Parents​—Iu Laekem Pikinini for Kasem Wanem Samting Long Future?

“Iufala young man and tu iufala young gele . . . Letem olketa praisem nem bilong Jehovah.”—PSALM 148:12, 13.

1. Wanem nao parents wari abaotem saed long olketa pikinini?

PARENTS barava tingim future bilong pikinini bilong olketa. Start kam from taem baby hem born—or maet bifor datwan—parents wari abaotem hem. Waswe, bae hem healthy? Bae hem grow long normal wei? Taem pikinini hem kamap moa big, samfala nara wari kamap. Klosap evri parents laekem best samting for pikinini bilong olketa.—1 Samuel 1:11, 27, 28; Psalm 127:3-5.

2. Why nao plande parents barava laekem pikinini bilong olketa for kasem gud laef taem olketa full-grown?

² Long world distaem, hem no isi for parents provaedem best samting for olketa pikinini. Plande parents kasem olketa hard samting long laef—olketa war, bigfala change saed long politik, hard taem saed long selen, problem saed long body or feeling, and olketa nara samting moa. Hem normal for olketa barava no laekem olketa pikinini for kasem sem samting. Long olketa rich kantri, maet parents lukim hao pikinini bilong olketa fren and relative bilong olketa kasem gud waka and garem gudfala laef. Datwan savve mekem olketa feel olsem olketa mas mek sure pikinini bilong olketa tu bae fit for kasem gud laef taem olketa full-grown.—Ecclesiastes 3:13.

Chusim Gud Laef

3. Olketa Christian chus for duim wanem?

³ From olketa Christian followim Jesus Christ, olketa chus for dedicatem laef bilong olketa long Jehovah. Olketa ting strong long toktok bilong Jesus taem hem sei: “Sapos eniwan hem want for kam bihaenem mi, hem mas lusim will bilong hemseleva and karem post for man safa long hem evriday and followim mi olowe.” (Luke 9:23; 14:27) Tru nao, insaed laef bilong wanfala Christian hem mas sakrifaesim samfala samting wea hemseleva laekem. Bat datwan no minim hem mas poor and safa. Hem kaen laef wea hapi and mekem man satisfae—wanfala gud laef—bikos insaed diswan hem fasin for give, and olsem Jesus sei: “Moa hapi kamaot from wei for givim samting winim wei for kasem samting.”—Acts 20:35.

4. Wanem nao Jesus encouragem olketa follower bilong hem for duim?

⁴ Long taem bilong Jesus pipol garem barava hard living. Witim wei for waka hard for provaed for famili bilong olketa, olketa stap anda long raf rul bilong Rome and olketa hevi wea olketa bigman bilong religion putim long olketa. (Matthew 23:2-4) Nomata olsem, plande wea lane abaotem Jesus hapi for lusim olketa samting wea olketa aftarem and waka bilong olketa, and kamap olketa follower bilong hem. (Matthew 4:18-22; 9:9; Colossians 4:14) Waswe, olketa disaepol hia duim samting wea maet isi for spoelem future bilong olketa? Tingim toktok bilong Jesus: “Evriwan wea lusim olketa haos or brata or sista or dadi or mami or pikinini or land for saed bilong nem bilong mi bae kasem plande moa samting and bae kasem laef olowe.” (Matthew 19:29) Jesus strongim long olketa follower bilong hem hao Dadi long heven savve long need bilong olketa. Dastawe hem talem olketa: “Gohed for lukaotem firstaem kingdom and raeteous fasin bilong hem, and iufala bae kasem olketa narafala samting hia.”—Matthew 6:31-33.

5. Hao nao tingting bilong samfala parents abaotem promis bilong Jesus hao God bae lukaftarem olketa servant bilong hem?

⁵ Hem semsem distaem tu. Jehovah savve long need bilong iumi, and olketa wea putim Kingdom firstaem long laef bilong olketa, especially olketa wea insaed long full-taem ministry, garem sem wei for feel sure hem bae lukaftarem olketa. (Malachi 3:6, 16; 1 Peter 5:7) Bat samfala parents no sure long diswan. Olketa laekem pikinini bilong olketa for muv ahed long service bilong Jehovah, maet long wei for join insaed long full-taem ministry. Bat, long narasaed, from hem no isi for faendem waka and saed long selen hem hard, olketa tingse hem important for olketa young wan kasem gudfala education firstaem, mekem olketa fit for kasem gudfala waka bihaen. Long tingting bilong parents olsem, plande taem, gudfala education hem minim for pikinini mas kasem hae education.

Prepare for Future

6. Insaed disfala article, wanem nao mining bilong datfala toktok “hae education”?

⁶ Education system long each kantri hem difren. Olsem example, long United States olketa pikinini savve kasem education for 12-fala year long olketa pablik skul. Bihaen datwan, olketa student savve chus for go long university or college for fofala year or winim, for kasem bachelor’s degree, or olketa savve skul go moa saed long medicine, law, engineering, and kaen waka olsem. Long disfala article, datfala toktok “hae education” hem minim kaen education olsem college or university. Long narasaed, samfala skul stap wea olketa kolem technical and vocational skul, wea student savve duim olketa shortfala course for kasem certificate or diploma for waka olsem carpenter, plumber, or for provaedem service.

7. Wanem nao olketa hevi wea olketa student kasem long hae skul?

⁷ Olketa secondary or hae skul distaem redim olketa student for kasem hae education. For kasem diswan, plande hae skul teachim olketa subject wea mekem olketa student fit for kasem hae mark long olketa entrance exam for university, winim wei for teachim olketa course wea bae helpem olketa faendem waka for selen. Olketa hae skul student distaem kasem bigfala hevi from olketa teacher, skul counselor, and olketa nara student for go long olketa best university for kasem olketa degree wea bae mekem olketa fit for kasem gudfala waka wea garem bigfala pei.

8. Christian parents mas disaedem olketa wanem samting?

⁸ So, wanem nao Christian parents shud duim? Hem tru, olketa laekem pikinini bilong olketa for kasem gud mark long skul and lanem samting wea bae mekem olketa fit for provaed for olketa seleva long future. (Proverbs 22:29) Bat waswe, olketa shud letem pikinini for followim tingting bilong disfala world wea sei man mas winim narawan, and kasem waka wea mekem hem kasem bigfala selen? Toktok and example bilong parents encouragem olketa pikinini for garem wanem kaen goal? Samfala parents barava waka hard and sevem selen mekem olketa fit for baem hae education for pikinini bilong olketa. Olketa narawan willing for garem kaon for duim diswan. Bat hem no kost saed long selen nomoa wea parents mas tingim taem olketa disaedem sapos pikinini bae kasem hae education or nomoa. Wanem nao really kost bilong hae education distaem?—Luke 14:28-33.

Kost Bilong Hae Education

9. Wanem nao kost saed long selen for hae education distaem?

⁹ Taem iumi tingim kost, plande taem iumi tingim selen nomoa. Long samfala kantri, gavman baem hae education and olketa student wea kasem mark no need for peim fee. Bat, long plande ples, hae education hem expensive and hem go ap moa distaem. Wanfala man raet go long New York Times niuspepa and sei: “Bifor, hae education hem givim chance for man duim plande samting nomata hem rich or nomoa. Bat distaem, hae education showimaot hao olketa wea rich and olketa wea poor no savve kasem sem chance.” Tru nao, moa and moa, olketa pipol wea rich and garem paoa nomoa fit for baem education olsem for pikinini bilong olketa, for mek sure olketa pikinini tu kamap rich and garem paoa long future. Waswe, Christian parents shud chusim goal olsem for pikinini bilong olketa?—Philippians 3:7, 8; James 4:4.

10. Hao nao hae education hem barava join witim wei for mekem living long kantri kamap moabeta?

¹⁰ Nomata long ples wea hae education hem free nomoa, maet olketa student garem olketa responsibility wea olketa just minim bihaen. Olsem example, The Wall Street Journal storyim hao long wanfala kantri long Southeast Asia, gavman ranem wanfala skul wea favorim olketa best student and no shame for no givim sem chance long olketa nara student. Olketa best student kasem chance for go long olketa best skul—Oxford and Cambridge University long England, olketa Ivy League skul long United States, and samfala narawan. Why nao gavman bilong datfala kantri long Asia garem program olsem? Datfala report hem sei diswan hem for “helpem economy bilong kantri.” Maet datfala education hem free, bat kost wea student hem peim nao hem wei wea hem busy for full laef bilong hem for help mekem living hem kamap moabeta long kantri bilong hem. Nomata pipol long world barava aftarem kaen laef olsem, waswe, hem fitim for Christian parents laekem sem samting for pikinini bilong olketa tu?—John 15:19; 1 John 2:15-17.

11. Wanem nao olketa report showimaot abaotem dirty fasin and wei for ova tumas long alcohol midolwan olketa university student?

¹¹ Pipol savve hao olketa nogud fasin hem big tumas long olketa university and college—fasin for iusim drug and ova tumas long alcohol, dirty fasin, raverave fasin, wei for forcem olketa niu student for duim enikaen danger samting, and plande samting moa. Tingim fasin for ova tumas long alcohol. Wanfala report long New Scientist magasin abaotem wei for drink witim goal for kamap drunk, hem sei: “Samting olsem 44 percent bilong [olketa university student long United States] drink witim goal for drunk wan taem or winim, evri tufala week.” Sem problem hem kamap midolwan olketa young pipol long Australia, Britain, Russia, and olketa nara ples. Saed long dirty fasin, olketa university student storyim wei for garem “wan-naet stand,” wea olsem wanfala report long Newsweek magasin talem “hem minim wei wea wanfala boy and gele meet for kiss or duim sex, wantaem nomoa, bat wea no interest for frenim each other or for stap tugeta moa bihaen datwan, nomata for story tugeta tu.” Research showimaot hao samting olsem 60 go kasem 80 percent bilong olketa student duim diswan. Wanfala woman wea duim research long diswan hem sei: “Sapos iu wanfala normal college student, iu duim diswan.”—1 Corinthians 5:11; 6:9, 10.

12. Wanem nao olketa hevi wea olketa college student kasem?

¹² Witim diswan, olketa kasem hevi tu saed long skul waka and olketa exam. Hem tru, olketa student mas study and duim homwak for pasim olketa exam. Samfala maet need for waka part-taem tu taem olketa go long skul. Evri samting hia needim staka taem and strong. So, haomas taem bae stap for olketa spiritual samting? Taem student feelim olketa hevi from skul waka, wanem nao first samting wea hem bae lusim? Waswe, bae Kingdom hem first samting long laef, or bae datwan lus nao? (Matthew 6:33) Bible encouragem olketa Christian olsem: “Gohed for lukluk gud mekem wei wea iufala wakabaot hem no olsem man wea no wise bat olsem man wea wise. Baem bak taem wea iu iusim for duim nara samting, bikos olketa day hem nogud tumas.” (Ephesians 5:15, 16) Hem sorre samting hao samfala lusim truth from olketa iusim full taem and strong bilong olketa for college, or from olketa join insaed samfala fasin wea againstim Bible!

13. Wanem nao olketa kwestin wea Christian parents mas ting raonem?

¹³ Hem tru, dirty fasin, nogud fasin, and olketa hevi hem no long olketa college and university nomoa. Nomata olsem, plande young wan long world ting long olketa samting hia olsem part bilong education nomoa, and normal samting. Waswe, fitim for Christian parents putim pikinini bilong olketa long danger olsem for maet fofala year or winim? (Proverbs 22:3; 2 Timothy 2:22) Waswe, hem fitim for sei big education nao important nomata maet for kasem datwan man bae stap long danger? And main important kwestin hem olsem: Wanem nao hae education teachim olketa young wan for putim olsem first samting long laef bilong olketa?a (Philippians 1:10; 1 Thessalonians 5:21) Parents mas prea abaotem and ting strong long olketa kwestin hia, and tu, danger saed long wei for sendem olketa pikinini for skul long nara ples or nara kantri.

Wanem Nara Education Nao Iu Savve Chusim?

14, 15. (a) Wanem kaonsel from Bible hem fitim distaem, nomata plande pipol garem difren tingting? (b) Wanem nao olketa kwestin wea olketa young wan savve askem olketa seleva?

¹⁴ Distaem plande pipol tingse olketa young wan mas garem university education for kasem gud laef. Bat, winim wei for followim tingting bilong world, olketa Christian followim Bible wea sei: “Finis for followim disfala world, bat kamap difren evribit from iufala changem tingting bilong iufala, mekem iufala savve pruvim long iufala seleva, gudfala and stretfala and perfect will bilong God.” (Romans 12:2) Wanem nao will bilong God for pipol bilong hem, nomata olketa young or olo, long disfala taem bilong end? Paul encouragem Timothy olsem: “Iusim gudfala tingting long evri samting, stand strong taem iu safa, duim waka for talemaot gud nius, duim evribit ministry bilong iu.” For sure, toktok bilong hem fitim iumi evriwan distaem.—2 Timothy 4:5.

¹⁵ Winim wei for letem wei bilong world for aftarem olketa material samting affectim iumi, iumi evriwan need for “iusim gudfala tingting”—wea minim, tingim olketa spiritual goal bilong iumi. Sapos iu wanfala young wan, askem iuseleva: ‘Waswe, mi duim best bilong mi for “duim evribit ministry bilong mi,” mekem mi fit olsem wanfala minister bilong Word Bilong God? Wanem nao plan bilong mi for duim ministry bilong mi “evribit”? Waswe, mi ting for mekem full-taem service olsem laef waka bilong mi?’ Olketa kwestin hia no isi, especially taem iu lukim olketa nara young wan busy long olketa selfish samting, wea minim olketa “lukaotem bigfala samting” wea olketa tingse bae mekem olketa garem gudfala future. (Jeremiah 45:5) Dastawe, Christian parents wea wise provaedem stretfala training and samting wea bae protectim spiritual saed bilong olketa pikinini start kam from taem olketa baby yet.—Proverbs 22:6; Ecclesiastes 12:1; 2 Timothy 3:14, 15.

16. Wanem wise samting nao Christian parents savve duim for provaedem gudfala spiritual living for pikinini bilong olketa?

¹⁶ Firstborn long wanfala famili wea garem thrifala boy and mami bilong olketa hem full-taem minister for plande year, hem sei: “Mami barava lukluk gud long hu nao mifala kaban witim. Mifala kaban nomoa witim olketa long kongregeson wea garem gudfala spiritual fasin, and no olketa skulfren. Mami evritaem invaetem tu, olketa wea serve full taem—olketa missionary, traveling overseer, Bethelite, and olketa pioneer—for kam long haos bilong mifala. For herem experience bilong olketa and for lukim hapi bilong olketa hem help for putim feeling for laek duim full-taem service insaed long heart bilong mifala.” Hem nambawan samting for lukim thrifala son evriwan insaed long full-taem ministry distaem—wanfala long Bethel, wanfala wea attendim Ministerial Training Skul, and wanfala wea hem pioneer!

17. Hao nao parents savve givim direction long olketa young wan saed long olketa skul subject and training wea olketa shud chusim? (Lukim box long page 29.)

¹⁷ Hem important tu, long taem wea fitim, for parents givim direction for olketa pikinini saed long olketa skul subject wea olketa chusim and training wea olketa laek kasem. Narafala young man, wea distaem serve long Bethel, hem sei: “Dadi and mami bilong mi pioneer bifor and bihaen tufala marit and tufala duim best for pasim go datfala feeling for laek pioneer long full famili. Taem mifala chusim olketa subject long skul or disaedem samting wea bae affectim future bilong mifala, tufala evritaem encouragem mifala for chusim samting wea bae givim mifala best chance for kasem part-taem waka and for pioneer.” Winim wei for chusim olketa subject wea redim student for kasem university education, parents and olketa pikinini need for ting raonem olketa course wea bae helpem olketa for servem God full taem.b

18. Hem gud for olketa young wan ting raonem wanem kaen waka?

¹⁸ Olketa research showimaot hao long plande kantri, bigfala need hem stap for pipol duim kaen waka olsem carpenter, plumber, and klining, and no eni big need for olketa wea graduate from olketa university. Datfala magasin USA Today, talem hao “70% bilong olketa wakman wea iumi bae needim long future hem no olketa wea garem degree from olketa go long college for fofala year, bat bae hem olketa wea kasem certificate in trade from olketa skul wea garem olketa course for tu-fala year.” Plande long olketa skul olsem garem olketa shortfala course saed long office waka, mechanic, computer repair, plumbing, hao for kat hair, and plande nara samting. Waswe, kaen waka olsem hem gud? Barava nao! Maet pipol no tingse waka olsem hem naes tumas, bat pei hem fitim and man savve chusim haomas day and wanem taem hem bae waka wea barava fitim olketa wea main waka bilong olketa hem for servem Jehovah.—2 Thessalonians 3:8.

19. Wanem nao best wei for kasem laef wea hapi and mekem man satisfae?

¹⁹ Bible hem sei: “Iufala young man and iufala young gele, . . . letem olketa praisem nem bilong Jehovah, from nem bilong hem barava hae tumas. Honor bilong hem hae winim earth and skae.” (Psalm 148:12, 13) Taem iumi tingim position and reward wea world savve givim, wei for servem Jehovah full taem nao best wei for kasem laef wea hapi and mekem man satisfae. Tingim evritaem disfala promis from Bible: “Blessing bilong Jehovah—hem nao mekem man rich, and hem no addim eni pain witim datwan.”—Proverbs 10:22.

[Olketa Footnote]

Waswe, Iu Savve Explainim?

• Olketa Christian trust long wanem for kasem gudfala future?

• Wanem nao olketa hard samting wea Christian parents feisim saed long future bilong pikinini bilong olketa?

• Iumi mas tingim wanem samting taem iumi lukluk long gud saed and nogud saed long wei for aftarem hae education?

• Hao nao parents savve helpem pikinini bilong olketa for servem Jehovah full taem?

[Box long page 29]

Hao Important Nao Hae Education?

Plande pipol wea go long university luk forward for kasem wanfala degree wea bae mekem olketa fit for kasem gudfala waka wea garem bigfala pei. Bat olketa gavman report showimaot hao 25% nomoa long olketa college student kasem wanfala degree insaed sixfala year. Datwan hem barava smol namba nomoa. Waswe, olketa wea kasem degree kasem gudfala waka nao? Lukluk long samting wea olketa research showimaot.

“For go long Harvard or Duke [university] no minim man bae kasem gudfala waka witim big pei. . . . Olketa bisnis no savve gud long young pipol wea lukaotem waka. Maet firstaem, pipol tinghae long wanfala university degree. Bat bihaen, samting wea boss really interest long hem nao, hem wanem man savve duim or no duim.”—Newsweek, November 1, 1999.

“Nomata man maet needim moa savve for kasem waka distaem winim bifor . . . , savve wea man needim hem olketa samting wea hem lanem long hae skul—maths, reading, and raeting wea kasem form 3 level . . . , no college level. . . . For kasem gudfala waka, olketa student no need for go long college, bat olketa mas savve gud long samting wea olketa lanem long hae skul.”—American Educator, Spring 2004.

‘Plande college barava no redim olketa student for laef bihaen olketa graduate from college. Distaem pipol interest tumas long olketa vocational skul. From 1996 go kasem 2000, namba bilong olketa student wea enroll hem go ap 48%. . . . Long semtaem, staka pipol go long college, wea minim staka moa pipol wea garem sem education lukaotem waka tu. From diswan, no inaf waka stap for evriwan and boss no mas tinghae long man wea garem degree.’—Time, January 24, 2005.

“U.S. Department of Labor talem hao maet long 2005 samting olsem wanfala long evri thrifala wea graduate from college bihaen fofala year, bae no kasem waka wea fitim degree wea olketa kasem.”—The Futurist, July/August 2000.

From diswan, staka teacher barava daotem sapos man really needim hae education olsem distaem. Datfala Futurist report hem sei: “Iumi givim education long pipol for olketa rongfala goal.” Bat Bible hem sei olsem abaotem God: “Mi, Jehovah, mi nao God bilong iufala, Datwan wea teachim iufala for kasem gud samting for iufala seleva, Datwan wea mekem iufala followim road wea iufala mas wakabaot long hem. O bae hem gud tumas sapos iufala barava obeyim olketa komandment bilong mi! Peace bilong iufala bae kamap olsem wanfala river, and raeteous fasin bilong iufala olsem olketa wave long sea.”—Isaiah 48:17, 18.

[Piksa long page 26]

Olketa lusim olketa samting wea olketa aftarem and followim Jesus

[Piksa long page 31]

Olketa Christian parents wea wise provaedem samting wea bae protectim spiritual saed bilong olketa pikinini start kam from taem olketa baby