Report Bilong Olketa wea Talemaot Kingdom
Pipol wea Honest Mekem Jehovah Kasem Praise
LONG full world, pipol savve long Olketa Jehovah’s Witness from olketa honest. Diswan nao samfala example from thrifala kantri.
Olusola wea seventin year hem stap long Nigeria. Wantaem hem faendem wanfala paos long graon taem hem go bak long haos from skul. Hem tekem go bak long principal, then principal kaontem selen hia and kasem ₦6,200 (samting olsem $45.00 U.S). Principal givim bak datfala paos long teacher wea lusim. Teacher hia givim ₦1,000 (samting olsem $7, U.S.) for Olusola for thankiu, and talem Olusola for iusim for baem skul fee bilong hem. Taem olketa nara skul pikinini herem, olketa tok spoelem Olusola. Tu-thri week bihaen, wanfala skul pikinini reportim selen bilong hem lus, so olketa teacher chekim evri skul pikinini. Teacher sei olsem long Olusola: “Iu standap long hia, mi savve iu no savve steal, bikos iu wanfala Jehovah’s Witness.” Olketa faendem datfala selen long tufala boy wea tok spoelem Olusola, and tufala kasem barava big panis. Olusola raet olsem: “Mi hapi from olketa savve mi wanfala Jehovah’s Witness wea bae no savve steal, and diswan givim glory long Jehovah.”
Wanday, Marcelo, wanfala man from Argentina, faendem wanfala basket long graon klosap long haos bilong hem. Hem tekem go insaed long haos wea hem and waef bilong hem openem. Tufala sapraes fogud from tufala lukim staka selen, samfala bank card, and tu-thri cheque wea olketa saenem finis, wea wanfala long olketa cheque hia hem for wan million peso (samting olsem $300,000 U.S.). Tufala faendem wanfala telephone namba long wanfala invoice. Tufala ringim man wea lusim basket bilong hem for kam tekem bak basket and evriting wea stap insaed, long ples wea Marcelo hem waka. Taem man hia arrive, hem luk wari tumas. Boss bilong Marcelo talem hem for no wari bikos Marcelo hem wanfala Jehovah’s Witness. Datfala man givim 20 peso (samting olsem $6, U.S.) for thankiu long Marcelo. Diswan mekem boss bilong Marcelo barava kros fogud, bikos hem tinghae tumas long honest fasin bilong Marcelo. Diswan openem wei for Marcelo explainim hao from hem wanfala Jehovah’s Witness, hem want for honest evritaem.
Disfala experience hem from Kyrgyzstan. Rinat, wanfala boy wea six year hem faendem paos bilong wanfala woman wea olketa stap long sem area. Selen wea stap insaed datfala paos hem 1,100 som (samting olsem $25, U.S.). Taem Rinat givim bak datfala paos, woman hia kaontem datfafa selen then hem talem mami bilong Rinat 200 som hem lus. Rinat sei hem no tekem datfala selen. So evriwan go for luk aotem datfala selen and olketa faendem klosap long ples wea Rinat faendem datfala paos. Woman hia hem barava sapraes fogud. Hem barava hapi tumas long Rinat and mami bilong hem, first samting, from hem kasem bak selen bilong hem, and mek-tu, for wei wea disfala mami teachim Rinat for kamap wanfala Christian.