara man, bat barava staka hasband lusim olketa waef. Bat klosap long end bilong olketa year bilong 1960, staka waef tu lusim famili bilong olketa. Distaem olketa woman tok swear, drunk, smoke, and duim olobaot fasin olsem olketa man tu. Waswe, datwan mekem olketa woman barava hapi? Nomoa. Long samfala kantri klosap haf long pipol wea marit olketa divorce. Waswe, samting wea samfala woman duim for mekem marit bilong olketa kamap gud hem win, or hem just mekem hem worse?—2 Timothy 3:1-5.
3. Wanem nao main problem wea spoelem marit?
3 Wanem nao main problem? Really, hem sem problem wea start kam long taem wea datfala bighed angel, wea hem nao “datfala snek bilong bifor kam wea olketa kolem Devil and Satan,” hem switim Eve. (Revelation 12:9; 1 Timothy 2:13, 14) Satan mekem pipol garem difren tingting abaotem teaching bilong God. Olsem example, saed long marit, Devil mekem hem luk olsem woman no garem freedom and hem hard tumas for hem. Hem nao bihaenem rong information wea pipol kasem thru long video, television, radio, magasin, and niuspepa bilong disfala world wea hem nao rulim. Evri information hia hem mekem olketa instruction bilong God for luk olsem hem saedem olketa man and no olketa woman, and for luk olsem hem no fitim distaem. (2 Corinthians 4:3, 4) Bat sapos iumi lukluk gud long wanem God talem abaotem waka bilong woman insaed marit, iumi bae lukim hao Word bilong God hem wise and hem barava helpem iumi.
Warning for Olketa wea Marit
4, 5. (a) Why nao gele shud tingting gud firstaem bifor hem marit? (b) Wanem nao gele shud duim bifor hem agree for maritim wanfala boy?
4 Bible talem wanfala warning. Hem talem hao long disfala world wea Devil rulim, nomata hasband and waef wea stap gud tugeta, bae olketa tu kasem “trabol.” So nomata God nao startim wei for marit, Bible warnim olketa wea disaed for marit. Wanfala man wea raetem Bible hem sei olsem abaotem widow woman wea laek for marit moa: “Hem bae moa hapi sapos hem stap olsem wanfala widow woman.” Jesus tu encouragem wei for singol for olketa wea “savve duim datwan.” Bat sapos eniwan laek for marit, hem shud maritim man wea “followim Lord,” wea minim samwan wea dedicate, baptaes, and worshipim God.—1 Corinthians 7:28, 36-40; Matthew 19:10-12.
5 Reason why gele nao main wan wea shud ting strong abaotem hu nao hem bae maritim hem disfala warning from Bible: “Woman wea marit hem stap anda long law bilong hasband bilong hem.” Only samting wea bae mekem waef “free from law bilong hem” nao, hem sapos hasband hem dae or duim dirty fasin and tufala divorce bikos long datwan. (Romans 7:2, 3) Feeling for laekem narawan wea boy and gele garem long firstaem wea tufala frenim each other, bae no inaf for mekem marit gohed for hapi. So wanfala singol woman or gele need for askem hemseleva, ‘Waswe, mi willing for stap anda long law bilong disfala man wea mi laek for maritim?’ Hem shud ting raonem disfala kwestin bifor hem marit, no bihaen hem marit.
6. Wanem nao plande gele distaem savve disaed for duim, and why nao datwan hem important tumas?
6 Long plande kantri distaem, gele savve chus for sei hem olraet or nomoa long boy wea askem hem for marit. Bat for disaed long gudfala wei nao hem hard samting for wanfala gele duim, bikos wei wea hem needim love and kea from wanfala hasband hem savve barava strong. Wanfala man wea raet insaed niuspepa hem sei: “Taem iumi barava laekem tumas for duim samting, nomata hem for marit or duim nara hard samting, plande taem iumi bae talem iumiseleva hao evri samting bae gud nomoa, no eni problem, and bae iumi interest nomoa long information wea talem samting wea iumi laek for herem.” Sapos man wea draevem kanu chusim rongfala taem for go long open sea, maet raf sea kapsaetem kanu and hem dae. Olsem tu, for mekem disison wea no wise abaotem hu for maritim savve barava spoelem man.
7. Wanem wise advaes nao samwan givim abaotem wei for lukaotem marit partner?
7 Gele shud barava ting raonem gud wanem nao insaed long wei for stap anda long law bilong man wea ask for maritim hem. Plande year go finis, wanfala gele from India hambol for sei: “Parents bilong iumi olketa olo and barava wise, and maet eni samting hem isi for trikim iumi bat datwan bae no trikim olketa. . . . Hem isi tumas for mi chusim rong man.” Help from parents and olketa narawan hem important. Insaed staka year finis, wanfala man for givim advaes wea wise hem encouragem young pipol for savve gud long parents bilong datwan wea olketa ting for maritim, and tu, for lukluk long wei wea hem deal witim parents bilong hem and olketa narawan long famili.
Hao Jesus Showimaot Wei for Stap Anda
8, 9. (a) Hao nao Jesus ting long wei wea hem stap anda long God? (b) Wanem gud samting nao man kasem from wei for stap anda?
8 Nomata hem hard for stap anda long samwan, olketa woman savve ting long diswan olsem samting wea man savve tinghae long hem, wea hem nao wei wea Jesus ting long datwan. For Jesus stap anda long God, hem mas safa and dae long wanfala post, nomata olsem, wei wea hem duim datwan mekem hem hapi. (Luke 22:41-44; Hebrews 5:7, 8; 12:3) Olketa woman savve followim example bilong Jesus, from Bible hem sei: “Man hem hed bilong woman; God hem hed bilong Christ.” (1 Corinthians 11:3) Bat important samting for tingim nao hem wei wea olketa woman stap anda long samfala man wea no hasband bilong olketa tu.
9 Bible talem olketa woman, nomata olketa marit or nomoa, hao olketa shud stap anda long olketa man wea kasem olketa spiritual mark and wea lead insaed long Christian kongregeson. (1 Timothy 2:12, 13; Hebrews 13:17) Taem olketa woman followim disfala direction from God, olketa showimaot example for olketa angel insaed arrangement wea God markem for organization bilong hem. (1 Corinthians 11:8-10) And tu, gudfala example and gudfala advaes bilong olketa mature marit woman teachim olketa young woman for “stap anda long hasband bilong olketa.”—Titus 2:3-5.
10. Wanem example nao Jesus showimaot long wei for stap anda?
10 Jesus luksavve hao wei for stap anda wea fitim hem gudfala. Wantaem, hem talem aposol Peter for peim tax for tufala long olketa man wea garem paoa, and hem nao givim selen long Peter for duim datwan. Bihaen, Peter raet olsem: “Stap anda long evri man from datwan nao samting wea Lord laekem.” (1 Peter 2:13; Matthew 17:24-27) Bible hem sei olsem abaotem nambawan example wea Jesus showimaot saed long wei for stap anda: “Hem lusim hae position and kamap olsem wanfala slave and hem kamap olsem olketa man. Winim datwan, taem hem kamap man, hem hambol and hem obey, nomata diswan lead go long wei for dae.”—Philippians 2:5-8.
11. Why nao Peter encouragem olketa waef for stap anda long olketa hasband wea no worshipim Jehovah?
11 Taem Peter encouragem olketa Christian for stap anda long olketa gavman bilong disfala world nomata olketa savve raf and no duim stret samting, hem sei olsem: “Tru nao, hem laekem iufala for duim olsem bikos Christ hem safa for iufala, and showimaot example for iufala barava followim.” (1 Peter 2:21) Bihaen Peter storyim wei wea Jesus barava safa and gohed for stap anda long God nomata datwan hem no isi, hem talem disfala encouragement for olketa waef wea hasband bilong olketa no worshipim Jehovah: “Iufala waef, stap anda long hasband bilong iufala, mekem sapos hasband no obeyim toktok bilong God, maet gogo hem laek for obey, no from samting wea iufala talem, bat bikos long fasin bilong iufala, from olketa lukim klinfala fasin bilong iufala and wei wea iufala showimaot bigfala respect.”—1 Peter 3:1, 2.
12. Olketa wanem gud samting nao kamaot from wei wea Jesus stap anda?
12 Long tingting bilong samfala pipol, wei for man stap anda long samwan wea tok spoelem hem, bae showimaot hao datfala man hem wik. Bat Jesus no garem datkaen tingting. Peter raet olsem: “Taem pipol tok spoelem hem, hem no tok spoelem olketa. Taem hem safa, hem no trae for changem bak.” (1 Peter 2:23) Gogo, samfala wea lukim Jesus safa start for biliv, wea wanfala nao hem man for steal wea hange long post saed long hem, and man long army wea lukluk taem olketa killim dae Jesus. (Matthew 27:38-44, 54; Mark 15:39; Luke 23:39-43) Long sem wei tu, Peter showimaot hao samfala hasband wea no worshipim Jehovah, nomata olketa raf tumas, olketa bae kamap olketa Christian bihaen olketa lukim gudfala wei wea waef stap anda long olketa. Datwan nao samting wea iumi lukim hem happen distaem.
Hao Olketa Waef Savve Mekem Olketa Hasband Hapi
13, 14. Wanem gud samting nao kamaot from wei wea olketa waef stap anda long olketa hasband wea no worshipim Jehovah?
13 Olketa waef wea servem Jehovah win for mekem olketa hasband interest long truth from olketa showimaot fasin olsem Christ. Long wanfala distrik convention bilong Olketa Jehovah’s Witness wea kamap no longtaem go nomoa, wanfala hasband sei olsem abaotem Christian waef bilong hem: “Mi krangge tumas long hao mi deal witim hem. Nomata olsem, hem barava respectim mi. No enitaem hem tok daonem mi. Hem no trae for forcem mi for followim wanem hem bilivim. Hem lukaftarem mi long wei wea showimaot love. Taem hem go long assembly, hem waka hard for redyim kaikai and duim olketa waka long haos firstaem bifor hem go. Fasin wea hem showimaot mekem mi start for interest long Bible. And from datwan, mi wanfala Witness nao!” So samting wea mekem hem interest nao, hem ‘fasin bilong waef’ bilong hem, no samting wea waef talem.
14 Olsem Peter talem, maet samting wea waef duim nao savve barava helpem hasband winim samting wea hem talem. Diswan hem showaot klia long example bilong wanfala waef wea lanem truth from Bible and disaed strong for attendim olketa Christian meeting. Hasband bilong hem singaot olsem: “Agnes, sapos iu go aot long datfala door, iu no kam bak moa insaed!” Hem no go aot “long datfala door,” bat hem go aot long nara door. Long next naet for meeting, hasband bilong hem sei olsem for mekem hem fraet: “Bae mi no stap taem iu kam bak.” Hem tok tru nao, hem go for thrifala day. Taem hem kam bak, long kaenfala wei waef bilong hem ask olsem: “Kaikai hem redi, iu laek kaikai distaem?” No enitaem Agnes lusim wei wea hem faithful long Jehovah. Gogo, hasband bilong hem studyim Bible, dedicate long God, and bihaen hem kamap overseer wea kasem plande responsibility.
15. Bible encouragem olketa Christian waef for “luk naes” long wanem wei?
15 Aposol Peter mekhae long samting wea olketa waef wea iumi story abaotem olketa showimaot, hem nao wei for “luk naes.” Bat diswan hem no wei for ova tumas long wei for “staelem hair” or “werem stael kaleko.” Peter hem sei: “Wei wea [iu] luk naes mas showaot long really fasin insaed heart, datfala kaleko bilong kwaet and hambol fasin wea no savve rotten wea God hem barava tinghae long hem.” Diswan showaot long toktok and fasin wea hem fitim, no long wei for raoa or tumas for askem man duim samting for iu. So long wei olsem, Christian waef showimaot bigfala respect for hasband bilong hem.—1 Peter 3:3, 4.
Olketa Example for Teachim Iumi
16. Long olketa wanem wei nao Sarah hem gudfala example for olketa Christian waef?
16 Peter raet olsem: “Olketa holy woman bifor wea hope long God, mekem olketa seleva luk naes, and stap anda long hasband bilong olketa.” (1 Peter 3:5) Olketa woman hia luksavve hao wei for mekem Jehovah hapi thru long wei for obeyim kaonsel bilong hem bae mekem famili hapi and mekem olketa kasem reward for laef olowe. Peter story abaotem Sarah, waef bilong Abraham wea barava luk naes and hem storyim wei wea hem “savve obeyim Abraham, and kolem hem ‘lord.’ ” Sarah sapotim hasband bilong hem wea fraet long God and wea Jehovah askem hem for servem hem long wanfala farawe ples. Sarah lusim gudfala living bilong hem, and tu, laef bilong hem stap long danger. (Genesis 12:1, 10-13) Peter praisem Sarah for example wea hem showimaot for no fraet, and hem sei: “Iufala kamap pikinini bilong hem sapos iufala gohed for duim gudfala samting and no fraet long eni samting.”—1 Peter 3:6.
17. Taem Peter storyim example bilong olketa Christian waef, why nao maet hem tingim Abigail?
17 Maet narawan wea Peter tingim hem Abigail, wea hem woman wea no fraet and wea hope long God. Abigail “garem gudfala tingting,” bat hasband bilong hem Nabal hem “raf and duim olketa nogud samting.” Taem Nabal no laek for givim kaikai and wata long David and olketa man bilong hem, olketa redi for killim dae Nabal and evriwan wea stap witim hem. Bat Abigail duim samting for sevem olketa. Hem tekem staka kaikai long olketa donkey and meetim David and olketa man bilong hem long road. Taem hem lukim David, hem go daon from donkey, baodaon long hem, and barava askem hem for no duim krangge samting. Diswan barava muvim heart bilong David. Hem sei long hem: “Thankiu nao long God bilong Israel, Jehovah, wea sendem iu tuday for meetim mi! And thankiu for gudfala tingting bilong iu.”—1 Samuel 25:2-33.
18. Sapos difren man trae for switim waef, hem savve ting raonem example bilong hu, and why nao olsem?
18 Nara nambawan example for olketa waef hem datfala Shulammite gele wea loyal nomoa long hambol young shepherd boy wea hem bae maritim. Hem garem strongfala love for hem nomata wanfala rich king trae for switim hem. Hem garem strong feeling for datfala young shepherd and hem sei: “Putim mi olsem saen long heart bilong iu and olsem saen long hand bilong iu, bikos love hem strong olsem dae . . . Bigfala wata and olketa river no savve aotem love.” (Song of Solomon 8:6, 7) Hem gud tu for olketa woman wea agree for marit mas disaed strong for loyal long olketa hasband and garem bigfala respect for olketa.
Nara Kaonsel Bilong God
19, 20. (a) Why nao olketa waef shud stap anda long olketa hasband? (b) Wanem gudfala example hem stap for olketa waef followim?
19 Last samting, tingim olketa nara verse wea stap raonem disfala theme scripture: ‘Iufala waef mas stap anda long hasband bilong iufala.’ (Ephesians 5:22) Why nao waef mas stap anda long hasband? Verse 23 hem sei: “Bikos hasband hem hed bilong waef bilong hem olsem Christ tu hem hed bilong kongregeson.” Dastawe, Bible encouragem olketa waef olsem: “Olsem kongregeson hem stap anda long Christ, olketa waef tu mas stap anda long olketa hasband long evri samting.”—Ephesians 5:23, 24, 33.
20 For obeyim disfala komand, olketa waef need for studyim and followim example bilong olketa long kongregeson bilong anointed follower bilong Christ. Plis readim 2 Corinthians 11:23-28 and lukim samting wea aposol Paul, wea hem wanfala long datfala kongregeson, mas feisim from wei for faithful long Hed bilong hem, Jesus Christ. Olsem Paul, olketa waef, and tu, olketa long kongregeson need for gohed loyal long Jesus. Olketa waef showimaot diswan thru long wei for stap anda long hasband bilong olketa.
21. Wanem nao olketa gudfala reason for waef stap anda long hasband?
21 Nomata plande waef distaem no laekem wei for stap anda long hasband, woman wea wise bae tingim olketa gudfala samting wea man kasem from wei for duim datwan. Olsem example, saed long hasband wea no worshipim Jehovah, maet wei for stap anda long hem long evri samting wea no againstim olketa law or principle bilong God bae mekem waef savve ‘sevem hasband bilong hem.’ (1 Corinthians 7:13, 16) And tu, hem savve hapi from hem savve Jehovah God hapi long samting hem duim and bae barava blessim hem from wei wea hem followim example bilong Son wea hem lovem.
Waswe, Iu Remember?
• Why nao maet hem no isi for waef respectim hasband bilong hem?
• Why nao gele mas barava tingting gud sapos hem bae agree for maritim samwan or nomoa?
• Long wanem wei nao Jesus kamap example for olketa waef, and olketa wanem gud samting nao savve kamaot from wei for followim example bilong hem?
[Piksa long page 9]
Why nao gele mas barava tingting gud sapos hem bae agree for maritim samwan or nomoa?
[Piksa long page 11]
Wanem nao olketa waef savve lanem from olketa example long Bible olsem Abigail?