No Givap for Duim Gud Samting
APOSOL Peter talem disfala encouragement: “Keepim fasin bilong iufala gud midolwan long olketa nation.” (1 Peter 2:12) Greek word wea olketa transleitim “gud” hem minim samting wea “luk naes, best wan, garem honor, nambawan.” Distaem maet hem luk olsem hem ova tumas for iumi expectim pipol for showimaot fasin wea gud or wea garem honor. Bat staka pipol bilong Jehovah distaem win for duim samting Peter talem. Diswan mekem pipol evriwea long world savve long olketa from olketa garem gudfala fasin.
Diswan hem spesol samting sapos iumi tingim hao iumi kasem olketa problem and wari long olketa “nogud taem wea hard for deal witim” distaem. (2 Timothy 3:1) Evriday iumi kasem olketa test, and wei for againstim olketa Christian hem happen evritaem. And tu, nomata samfala test hem for lelebet taem nomoa, olketa narawan gohed and no savve finis, and kamap barava worse. Nomata olsem, aposol Paul talem disfala advaes: “Iumi no givap for duim gud samting, bikos long barava taem iumi bae harvestim samting sapos iumi no kamap taed.” (Galatians 6:9) Bat hao nao man fit for duim gud samting and gohed for duim datwan, nomata hem kasem olketa test wea mekem hem sorre tumas, and olketa nogud samting wea no savve stop?
Help for Duim Gud Samting
For man garem fasin wea “best, garem honor, nambawan,” hem mas join witim heart. So wei for gohed showimaot gud fasin hem no samting wea seknomoa happen taem test and hard taem kamap. Bat diswan hem kamaot from wei for followim olketa Bible principle evriday long laef. Wanem nao samfala samting wea savve helpem man for duim diswan? Ting raonem olketa point hia.
Mekem grow tingting bilong Christ. Hambol fasin nomoa savve helpem man gohed for stand strong taem hem kasem samting wea no followim justice. Man wea tinghae tumas long hemseleva bae no acceptim wei wea pipol deal witim hem long nogud wei. Bat Jesus “mekem hemseleva hambol and obey go kasem taem hem dae.” (Philippians 2:5, 8) Taem iumi followim example bilong hem, bae iumi no ‘kamap taed or givap’ for duim holy waka. (Hebrews 12:2, 3) Lanem hambol wei for obey taem iu willing for waka tugeta witim olketa wea lead long kongregeson bilong iu. (Hebrews 13:17) Lane for tingim hao olketa narawan “important” winim iu, and duim samting olketa laekem fastaem long wanem iuseleva laekem.—Philippians 2:3, 4.
No forget, Jehovah lovem iu. Iumi mas trustim evribit hao Jehovah “stap and hem kamap datwan for givim reward long olketa wea barava luk aotem hem.” (Hebrews 11:6) Hem tingim iumi tumas and hem laekem iumi for kasem laef olowe. (1 Timothy 2:4; 1 Peter 5:7) For rememberim hao no eni samting savve stopem God for lovem iumi bae helpem iumi for no givap for duim gud samting taem iumi kasem test.—Romans 8:38, 39.
Barava trustim Jehovah. Hem barava important for trustim Jehovah, especially taem hem luk olsem olketa test no savve finis or maet iumi bae dae from datwan. Iumi mas trustim evribit hao Jehovah bae no letem iumi kasem eni test ‘wea iumi no fit for winim,’ bat hem bae evritaem ‘mekem wei for iumi.’ (1 Corinthians 10:13) Taem iumi trustim Jehovah, iumi bae no fraet nomata sapos bae iumi dae.—2 Corinthians 1:8, 9.
Gohed for prea. Hem barava important for prea from heart. (Romans 12:12) Diskaen prea hem wanfala wei for barava fren gud witim Jehovah. (James 4:8) Iumi lanem from olketa samting iumiseleva kasem hao “nomata wanem samting iumi askem . . . , hem herem iumi.” (1 John 5:14) Sapos Jehovah letem problem bilong iumi for gohed for testim faithful fasin bilong iumi, iumi prea long hem for helpem iumi stand strong. (Luke 22:41-43) Prea teachim iumi hao iumi no stap seleva, and iumi evritaem savve win bikos Jehovah stap witim iumi.—Romans 8:31, 37.
Gudfala Waka—‘Mekem Praise and Honor Kamap’
Samfala taem evri Christian “feel sorre from plande test” wea olketa kasem. Nomata olsem, iumi mas “no givap for duim gud samting.” Taem iu kasem hevi, strongim iuseleva long wei for tingim hao faithful fasin bilong iu bae “mekem praise and glory and honor kamap.” (1 Peter 1:6, 7) Mekius long evri spiritual samting wea Jehovah provaedem for strongim faith bilong iu. Taem iu needim help, go long olketa shepherd, olketa teacher, and olketa wea givim kaonsel insaed Christian kongregeson. (Acts 20:28) No miss for attendim evri kongregeson meeting wea savve ‘muvim iumi for showimaot love and duim gudfala waka.’ (Hebrews 10:24) For garem wanfala schedule for readim Bible evriday, duim study seleva, and for share evritaem long Christian ministry, bae helpem iu for strong and no sleep long spiritual wei.—Psalm 1:1-3; Matthew 24:14.
Sapos staka taem nao iu feelim bigfala love and wei wea Jehovah kea, diswan bae barava muvim iu for “strong for olketa gudfala waka.” (Titus 2:14) Remember, “man wea gohed strong kasem end nao bae sev.” (Matthew 24:13) So disaed strong for ‘no givap for duim gud samting’!
[Blurb long page 29]
Iumi mas trustim evribit hao Jehovah bae no letem iumi kasem eni test ‘wea iumi no fit for winim,’ bat hem bae evritaem ‘mekem wei for iumi.’
[Olketa Piksa long page 30]
Wei for busy long theocratic waka bae help for redim iumi for olketa test