Kwestin From Reader

Waswe, King Solomon bae no laef bak nao from hem no faithful long God taem hem olo?—1 Kings 11:3-9.

Nomata Bible garem nem bilong samfala faithful man and woman wea fit for laef bak moa, hem no talem sapos evriwan wea hem garem nem bilong olketa bae laef bak moa. (Hebrews 11:1-40) Bat, iumi savve garem lelebet idea abaotem judgment bilong God for Solomon taem iumi markem samting wea happen taem hem dae witim samting wea happen long samfala faithful wan taem olketa dae tu.

Bible storyim tufala samting nomoa wea savve happen long pipol wea dae—dae olowe or dae lelebet taem nomoa then laef bak moa. Pipol wea kasem judgment for dae olowe bae olketa torowem insaed “Gehenna,” or “lake bilong fire.” (Matthew 5:22; Mark 9:47, 48; Revelation 20:14) Insaed disfala sekson, hem Adam and Eve, Judas Iscariot wea givim go Jesus for dae, and evriwan wea dae taem God judgem and distroem olketa, olsem pipol long taem bilong Noah and pipol long Sodom and Gomorrah.a For pipol wea fit for laef bak moa, taem olketa dae olketa bae stap insaed grev wea Bible kolem Sheol or Hades long olketa fasfala languis wea olketa iusim for raetem Bible. Taem Bible storyim future for olketa hia, hem sei: “Sea givim kam olketa wea dae insaed long hem, dae and Hades givim kam olketa wea dae insaed long olketa, and olketa kasem judgment fitim samting wea olketa wanwan duim.”—Revelation 20:13.

Sapos olsem, olketa wea nem bilong olketa stap long Hebrews chapter 11 weit insaed grev for laef bak moa. Insaed disfala sekson bilong olketa loyal servant bilong God hem Abraham, Moses, and David. Tingim hao Bible story abaotem dae bilong olketa. Jehovah sei olsem long Abraham: “Long saed bilong iu, bae iu go long olketa laen dadi bilong iu long peace; bae olketa berem iu bihaen iu laef for staka year.” (Genesis 15:15) Jehovah sei olsem long Moses: “Iu bae leidaon witim olketa laen dadi bilong iu.” (Deuteronomy 31:16) Bible sei olsem abaotem David, dadi bilong Solomon: “David hem leidaon witim olketa laen dadi bilong hem and olketa berem hem long Taon bilong David.” (1 Kings 2:10) So, datfala toktok ‘man leidaon witim olketa laen dadi bilong hem,’ hem narafala wei for sei man stap insaed Sheol, wea minim, grev.

Wanem nao happen long Solomon taem hem dae? Bible ansa olsem: “Olketa day wea Solomon rul long Jerusalem ovarem Israel hem foti year. Then Solomon leidaon witim olketa laen dadi bilong hem, and olketa berem hem long Taon bilong David, dadi bilong hem.” (1 Kings 11:42, 43) So luk olsem iumi fit for sei Solomon hem weit insaed grev for laef bak moa.

Diswan hem showimaot hao chance hem stap for olketa wea Bible sei olketa leidaon witim olketa laen dadi bilong olketa for laef bak moa. Bible talem semkaen toktok olsem tu for staka wea kamap king bihaen Solomon, nomata olketa no faithful. Iumi savve bilivim diswan bikos “wanfala resurrection bae kamap for olketa wea raeteous and olketa wea no raeteous.” (Acts 24:15) Bat bae iumi mas weit go kasem taem ‘evriwan kamaot from grev’ for barava savve hu nao olketa wea resurrect. (John 5:28, 29) So winim wei for barava trae for talem hu nao olketa wea bae resurrect, iumi mas weit and trustim hao Jehovah bae disaed long perfect wei.

[Footnote]