Hu Nao Jesus Christ?

TINGIM hapi bilong wanfala young Jew man wea nem bilong hem Andrew, long firstaem wea hem herem toktok bilong Jesus from Nazareth! Bible sei Andrew ran go long brata bilong hem and sei: “Mifala faendem Messiah [wea minim, Christ].” (John 1:41) Long Hebrew and Greek languis, mining bilong word wea plande taem olketa transleitim olsem “Messiah” and “Christ” hem “Anointed Wan.” Jesus hem Anointed Wan, or Datwan wea God chusim—datfala Leader wea hem promis for sendem. (Isaiah 55:4) Bible storyim olketa profesi abaotem hem, and long datfala taem olketa Jew luk forward for hem kam.—Luke 3:15.

Hao nao iumi savve Jesus hem really Datwan wea God chusim? Well, tingim samting wea happen long year 29 C.E. taem Jesus hem kasem 30 year. Jesus go for John Baptaesa baptaesim hem long Jordan River. Bible sei: “Bihaen hem baptaes finis Jesus hem kamaot from wata; and semtaem nomoa, heven hem open, and hem lukim spirit bilong God kam daon long hem olsem wanfala kurukuru. And tu, wanfala voice from heven hem sei: ‘Diswan nao Son bilong mi, wea mi lovem, wea mi appruvim.’” (Matthew 3:16, 17) Bihaen John herem disfala toktok bilong God wea hem sei hem appruvim Jesus, waswe, John daotem hao Jesus hem Datwan wea God chusim? Taem Jehovah God pourimaot holy spirit bilong Hem long Jesus, Hem anointim Jesus for kamap King insaed Kingdom bilong Hem. So, Jesus kamap Jesus Christ, wea minim Jesus datfala Anointed Wan. Nomata olsem, why nao olketa kolem Jesus, Son bilong God? Hem kam from wea?

Hem “From Taem Bifor Kam”

Laef bilong Jesus hem garem thrifala part. Firstfala part hem start longtaem bifor hem born olsem wanfala man. Micah 5:2 sei hem “start from taem bifor kam, from olketa day bifor yet.” Jesus seleva sei: “Mi from olketa ples antap”—wea minim from heven. (John 8:23) Hem stap long heven bifor olsem wanfala maeti spirit.

Masbi God stap seleva firstaem, bikos evri nara samting garem start. Gogo, God hem start for creatim olketa samting. Hu nao first wan wea hem creatim? Lastfala buk bilong Bible sei Jesus nao “start bilong creation bilong God.” (Revelation 3:14) Jesus hem “firstborn long evri creation.” Iumi fit for sei olsem bikos “thru long hem evri narafala samting kamap long heven and long earth, olketa samting wea man lukim and olketa samting wea man no lukim.” (Colossians 1:15, 16) From no eniwan helpem God for creatim Jesus, Bible sei hem nao “only Son wea hemseleva nao wakem.” (John 3:16) Datfala firstborn Son garem tu disfala title “datfala Word.” (John 1:14) Why nao olsem? Bikos bifor hem born olsem man long earth, hem waka long heven olsem datwan wea toktok for God.

“Datfala Word” hem stap witim Jehovah God “long start,” taem God creatim “skae and earth.” God story long hem taem hem sei: “Iumi wakem man long image bilong iumi.” (John 1:1; Genesis 1:1, 26) Firstborn Son hia stap witim Jehovah, Dadi bilong hem, and busy for waka witim hem. Long Proverbs 8:22-31, hem sei olsem: “Mi stap witim hem [datfala Creator] olsem nambawan wakman, and mi nao kamap datwan wea hem laekem tumas evriday, and evritaem mi hapi taem mi stap witim hem.”

For sure Jehovah God and only Son wea God seleva nao wakem barava savve gud long each other taem tufala waka tugeta! Datfala wei for waka klos tugeta witim Jehovah for plande million year hem affectim Son bilong God long barava bigfala wei. Disfala Son wea obey hem kamap olsem Dadi bilong hem, Jehovah. Tru nao, Colossians 1:15 kolem Jesus “image bilong God wea iumi no savve lukim.” Dastawe, savve abaotem Jesus hem barava important for kasem wanem iumi needim long spiritual wei and for satisfaem feeling wea iumi born witim for laek for savve long God. Taem hem stap long earth, Jesus duim evri samting wea God expectim hem for duim. Dastawe, taem iumi savve long Jesus, datwan minim savve bilong iumi abaotem Jehovah hem kamap big tu. (John 8:28; 14:8-10) Bat gogo, hao nao Jesus kam long earth?

Taem Hem Stap Long Earth Olsem Man

Mek-tu part long laef bilong Jesus hem start taem God sendem Son bilong hem long earth. Jehovah duim mirakol for putim laef bilong Jesus from heven insaed long bele bilong wanfala faithful young Jew gele, wea nem bilong hem Mary. Jesus no garem sin taem hem born bikos dadi bilong hem no from earth. Holy spirit or paoa bilong Jehovah hem kam long Mary mekem hem babule long mirakol wei. (Luke 1:34, 35) So Mary hem bornem wanfala perfect pikinini. From Jesus hem son wea Joseph, datfala carpenter hem adoptim, hem growap insaed wanfala poor famili and bihaen hem born, Joseph and Mary garem samfala pikinini moa.—Isaiah 7:14; Matthew 1:22, 23; Mark 6:3.

Bible no storyim staka samting abaotem taem Jesus pikinini, bat wanfala important samting wea happen nao hem storyim. Taem Jesus 12 year, dadi and mami bilong hem tekem hem long Jerusalem for Passover, wea hem samting olketa duim evri year. Taem olketa long there, hem gogo olowe long temple and stap “midolwan long olketa teacher and hem lisin long olketa and askem olketa kwestin.” And tu, “olketa wea lisin long hem barava sapraes long savve bilong hem and olketa ansa wea hem givim.” Tru nao, Jesus wea pikinini nomoa savve askem olketa spiritual kwestin wea mekem man tingting, and tu, hem givim olketa ansa wea mekem pipol sapraes fogud. (Luke 2:41-50) Taem hem growap long taon bilong Nazareth, hem lane for kamap wanfala carpenter from dadi bilong hem Joseph, wea adoptim hem.—Matthew 13:55.

Jesus stap long Nazareth go kasem taem hem 30 year. Then hem go for John Baptaesa baptaesim hem. Bihaen hem baptaes, Jesus startim bigfala ministry bilong hem. For thri and haf year, hem gogo long evri part long homland bilong hem for talemaot gud nius abaotem Kingdom Bilong God. Hem givim pruv hao God nao sendem hem. Hao nao hem duim datwan? Taem hem duim staka mirakol wea man nating hard for duim.—Matthew 4:17; Luke 19:37, 38.

Jesus hem garem fasin for kea and hem garem barava deep feeling for pipol tu. Wei wea hem kea showaot long tingting and hao hem deal witim nara pipol. Bikos Jesus hem man wea pipol feel free for go story witim hem and hem kaen, pipol barava laekem hem. Nomata olketa pikinini tu no fraetem hem. (Mark 10:13-16) Jesus respectim olketa woman, nomata samfala pipol wea stap long datfala taem ting daonem olketa. (John 4:9, 27) Hem helpem pipol wea poor and garem hevi long wei for ‘strongim soul bilong olketa.’ (Matthew 11:28-30) Wei bilong hem for teach hem klia, simpol, and hem showim olketa wanem for duim. And samting wea hem teachim showimaot wei wea hem laekem tumas for olketa wea lisin long hem for savve long trufala God, Jehovah.—John 17:6-8.

Taem Jesus iusim holy spirit bilong God for duim olketa mirakol for healim olketa wea sik and safa, datwan showimaot hem kea. (Matthew 15:30, 31) Olsem example, wanfala man wea garem leprosy kam long hem and sei: “Sapos iu willing, iu savve mekem mi klin.” Wanem nao Jesus duim? Hem tasim datfala man and sei: “Mi willing. Kamap klin.” Then datfala sik man hem heal nao!—Matthew 8:2-4.

Tingim tu wanfala taem wea staka pipol wea kam long Jesus stap witim hem for thrifala day and no garem eni samting for kaikaim. Hem feel sorre long olketa and duim mirakol for feedim “foa thousand man, witim olketa woman and smol pikinini.” (Matthew 15:32-38) Long narataem, Jesus hem talem big wind and rain for stap kwaet wea mekem olketa fren bilong hem stap long danger. (Mark 4:37-39) Hem mekem olketa wea dae finis for laef bak moa.a (Luke 7:22; John 11:43, 44) Jesus willing tu for givim perfect laef bilong hem olsem wanfala man mekem olketa man wea no perfect savve garem hope for future. Jesus garem barava bigfala love for olketa man!

Distaem Jesus Long Wea?

Jesus dae long wanfala post taem hem 33 1/2 year.b Bat dae hem no end long laef bilong hem. Mek-thri part long laef bilong hem start thrifala day bihaen hem dae taem Jehovah God resurrectim Son bilong hem olsem wanfala spirit. Bihaen hem resurrect, Jesus showim hemseleva long staka handred pipol wea laef long datfala taem. (1 Corinthians 15:3-8) Bihaen datwan, hem “sidaon long raet saed bilong God” and weit for kasem paoa olsem king. (Hebrews 10:12, 13) Long datfala taem, Jesus start for rul olsem King. So, taem iumi tingim wea nao Jesus distaem, wanem tingting nao iumi shud garem? Waswe, iumi shud ting long hem olsem wanfala man wea safa wea pipol killim hem dae? Or waswe, iumi shud ting long hem olsem samwan wea iumi mas worshipim? Distaem Jesus hem no wanfala man and hem no Olmaeti God. Bat, hem wanfala maeti spirit, wanfala King wea rul. Klosap nao, hem bae showimaot wei wea hem rul long disfala earth wea fulap witim trabol.

Toktok long Revelation 19:11-16 storyim Jesus Christ olsem wanfala king wea sidaon antap wanfala white horse and kam for judgem and faetem war wea raeteous. Hem garem “wanfala sword wea long and sharp . . . and hem bae iusim datwan for againstim olketa nation.” Tru nao, Jesus bae iusim bigfala paoa bilong hem for distroem wicked pipol. And waswe olketa wea traem best for followim example wea hem showim taem hem stap long earth? (1 Peter 2:21) Hem and Dadi bilong hem bae keepim olketa sef long “war bilong bigfala day bilong God Olmaeti”—wea Bible kolem Armageddon—mekem olketa savve laef olowe long earth anda long Kingdom bilong God long heven.—Revelation 7:9, 14; 16:14, 16; 21:3, 4.

Long peaceful rul bilong hem, Jesus bae duim staka nambawan mirakol for evri man! (Isaiah 9:6, 7; 11:1-10) Hem bae healim olketa wea sik and bae hem finisim dae. God bae iusim Jesus for resurrectim plande billion pipol, and givim olketa chance for laef olowe long earth. (John 5:28, 29) Laef anda long datfala Kingdom rul bae gud winim eni samting iumi savve tingim. Dastawe, hem important for iumi gohed kasem savve from Bible and barava savve gud long Jesus Christ.

[Olketa Footnote]

[Box long page 7]

WASWE, JESUS NAO OLMAETI GOD?

Staka pipol wea lotu sei Jesus hem God. Samfala sei God hem wanfala Trinity. Disfala teaching sei: “Father hem God, Son hem God, and Holy Spirit hem God, nomata olsem, wanfala God nomoa stap, and no thrifala.” Olketa bilivim thrifala hia “stap olowe and olketa semsem.” (The Catholic Encyclopedia) Waswe, kaen tingting olsem hem stret?

Jehovah God hem Creator. (Revelation 4:11) Hem no garem start or finis, and hem olmaeti. (Psalm 90:2) Bat Jesus, hem garem start. (Colossians 1:15, 16) Taem Jesus story abaotem God olsem Dadi bilong hem, hem sei: “Father hem winim mi.” (John 14:28) Jesus explainim tu hao hem or olketa angel no savve long samfala samting bat Father nomoa savve.—Mark 13:32.

Nara samting moa, Jesus prea olsem long Dadi bilong hem: “No followim will bilong mi, bat followim will bilong iu.” (Luke 22:42) Sapos Jesus no prea long samwan wea moa hae, hu nao hem prea long hem? And tu, God nao resurrectim Jesus from dae, Jesus no resurrectim hemseleva. (Acts 2:32) Hem klia hao Father and Son no semsem bifor Jesus kam long earth or taem hem stap long earth. Waswe bihaen Jesus resurrect go long heven? First Corinthians 11:3 hem sei: “Hed bilong Christ hem God.” For tok stret, Son bae evritaem stap anda long God. (1 Corinthians 15:28) So Bible showimaot hao Jesus hem no Olmaeti God. Bat, hem Son bilong God.

Holy spirit, wea olketa sei hem mek-thri insaed Trinity, hem no wanfala person. Man wea raetem psalm hem sei olsem taem hem prea long God: “Sapos iu sendem go spirit bilong iu, iu creatim olketa.” (Psalm 104:30) Disfala spirit hem no God seleva; hem paoa wea hem sendem or iusim for duim eni samting wea hem laek for duim. God iusim diswan taem hem creatim skae, earth, and evri samting wea laef. (Genesis 1:2; Psalm 33:6) God iusim holy spirit bilong hem for muvim olketa man for raetem Bible. (2 Peter 1:20, 21) So, Trinity hem no wanfala teaching insaed Bible.c Bible hem sei: “God bilong iumi Jehovah, hem wanfala Jehovah.”—Deuteronomy 6:4.

[Footnote]

[Piksa long page 5]

Taem Jesus baptaes, hem kamap Anointed Wan Bilong God

[Piksa long page 7]

Jesus iusim strong bilong hem for duim waka wea God markem hem for duim

[Piksa long page 7]

Distaem, Jesus hem wanfala maeti King