“Lukluk Gud Long Hao Iu Lisin”

WEI FOR LISIN hem important part long wei for lane. Hem savve affectim chance bilong man for stap laef. Taem Jehovah hem redyim wei for sevem pipol bilong hem from wei wea olketa prisoner long Egypt, hem givim olketa instruction long Moses, for talem olketa olo man bilong Israel wanem olketa mas duim for sevem firstborn bilong olketa from datfala angel bilong dae. (Ex. 12:21-23) Then olketa olo man hia talem disfala information long each famili. From olketa talem nomoa diswan and no raetem, olketa mas lisin gud. Wanem nao olketa duim? Bible hem sei: “Olketa son bilong Israel barava duim samting wea Jehovah komandim long Moses and Aaron. Olketa barava duim olsem.” (Ex. 12:28, 50, 51) Samting wea kamaot from diswan nao, Israel sev long nambawan wei.

Distaem, Jehovah hem redyim iumi for wanfala wei for sev wea bae winim datwan. Fitim for iumi duim best bilong iumi for lisin gud long instruction wea hem provaedem. Iumi kasem disfala instruction long olketa kongregeson meeting. Waswe, iu kasem evri gud samting long olketa taem for hipap olsem? Hem barava depend long wei wea iu lisin.

Waswe, iu rememberim olketa main point bilong instruction wea kamap long meeting? Waswe, hem fasin bilong iu, evri week, for lukaotem olketa wei for iusim disfala instruction long laef bilong iu or for sharem witim nara pipol?

Redyim Heart Bilong Iu

For kasem evri gud samting from instruction long olketa Christian meeting, iumi need for redyim heart bilong iumi. Samting wea happen long taem wea King Jehoshaphat rul long Judah strongim hao wei for duim diswan hem important. Jehoshaphat hem barava strong for trufala worship. Hem “aotem olketa hae ples and olketa tambu post from Judah” and hem appointim olketa prince, Levite, and priest for teachim Law bilong Jehovah long pipol long evri taon bilong Judah. Nomata olsem, “olketa hae ples no finis.” (2 Chron. 17:6-9; 20:33) Wei for worshipim Jehovah long olketa hae ples wea hem no acceptim, and wei for worshipim olketa false god, barava stap deep long pipol dastawe olketa worship hia no finis.

Why nao disfala instruction wea Jehoshaphat arrangem no go ahed for affectim olketa? Bible sei: “Olketa pipol seleva no redyim yet heart bilong olketa for God bilong olketa laen dadi bilong olketa.” Olketa herem, bat fail for followim. Maet olketa feel hao wei for gogo long temple long Jerusalem for offerim olketa sakrifaes hem hard waka tumas. Nomata wanem, faith bilong olketa no muvim heart bilong olketa.

For stap klia long wei for isisi go bak long olketa wei bilong world bilong Satan, iumi mas redyim heart bilong iumi for kasem instruction wea Jehovah provaedem distaem. Hao nao olsem? Wanfala important wei hem thru long prea. Iumi shud prea for iumi garem feeling for thankiu for instruction bilong God wea iumi bae kasem. (Ps. 27:4; 95:2) Diswan bae helpem iumi for tinghae long hard waka bilong olketa brata wea, nomata olketa no perfect, willing for Jehovah savve iusim olketa for teachim pipol bilong hem. Diswan bae muvim iumi for sei thankiu long Jehovah, no for olketa niu samting wea iumi lanem nomoa, bat tu, for disfala chance for mekem kamap moa deep wei wea iumi minim and tinghae long olketa samting wea iumi lanem finis. From iumi want for duim evribit will bilong God, iumi prea olsem: “Teachim mi, O Jehovah, abaotem wei bilong iu. . . . Mekem heart bilong mi wan for fraet long nem bilong iu.”—Ps. 86:11.

Bossim Wei wea Iu Lisin

Planti samting stap for mekem iumi no lisin gud. Mind bilong iumi maet fulap witim olketa wari. Wei for muv raon or mek-noise from audience or from aotsaed long meeting ples savve pullim mind bilong iumi go difren. Wei for no feel gud saed long body savve mekem hem hard for iumi lisin gud. Planti taem olketa wea garem smol pikinini faendem hem hard for lisin. Wanem nao savve helpem iumi for lisin gud long olketa meeting?

Eye savve barava affectim wei wea iumi lisin gud. Iusim eye for helpem iu lisin gud long wei for lukluk long speaker nomoa. Taem hem talem wanfala scripture—nomata scripture wea iu savve gud long hem—tan go long hem, and luk followim taem hem readim. Bossim iuseleva for no lukluk long evri samting wea muv or mek-noise. Sapos eye bilong iu evritaem mekem iu for tingim difren samting, iu bae no herem planti samting wea speaker talem.

Sapos eni “tingting for wari” mekem hem hard for iu lisin gud long program, prea long Jehovah for iu garem peace long mind and heart, mekem iu savve lisin gud. (Ps. 94:19; Phil. 4:6, 7) Duim diswan tu-thri taem sapos iu needim. (Matt. 7:7, 8) Olketa kongregeson meeting hem samting wea Jehovah provaedem. Iu savve sure hao hem wantem iu for kasem gud samting from olketa.—1 John 5:14, 15.

Wei for Lisin Long Olketa Tok

Maet iu savve rememberim olketa point wea iu laekem tumas long olketa tok wea iu herem finis. Bat wei for lisin long wanfala tok hem minim moa samting winim wei for kasem olketa spesol point nomoa. Wanfala tok hem olsem wanfala gogo. Nomata maet samfala interesting samting stap for lukim insaed long datfala gogo, main samting nao hem wea nao iu go long hem, goal bilong datfala gogo. Speaker maet trae for leadim audience go long wanfala tingting or for muvim olketa for duim samting.

Tingim tok wea Joshua givim long nation bilong Israel, wea stap long Joshua 24:1-15. Goal bilong hem, hem for muvim pipol for stand strong for duim trufala worship long wei for separatem olketa seleva evribit from wei for worshipim olketa idol wea olketa nation raonem olketa duim. Why nao datwan hem barava important? Wei wea false worship hem kamap strong savve barava affectim wei wea Jehovah hem acceptim olketa. Olketa pipol showimaot wei wea olketa acceptim toktok bilong Joshua taem olketa sei: “Mifala kanduit ting for lusim Jehovah for mekem mifala servem olketa nara god. . . . Mifala bae servem Jehovah.” And hem nao olketa duim!—Josh. 24:16, 18, 31.

Taem iu lisin long wanfala tok, trae for luksavve long goal bilong hem. Tingim wei wea each point wea speaker talem hem point go long datfala goal. Askem iuseleva wanem nao datfala information encouragem iu for duim.

Lisin Long Taem Bilong Kwestin and Ansa

Wastaoa Study, Kongregeson Buk Study, and samfala part bilong Service Meeting, olketa duim olsem kwestin-and-ansa from information wea garem faondeson long Bible.

Long samfala wei, wei for lisin long wanfala kwestin-and-ansa part hem olsem iu share insaed long wanfala story. For kasem gud samting evribit, lisin long careful wei. Tingim wea nao disfala story lead go for hem. Tingim hao nao speaker hem mekhae long theme and olketa main point. Ansarem olketa kwestin bilong hem long mind bilong iu. Lisin taem olketa narawan minim and storyim hao for followim datfala information. Wei for ting long datfala information olsem hao olketa narawan ting long hem savve helpem iu for tingim difren saed bilong samting wea iu minim finis. Duim part bilong iu for helpem narawan taem iu talem toktok bilong faith bilong iuseleva.—Rom. 1:12.

Wei for studyim firstaem information wea olketa markem bae helpem iu for interest long datfala part and for minim olketa koment wea narawan talem. Sapos samting mekem hem hard for iu studyim evribit datfala information, trae for markem tu-thri minute bifor long meeting for lukim wanem nao olketa main point bilong datfala information. Wei for duim olsem bae helpem iu for kasem moa samting from datfala part.

Wei for Lisin Long Olketa Assembly and Convention

Long olketa assembly and convention, maet moa samting stap wea mekem hem hard for lisin winim taem bilong kongregeson meeting. Diswan mekem iumi need for duim moa samting for lisin. Wanem nao savve helpem iumi?

Hem important for kasem inaf sleep long naet. Each day bifor program hem start, putim and keepim theme long mind bilong iu. Lukluk long title bilong each tok, and trae for tingim wanem nao bae kamaot long datfala tok. Iusim Bible bilong iu evritaem. Planti faendem hao wei for raetem olketa smol note bilong olketa main point hem helpem mind bilong olketa for followim program. Raetem daon olketa point wea iu plan for iusim long ministry and laef bilong iuseleva. Story raonem tu-thri long olketa point hia taem iu go and kam from ples for assembly each day. Diswan bae helpem iu for rememberim datfala information.

Trainim Pikinini for Lisin

Christian parents savve helpem pikinini bilong olketa—nomata olketa baby—for kamap “wise for salvation” long wei for tekem olketa long olketa kongregeson meeting, assembly, and convention. (2 Tim. 3:15) From olketa pikinini no semsem saed long fasin and hao long olketa savve lisin, iu needim fasin for luksavve for helpem olketa lane for lisin gud. Olketa idea hia maet helpem iu.

Long haos, markem olketa taem for young pikinini sidaon kwaet and read or lukluk long olketa piksa insaed olketa Christian pablikeson bilong iumi. Long olketa meeting, stap klia long wei for iusim olketa toy for keepim pikinini kwaet. Olsem hem tru long Israel bifor, distaem tu olketa young wan kam “for olketa savve lisin and lane.” (Deut. 31:12) Long taem wea fitim, samfala mami and dadi givim, nomata long smol pikinini, pablikeson wea iumi iusim long olketa meeting for pikinini seleva. Taem pikinini kamap moa big, helpem olketa for prepare mekem olketa savve tekpart long olketa kwestin and ansa part.

Olketa scripture showimaot hao wei for lisin long Jehovah barava join witim wei for obeyim hem. Iumi savve lukim diswan long olketa word wea Moses talem long nation bilong Israel: “Mi putim laef and dae front long iufala, blessing and curse; and iufala mas chusim laef . . . long wei for lovem Jehovah, God bilong iufala, and for lisin long voice bilong hem and for stap klosap long hem.” (Deut. 30:19, 20) Distaem, wei for lisin long instruction wea Jehovah provaedem and obeyim thru long wei for followim long laef, hem important tumas sapos iumi laek for Jehovah appruvim iumi and givim iumi blessing bilong laef olowe. So hem important tumas for iumi followim encouragement wea Jesus givim for: “Lukluk gud long hao iu lisin”!—Luke 8:18.