Lisin Long Wei wea Showimaot Iu Kea

“THANKIU nao for lisin long mi.” Waswe, eniwan tok olsem long iu? Taem man tok olsem really hem praisem iu! Klosap evriwan tinghae long man wea savve lisin gud. Taem iumi lisin gud long pipol wea kasem trabol or garem staka problem iumi helpem olketa for feel gud. Wei for duim olsem savve helpem iumi for lovem pipol! Long Christian kongregeson, wei for lisin long wei wea showimaot iumi kea hem main part long wei for ‘tingim and muvim each other for showimaot love and duim gudfala waka.’—Hebrews 10:24.

Nomata olsem, plande pipol no savve lisin gud. Winim wei for lisin, olketa laek for givim advaes, story abaotem samting wea kasem olketa seleva, and talem tingting bilong olketa. Wei for lisin hem samting wea man mas lanem firstaem. Hao nao iumi savve lane for lisin long wei wea showimaot iumi kea?

Important Samting Saed Long Diswan

Jehovah hem “Barava Nambawan Teacher” bilong iumi. (Isaiah 30:20) Hem savve teachim iumi staka samting abaotem wei for lisin. Tingim hao Jehovah hem helpem profet Elijah. From Elijah fraetem wei wea Queen Jezebel laek for killim hem dae, hem ranawe go long wilderness and hem laek for dae. Taem hem stap long there angel bilong God kam story long hem. Taem disfala profet storyim samting wea mekem hem fraet, Jehovah lisin and then showim hem bigfala paoa bilong Hem. Wanem nao kamaot from datwan? Elijah no fraet nao and hem go bak long assignment bilong hem. (1 Kings 19:2-15) Why nao Jehovah willing for lisin long olketa problem bilong olketa servant bilong hem? Bikos hem kea for olketa. (1 Peter 5:7) Wanfala important samting wea mekem man for lisin gud nao, hem diswan: Tingim narawan, and showimaot iu kea for olketa.

Taem wanfala man long Bolivia duim wanfala nogud samting, hem tinghae tumas long wei wea wanfala Christian brata hem showimaot kaen wei olsem for kea. Datfala man hem sei: “Long datfala taem mi barava feel sorre tumas. Sapos disfala brata no willing for lisin long mi, maet mi givap nao for servem Jehovah. Datfala brata no talem staka samting, bat taem mi savve hem kea and willing for lisin long mi, datwan barava strongim mi. Mi no needim hem for talem mi wanem for duim; mi savve finis wanem for duim. Samting wea mi needim nomoa hem for savve samwan hem kea for mi. Wei wea datfala brata lisin long mi hem stopem datfala problem for winim mi.”

Jesus Christ nao nambawan example saed long wei for lisin long wei wea showimaot kea. No longtaem bihaen Jesus hem dae, tufala disaepol bilong hem gogo for wanfala vilij wea stap samting olsem 11 kilometer from Jerusalem. For sure olketa barava feel wikdaon. So Jesus Christ wea resurrect finis start for wakabaot witim tufala. Hem chusim gud olketa kwestin wea hem askem for kasem tingting bilong tufala, and olketa disaepol hia start for story witim hem nao. Tufala storyim hope bilong tufala and wei wea olketa feel sorre and samting wea mekem tufala konfius. Jesus hem kea for olketa, and wei wea hem showimaot hem kea taem hem lisin hem lead go long wei wea tufala disaepol hia lisin long hem. Then Jesus start for “explainim long tufala olketa samting wea olketa Scripture talem abaotem hemseleva.”—Luke 24:13-27.

Wei for lisin firstaem long olketa narawan hem wanfala loving wei for mekem olketa lisin long iumi. Wanfala woman long Bolivia hem sei: “Parents bilong mi and parents bilong hasband bilong mi no laekem wei wea mi teachim olketa pikinini bilong mi. Mi no laek herem wanem olketa talem, bat miseleva no sure hao for teachim pikinini. Long datfala taem, wanfala woman wea hem Jehovah’s Witness kam visitim mi. Hem story abaotem olketa promis bilong God. Bat, wei wea hem askem tingting bilong mi hem mekem mi luksavve hao hem willing for lisin long mi. Mi askem hem for kam insaed haos, and mi talem hem olketa problem bilong mi. Hem patient for lisin. Hem askem mi wanem nao mi laekem for olketa pikinini bilong mi kasem, and hao nao tingting bilong hasband bilong mi abaotem datwan. Mi barava hapi for story witim samwan wea willing for trae for minim feeling bilong mi. Taem hem showim mi wanem Bible talem abaotem famili laef, mi savve mi story witim samwan wea kea abaotem problem bilong mi.”

Bible hem sei: “Love . . . hem no lukaotem samting for hemseleva nomoa.” (1 Corinthians 13:4, 5) For lisin long wei wea showimaot iumi kea hem minim iumi mas tingim olketa narawan firstaem. Diswan minim iumi shud offem television or radio, stop for duim wanfala waka or readim niuspepa taem narawan story long iumi abaotem wanfala serious samting. For lisin long wei wea showimaot iu kea hem minim for barava interest long samting wea narawan tingim. Hem minim iumi mas no start for story abaotem iumiseleva long wei for talem samting olsem, “Datwan mekem mi tingim samting wea happen long mi last taem.” Iumi savve tok olsem taem iumi storyim samting wea no important, bat taem samwan storyim wanfala problem wea serious iumi need for tingim hem firstaem. Disfala wei for interest long olketa narawan savve showaot long narafala wei tu.

Lisin for Minim Feeling Bilong Narawan

Olketa fren bilong Job lisin long samting olsem tenfala taem wea hem story. Nomata olsem, Job hem sei: “Mi no garem eniwan for lisin long mi!” (Job 31:35) Why nao olsem? Bikos wei wea olketa lisin nating comfortim Job. Olketa nating kea long Job and no laek for minim feeling bilong hem tu. Olketa nating garem fasin for lisin long wei wea minim feeling bilong narawan. Bat aposol Peter givim disfala kaonsel: “Iufala evriwan mas garem wankaen tingting, minim feeling bilong narawan, lovem each other olsem brata, garem fasin for kea, hambol long tingting.” (1 Peter 3:8) Hao nao iumi savve showimaot iumi minim feeling bilong narawan? Wanfala wei hem for showimaot iumi kea abaotem feeling bilong olketa and trae for minim olketa. Iumi savve showimaot iumi kea taem iumi talem olketa kaen toktok olsem, “Datwan mas mekem iu barava feel nogud,” or “Datwan mas mekem iu tingse olketa no minim iu.” Narafala wei wea showimaot iumi minim samting wea datfala man talem iumi, hem for storyim moa long hem samting wea hem talem long iumi. Wei for lisin witim fasin for kea hem minim iumi no lisin nomoa long samting wea man talem, bat hem minim tu, for luksavve long feeling bilong hem.

Roberta hem wanfala full-taem minister bilong Olketa Jehovah’s Witness for longtaem finis. Hem sei olsem: “Wantaem long laef bilong mi, mi barava wikdaon long ministry bilong mi. So mi story witim traveling overseer. Hem barava lisin and trae for minim feeling bilong mi. Luk olsem hem luksavve tu hao mi fraet nogud hem tok strong long mi bikos long samting wea mi tingim. Datfala brata talem hao hem minim feeling bilong mi, from hem garem olketa semkaen feeling olsem tu bifor. Diswan barava helpem mi for gohed.”

Waswe, iumi savve lisin nomata iumi no agree long evri samting wea man talem? Waswe, iumi savve talem samwan hao iumi hapi from olketa talem iumi feeling bilong olketa? Ia. Waswe sapos wanfala smol boy faet long skul or wanfala pikinini les for go long meeting? Hem gud tumas sapos parents lisin and trae for minim firstaem tingting bilong datfala young wan bifor olketa explainim wanem hem stret and no stret saed long samting wea happen.

Proverbs 20:5 hem sei: “Kaonsel wea stap long heart bilong man hem olsem deep wata, bat man wea garem fasin for luksavve bae pullim kamaot datwan.” Sapos samwan wea garem savve no kwiktaem givim iumi advaes, maet iumi savve askem samfala kwestin for savve long tingting bilong hem. Datwan semsem tu taem iumi lisin long wei wea showimaot iumi kea. Man wea garem fasin for luksavve nao fit for duim datwan. Wei for askem olketa kwestin savve help, bat iumi mas careful for no askem olketa samting wea maet private. Hem maet helpem hem sapos iumi talem hem for storyim samting wea hem willing for story abaotem. Olsem example, maet wanfala waef wea laek storyim problem insaed marit bilong hem feel moa isi for storyim firstaem hao hem and hasband bilong hem fren and gogo tufala marit. Man wea inactive long Christian ministry maet isi for startim story bilong hem taem hem explainim hao hem start for lanem truth.

Hem No Isi for Lisin Long Wei wea Showimaot Iu Kea

For lisin long samwan wea kros long iumi hem no isi samting, from hem wei bilong iumi for laek defendim iumiseleva. Hao nao for deal witim diswan? Proverbs 15:1 hem sei: “Kwaet ansa hem stopem kros.” Wanfala wei for givim kwaet ansa, hem for askem datfala man long kaenfala wei for hem story and then lisin long patient wei taem hem talemaot samting hem feel nogud long hem.

Plande taem, taem tufala pipol raoa tufala gohed for talem nomoa sem samting wea tufala talem finis. Each wan tingse narawan no lisin long hem. Bae hem barava gud tumas sapos wanfala really lisin long narawan! Hem important tumas for showimaot fasin for bossim seleva and story long wise and loving wei. Bible sei olsem long iumi: “Man wea kontrolem mouth bilong hem duim wisefala samting.”—Proverbs 10:19.

Disfala wei for lisin wea showimaot wei for kea hem no isi samting for duim. Bat sapos iumi waka hard and bossim iumiseleva iumi savve lane for duim diswan. Hem wanfala samting wea hem gud tumas for iumi savve duim. Really wei for lisin long narawan taem hem story hem samting wea showimaot love. Hem givim iumi hapi tu. Dastawe, hem barava wise for mekem grow wei for lisin long wei wea showimaot iumi kea!

[Footnote]

[Piksa long page 11]

Taem iumi lisin, iumi mas tingim narawan firstaem

[Piksa long page 12]

Hem no isi for lisin taem man feel nogud