Wanem Kaen Education Nao Savve Mekem Iu Kasem Gud Laef?

WASWE, enitaem iu garem staka problem tumas gogo iu feel olsem iu draon insaed long raf sea? Tingim bigfala wei for safa wea savve kamap sapos iu no deal witim olketa problem long gudfala wei! No eniwan hem born witim savve for stretem evri problem, or for disaedem stretfala samting evritaem. Dastawe education hem important. Wea nao iu savve kasem education wea savve mekem iu redi for deal witim olketa problem long laef long gudfala wei?

Staka pipol, nomata olketa young or olo, mekhae long wei wea hem important tumas for kasem education. Samfala savveman sei olketa “biliv strong hao iu bae no savve kasem gudfala waka sapos iu no garem wanfala college degree.” Nomata olsem, plande samting wea olketa man needim hem olketa samting wea education no savve givim. Olsem example, waswe, hae education savve helpem iu for kamap dadi or mami, marit partner, or fren wea showimaot love? Saed long datwan, staka man wea pipol tinghae long olketa from bigfala savve bilong olketa maet garem olketa fasin wea no mas gud, or marit laef bilong olketa brekdaon, or maet gogo olketa man hia suisaed tu.

Samfala pipol luk long religion for leadim olketa, olsem samting for trainim and teachim olketa, bat olketa feel nogud from olketa no kasem gudfala help for feisim hard taem long laef. Olsem example, Emiliaa from Mexico hem sei olsem: “Samting olsem 15 year go finis mi tingse mi and hasband bilong mi hard for stap tugeta nao. Mitufala raoa olowe. Mi no savve mekem hem stop for drink. Plande taem mi mas lusim olketa smol pikinini bilong mitufala for stap seleva taem mi go lukaotem hasband bilong mi. Feeling bilong mi barava nogud tumas. Tu-thri taem mi go long church for faendem eni samting wea savve helpem mi. Nomata samfala taem olketa iusim Bible, mi no herem eni kaonsel wea barava storyim samting wea mi insaed; and no eniwan kam long mi for talem mi wanem for duim tu. For sidaon long church for lelebet taem and talem olowe olketa sem prea hem no mekem mi satisfae.” Olketa nara pipol lusim trust bilong olketa long religion taem olketa lukim hao laef bilong olketa bigman bilong lotu barava olobaot. From diswan, staka pipol no ting long religion olsem ples for kasem training or education wea olketa needim for kasem gud laef.

So, maet iu askem iuseleva olsem: ‘Wanem kaen education nao mi shud kasem mekem mi garem gud laef?’ Waswe, trufala Christian Wei savve ansarem disfala important kwestin? Nextfala article bae storyim diswan.

[Footnote]